Ibbenefika Mill-​Iskola Tal-​Ministeru Teokratiku Għall-​1996​—It-​3 Parti

¹ L-​appostlu Pawlu ried lil ħutu jitolbu għalih sabiex ikun jistaʼ jakkwista l-​abbiltà li jgħid l-​aħbar tajba bil-​qlubija. (Ef. 6:​18-20) Aħna nixtiequ nikkultivaw dik l-​istess abbiltà. Għal dak l-​għan, napprezzaw l-​għajnuna mogħtija permezz taʼ l-​Iskola tal-​Ministeru Teokratiku, fejn dawk li jattendu l-​laqgħat u li jikkwalifikaw huma inkuraġġiti jinkitbu fiha.

² Bħala studenti, aħna nirċievu pariri individwali biex jgħinuna ntejbu l-​abbiltajiet tagħna fil-​kliem u fit-​taħriġ. (Prov. 9:9) Nistgħu nibbenefikaw ukoll billi nagħtu widen għall-​parir li jirċievu studenti oħrajn, u napplikaw għalina dak li nitgħallmu. Meta nkunu se nippreparaw inkarigu, għandna nistudjaw bil-​għaqal is-​sors minn fejn hu meħud il-​materjal biex inkunu ċerti li l-​ispjegazzjoni tagħna tkun bla żball. Il-​punti prinċipali u l-​iskritturi li nużaw għandhom jaqblu maʼ l-​iżvilupp tat-​tema ġenerali. Jekk it-​taħdita tinvolvi persuna oħra, għandha ssir prova minn qabel ma tiġi mogħtija fl-​iskola. Hekk kif nagħmlu progress, għandu jsir sforz biex nitkellmu spirtu pront, billi nużaw in-​noti minflok karta miktuba bil-​kliem kollu.

³ Dawk kollha li jkollhom inkarigi fl-​iskola għandhom jaslu kmieni, jagħtu l-​karta taʼ l-​iSpeech Counsel lill-​indokratur taʼ l-​iskola, u jpoġġu bil-​qiegħda fuq quddiem fis-​sala. L-​aħwa nisa għandhom javżaw minn qabel lill-​indokratur taʼ l-​iskola x’inhu s-​setting tagħhom u jekk humiex se jpoġġu bil-​qiegħda jew jibqgħu bil-​wieqfa għat-​taħdita tagħhom. Billi nikkoperaw b’dawn il-​modi nikkontribwixxu lejn programm bla xkiel u dan jgħin lil dawk li jieħdu ħsieb il-​pletform biex ikollhom kollox lest minn qabel.

⁴ Preparazzjoni Taʼ L-​Inkarigu Nru. 2: Skop wieħed tal-​qari mill-​Bibbja hu li jgħin lill-​istudent itejjeb l-​abbiltà tiegħu fil-​qari. Dan kif jistaʼ jinkiseb bl-​aħjar mod? L-​aqwa mod biex wieħed isir tajjeb fil-​qari hu billi jaqra l-​materjal darba wara l-​oħra. Biex jitgħallem it-​tifsir u l-​pronunzja eżatta taʼ kliem mhux daqstant familjari, l-​istudent għandu jfittixhom f’dizzjunarju. Forsi dan jeħtieġ ukoll li wieħed isir familjari maʼ xi jfissru s-​simboli tal-​pronunzja wżati fid-​dizzjunarju.

⁵ In-​New World Translation tipprovdi għajnuna f’li wieħed jippronunzja sewwa l-​ismijiet u kliem mhux komuni li jinstabu fil-​Bibbja. Tagħmel dan billi taqsamhom f’sillabi u tipprovdi sinjali taʼ l-​aċċent. (Ara “All Scripture Is In­spired of God and Beneficial,” paġni 325-6, paragrafi 27-8.) Bħala regola, is-​sillaba li tiġi qabel il-​marka taʼ l-​aċċent tinstemaʼ l-​iktar. Jekk is-​sillaba li għandha l-​aċċent tispiċċa b’vokali, il-​vokali tinħass itwal meta tgħidha. Jekk sillaba tispiċċa b’konsonanti, il-​vokali f’dik is-​sillaba hija qasira. (Qabbel Saʹlu maʼ Salʹlu.) Biex jgħinhom jippreparaw għall-​inkarigi tagħhom tal-​qari mill-​Bibbja, xi aħwa rġiel jisimgħu l-​audiocassettes tas-​Soċjetà.

⁶ Il-​ġenituri jistgħu jgħinu lil uliedhom żgħar jippreparaw l-​inkarigu tal-​qari. Dan jistaʼ jinkludi li joqogħdu jisimgħu lit-​tifel waqt li jkun qiegħed jagħmel il-​provi u mbagħad jagħtuh suġġerimenti t’għajnuna biex imur aħjar. Il-​ħin assenjat jinkludi introduzzjoni qasira u konklużjoni xierqa li jkun fiha l-​applikar tal-​punti prinċipali. B’hekk l-​istudent jiżviluppa l-​abbiltà tiegħu li jitkellem spirtu pront.

⁷ Is-​salmista xtaq permezz tat-​talb: “O Jehovah, jalla tiftaħ dawn ix-​xofftejn minn tiegħi, biex fommi stess ikun jistaʼ jiddikjara t-​tifħir tiegħek.” (Salm 51:15) Jalla l-​parteċipazzjoni tagħna fl-​Iskola tal-​Ministeru Teokratiku tgħinna nissodisfaw din l-​istess xewqa.