കടുവ! കടുവ!

ഇന്ത്യയിലെ ഉണരുക! ലേഖകൻ

നേപ്പാ​ളി​ലെ റോയൽ ചിറ്റവാൻ ദേശീയ പാർക്കിൽ അനേകം വർഷങ്ങൾ കടുവ​യെ​ക്കു​റി​ച്ചു പഠനം നടത്തിയ ഡോ. ചാൾസ്‌ മക്‌ഡ്യൂ​ഗൽ അനുസ്‌മ​രി​ക്കു​ന്നു: ‘ഒരിക്കൽ ഞാൻ ഇടുങ്ങിയ ഒരു പർവത​നി​ര​യി​ലൂ​ടെ നടക്കു​ക​യാ​യി​രു​ന്നു. നടക്കു​മ്പോൾ, എതിർദി​ശ​യിൽനിന്ന്‌ ഒരു കടുവ വരുന്നു. ഏതാണ്ടു മുകളിൽവെ​ച്ചാ​യി​രു​ന്നു ഞങ്ങൾ കണ്ടുമു​ട്ടി​യത്‌. ഞങ്ങൾക്കി​ട​യിൽ അധികം അകല​മൊ​ന്നും ഉണ്ടായി​രു​ന്നില്ല—ഏതാണ്ട്‌ 15 വാര അകലം.’ ഡോ. മക്‌ഡ്യൂ​ഗൽ നിശ്ചല​നാ​യി നിന്നു. കടുവ​യു​ടെ കണ്ണി​ലേക്ക്‌ ഉറ്റു​നോ​ക്കു​ന്ന​തി​നു​പ​കരം—കടുവ ഇത്‌ ഒരു വെല്ലു​വി​ളി​യാ​യി​ട്ടാ​ണു കരുതു​ന്നത്‌—കടുവ​യു​ടെ മുതു​കി​നു മുകളി​ലൂ​ടെ അദ്ദേഹം നോട്ടം പായിച്ചു. കടുവ പതുങ്ങി​ക്കി​ടന്നു, എന്നാൽ ആക്രമി​ക്കാ​നുള്ള ഭാവ​മൊ​ന്നു​മി​ല്ലാ​യി​രു​ന്നു. ഏറെ സമയത്തി​നു​ശേഷം, ഡോ. മക്‌ഡ്യൂ​ഗൽ പിന്നി​ലേക്ക്‌ ഏതാനും ചുവടു​കൾവെച്ചു. ‘എന്നിട്ട്‌ ഞാൻ വന്നിട​ത്തേ​ക്കു​തന്നെ തിരി​ച്ചു​ന​ടന്നു,’ അദ്ദേഹം പറയുന്നു.

ഈ നൂറ്റാ​ണ്ടി​ന്റെ ആരംഭ​ത്തിൽ, ഇന്ത്യയി​ലെ ഏതാണ്ട്‌ 40,000 എണ്ണം ഉൾപ്പെടെ, സ്വദേ​ശ​മായ ഏഷ്യയിൽ 1,00,000 കടുവകൾ ഉണ്ടായി​രു​ന്നു. എന്നാൽ, 1973 ആയപ്പോ​ഴേ​ക്കും ഈ വിശിഷ്ട ജന്തുക്ക​ളു​ടെ സംഖ്യ ലോക​മൊ​ട്ടാ​കെ 4,000-ത്തിൽ താഴെ​യാ​യി കുറഞ്ഞി​രി​ക്കു​ന്നു. മുഖ്യ​മാ​യും നായാ​ട്ടി​ന്റെ ഫലമാ​യി​ട്ടാണ്‌ ഇതു സംഭവി​ച്ചി​രി​ക്കു​ന്നത്‌. ഭൂമി​യി​ലെ ഏറ്റവും വലിയ പൂച്ചയായ കടുവ, മനുഷ്യ​രാ​ലുള്ള വംശനാശ ഭീഷണി നേരി​ടാൻ ഇടയായി. എന്നാൽ, കടുവ മനുഷ്യർക്ക്‌ ഒരു ഭീഷണി​യാ​ണോ? ഈ വൻ പൂച്ച യഥാർഥ​ത്തിൽ എങ്ങനെ​യി​രി​ക്കും? അതു നാമാ​വ​ശേ​ഷ​മാ​കു​ന്നതു തടയാ​നുള്ള ശ്രമങ്ങൾ വിജയ​ക​ര​മാ​യി​രു​ന്നി​ട്ടു​ണ്ടോ?

