Kuraġġużi Permezz tal-​Fidi u l-​Biżaʼ minn Alla

“Agħmel il-​ħila [“kun kuraġġuż,” “NW”] u qawwi qalbek . . . għax il-​Mulej, Alla tiegħek, ikun miegħek.”—ĠOŻWÈ 1:9.

1, 2. (a) Mill-ħarsa tal-​bniedem, kienu l-​Iżraelin jidhru li se jirbħulhom lill-​Kangħanin? (b) Ġożwè liema rassiguranza rċieva?

FL-​1473 Q.E.K., il-​ġens taʼ Iżrael kien wasal biex jidħol fl-​Art Imwiegħda. Dwar l-​isfidi li kellhom jiffaċċjaw, Mosè fakkar lill-​poplu: “Illum int se taqsam il-​Ġordan biex tirbaħ ġnus ikbar u aqwa minnek, bliet kbar bi swar m’ogħla s-​smewwiet; ġnus kbar u nies twal; ulied Għanak; . . . int smajt min jgħid minnhom: ‘Min jistaʼ jiqfilhom ’l ulied Għanak?’” (Dewteronomju 9:​1, 2) Iva, dawn il-​gwerriera ġganteski kienu nies magħrufin sew! Iktar minn hekk, xi Kangħanin kellhom armati attrezzati sew, bi żwiemel u karrijiet li kellhom roti bi mnieġel tal-​ħadid.—Mħallfin 4:13.

² Min-​naħa l-​oħra, Iżrael kien ġens li kien fil-​jasar u li kien għadu kif qattaʼ 40 sena fix-​xagħri. Għalhekk, mill-​ħarsa tal-​bniedem, ma tantx kellhom probabbiltà li jirbħu. Madankollu, Mosè kellu l-​fidi; hu setaʼ “jara” lil Ġeħova jiggwidahom. (Ebrej 11:27) “Il-​Mulej, Alla tiegħek, hu li se jgħaddi quddiemek,” qal Mosè lill-​poplu. “Hu li se jeqridhom; hu li se jrażżanhom quddiemek.” (Dewteronomju 9:3; Salm 33:​16, 17) Wara li Mosè miet, Ġeħova assigura lil Ġożwè li Hu kien se jappoġġah billi qal: “Qum u aqsam dan il-​Ġordan, int u dan il-​poplu kollu taʼ Iżrael, lejn l-​art li jien se nagħtikom. Ħadd ma jiqaflek kemm iddum ħaj. Bħalma kont maʼ Mosè hekk inkun miegħek.”—Ġożwè 1:​2, 5.

3. X’għen lil Ġożwè jkollu fidi u kuraġġ?

³ Sabiex ikollu l-​appoġġ u l-​gwida taʼ Ġeħova, Ġożwè kellu jaqra u jimmedita fuq il-​Liġi t’Alla u japplikaha. “U hekk tirnexxi f’għemilek u jkollok ir-​riżq,” qal Ġeħova. “M’hux dan il-​kmand tiegħi? Agħmel il-​ħila [“kun kuraġġuż,” NW] u qawwi qalbek; tibżax u titħawwadx, għax il-​Mulej, Alla tiegħek, ikun miegħek kull fejn tmur.” (Ġożwè 1:​8, 9) Minħabba li Ġożwè semaʼ minn Alla, hu ta prova li kien kuraġġuż, b’saħħtu, u taʼ suċċess. Madankollu, ħafna minn dawk taʼ l-​istess ġenerazzjoni tiegħu ma semgħux. B’riżultat taʼ dan, huma ma kellhomx suċċess, u mietu fix-​xagħri.

Poplu bla Fidi li Kien Nieqes mill-​Kuraġġ

4, 5. (a) L-attitudni taʼ l-​għaxar spiji kif kienet differenti minn dik taʼ Ġożwè u Kaleb? (b) Ġeħova kif wieġeb għan-​nuqqas taʼ fidi li wera l-​poplu?

