ചില കുട്ടികൾ വലിയ കുഴപ്പ​ക്കാ​രാ​യി​രി​ക്കു​ന്ന​തി​ന്റെ കാരണം

“ജനിതക സ്വാധീ​നങ്ങൾ, മസ്‌തിഷ്‌ക രസതന്ത്രം, നാഡീ​വ​ളർച്ച ഇവയെ​ല്ലാം കുട്ടി​ക​ളെന്ന നിലയിൽ നാം ആരായി​രി​ക്കു​ന്നു​വെ​ന്ന​തി​നെ​യും മുതിർന്ന​വ​രെന്ന നിലയിൽ നാം ആരായി​ത്തീ​രു​ന്നു​വെ​ന്ന​തി​നെ​യും ശക്തമായി സ്വാധീ​നി​ക്കു​ന്നു.”—സ്‌ററാൻലി ററു​റെക്കി, എം.ഡി.

ഓരോ കുട്ടി​യും അവന്റെ അല്ലെങ്കിൽ അവളുടെ അനന്യ​വും വ്യതി​രി​ക്ത​വു​മായ രീതി​യിൽ വളരുന്നു. കുട്ടികൾ നൈസർഗി​ക​മെന്നു തോന്നുന്ന കുറേ സ്വഭാ​വ​വി​ശേ​ഷ​ങ്ങ​ളും ഭാവങ്ങ​ളും പ്രകടി​പ്പി​ക്കു​ന്നു. അവയു​ടെ​മേൽ മാതാ​പി​താ​ക്കൾക്കു കുറച്ചു​മാ​ത്രം അല്ലെങ്കിൽ ഒട്ടും​തന്നെ സ്വാധീ​ന​മില്ല. നിയ​ന്ത്രി​ക്കാൻ വിഷമ​മുള്ള, അടങ്ങി​യി​രി​ക്കാത്ത, ശിഥി​ലീ​കരണ സ്വഭാ​വ​മുള്ള കുട്ടികൾ എല്ലാക്കാ​ല​ത്തും ഉണ്ടായി​രു​ന്നി​ട്ടുണ്ട്‌. അത്യു​ത്ത​മ​രായ മാതാ​പി​താ​ക്കൾക്കു​പോ​ലും വളർത്തി​ക്കൊ​ണ്ടു​വ​രാൻ പ്രയാ​സ​മുള്ള ഒരു കുട്ടി​യു​ണ്ടാ​യി​രു​ന്നേ​ക്കാം.

എന്നാൽ ചില കുട്ടി​കളെ വളർത്തു​ന്നതു വളരെ​യ​ധി​കം പ്രയാ​സ​ക​ര​വും വെല്ലു​വി​ളി​പ​ര​വു​മാ​യി​രി​ക്കു​ന്ന​തെ​ന്തു​കൊണ്ട്‌? ഗുരു​ത​ര​മായ സ്വഭാവ പ്രശ്‌നങ്ങൾ അനുഭ​വി​ക്കുന്ന കുട്ടി​ക​ളു​ടെ എണ്ണം വർധി​ച്ചു​കൊ​ണ്ടി​രി​ക്കു​ക​യാണ്‌. മൊത്തം കുട്ടി​ക​ളു​ടെ 5 മുതൽ 10 വരെ ശതമാനം ഭയങ്കര​മായ അസ്വസ്ഥത പ്രകടി​പ്പി​ക്കു​ന്നു​വെ​ന്നും ശ്രദ്ധിച്ചു കേൾക്കു​ന്ന​തി​നും ശ്രദ്ധ​കേ​ന്ദ്രീ​ക​രി​ക്കു​ന്ന​തി​നും നിയമങ്ങൾ അനുസ​രി​ക്കു​ന്ന​തി​നും വികാ​ര​ങ്ങളെ നിയ​ന്ത്രി​ക്കു​ന്ന​തി​നു​മുള്ള ഈ കുട്ടി​ക​ളു​ടെ അപ്രാ​പ്‌തി അവർക്കും കുടും​ബ​ത്തി​നും അധ്യാ​പ​കർക്കും കൂട്ടു​കാർക്കും അസംഖ്യം ബുദ്ധി​മു​ട്ടു​കൾ സൃഷ്ടി​ക്കു​ന്നു​വെ​ന്നും ഡോക്ടർമാ​രും ഗവേഷ​ക​രും പൊതു​വേ സമ്മതി​ക്കു​ന്നു.