കടുവ​യു​ടെ കുടും​ബ​ജീ​വി​തം

വർഷങ്ങ​ളാ​യുള്ള ക്ഷമാപൂർവ​മായ നിരീ​ക്ഷണം, പ്രകൃ​തി​ശാ​സ്‌ത്ര​ജ്ഞ​ന്മാർക്ക്‌ കടുവ​ക​ളെ​ക്കു​റി​ച്ചു വ്യക്തമായ അറിവു നൽകി​യി​രി​ക്കു​ന്നു. വടക്കേ ഇന്ത്യയി​ലുള്ള രന്തമ്പോ​റി​ലെ മനോ​ഹ​ര​മായ വനങ്ങളി​ലെ ഒരു സാധാരണ കടുവാ​കു​ടും​ബത്തെ നമ്മൾ നിരീ​ക്ഷി​ക്കു​ന്ന​താ​യി വിഭാവന ചെയ്യുക. മൂക്ക്‌മു​തൽ വാലറ്റം​വരെ മൂന്നു മീറ്റ​റോ​ളം നീളമുള്ള ആൺകടു​വ​യ്‌ക്ക്‌ 200 കിലോ​ഗ്രാം തൂക്കമു​ണ്ടാ​യി​രി​ക്കും. അവന്റെ ഇണയ്‌ക്ക്‌ ഏതാണ്ട്‌ 2.7 മീറ്റർ നീളവും 140 കിലോ​ഗ്രാം തൂക്കവും കാണും.a മൂന്ന്‌ കടുവാ​ക്കു​ഞ്ഞു​ങ്ങ​ളാ​ണു​ള്ളത്‌, ഒരാണും രണ്ടു പെണ്ണും.

ഈ വനങ്ങളി​ലെ താപനില 45 ഡിഗ്രി സെൽഷ്യ​സി​ലും കവി​ഞ്ഞേ​ക്കാം. എന്നാൽ കടുവാ​കു​ടും​ബം ഇലകൾ ധാരാ​ള​മുള്ള മരങ്ങൾക്ക​ടി​യിൽ തണൽ കണ്ടെത്തു​ന്നു. കൂടാതെ, അടുത്തുള്ള തടാക​ത്തി​ലെ തണുത്ത വെള്ളത്തിൽ അവയ്‌ക്ക്‌ എപ്പോ​ഴും മുങ്ങി​ര​സി​ക്കു​ക​യു​മാ​വാം. നീന്തുന്ന പൂച്ചക​ളോ? അതേ, കടുവ​കൾക്കു വെള്ളം വളരെ പ്രിയ​മാണ്‌. യഥാർഥ​ത്തിൽ, അഞ്ചു കിലോ​മീ​റ്റ​റി​ലേറെ ദൂരം അവ നിറു​ത്താ​തെ നീന്തു​ന്ന​താ​യി അറിയ​പ്പെ​ടു​ന്നു.

സൂര്യ​പ്ര​കാ​ശം വൃക്ഷങ്ങൾക്കി​ട​യി​ലൂ​ടെ അരിച്ചി​റങ്ങി കടുവ​യു​ടെ ഓറഞ്ച്‌ നിറത്തി​ലുള്ള തിളക്ക​മുള്ള പുറം​തോ​ലിൽ പതിക്കു​മ്പോൾ അതു ശോഭി​ക്കു​ന്ന​തു​പോ​ലെ കാണ​പ്പെ​ടു​ന്നു. കറുത്ത വരകൾ മിന്നി​ത്തി​ള​ങ്ങു​ന്നു. തവിട്ടു കലർന്ന മഞ്ഞ നിറത്തി​ലുള്ള കണ്ണുകൾക്കു​മീ​തെ​യുള്ള വെള്ള വരകൾ വെട്ടി​ത്തി​ള​ങ്ങു​ന്നു. ആ മൂന്നു കടുവാ​ക്കു​ഞ്ഞു​ങ്ങ​ളെ​യും അൽപ്പസ​മയം നോക്കി​നി​ന്നാൽ, വ്യത്യ​സ്‌ത​മായ അവയുടെ വരകളും മുഖത്തെ പാടു​ക​ളും നിമിത്തം അവയെ നമുക്ക്‌ എളുപ്പം തിരി​ച്ച​റി​യാൻ സാധി​ക്കും.

