Noffru Lilna Nfusna Minn Jeddna
1 Is-salmista David ipprofetizza li n-nies taʼ Jehovah “se joffru lilhom infushom għax iridu”; jiġifieri, bħala “volontieri fil-pront.” (Salm 110:3, nota taʼ taħt) Dan ċertament li qiegħed jitwettaq fost is-sħubija tagħna t’aħwa madwar id-dinja. Matul kull waħda mill-aħħar erbaʼ snin taʼ servizz li għaddew, in-nies taʼ Jehovah iddedikaw iktar minn biljun siegħa f’li jxerrdu l-aħbar tajba tas-Saltna. U hemm ħafna modi, flimkien max-xogħol taʼ l-ippridkar u taʼ li nagħmlu dixxipli, fejn nistgħu noffru lilna nfusna minn jeddna biex ngħinu lil oħrajn.
2 Modi Kif Nistgħu Nuru L-Volontà Tagħna: Xi wħud fil-kongregazzjoni jistaʼ jkollhom bżonn t’għajnuna biex imorru għal-laqgħat. Għala ma toffrix li teħodhom miegħek? Oħrajn jistgħu jkunu morda, ma jifilħux, jew fl-isptar. Tistaʼ int tieħu l-inizjattiva biex iżżurhom jew tkun t’għajnuna b’xi mod? Jistaʼ jkun hemm individwu jew xi familja li għandhom bżonn taʼ l-inkuraġġiment. Ħsibt dwar li tistieden lil uħud bħal dawn biex kultant joqogħdu miegħek għall-istudju tiegħek tal-familja? Xi pijunier jew pubblikatur jistaʼ jkollu bżonn taʼ sieħeb fil-ministeru. Għala ma toffrix biex taħdmu flimkien fis-servizz? Dawn huma ftit mill-modi fejn nistgħu b’mod volontarju nagħmlu t-tajjeb maʼ dawk imseħbin magħna fil-fidi.—Gal. 6:10.
3 L-aħwa rġiel jistgħu juru l-volontà tagħhom li jiġu wżati fl-organizzazzjoni taʼ Jehovah billi jistinkaw ħalli jilħqu l-kwalifiki għal anzjani u qaddejja ministerjali. (1 Tim. 3:2-10, 12, 13; Tit. 1:5-9) Hekk kif inkomplu niżdiedu fin-numru, hemm il-bżonn t’aħwa rġiel ikkwalifikati li huma lesti li jkunu minn taʼ quddiem f’li jippridkaw u jgħallmu u f’li jindokraw il-kongregazzjonijiet.—1 Tim. 3:1.
4 Forsi xi ftit minna jistgħu jagħmlu lilhom infushom disponibbli għas-servizz taʼ Jehovah f’qasam akbar billi jinkitbu bħala pijunieri awżiljari minn żmien għal żmien. Jerġaʼ wkoll, bi ftit aġġustamenti raġonevoli fl-iskeda tagħna, forsi nkunu nistgħu nagħmlu dan kontinwament jew saħansitra nibdew fis-servizz taʼ pijunier regulari. Huma ċ-ċirkostanzi tagħna tali li nistgħu mmorru noqogħdu x’imkien fejn hemm bżonn akbar għall-għajnuna? Ħafna qiegħed ukoll jiġi mwettaq fil-bini taʼ Swali tas-Saltna, Swali taʼ l-Assembleat, u faċilitajiet tal-fergħat madwar id-dinja, fejn hemm bżonn taʼ ħafna wħud li lesti għax-xogħol. Dawk li offrew lilhom infushom għal dawn ix-xogħlijiet mill-aħjar huma apprezzati ħafna, u dawn ġew imberkin bil-bosta!—Luqa 6:38.
5 Dawn huma żminijiet eċċitanti. Jehovah, permezz taʼ l-ispirtu tiegħu, qiegħed iwettaq xogħol meraviljuż fuq l-art permezz tan-nies ħerqanin tiegħu! Kull meta Jehovah, permezz taʼ l-organizzazzjoni tiegħu, jibgħat stedina biex uħud jieħdu sehem f’iktar attività tas-Saltna, nagħmlu tajjeb li nistaqsu lilna nfusna: ‘Għadni jien noffri lili nnifsi minn jeddi?’ Imbagħad għandna neżaminaw bit-talb lil qalbna u liċ-ċirkostanzi tagħna. Id-devozzjoni tagħna lejn Alla se ġġagħalna nagħmlu dak kollu li nistgħu fis-servizz sagru, u b’hekk inferrħu qalb Jehovah!—Sof. 3:17.