മസ്‌തി​ഷ്‌ക​കോശ പ്രവർത്ത​നത്തെ നിയ​ന്ത്രി​ക്കു​ക​യും മസ്‌തി​ഷ്‌ക​ത്തി​ന്റെ സ്വഭാവ നിയന്ത്രണ രീതിയെ സുഗമ​മാ​ക്കു​ക​യും ചെയ്യുന്ന “മസ്‌തി​ഷ്‌ക​ത്തി​ന്റെ നാഡീ​യാ​വേഗ വ്യവസ്ഥ​ക​ളി​ലെ ചില രാസവ​സ്‌തു​ക്ക​ളിൽ സ്വതഃ​സി​ദ്ധ​മാ​യുള്ള തകരാ​റാണ്‌” കാരണം എന്നു പറഞ്ഞു​കൊണ്ട്‌ യേൽ യൂണി​വേ​ഴ്‌സി​ററി മെഡിക്കൽ സ്‌കൂ​ളി​ലെ ശിശു​ശാ​സ്‌ത്ര​ത്തി​ന്റെ​യും നാഡീ​ശാ​സ്‌ത്ര​ത്തി​ന്റെ​യും പ്രൊ​ഫ​സ്സ​റായ ഡോ. ബെനററ്‌ ഷേവി​റ​റ്‌സ്‌ കാതലായ ഒരു പ്രശ്‌ന​ത്തിൽ ശ്രദ്ധ കേന്ദ്രീ​ക​രി​ക്കു​ന്നു. കുട്ടിയെ വളർത്താ​നുള്ള ബുദ്ധി​മുട്ട്‌ എന്തുത​ന്നെ​യാ​യി​രു​ന്നാ​ലും, വിമർശ​ന​ത്തി​നും വെറു​പ്പി​നും പകരം പ്രോ​ത്സാ​ഹ​ന​വും പിന്തു​ണ​യും പ്രദാനം ചെയ്‌തു​കൊണ്ട്‌ തങ്ങളുടെ കുട്ടി​യു​ടെ സ്വഭാ​വത്തെ ഫലപ്ര​ദ​മാ​യി കൈകാ​ര്യം ചെയ്യു​ന്ന​തിൽ വൈദ​ഗ്‌ധ്യം സിദ്ധി​ക്കു​ന്ന​തി​ലാ​യി​രി​ക്കണം മാതാ​പി​താ​ക്ക​ളു​ടെ മുഖ്യ​ശ്രദ്ധ.

ബൈബിൾ കാലങ്ങ​ളിൽ കുട്ടി​ക​ളു​ടെ വിദ്യാ​ഭ്യാ​സ​ത്തി​നും പരിശീ​ല​ന​ത്തി​നും ഉത്തരവാ​ദി​കൾ മാതാ​പി​താ​ക്ക​ളാ​യി​രു​ന്നു. ദൈവ​നി​യ​മങ്ങൾ സംബന്ധി​ച്ചു ശിക്ഷണ​വും പ്രബോ​ധ​ന​വും കൊടു​ക്കു​ന്നത്‌ തങ്ങളുടെ കുട്ടിയെ ജ്ഞാനി​യാ​ക്കി​ത്തീർക്കു​മെന്ന്‌ അവർക്ക​റി​യാ​മാ​യി​രു​ന്നു. (ആവർത്ത​ന​പു​സ്‌തകം 6:6, 7; 2 തിമൊ​ഥെ​യൊസ്‌ 3:15) അതു​കൊണ്ട്‌, തിര​ക്കേ​റിയ പട്ടിക ഗണ്യമാ​ക്കാ​തെ മാതാ​പി​താ​ക്കൾ ഒരു കുട്ടി​യു​ടെ ആവശ്യങ്ങൾ നിറ​വേ​റ​റു​ന്ന​തി​നു​വേണ്ടി പ്രത്യേ​കിച്ച്‌ കുട്ടി​യു​ടെ നിഷേ​ധാ​ത്മ​ക​മായ സ്വഭാ​വ​ത്തോ​ടു ക്രിയാ​ത്മ​ക​മായ രീതി​യിൽ പ്രതി​ക​രി​ക്കാൻ ശ്രദ്ധി​ച്ചു​കൊണ്ട്‌ തങ്ങളാ​ലാ​വോ​ളം പ്രയത്‌നി​ക്ക​ണ​മെ​ന്നു​ള്ളതു ദൈവദത്ത ഉത്തരവാ​ദി​ത്വ​മാണ്‌. ഇന്ന്‌ ശിശു​രോഗ ചികി​ത്സ​യിൽ കണ്ടുവ​രുന്ന അനവധി സ്വഭാവ പ്രശ്‌ന​ങ്ങ​ളിൽ അമിത ചുറു​ചു​റു​ക്കു​ള്ള​വ​രും വികാ​ര​ങ്ങൾക്ക്‌ അടി​പെ​ടു​ന്ന​വ​രും അശ്രദ്ധാ​ലു​ക്ക​ളു​മായ കുട്ടികൾ ഉൾപ്പെ​ടു​ന്നു. അതു​കൊണ്ട്‌, വളർത്തി​ക്കൊ​ണ്ടു​വ​രാൻ പ്രയാ​സ​മുള്ള കുട്ടി​ക​ളി​ലെ ഘടകങ്ങ​ളെന്ന നിലയിൽ എഡിഡി​യും എഡിഎ​ച്ച്‌ഡി​യും ചർച്ച​ചെ​യ്യു​ന്നതു സഹായ​ക​ര​മാ​യി​രി​ക്കും.a