കടുവ​യു​ടെ വളർച്ച

പ്രസവം അടുത്ത​പ്പോൾ തള്ളക്കടുവ, നിബി​ഡ​മായ സസ്യങ്ങ​ളാൽ മറയ്‌ക്ക​പ്പെട്ട, പറ്റിയ ഒരു ഗുഹ തേടി​പ്പി​ടി​ച്ചി​രു​ന്നു. അവി​ടെ​യി​രു​ന്നാൽ ആ കുടും​ബ​ത്തിന്‌, മറ്റു മൃഗങ്ങളെ ആകർഷി​ക്കുന്ന ഒരു കുള​ത്തോ​ടു​കൂ​ടിയ സമഭൂ​മി​യി​ലേ​ക്കുള്ള വീക്ഷണം ലഭിക്കു​ന്നു. കുഞ്ഞു​ങ്ങ​ളു​ടെ അടുക്കൽനിന്ന്‌ അധികം ദൂരെ​യ​ല്ലാ​തെ ആഹാര​ത്തി​നാ​യി വേട്ടയാ​ടാം എന്നതു​കൊ​ണ്ടാണ്‌ പെൺക​ടുവ ഈ സ്ഥലം തിര​ഞ്ഞെ​ടു​ത്തത്‌.

ജനനം​മു​തൽ കടുവാ​ക്കു​ഞ്ഞു​ങ്ങൾക്കു വളരെ​യ​ധി​കം ശ്രദ്ധ ലഭിച്ചി​ട്ടുണ്ട്‌. നന്നേ കുഞ്ഞു​ങ്ങ​ളാ​യി​രി​ക്കെ, അമ്മ അവയെ തന്റെ കാലു​കൾക്കി​ട​യി​ലാ​യി അണച്ചു​പി​ടി​ക്കു​ക​യും മൂക്കു​കൊണ്ട്‌ അവയുടെ മേൽ ഉരസു​ക​യും അവയെ നക്കുക​യു​മൊ​ക്കെ ചെയ്‌തി​രു​ന്നു. അപ്പോ​ഴെ​ല്ലാം അമ്മ പതുക്കെ മുറു​മു​റു​ക്കു​ന്നു​ണ്ടാ​യി​രി​ക്കും. കുഞ്ഞുങ്ങൾ വളർന്ന​പ്പോൾ അവ ഒളിച്ചു​ക​ളി​ക്കാ​നും കളി​പ്പോ​രു നടത്താ​നും തുടങ്ങി. കടുവാ​ക്കു​ഞ്ഞു​ങ്ങൾക്കു കുറുകൽ ശബ്ദം പുറ​പ്പെ​ടു​വി​ക്കാൻ സാധി​ക്കു​ക​യി​ല്ലെ​ങ്കി​ലും ഏതാണ്ട്‌ ഒരു വയസ്സു​മു​തൽ, വളരെ​നേ​ര​ത്തി​നു​ശേഷം അമ്മ തിരി​ച്ചെ​ത്തു​മ്പോൾ അവ വളരെ വലിയ ശബ്ദത്തിൽ ഉച്ഛ്വസി​ക്കു​ന്നു.

അമ്മയോ​ടൊ​പ്പം വെള്ളത്തിൽ നീന്തി​ക്ക​ളി​ക്കാൻ കടുവാ​ക്കു​ഞ്ഞു​ങ്ങൾക്ക്‌ ഇഷ്ടമാണ്‌. വാൽ വെള്ളത്തി​ലിട്ട്‌ പെൺക​ടുവ തടാക​ക്ക​ര​യിൽ ഇരിക്കു​ന്നതു വിഭാ​വ​ന​ചെ​യ്യുക. ഉഷ്‌ണി​ക്കു​ന്ന​തി​നാൽ ഇടയ്‌ക്കി​ടെ അവൾ വാലി​ളക്കി ശരീര​ത്തി​ലേക്കു വെള്ളം തെറി​പ്പി​ക്കു​ന്നു. വാലു​ക​ളെ​പ്പറ്റി പറയു​ക​യാ​ണെ​ങ്കിൽ, അമ്മ തന്റെ വാൽ അങ്ങോ​ട്ടു​മി​ങ്ങോ​ട്ടും ആട്ടി​ക്കൊ​ണ്ടി​രി​ക്കവേ അതു പിടി​ക്കാൻ ശ്രമി​ക്കു​ന്ന​തിൽ കടുവാ​ക്കു​ഞ്ഞു​ങ്ങൾക്ക്‌ ഒരിക്ക​ലും മടുപ്പു​തോ​ന്നാ​റില്ല. ഇങ്ങനെ ചെയ്യു​ക​വഴി പെൺക​ടുവ തന്റെ കുഞ്ഞു​ങ്ങ​ളു​മാ​യി വെറുതെ കളിക്കുക മാത്രമല്ല ചെയ്യു​ന്നത്‌, പിന്നീട്‌ വേട്ടയാ​ടി​ത്തു​ട​ങ്ങു​മ്പോൾ ചാടി​വീ​ഴാ​നുള്ള വിദ്യ അവൾ അവയെ പഠിപ്പി​ക്കുക കൂടി ചെയ്യുന്നു. മരം കേറാ​നും കടുവാ​ക്കു​ഞ്ഞു​ങ്ങൾക്ക്‌ ഇഷ്ടമാണ്‌. എന്നാൽ, ഏതാണ്ട്‌ 15 മാസമാ​കു​ന്ന​തോ​ടെ മരത്തിൽ എളുപ്പം കയറാൻ സാധി​ക്കാ​ത്ത​വി​ധം അവയ്‌ക്ക്‌ അത്ര​യേറെ തടി​വെ​ക്കു​ന്നു.