⁴ Erbgħin sena qabel meta l-​Iżraelin l-​ewwel waslu viċin Kangħan, Mosè kien bagħat 12-il raġel biex jispijaw l-​art. Għaxra minnhom ġew lura beżgħanin. Huma qalu: “Il-​popli kollha li rajna f’nofsha huma razza taʼ nies twal. Hemm rajna l-​ġganti [“in-​Nefilim,” NW] (ulied Għanak ġejjin mill-​ġganti) u ħassejna ruħna bħal ġradijiet.” Kienu l-​“popli kollha”—mhux biss l-​Għanakin—ġganti? Le. Kienu l-​Għanakin dixxendenti tan-​Nefilim taʼ qabel id-​Dilluvju? Dażgur li le! Madankollu, minħabba dawn l-​esaġerazzjonijiet, qam biżaʼ kbir fost in-​nies. Il-​poplu saħansitra ried imur lura lejn l-​Eġittu, l-​art li fiha kien imjassar!—Numri 13:31–14:4.

⁵ Madankollu, tnejn mill-​ispiji, Ġożwè u Kaleb, kienu ħerqanin biex jidħlu fl-​Art Imwiegħda. Huma qalu li l-​Kangħanin kienu “bħall-​ħobż” għalihom. “[“Il-​kenn tagħhom telaq minn fuqhom,” NW]. Il-​Mulej magħna, la tibżgħux minnhom.” (Numri 14:9) Kellhom Ġożwè u Kaleb raġuni għala jkunu ottimisti? Dażgur li kellhom! Flimkien mal-​bqija tal-​ġens, huma kienu raw lil Ġeħova jumilja lill-​Eġittu setgħan u l-​allat tiegħu permezz taʼ l-​Għaxar Kastigi. Imbagħad raw lil Ġeħova jgħarraq lill-​Fargħun u l-​forza militari tiegħu fil-​Baħar l-​Aħmar. (Salm 136:15) Jidher ċar li l-​biżaʼ li wrew l-​għaxar spiji u n-​nies li kienu influwenzaw ma kienx ġustifikat. Filwaqt li esprima l-​uġigħ kbir li ħass, Ġeħova qal: “Kemm se jdumu ma jafdawx fija, minkejja s-​sinjali li għamilt f’nofshom?”—Numri 14:11.

6. Il-​kuraġġ kif inhu relatat mal-​fidi, u dan kif jidher illum?

⁶ Ġeħova qal x’kien l-​għerq tal-​problema—l-​attitudni beżżiegħa tagħhom uriet li l-​poplu kellu nuqqas taʼ fidi. Iva, il-​fidi u l-​kuraġġ huma relatati mill-​qrib, tant hu hekk li l-​appostlu Ġwanni setaʼ jikteb dan li ġej dwar il-​kongregazzjoni Kristjana u t-​taqbida spiritwali tagħha: “Din hi r-​rebħa li rebħet lid-​dinja, il-​fidi tagħna.” (1 Ġwanni 5:4) Illum, fidi bħal dik taʼ Ġożwè u Kaleb wasslet biex l-​aħbar tajba tas-​Saltna tiġi pridkata madwar id-​dinja permezz taʼ iktar minn sitt miljun Xhud taʼ Ġeħova, kbar u żgħar, b’saħħithom u dgħajfin. L-​ebda għadu ma jistaʼ jsikket lil din l-​armata setgħana u kuraġġuża.—Rumani 8:31.

‘Terġax Lura’