ഈ ക്രമ​ക്കേ​ടു​കൾ 1950-കളിൽ “നേരിയ തോതി​ലുള്ള മസ്‌തിഷ്‌ക തകരാറ്‌” എന്നാണ്‌ അറിയ​പ്പെ​ട്ടി​രു​ന്നത്‌. “എഡിഡി തലച്ചോ​റി​നു​ണ്ടാ​കുന്ന ക്ഷതമേ അല്ലെ”ന്ന്‌ കണ്ടുപി​ടി​ത്തങ്ങൾ പ്രകട​മാ​ക്കി​യ​തോ​ടെ ഈ സാങ്കേ​തിക സംജ്ഞ ഉപയോ​ഗി​ക്കാ​താ​യി എന്ന്‌ ശിശു-നാഡീ ശാസ്‌ത്ര​ജ്ഞ​നായ ഡോ. ജാൻ മതിസെൻ പറയുന്നു. ഡോ. മതിസെൻ ഇപ്രകാ​രം പറയുന്നു: “എഡിഡി തലച്ചോ​റി​ന്റെ ചില ഭാഗങ്ങ​ളി​ലു​ണ്ടാ​കുന്ന ന്യൂന​ത​യാ​ണെന്നു തോന്നു​ന്നു. ഇതിൽ ഉൾപ്പെ​ട്ടി​രി​ക്കുന്ന കൃത്യ​മായ നാഡീ​രാസ പ്രശ്‌ന​ങ്ങ​ളെ​ക്കു​റിച്ച്‌ ഞങ്ങൾക്ക്‌ ഇപ്പോ​ഴും നിശ്ചയ​മില്ല. എന്നാൽ തലച്ചോ​റി​ലുള്ള ഡോപ്പ​മിൻ എന്നറി​യ​പ്പെ​ടുന്ന ഒരു രാസവ​സ്‌തു ഇതിൽ ഉൾപ്പെ​ട്ടി​ട്ടു​ണ്ടെന്നു തോന്നു​ന്നു.” ഈ പ്രശ്‌ന​ത്തിൽ ഡോപ്പ​മിൻ നിയ​ന്ത്രണം ഉൾപ്പെ​ടു​ന്നു​വെന്ന്‌ അദ്ദേഹം വിശ്വ​സി​ക്കു​ന്നു. “ഒരൊററ രാസവ​സ്‌തു​വല്ല പ്രശ്‌നം സൃഷ്ടി​ക്കു​ന്നത്‌, പിന്നെ​യോ അനേകം രാസവ​സ്‌തു​ക്കൾ തമ്മിലുള്ള ബന്ധമാണ്‌,” അദ്ദേഹം കൂട്ടി​ച്ചേർത്തു.