പിതാ​വി​ന്റെ പങ്ക്‌

തള്ളക്കടുവ തനിച്ചാ​ണു കുഞ്ഞു​ങ്ങളെ വളർത്തി​ക്കൊ​ണ്ടു​വ​രു​ന്ന​തെ​ന്നും അവസരം ലഭിക്കു​ന്ന​പക്ഷം ആൺകടുവ കുഞ്ഞു​ങ്ങളെ കൊല്ലു​മെ​ന്നും സമീപ​കാ​ലം​വരെ പലരും വിചാ​രി​ച്ചി​രു​ന്നു. എന്നാൽ, ഒട്ടുമിക്ക കടുവ​ക​ളെ​യും സംബന്ധി​ച്ചി​ട​ത്തോ​ളം വാസ്‌തവം അതല്ല. തന്തക്കടുവ കുറേ​ക്കാ​ല​ത്തേക്കു വനത്തിൽ അപ്രത്യ​ക്ഷ​മാ​യി 50 ചതുരശ്ര കിലോ​മീ​റ്റ​റി​ലേറെ വരുന്ന തന്റെ പ്രദേ​ശത്തു വിഹരി​ക്കു​ന്നു. എന്നാൽ, അവൻ തന്റെ കുടും​ബം സന്ദർശി​ക്കു​ക​യും ചെയ്യുന്നു. സന്ദർശനം നടത്തു​മ്പോൾ, പെൺക​ടു​വ​യോ​ടും കുഞ്ഞു​ങ്ങ​ളോ​ടു​മൊ​പ്പം അവൻ വേട്ടയാ​ടാൻ കൂടി​യേ​ക്കാം. വേട്ടയാ​ടി കിട്ടിയ മൃഗത്തെ അവരു​മാ​യി പങ്കു​വെ​ക്കു​ക​പോ​ലും ചെയ്‌തേ​ക്കാം. ഏറ്റവും സാമർഥ്യ​മുള്ള കടുവാ​ക്കുഞ്ഞ്‌ ആദ്യം തീറ്റയാ​രം​ഭി​ക്കു​ന്നു. ആർത്തി കാട്ടി കുറേ നേര​ത്തേക്ക്‌ സഹോ​ദ​രി​മാർക്ക്‌ ഒന്നും കൊടു​ക്കാ​തി​രി​ക്കു​ക​യാ​ണെ​ങ്കിൽ അമ്മ അവനു പതുക്കെ ഒരു തട്ടു​കൊ​ടു​ക്കു​ക​യോ പാദം​കൊ​ണ്ടു നല്ല അടി​വെ​ച്ചു​കൊ​ടു​ക്കു​ക​പോ​ലു​മോ ചെയ്‌തേ​ക്കാം. പെൺകു​ഞ്ഞു​ങ്ങൾക്കും വിഭവ​ത്തി​ന്റെ മിതമായ പങ്കു കിട്ടാ​നാ​ണത്‌.