7. Xi tfisser il-​frażi ‘terġaʼ lura’?

⁷ Il-​qaddejja taʼ Ġeħova llum jippridkaw b’kuraġġ l-​aħbar tajba minħabba li għandhom l-​istess attitudni li kellu l-​appostlu Pawlu, li kiteb: “Aħna m’aħniex it-​tip li nerġgħu lura biex ninqerdu, imma t-​tip li għandna l-​fidi biex inżommu ruħna ħajja.” (Ebrej 10:39) Bħalma semma Pawlu, li ‘terġaʼ lura’ ma jfissirx li tħossok beżgħan għal perijodu qasir taʼ żmien, għax fil-​fatt ħafna qaddejja leali t’Alla xi drabi ħassewhom beżgħanin. (1 Samwel 21:13 [21:​12, NW]; 1 Slaten 19:​1-4) Minflok, din tfisser “li tirtira,” “li tittraskura milli żżomm mal-​verità,” jgħid dizzjunarju wieħed tal-​Bibbja. Ikompli jżid li l-​frażi ‘terġaʼ lura’ tistaʼ tkun metafora bbażata fuq “it-​tniżżil tal-​qlugħ, u b’hekk jitnaqqas il-​pass” fejn għandu x’jaqsam is-​servizz lejn Alla. M’għandniex xi ngħidu, dawk li għandhom fidi b’saħħitha ma jgħaddilhomx minn moħħhom li ‘jnaqqsu l-​pass’ meta jqumu d-​diffikultajiet—kemm jekk tkun persekuzzjoni, nuqqas taʼ saħħa, u kemm jekk xi prova oħra. Minflok, huma jirsistu fil-​qadi tagħhom lejn Ġeħova, billi jżommu f’moħħhom li hu jinteressah ħafna minnhom u jaf il-​limitazzjonijiet tagħhom. (Salm 55:23 [55:​22, NW]; 103:14) Għandek int dak it-​tip taʼ fidi?

8, 9. (a) Ġeħova kif saħħaħ il-​fidi tal-​Kristjani tal-​bidu? (b) X’nistgħu nagħmlu biex nibnu l-​fidi tagħna?

⁸ Darba minnhom l-​appostli ħassew li l-​fidi tagħhom kienet qed tonqos, u għalhekk qalu lil Ġesù: “Agħtina iktar fidi.” (Luqa 17:5) It-​talba sinċiera tagħhom intlaqgħet b’mod speċjali f’Pentekoste tas-​sena 33 E.K. meta l-​ispirtu qaddis imwiegħed niżel fuq id-​dixxipli u tahom iktar dehen fuq il-​Kelma t’Alla u l-​iskop tiegħu. (Ġwanni 14:26; Atti 2:​1-4) Issa li l-​fidi tagħhom ġiet imsaħħa, id-​dixxipli bdew kampanja taʼ ppridkar li minkejja l-​oppożizzjoni wasslet l-​aħbar tajba “fil-​ħolqien kollu li hu taħt is-​sema.”—Kolossin 1:23; Atti 1:8; 28:22.

⁹ Sabiex inkunu nistgħu nibnu l-​fidi tagħna u nirsistu fil-​ministeru tagħna, aħna wkoll irridu nistudjaw u nimmeditaw fuq l-​Iskrittura u nitolbu għall-​ispirtu qaddis. L-​uniku mod biex ikollna tip taʼ fidi li tagħtina l-​kuraġġ li hemm bżonn biex nissaportu l-​ġlieda spiritwali tagħna u nirbħu huwa billi nnaqqxu l-​verità f’moħħna u f’qalbna—bħalma għamlu Ġożwè, Kaleb, u d-​dixxipli Kristjani tal-​bidu.—Rumani 10:17.

Il-​Fidi​—Iktar minn Sempliċement Twemmin

10. Il-​fidi vera x’tinkludi?

¹⁰ Bħalma ntwera minn uħud li żammew l-​integrità fil-​passat, il-​fidi li tagħti l-​kuraġġ u s-​sabar tinkludi iktar minn sempliċement twemmin f’Alla. (Ġakbu 2:19) Teħtieġ li nsiru nafu lil Ġeħova bħala persuna u li jkollna fiduċja sħiħa fih. (Salm 78:​5-8; Proverbji 3:​5, 6) Tfisser li aħna nemmnu b’qalbna kollha li l-​iktar li nibbenefikaw huwa meta nagħtu kas il-​liġijiet u l-​prinċipji t’Alla. (Isaija 48:​17, 18) Il-​fidi tinvolvi wkoll li tkun ċert li Ġeħova se jwettaq il-​wegħdi kollha tiegħu u “jippremja lil dawk li jfittxuh bil-​ħeġġa.”—Ebrej 11:​1, 6; Isaija 55:11.

11. Ġożwè u Kaleb b’liema mod tbierku għall-​fidi u l-​kuraġġ tagħhom?