എഡിഡി​യു​ടെ കാരണം സംബന്ധിച്ച്‌ ഉത്തരം കിട്ടാതെ അനേകം ചോദ്യ​ങ്ങൾ ഇനിയും അവശേ​ഷി​ക്കു​ന്നു​ണ്ടെ​ങ്കി​ലും ശ്രദ്ധാ​കേ​ന്ദ്രീ​ക​രണം, വികാ​രങ്ങൾ, പേശീ​പ്ര​വർത്തനം എന്നിവയെ നിയ​ന്ത്രി​ക്കു​ന്ന​തി​ലെ സ്ഥിരമായ പരാജയം നാഡീ​സം​ബ​ന്ധ​മാ​ണെന്ന്‌ ഡോ. മതിസെൻ പറയു​ന്ന​തി​നോട്‌ ഗവേഷകർ പൊതു​വേ യോജി​ക്കു​ന്നു. “കൂടുതൽ കൃത്യ​മായ ഉത്തരങ്ങൾക്കു​വേണ്ടി വളരെ​യ​ധി​കം ഗവേഷണം നടത്തേ​ണ്ടി​യി​രി​ക്കു​ന്നു” എന്ന്‌ സമ്മതി​ച്ചെ​ങ്കി​ലും എഡിഡി തലച്ചോ​റി​ലെ ഒരു പ്രത്യേക പോഷ​ണ​പ​രി​ണാ​മ​സം​ബ​ന്ധ​മായ ക്രമ​ക്കേ​ടു​കൊണ്ട്‌ ഉണ്ടാകു​ന്ന​താ​ണെന്ന്‌ ഐക്യ​നാ​ടു​ക​ളി​ലെ നാഷണൽ ഇൻസ്‌റ​റി​റ​റ്യൂട്ട്‌ ഓഫ്‌ മെൻറൽ ഹെൽത്തി​ലെ ഡോ. അലൻ സമെറ​റ്‌കി​നും ഗവേഷ​ക​രും അടുത്ത​കാ​ലത്തു നടത്തിയ ഒരു പഠനം ആദ്യമാ​യി അഭി​പ്രാ​യ​പ്പെട്ടു.

സ്‌കൂൾ ഒരു യഥാർഥ വെല്ലു​വി​ളി അവതരി​പ്പി​ക്കു​ന്നു

സ്‌കൂൾമു​റി​യിൽ, ശ്രദ്ധ​കേ​ന്ദ്രീ​ക​രി​ക്കു​ന്ന​തി​നും അടങ്ങി​യി​രി​ക്കു​ന്ന​തി​നു​മുള്ള വലിയ ആവശ്യം ഉള്ളതു​കൊണ്ട്‌ സ്ഥിരമാ​യി അശ്രദ്ധ​രും ശ്രദ്ധാ​ശൈ​ഥി​ല്യം അനുഭ​വി​ക്കു​ന്ന​വ​രും വികാ​ര​ങ്ങൾക്ക്‌ അടി​പ്പെ​ടു​ന്ന​വ​രും അല്ലെങ്കിൽ അമിത​മാ​യി ചുറു​ചു​റു​ക്കു​ള്ള​വ​രു​മായ കുട്ടി​കൾക്ക്‌ സ്‌കൂൾ സാധാ​ര​ണ​മാ​യി വലിയ ബുദ്ധി​മു​ട്ടാണ്‌. ഏതു കാര്യ​ത്തി​ലും ദീർഘ​നേരം ശ്രദ്ധ​കേ​ന്ദ്രീ​ക​രി​ക്കാൻ ഈ കുട്ടി​കൾക്കു ബുദ്ധി​മു​ട്ടാ​യ​തു​കൊണ്ട്‌ അത്യധി​ക​മാ​യി ചുറു​ചു​റു​ക്കു കാണി​ക്കു​ക​യ​ല്ലാ​തെ അവർ എന്തു ചെയ്യാൻ? ചില കുട്ടി​കൾക്കു ഭവനത്തി​ലാ​യാ​ലും ശരി സ്‌കൂ​ളി​ലാ​യാ​ലും ശരി സാധാരണ പഠന നിലവാ​ര​ങ്ങൾക്കൊ​ത്തു പോകാൻ കഴിയാത്ത അത്ര ശ്രദ്ധക്കു​റ​വാണ്‌. തങ്ങളുടെ സ്വഭാവം നിയ​ന്ത്രി​ക്കാ​നും പ്രവൃ​ത്തി​ക​ളു​ടെ പരിണ​ത​ഫ​ലങ്ങൾ വിലയി​രു​ത്താ​നും ഇക്കൂട്ടർക്കു പ്രയാ​സ​മാ​യ​തു​കൊണ്ട്‌ ക്ലാസ്സ്‌ ചട്ടമ്പി അല്ലെങ്കിൽ ക്ലാസ്സ്‌ കോമാ​ളി ആയിരി​ക്കു​ന്ന​തിന്‌ അവർക്കു ശിക്ഷണം ലഭിക്കു​ന്നത്‌ അസാധാ​രണ സംഗതി​യല്ല.