തങ്ങളുടെ ഭീമാ​കാ​ര​നായ പിതാ​വു​മൊത്ത്‌ കടുവാ​ക്കു​ഞ്ഞു​ങ്ങൾ കളിച്ചു​ര​സി​ക്കു​ന്നു. അടുത്തുള്ള കുളമാണ്‌ ഇതിനു പറ്റിയ സ്ഥലം. തന്തക്കടുവ പിന്നോട്ട്‌ കഴുത്തറ്റം വെള്ളത്തിൽ മുങ്ങുന്നു. (കണ്ണിൽ വെള്ളം തെറി​ക്കു​ന്നതു കടുവ​കൾക്കി​ഷ്ടമല്ല!) കടുവാ​ക്കു​ഞ്ഞു​ങ്ങൾ തന്റെ ശരീര​ത്തിൽ മൂക്കു​കൊണ്ട്‌ ഉരസാൻ അവൻ അനുവ​ദി​ക്കു​ന്നു. അപ്പോ​ഴെ​ല്ലാം അവൻ അവയുടെ മുഖങ്ങൾ നക്കി​ക്കൊ​ണ്ടി​രി​ക്കു​ന്നു. ശക്തമായ കുടും​ബ​ബ​ന്ധ​മു​ണ്ടെന്നു സ്‌പഷ്ടം.

നരഭോ​ജി​ക​ളോ?

മിക്ക​പ്പോ​ഴും, പതുങ്ങി​ച്ചെന്ന്‌ മനുഷ്യ​രെ ആക്രമി​ച്ചു കൊന്നു​തി​ന്നുന്ന, ക്രൗര്യ​മേ​റിയ ആക്രമ​ണ​കാ​രി​ക​ളായ ജന്തുക്ക​ളാ​യി​ട്ടാ​ണു പുസ്‌ത​ക​ങ്ങ​ളും സിനി​മ​ക​ളും കടുവ​കളെ ചിത്രീ​ക​രി​ക്കു​ന്നത്‌. എന്നാൽ, ഇതിൽ ഒട്ടുതന്നെ സത്യമില്ല. എല്ലാ കടുവ​ക​ളും നരഭോ​ജി​കളല്ല. വനത്തിൽ ഒരു മനുഷ്യ​നെ കണ്ടാൽ കടുവ നിശബ്ദം തെന്നി​മാ​റു​ക​യാ​ണു പതിവ്‌. രസകര​മാ​യി, മനുഷ്യ​ഗന്ധം കടുവ​ക​ളിൽ യാതൊ​രു പ്രതി​ക​ര​ണ​വും ഉളവാ​ക്കു​ന്നി​ല്ലെന്നു കാണ​പ്പെ​ടു​ന്നു.

എങ്കിലും, ചില സാഹച​ര്യ​ങ്ങ​ളിൽ വിശന്നു​വലഞ്ഞ ഒരു കടുവ തീർച്ച​യാ​യും അപകട​കാ​രി​യാ​യി​ത്തീ​രാ​വു​ന്ന​താണ്‌. വയസ്സു​ചെന്നു പല്ലു​കൊ​ഴി​ഞ്ഞ​തി​ന്റെ​യോ മനുഷ്യർ മുറി​വേൽപ്പി​ക്കു​ക​യോ ചെയ്‌ത​തി​ന്റെ ഫലമായി അതിനു സാധാ​ര​ണ​വി​ധ​ത്തിൽ വേട്ടയാ​ടാൻ കഴിയാ​തെ വന്നേക്കാം. അതു​പോ​ലെ​തന്നെ മനുഷ്യൻ കടുവ​യു​ടെ ആവാസം കൈ​യേറി താമസ​മാ​രം​ഭി​ക്കു​മ്പോൾ കടുവ​ക​ളു​ടെ സ്വഭാ​വിക ഇരകളു​ടെ എണ്ണം കുറ​ഞ്ഞേ​ക്കാം. ഇതു​പോ​ലുള്ള കാരണ​ങ്ങൾക്കൊണ്ട്‌, ഇന്ത്യയിൽ വർഷത്തിൽ 50-തോളം പേരെ കടുവകൾ കൊല്ലു​ന്നു. എങ്കിലും പാമ്പു​ക​ടി​യേറ്റു മരിക്കു​ന്ന​വ​രു​ടെ എണ്ണം ഇതിന്റെ നൂറി​ര​ട്ടി​യി​ല​ധി​ക​മാണ്‌. മുഖ്യ​മാ​യും ഗംഗയു​ടെ ചതുപ്പു​നി​റഞ്ഞ അഴി​പ്ര​ദേ​ശ​ത്താണ്‌ കടുവ​യിൽനി​ന്നുള്ള ആക്രമ​ണങ്ങൾ പ്രധാ​ന​മാ​യും സംഭവി​ക്കു​ന്നത്‌.