¹¹ Fidi bħal din ma tibqax dejjem l-​istess. Din tikber hekk kif napplikaw il-​verità f’ħajjitna, ‘induqu’ l-​benefiċċji, ‘naraw’ it-​talb tagħna jiġi mismugħ, u nħossu d-​direzzjoni taʼ Ġeħova fil-​ħajja tagħna b’modi oħra. (Salm 34:​8, NW; 1 Ġwanni 5:​14, 15) Nistgħu nkunu ċerti li l-​fidi taʼ Ġożwè u Kaleb kibret hekk kif daqu t-​tjieba t’Alla. (Ġożwè 23:14) Ikkunsidra dan li ġej: Huma salvaw minn vjaġġ li dam 40 sena fix-​xagħri, bħalma Alla wiegħed li kien se jiġri. (Numri 14:​27-30; 32:​11, 12) Ngħataw irwol attiv fil-​ġlieda li damet għaddejja sitt snin biex jirbħu lill-​Kangħan. Fl-​aħħar, huma gawdew ħajja twila u saħħa tajba u saħansitra rċivew il-​wirt persunali tagħhom. Kemm iberikhom bil-​kbir Ġeħova lil dawk li jaqduh bil-​lealtà u l-​kuraġġ!—Ġożwè 14:​6, 9-14; 19:​49, 50; 24:29.

12. Ġeħova kif ‘ikabbar kelmtu’?

¹² Il-​qalb tajba bl-​imħabba li Alla wera maʼ Ġożwè u Kaleb tfakkarna f’kemm hu minnu kliem is-​salmista: “Int kabbart kelmtek saħansitra fuq l-​isem kollu tiegħek.” (Salm 138:​2, NW) Meta Ġeħova juża ismu bħala garanzija għal xi wegħda li jkun għamel, it-​twettiq taʼ dik il-​wegħda ‘jitkabbar’ fis-​sens li jkun aħjar minn dak li jkun ġie mistenni. (Efesin 3:20) Iva, Ġeħova qatt ma jiddiżappunta lil dawk li jqiegħdu ‘l-​għaxqa tagħhom’ fih.—Salm 37:​3, 4.

Raġel li “Għoġob Sew lil Alla”

13, 14. Ħenok għala kellu bżonn il-​fidi u l-​kuraġġ?

¹³ Nistgħu nitgħallmu ħafna dwar il-​fidi u l-​kuraġġ billi nikkunsidraw l-​eżempju li ħalla xhud ieħor li għex qabel żmien il-​Kristjanità—Ħenok. Saħansitra qabel ma beda jipprofetizza, Ħenok wisq probabbli kien jaf li l-​fidi u l-​kuraġġ tiegħu kienu se jgħaddu minn prova. Kif? Għax Ġeħova kien qal fl-​Għeden li kellu jkun hemm mibegħda, jew għadwa, bejn dawk li jaqdu lil Alla u dawk li jaqdu lil Satana x-​Xitan. (Ġenesi 3:15) Ħenok kien jaf ukoll li din il-​mibegħda qamet fil-​bidu taʼ l-​istorja umana meta Kajjin qatel lil ħuh Abel. Tabilħaqq, Adam, missierhom, għex għal kważi 310 snin wara li twieled Ħenok.—Ġenesi 5:​3-18.

¹⁴ Biss, minkejja dan kollu, Ħenok b’kuraġġ ‘mexa m’Alla’ u kkundanna ‘l-​kliem kollu li jkexkex’ li l-​poplu qal kontra Ġeħova. (Ġenesi 5:22; Ġuda 14, 15) Din il-​waqfa bla biżaʼ favur il-​qima vera milli jidher ġabet ħafna għedewwa għal Ħenok u poġġietlu ħajtu fil-​periklu. F’dan il-​każ, Ġeħova salva lill-​profeta mill-​uġigħ tal-​mewt. Wara li lil Ħenok urieh li “għoġob sew lil Alla,” Ġeħova “ttrasferieh” mill-​ħajja għall-​mewt, forsi billi tefgħu f’estasi fejn ra dehra profetika.—Ebrej 11:​5, 13; Ġenesi 5:24.