ആത്യന്തി​ക​മാ​യി, അവർ ഒരുപക്ഷേ “മോശ”മെന്നും “വിഡ്‌ഢി”യെന്നും തങ്ങളെ​ത്തന്നെ മുദ്ര​കു​ത്തി​ക്കൊ​ണ്ടും അതു​പോ​ലെ പ്രവർത്തി​ച്ചു​കൊ​ണ്ടും അപകർഷ​താ​ബോ​ധം സ്വയം വികസി​പ്പി​ച്ചെ​ടു​ക്കു​ന്നു. എത്ര കഠിന ശ്രമം ചെയ്‌തി​ട്ടും പരീക്ഷ​യിൽ തോറ​റു​പോ​കുന്ന ഈ കുട്ടികൾ സ്ഥിരമായ തോൽവി​ക്കു സ്വയം വിധേ​യ​രാണ്‌.

പരി​ഭ്രാ​ന്ത​രാ​യ മാതാ​പി​താ​ക്കൾ കുട്ടി​യു​ടെ ശിഥി​ലീ​കരണ സ്വഭാവം നിമിത്തം വളരെ ഉത്‌ക​ണ്‌ഠാ​കു​ല​രും കുഴഞ്ഞ​വ​രും ആയിത്തീ​രു​ന്നു. ഈ സാഹച​ര്യം നിമിത്തം മാതാ​പി​താ​ക്കൾ പരസ്‌പരം കുററ​പ്പെ​ടു​ത്തു​മ്പോൾ ഇടയ്‌ക്കി​ട​യ്‌ക്ക്‌ വിവാ​ഹ​ത്തിൽ സ്വര​ച്ചേർച്ച​യി​ല്ലാ​യ്‌മ​യും ഉണ്ടാകു​ന്നു. നല്ല കാര്യങ്ങൾ മറന്ന്‌ ദേഷ്യ​ത്തോ​ടെ തന്നെയും പിന്നെ​യും ചീത്തക്കാ​ര്യ​ങ്ങൾ പറഞ്ഞു​കൊ​ണ്ടാ​ണു പല മാതാ​പി​താ​ക്ക​ളും സമയത്തി​ന്റെ സിംഹ​ഭാ​ഗ​വും ചെലവ​ഴി​ക്കു​ന്നത്‌. അതു​കൊണ്ട്‌ നിഷേ​ധാ​ത്മക രീതി​യി​ലുള്ള സ്വഭാ​വ​ക്കാ​രോട്‌ അവർ കൂടു​ത​ലാ​യി പ്രതി​ക​രി​ച്ചാൽ സംഗതി ഏറെ വഷളാ​കും. അങ്ങനെ കുടും​ബ​വും ഒരു പരിധി​വരെ, കുട്ടി​യോട്‌ ഇടപെ​ടുന്ന മററു​ള്ള​വ​രും നിയ​ന്ത്ര​ണ​മേ​റെ​റ​ടു​ക്കാൻ വേണ്ടി​യുള്ള ഒരു നിരന്തര പോരാ​ട്ട​ത്തിൽ അകപ്പെ​ടു​ന്നു. ഇത്‌ ശ്രദ്ധക്കു​റവ്‌ ക്രമ​ക്കേട്‌ ഉള്ളതോ ഇല്ലാത്ത​തോ ആയി​ക്കൊ​ള്ളട്ടെ, കുഴപ്പ​ക്കാ​ര​നായ ഒരു കുട്ടി​യു​ടെ സ്വഭാവം മനസ്സി​ലാ​ക്കാ​ത്ത​തി​ന്റെ​യും കൈകാ​ര്യം ചെയ്യാ​ത്ത​തി​ന്റെ​യും ഫലമാണ്‌.

റോണി​യെ​ക്കൊണ്ട്‌ അമ്മയ്‌ക്കുള്ള ബുദ്ധി​മുട്ട്‌

“റോണി ഭൂജാ​ത​നായ നിമിഷം മുതൽ ഒരിക്ക​ലും സന്തോ​ഷ​വാ​നാ​യി​രു​ന്നി​ട്ടില്ല. അവൻ എല്ലായ്‌പോ​ഴും അസ്വസ്ഥ​നും കരച്ചി​ലു​കാ​ര​നു​മാ​യി​രു​ന്നു. അലെർജി കാരണം അവന്റെ ത്വക്ക്‌ ചൊറി​ഞ്ഞു​പൊ​ട്ടു​ക​യും ചെവി പഴുക്കു​ക​യും എപ്പോ​ഴും വയറി​ള​ക്ക​മു​ണ്ടാ​കു​ക​യും ചെയ്‌തി​രു​ന്നു.