ഡോ. മക്‌ഡ്യൂ​ഗൽ പറയു​ന്ന​ത​നു​സ​രിച്ച്‌, കടുവകൾ മിക്കയാ​ളു​ക​ളും കരുതു​ന്നത്ര അപകട​കാ​രി​ക​ളൊ​ന്നു​മല്ല. കടുവ​യു​ടെ വളരെ​യ​ടു​ത്തു വരുന്നത്‌ ആക്രമി​ക്കാൻ തക്കവിധം അതിനെ ചൊടി​പ്പി​ക്കാ​മെ​ങ്കി​ലും “കടുവ, സംയമ​ന​മുള്ള വളരെ ശാന്തനും സമചി​ത്ത​ത​യു​മുള്ള ഒരു മൃഗമാണ്‌. സാധാ​ര​ണ​ഗ​തി​യിൽ, നിങ്ങൾ ഒരു കടുവയെ കണ്ടുമു​ട്ടു​ക​യാ​ണെ​ങ്കിൽ—വളരെ അടുത്തു​വെ​ച്ചാ​ണെ​ങ്കിൽപോ​ലും—അതു നിങ്ങളെ ആക്രമി​ക്കു​ക​യില്ല, അദ്ദേഹം പറയുന്നു.”

കടുവ​കൾക്കി​ട​യിൽ ശണ്‌ഠ അപൂർവ​മാണ്‌. ഉദാഹ​ര​ണ​ത്തിന്‌, പ്രായം​കു​റഞ്ഞ ഒരു കടുവ അലഞ്ഞു​തി​രി​ഞ്ഞു മറ്റൊരു കടുവ​യു​ടെ പ്രദേ​ശ​ത്തേക്കു കടന്ന്‌ അവിടത്തെ താമസ​ക്കാ​ര​നായ ആൺകടു​വയെ ആകസ്‌മി​ക​മാ​യി കണ്ടുമു​ട്ടി​യേ​ക്കാം. ഉച്ചത്തി​ലുള്ള മുരൾച്ച​ക​ളും പേടി​പ്പെ​ടു​ത്തുന്ന ഗർജന​ങ്ങ​ളും മുഖ​ത്തോ​ടു​മു​ഖം നോക്കി​യുള്ള മുറു​മു​റു​ക്ക​ലു​ക​ളും ഉണ്ടാകു​ന്നു. എന്നാൽ, പ്രായം​ചെന്ന ആൺകടുവ തന്റെ മേൽക്കോയ്‌മ കാണി​ക്കു​മ്പോൾ പ്രായം​കു​റഞ്ഞ കടുവ കീഴ്‌പെ​ട​ലി​ന്റെ സൂചന​യെ​ന്ന​നി​ല​യിൽ കാലുകൾ വായു​വി​ലാ​ക്കി മലർന്നു​കി​ട​ക്കു​ന്നു. അതോടെ ഏറ്റുമു​ട്ട​ലും അവസാ​നി​ച്ചു.