15. Liema eżempju mill-​aqwa ta Ħenok lill-​qaddejja taʼ Ġeħova llum?

¹⁵ Eżattament wara li semma l-​fatt li Ħenok ġie trasferit, Pawlu reġaʼ enfasizza l-​importanza tal-​fidi billi qal: “Iktar minn hekk, mingħajr fidi impossibbli li [togħġob lil Alla] sew.” (Ebrej 11:6) Iva, il-​fidi tat lil Ħenok il-​kuraġġ biex jimxi maʼ Ġeħova u biex jipproklama l-​messaġġ taʼ ġudizzju Tiegħu lil dinja li ma kinitx tibżaʼ minn Alla. F’dan, Ħenok tana eżempju mill-​aqwa. Aħna għandna xogħol simili x’nagħmlu f’dinja li topponi l-​qima vera u li hija mimlija b’kull xorta taʼ ħażen.—Salm 92:8 (92:​7, NW); Mattew 24:14; Rivelazzjoni 12:17.

Kuraġġ li Jiġi mill-​Biżaʼ minn Alla

16, 17. Min kien Għobadija, u f’liema sitwazzjoni sab ruħu?

¹⁶ Minbarra l-​fidi, hemm kwalità oħra li ġġib il-​kuraġġ u din hija l-​biżaʼ riverenzjali minn Alla. Ejja nikkunsidraw eżempju li jispikka taʼ raġel li kien jibżaʼ minn Alla u li kien jgħix fi żmien il-​profeta Elija u s-​Sultan Aħab, li kien jaħkem fis-​saltna taʼ Iżrael fit-​tramuntana. Matul il-​ħakma t’Aħab, il-​qima lejn Bagħal kienet infettat is-​saltna tat-​tramuntana fuq skala li qatt ma ntlaħqet qabel. Fil-​fatt, 450 profeta taʼ Bagħal u 400 profeta taʼ l-​arblu sagru, simbolu falliku, kienu “jieklu mill-​mejda taʼ Ġeżabel,” mart Aħab.—1 Slaten 16:​30-33; 18:19.

¹⁷ Ġeżabel, għadu kiefer taʼ Ġeħova, ipprovat teqred kompletament il-​qima vera mill-​pajjiż. Hi qatlet lil xi wħud mill-​profeti taʼ Ġeħova u saħansitra pprovat toqtol lil Elija, li fi qbil mad-​direzzjoni taʼ Ġeħova ħarab għan-​naħa l-​oħra tal-​Ġordan. (1 Slaten 17:​1-3; 18:13) Tistaʼ timmaġina kemm kien diffiċli biex tappoġġa l-​qima pura fis-​saltna tat-​tramuntana dak iż-​żmien? U tistaʼ timmaġina kemm kien iktar diffiċli kieku kont taħdem fil-​palazz irjali stess? Din kienet is-​sitwazzjoni li sab ruħu fiha Għobadija,a li kien jibżaʼ minn Alla u li kien jaqdi fid-​dar t’Aħab.—1 Slaten 18:3.

18. X’kien li għamel lil Għobadija aduratur li jispikka taʼ Ġeħova?

¹⁸ M’għandniex xi ngħidu, Għobadija kien juża l-​għaqal u d-​diskrezzjoni fil-​qima tiegħu lil Ġeħova. Madankollu, m’għamilx kompromessi. Fil-​fatt, l-​1 Slaten 18:3 jgħidilna: “Għobadija kien jibżaʼ ħafna mill-​Mulej.” (Korsiv tagħna.) Iva, il-​biżaʼ minn Alla li Għobadija kien juri kien jispikka! Min-​naħa l-​oħra, dan il-​biżaʼ bnin tah kuraġġ mill-​aqwa, bħalma wera eżattament wara li Ġeżabel qatlet lill-​profeti taʼ Ġeħova.