“ചെറു​പ്പ​ത്തിൽത്തന്നെ റോണി​യു​ടെ ചലന പ്രാപ്‌തി​കൾ നന്നായി വികാസം പ്രാപി​ച്ചു. ഇരിക്കാ​നും എഴു​ന്നേൽക്കാ​നും നിൽക്കാ​നും പിന്നെ നടക്കാ​നും—അതോ ഓടാ​നും എന്നു ഞാൻ പറയണോ?—ഒക്കെ അവന്‌ വളരെ വേഗത​യാ​യി​രു​ന്നു. അവന്റെ മയക്കത്തി​ന്റെ സമയങ്ങ​ളിൽ ഞാൻ വീട്ടു​ജോ​ലി​ക​ളെ​ല്ലാം വേഗം ചെയ്‌തു​തീർത്തു. കാരണം എന്റെ കൊച്ചു “ചുഴലി​ക്കാ​ററ്‌” എഴു​ന്നേ​ററു കഴിഞ്ഞാൽപ്പി​ന്നെ ഓടി​ന​ടന്ന്‌ കണ്ണിന്‌ ആകർഷ​ക​മാ​യ​തൊ​ക്കെ എടുത്തു കൈകാ​ര്യം ചെയ്യും. അങ്ങനെ അവനും വീടി​നും കുഴപ്പ​മൊ​ന്നും വരുത്തി​വ​യ്‌ക്കാ​തെ അവനെ സംരക്ഷി​ക്കു​ന്ന​തി​നുള്ള തിരക്കി​ലാ​യി​രി​ക്കും ഞാൻ. മിക്കതും തന്നെ അവന്റെ കണ്ണിന്‌ ആകർഷ​ക​മാ​യി​രു​ന്നു താനും!

“അവന്റെ ശ്രദ്ധാ​പ​രി​ധി വളരെ ഹ്രസ്വ​മാ​യി​രു​ന്നു. ഒന്നിലും അവൻ ദീർഘ​നേരം ഏർപ്പെ​ടി​ല്ലാ​യി​രു​ന്നു. അടങ്ങി​യി​രി​ക്കു​ന്നത്‌ അവന്‌ വെറു​പ്പാ​യി​രു​ന്നു. അനങ്ങാ​തെ​യി​രി​ക്കേണ്ട ഏതെങ്കി​ലും സ്ഥലത്ത്‌, പ്രത്യേ​കി​ച്ചു സഭാമീ​റ​റിം​ഗു​കൾക്ക്‌, ഞങ്ങൾ അവനെ​യും കൊണ്ടു​പോ​കു​മ്പോൾ ഇതൊരു പ്രശ്‌ന​മാ​യി​രു​ന്നു. അടങ്ങി​യി​രി​ക്കാ​ത്ത​തിന്‌ അടി​കൊ​ടു​ക്കു​ന്നതു വെറു​തെ​യാ​യി​രു​ന്നു. അവന്‌ അതിനു കഴിയില്ല. ശുഭകാം​ക്ഷി​ക​ളായ പലരും പരാതി​പ്പെട്ടു, ഉപദേശം തന്നു. പക്ഷേ ഒരു പ്രയോ​ജ​ന​വും ഉണ്ടായില്ല.