ഈ വൻ പൂച്ചയു​ടെ ഭാവി

കടുവ​യിൽനിന്ന്‌ അപകടം നേരി​ടു​ന്ന​തി​നു​പ​കരം കടുവ​യു​ടെ ഒരേ ഒരു യഥാർഥ ഭീഷണി മനുഷ്യ​നാ​ണെന്നു തെളി​ഞ്ഞി​രി​ക്കു​ന്നു. വംശനാ​ശം സംഭവി​ക്കു​ന്ന​തിൽനി​ന്നു കടുവയെ രക്ഷിക്കാ​നുള്ള ശ്രമങ്ങൾ ഇപ്പോൾ നടന്നു​കൊ​ണ്ടി​രി​ക്കു​ന്നു. നിരവധി ഏഷ്യൻ രാജ്യങ്ങൾ കടുവാ​സം​ര​ക്ഷ​ണ​കേ​ന്ദ്രങ്ങൾ സ്ഥാപി​ച്ചി​ട്ടുണ്ട്‌. 1973-ൽ, വടക്കേ ഇന്ത്യയി​ലെ കോർബറ്റ്‌ ദേശീയ പാർക്കിൽ പ്രൊ​ജക്ട്‌ ടൈഗർ എന്നു വിളി​ക്ക​പ്പെ​ടുന്ന ഒരു പ്രത്യേക ശ്രമം നടപ്പാ​ക്കു​ക​യു​ണ്ടാ​യി. പ്രൊ​ജക്ട്‌ ടൈഗ​റി​നു​വേണ്ടി ഫണ്ടുക​ളും സജ്ജീക​ര​ണ​ങ്ങ​ളും ലോക​മെ​മ്പാ​ടു​നി​ന്നും ഇന്ത്യയി​ലേക്ക്‌ ഒഴുകി. കാല​ക്ര​മേണ, 18 കടുവാ​സം​ര​ക്ഷ​ണ​കേ​ന്ദ്ര​ങ്ങൾക്കാ​യി മൊത്തം 28,000 ചതുരശ്ര കിലോ​മീ​റ്റ​റി​ലേറെ വരുന്ന പ്രദേശം ഇന്ത്യയിൽ മാറ്റി​വെച്ചു. 1978-ഓടെ, വംശനാ​ശം നേരി​ടുന്ന വർഗങ്ങ​ളു​ടെ പട്ടിക​യിൽ കടുവ​യെ​യും ഉൾപ്പെ​ടു​ത്തി. അത്ഭുതം ജനിപ്പി​ക്കുന്ന ഫലങ്ങളു​ണ്ടാ​യി! കടുവാ​വേട്ട നിരോ​ധി​ക്കു​ന്ന​തി​നു​മുമ്പ്‌ മനുഷ്യ​നെ പേടിച്ച്‌ കടുവ പതുങ്ങി​ന​ട​ക്കാ​നും മുഖ്യ​മാ​യും രാത്രി​കാ​ല​ങ്ങ​ളിൽമാ​ത്രം ഇറങ്ങി​ന​ട​ക്കാ​നും തുടങ്ങി​യി​രു​ന്നു. എന്നാൽ ഏതാനും വർഷക്കാ​ലത്തെ സംരക്ഷ​ണ​ത്തി​നു​ശേഷം, അവ സംരക്ഷ​ണ​കേ​ന്ദ്ര​ങ്ങ​ളിൽ വിഹരി​ക്കാ​നും നല്ല പകൽവെ​ളി​ച്ച​ത്തിൽ വേട്ടയാ​ടാ​നും തുടങ്ങി!

എന്നിട്ടും, കടുവകൾ ഇപ്പോ​ഴും നേരി​ടുന്ന ഒരു ഭീഷണി​യുണ്ട്‌: കടുവ​യു​ടെ ശരീര​ഭാ​ഗങ്ങൾ കൊണ്ടു​ണ്ടാ​ക്കുന്ന പരമ്പരാ​ഗത ഏഷ്യൻ മരുന്നു​ക​ളു​ടെ അന്താരാ​ഷ്‌ട്ര​ത​ല​ത്തി​ലുള്ള ആവശ്യ​മാ​ണത്‌. ഉദാഹ​ര​ണ​ത്തിന്‌, ഒരു സഞ്ചി കടുവ​യു​ടെ അസ്ഥികൾക്ക്‌ ഇന്ത്യയിൽ 18,000 രൂപ വിലവ​രും; അസ്ഥികൾ സംസ്‌ക​രണം ചെയ്‌ത്‌ വിദൂ​ര​പൗ​ര​സ്‌ത്യ​ദേ​ശത്തെ വിപണി​ക​ളിൽ എത്തു​മ്പോ​ഴേ​ക്കും വില 7,50,000-ത്തിലധി​കം രൂപയാ​യി കുത്തനെ ഉയർന്നി​രി​ക്കും. ഇത്ര​യേറെ പണം സമ്പാദി​ക്കാ​മെ​ന്നു​ള്ള​തു​കൊണ്ട്‌, വനപാ​ല​കരെ കബളി​പ്പി​ക്കു​ന്ന​തിൽ അനധി​കൃത കടുവാ​വേ​ട്ട​ക്കാ​രോ​ടൊ​പ്പം കൂടാ​നുള്ള പ്രലോ​ഭനം ദരി​ദ്ര​രായ ഗ്രാമീ​ണർക്കു​ണ്ടാ​കു​ന്നു. കടുവയെ സംരക്ഷി​ക്കാ​നുള്ള ശ്രമങ്ങൾ വിജയ​പ്ര​ദ​മാ​ണെന്ന്‌ ആദ്യ​മൊ​ക്കെ കരുതി​യി​രു​ന്നു. എന്നാൽ 1988 മുതൽ, സാഹച​ര്യ​ങ്ങൾ വഷളാ​യി​ത്തു​ട​ങ്ങി​യി​രി​ക്കു​ന്നു. ഇന്ന്‌ ഏതാണ്ട്‌ 27 കടുവകൾ മാത്രമേ രന്തമ്പോ​റിൽ വിഹരി​ക്കു​ന്നു​ള്ളൂ. 20 വർഷം മുമ്പ്‌ 40 എണ്ണമു​ണ്ടാ​യി​രു​ന്നു. ലോക​മൊ​ട്ടാ​കെ നോക്കു​ക​യാ​ണെ​ങ്കിൽ കടുവ​ക​ളു​ടെ സംഖ്യ 5,000-ത്തോള​മാ​യി കുറഞ്ഞി​രി​ക്കു​ന്നു!