19. X’azzjoni ħa Għobadija li wriet li kellu l-​kuraġġ?

¹⁹ Naqraw: “Meta Ġeżabel kienet qiegħda teqred il-​profeti tal-​Mulej, Għobadija qabad mitt profeta u ħbiehom, ħamsin ħamsin, fl-​għerien, u kien jipprovdilhom ħobż u ilma.” (1 Slaten 18:4) Bħalma tistaʼ timmaġina, li titmaʼ mitt raġel bil-​moħbi kienet biċċa xogħol perikoluża ħafna. Għobadija mhux biss ried joqgħod attent li ma jinqabadx minn Aħab u Ġeżabel imma wkoll kellu joqgħod attent li ma jinqabadx mit-​850 profeta falz li spiss kienu jmorru fil-​palazz. Barra minn hekk, il-​ħafna aduraturi foloz li kienu fil-​pajjiż, min-​nies komuni sal-​prinċpijiet, żgur li kienu jaħtfu kull opportunità biex jikxfu lil Għobadija ħalli jaqilgħu l-​favur tas-​sultan u r-​reġina. Minkejja dan, Għobadija b’kuraġġ ħa ħsieb il-​bżonnijiet tal-​profeti taʼ Ġeħova taħt imnieħer dawn l-​idolatri. Kemm jistaʼ jagħti kuraġġ il-​biżaʼ minn Alla!

20. Il-​biżaʼ li Għobadija kellu minn Alla kif għenu, u l-​eżempju tiegħu kif jgħinek?

²⁰ Minħabba li Għobadija wera l-​kuraġġ permezz tal-​biżaʼ minn Alla, Ġeħova mid-​dehra pproteġieh mill-​għedewwa tiegħu. Proverbji 29:25 jgħid: “Min jibżaʼ mill-​bniedem jaqaʼ fi xkiel; imma min jittama fil-​Mulej ikun fil-​kenn.” Għobadija kien bniedem komuni; kien beżaʼ li jinqabad u jinqatel, eżattament bħalma kieku nħossuna aħna. (1 Slaten 18:​7-9, 12) Minkejja dan, il-​biżaʼ minn Alla tah kuraġġ biex jegħleb kwalunkwe biżaʼ mill-​bniedem li setaʼ kellu. Għobadija huwa eżempju mill-​aqwa għalina lkoll, speċjalment għal dawk li jqimu lil Ġeħova minkejja li jkunu qed jipperikolaw il-​libertà tagħhom jew saħansitra ħajjithom. (Mattew 24:9) Iva, jalla lkoll kemm aħna nistinkaw biex naqdu lil Ġeħova “bil-​biżaʼ t’Alla u b’rispett profond.”—Ebrej 12:28.

21. X’se jiġi kunsidrat fl-​artiklu li jmiss?

²¹ Il-​fidi u l-​biżaʼ minn Alla m’humiex l-​uniċi żewġ kwalitajiet li jibnu l-​kuraġġ; l-​imħabba tistaʼ tkun qawwa saħansitra iktar b’saħħitha. Pawlu kiteb: “Alla ma taniex spirtu beżżiegħ, imma spirtu taʼ qawwa u taʼ mħabba u taʼ moħħ f’loku.” (2 Timotju 1:7) Fl-​artiklu li jmiss se naraw kif l-​imħabba se tgħinna naqdu lil Ġeħova bil-​kuraġġ matul dawn l-​aħħar jiem kritiċi.—2 Timotju 3:1.

[Nota taʼ taħt]

Taf Twieġeb?

• X’kien dak li għen li Ġożwè u Kaleb juru kuraġġ?

• Il-​fidi vera x’tinkludi?

• Ħenok għala ma beżax meta pproklama l-​messaġġ taʼ ġudizzju t’Alla?

• Il-​biżaʼ minn Alla kif jagħti l-​kuraġġ?

[Stampa f’paġna 17]

Ġeħova kkmanda lil Ġożwè: “Agħmel il-​ħila [“kun kuraġġuż,” “NW”] u qawwi qalbek”

[Stampa f’paġna 18]

Għobadija ħa ħsieb u pproteġa lill-​profeti t’Alla

[Stampi f’paġna 19]

Ħenok tkellem il-​kelma t’Alla b’kuraġġ