“റോണി ബുദ്ധി​മാ​നാ​യി​രു​ന്നു. അതു​കൊണ്ട്‌ അവന്‌ ഏതാണ്ട്‌ മൂന്നു വയസ്സാ​യ​പ്പോൾ ദിവസ​വും അല്‌പ​സ​മയം അവനോ​ടൊ​ത്തു വായി​ക്കാ​നുള്ള ഒരു പദ്ധതി ഞങ്ങൾ ആരംഭി​ച്ചു. അഞ്ചു വയസ്സാ​യ​പ്പോ​ഴേ​ക്കും അവന്‌ നന്നായി വായി​ക്കാൻ കഴിയു​മാ​യി​രു​ന്നു. പിന്നെ അവൻ സ്‌കൂ​ളിൽ പോയി​ത്തു​ടങ്ങി. ഒരു മാസം കഴിഞ്ഞ​പ്പോൾ അധ്യാ​പി​കയെ ചെന്നു​കണ്ട്‌ സംസാ​രി​ക്കാൻ എന്നോട്‌ ആവശ്യ​പ്പെട്ടു. റോണി​യെ ആദ്യം കണ്ടപ്പോൾ അവനൊ​രു മാലാ​ഖാ​യെ​പ്പോ​ലെ​യാ​ണെന്നു തനിക്കു തോന്നി​യെ​ന്നും എന്നാൽ അവൻ ഒരു മാസം ക്ലാസ്സിൽ ഇരുന്നു​ക​ഴി​ഞ്ഞ​പ്പോൾ, അവൻ മറേറ സ്ഥലത്തു​നി​ന്നു​ള്ള​വ​നാ​യാണ്‌ തനിക്കു തോന്നി​യ​തെ​ന്നും അവർ എന്നോടു പറഞ്ഞു! അവൻ എപ്പോ​ഴും ചാടു​ക​യും മററു കുട്ടി​കളെ തള്ളുക​യും ഉന്തിയി​ടു​ക​യും ഒക്കെയാ​യി​രു​ന്നു പണി​യെന്ന്‌ അവർ എന്നെ അറിയി​ച്ചു. അവൻ ശാന്തനാ​യോ അടങ്ങി​യോ ഇരിക്കു​മാ​യി​രു​ന്നില്ല. അവൻ മുഴു ക്ലാസ്സി​നെ​യും ശല്യം ചെയ്‌തു. അവന്‌ ആത്മനി​യ​ന്ത്ര​ണ​മി​ല്ലാ​യി​രു​ന്നു. ഒരു മത്സര മനോ​ഭാ​വം വളർന്നു വരുന്ന​താ​യും അവർ ശ്രദ്ധിച്ചു. അവനെ ഒരു പ്രത്യേക പഠന ക്ലാസ്സിൽ ആക്കാനും ഒരു ഡോക്ടറെ കണ്ട്‌ അവനെ ശാന്തനാ​ക്കാ​നുള്ള മരുന്നു​വാ​ങ്ങാ​നും ശുപാർശ​ചെ​യ്‌തു. ഞങ്ങൾ ആകെ തകർന്നു​പോ​യി!

“റോണിക്ക്‌ വേണ്ടത്‌ മരുന്നാ​യി​രു​ന്നില്ല. എന്നാൽ ശിശു​രോ​ഗ​വി​ദ​ഗ്‌ധൻ ഞങ്ങൾക്കു ചില പ്രാ​യോ​ഗിക നിർദേ​ശങ്ങൾ നൽകി. ബുദ്ധി​മാ​നായ റോണിക്ക്‌ വിരസത അനുഭ​വ​പ്പെ​ടു​ന്നു​ണ്ടെ​ന്നാ​യി​രു​ന്നു അദ്ദേഹ​ത്തി​ന്റെ അഭി​പ്രാ​യം. അതു​കൊണ്ട്‌ റോണി​യെ എപ്പോ​ഴും തിരക്കു​ള്ള​വ​നാ​യി നിർത്താ​നും അവനെ വളരെ സ്‌നേ​ഹി​ക്കാ​നും അതു​പോ​ലെ ഞങ്ങൾ ക്ഷമയും ക്രിയാ​ത്മ​ക​ത​യും ഉള്ളവരാ​യി​രി​ക്കാ​നും അദ്ദേഹം ഞങ്ങളോ​ടു നിർദേ​ശി​ച്ചു. പ്രായ​മാ​കു​ക​യും ആഹാര​ക്രമം മാററു​ക​യും ചെയ്യു​ന്ന​ത​നു​സ​രിച്ച്‌ റോണി​യെ​ക്കൊ​ണ്ടുള്ള പ്രശ്‌നം കുറഞ്ഞു​വ​രു​മെന്ന്‌ അദ്ദേഹം വിചാ​രി​ച്ചു.