കഴിഞ്ഞ നൂറ്റാ​ണ്ടി​ന്റെ അവസാ​നം​വരെ ഇന്ത്യയിൽ കടുവ​ക​ളും മനുഷ്യ​രും ആപേക്ഷിക ഒരുമ​യോ​ടെ സഹവർത്തി​ച്ചു​പോ​ന്നി​രു​ന്നു. അവർക്കു വീണ്ടും അങ്ങനെ ആയിരി​ക്കാൻ കഴിയു​മോ? ഇപ്പോൾ, “കടുവ! കടുവ!” എന്ന ഉത്സാഹ​പൂർവ​മായ വിളി, ലോക​ത്തി​ലെ ഏറ്റവും വലിയ പൂച്ചയെ കണ്ടതിന്റെ ഫലമാ​യി​ട്ടാ​യി​രി​ക്കാം. പരിരക്ഷണ പദ്ധതികൾ കടുവ​യ്‌ക്കു ഭാവി​യിൽ സംരക്ഷണം ഉറപ്പാ​ക്കു​മോ എന്നു കണ്ടറി​യേ​ണ്ടി​യി​രി​ക്കു​ന്നു. എന്നാൽ, മുഴു ഭൂമി​യും ഒടുവിൽ ഏദെൻതോ​ട്ടം പോലെ ഒരു പറുദീ​സ​യാ​യി​ത്തീ​രു​മെന്നു ബൈബിൾ നമുക്ക്‌ ഉറപ്പു​ത​രു​ന്നു. അപ്പോൾ, മനുഷ്യ​നും കടുവ​യെ​പ്പോ​ലെ​യുള്ള വന്യജീ​വി​ക​ളും സമാധാ​ന​ത്തിൽ ഭൂമി പങ്കു​വെ​ക്കും.—യെശയ്യാ​വു 11:6-9.

[അടിക്കു​റിപ്പ്‌]

[17-ാം പേജിലെ ചതുരം/ചിത്രം]

വെളുത്ത കടുവ

ഇന്ത്യയി​ലെ ദേശീയ നിധി​യായ, അപൂർവ​മായ വെളുത്ത കടുവ ഉത്‌പ​രി​വർത്തനം സംഭവിച്ച ഗുപ്‌ത​ഗു​ണ​മുള്ള ജീനിന്റെ ഫലമാണ്‌. 1951-ൽ വെളുത്ത ഒരു ആൺകടു​വാ​ക്കു​ഞ്ഞി​നെ ഇന്ത്യയി​ലെ റേവ വനത്തിൽവെച്ചു പിടി​കൂ​ടി. സാധാരണ നിറത്തി​ലുള്ള ഒരു പെൺക​ടു​വ​യു​മൊത്ത്‌ ഇണചേർത്ത​പ്പോൾ സാധാരണ നിറത്തി​ലുള്ള കടുവാ​ക്കു​ഞ്ഞു​ങ്ങ​ളു​ണ്ടാ​യി. എന്നാൽ, അതിൽപെട്ട ഒരു പെൺക​ടു​വയെ വെളുത്ത തന്തക്കടു​വ​യു​മാ​യി ഇണചേർത്ത​പ്പോൾ അവൾ നാലു വെളുത്ത കടുവാ​ക്കു​ഞ്ഞു​ങ്ങളെ പ്രസവി​ച്ചു. ശ്രദ്ധാ​പൂർവ​മുള്ള പ്രജന​നം​വഴി അപൂർവ​മായ ഈ മനോഹര മൃഗങ്ങളെ മൃഗശാ​ല​ക​ളിൽ കാണാൻ ആളുകൾക്കു കഴിയു​ന്നു.

[16-ാം പേജിലെ ചിത്രം]

നീന്തുന്ന പൂച്ചക​ളോ? അതേ!

[17-ാം പേജിലെ ചിത്രം]

മിക്ക ആളുക​ളും കരുതു​ന്നത്ര അപകട​കാ​രി​കളല്ല കടുവകൾ