“ഞങ്ങളുടെ മകനോട്‌ ശ്രദ്ധ​യോ​ടെ ഇടപെ​ടേ​ണ്ട​താ​ണെന്ന്‌, ഊർജത്തെ ക്രിയാ​ത്മ​ക​മായ ഒരു രീതി​യിൽ തിരി​ച്ചു​വി​ടാൻ പഠിക്കാൻ അവനെ സഹായി​ക്കേ​ണ്ട​താ​ണെന്നു ഞങ്ങൾ മനസ്സി​ലാ​ക്കി. ഇതിന്‌ വളരെ​യ​ധി​കം സമയം ആവശ്യ​മാ​യി​രു​ന്നു; അതു​കൊണ്ട്‌, സ്‌കൂൾ ജോലി​യിൽ അവനോ​ടൊ​പ്പം അനേകം മണിക്കൂർ ചെലവ​ഴി​ക്കാ​നും ക്ഷമാപൂർവം പഠിപ്പി​ക്കാ​നും അവനു കാര്യങ്ങൾ വിശദീ​ക​രി​ച്ചു​കൊ​ടു​ക്കാ​നും തക്കവണ്ണം ഞങ്ങൾ ദിനപ്പ​ട്ടി​ക​യിൽ മാററം​വ​രു​ത്തി. നിഷേ​ധാ​ത്മ​ക​മായ വാക്കുകൾ ഉപയോ​ഗി​ക്കു​ന്ന​തും ചിന്തയി​ല്ലാ​യ്‌മ​യും കുസൃ​തി​യും കാട്ടു​മ്പോൾ അവനെ കുററ​പ്പെ​ടു​ത്തു​ന്ന​തും ഞങ്ങൾ നിർത്തി. അവന്റെ കുറഞ്ഞു​പോയ ആത്മാഭി​മാ​നത്തെ ഉയർത്തുക എന്നതാ​യി​രു​ന്നു ഞങ്ങളുടെ ലക്ഷ്യം. കൽപ്പി​ക്കു​ന്ന​തി​നോ ആവശ്യ​പ്പെ​ടു​ന്ന​തി​നോ പകരം ഞങ്ങൾ കാര്യങ്ങൾ ചർച്ച ചെയ്യു​മാ​യി​രു​ന്നു. അവനുൾപ്പെട്ട എന്തെങ്കി​ലും തീരു​മാ​നങ്ങൾ ഉണ്ടെങ്കിൽ ഞങ്ങൾ അവന്റെ അഭി​പ്രാ​യം ആരായു​മാ​യി​രു​ന്നു.

“മററു കുട്ടി​കൾക്കു സ്വാഭാ​വി​ക​മാ​യി ഉണ്ടാകുന്ന ചില കാര്യങ്ങൾ റോണിക്ക്‌ അത്ര എളുപ്പം ഉണ്ടായില്ല. ഉദാഹ​ര​ണ​ത്തിന്‌, ക്ഷമയും ശാന്തത​യും ഉള്ളവനാ​യി​രി​ക്കാ​നും അനങ്ങാ​തെ​യി​രി​ക്കാ​നും തന്റെ വിപു​ല​മായ ശാരീ​രിക പ്രവർത്ത​നത്തെ നിയ​ന്ത്രി​ക്കാ​നും ഒക്കെ അവൻ പഠിച്ചു​വ​ര​ണ​മാ​യി​രു​ന്നു. പക്ഷേ അത്‌ നിയ​ന്ത്രി​ക്കാ​വു​ന്നതേ ഉണ്ടായി​രു​ന്നു​ള്ളൂ. താൻ ചെയ്‌തു​കൊ​ണ്ടി​രു​ന്ന​തോ ചെയ്യാൻ പോകു​ന്ന​തോ ആയ കാര്യങ്ങൾ സാവധാ​നം ആലോ​ചി​ച്ചു ചെയ്യാൻ ബോധ​പൂർവ​ക​മായ ശ്രമം നടത്തേ​ണ്ട​താ​ണെന്നു മനസ്സി​ലാ​യ​പ്പോൾ അവൻ അതു ചെയ്‌തു​തു​ടങ്ങി. 13 വയസ്സാ​യ​പ്പോൾ അവന്റെ സ്വഭാവം സാധാ​ര​ണ​മാ​യി​ത്തീർന്നു. സന്തോ​ഷ​ക​ര​മെന്നു പറയട്ടെ, കാര്യ​ങ്ങ​ളെ​ല്ലാം അന്നു മുതൽ തടസ്സം​കൂ​ടാ​തെ നീങ്ങു​ന്നുണ്ട്‌, സാധാ​ര​ണ​മാ​യി മത്സരമ​നോ​ഭാ​വ​മു​ണ്ടാ​യി​രി​ക്കുന്ന കൗമാര വർഷങ്ങ​ളിൽ പോലും.

“റോണിക്ക്‌ വളരെ​യ​ധി​കം സ്‌നേ​ഹ​വും അതേ അളവിൽത്തന്നെ സമയവും ക്ഷമയും ഒക്കെ കൊടു​ത്ത​തി​നുള്ള പ്രതി​ഫ​ലങ്ങൾ സമൃദ്ധ​മാ​യി ലഭിച്ചി​ട്ടുണ്ട്‌!”

[അടിക്കു​റി​പ്പു​കൾ]