Nissel f’Oħrajn it-​Tama taʼ Ħajja taʼ Dejjem

¹ Għalkemm il-​bniedem fittex modi biex inaqqas il-​proċess tax-​xjuħija u jestendi t-​tul tal-​ħajja, ix-​xjuħija u l-​mewt għadhom ma jistgħux jiġu evitati. Kemm aħna grati li l-​Bibbja tispjega għala l-​bnedmin jixjieħu u jmutu, u wkoll kif l-​effetti distruttivi tax-​xjuħija se jitreġġgħu lura u l-​mewt se tiġi eliminata. Dawn il-​veritajiet huma ppreżentati b’manjiera konvinċenti fil-​ktieb Għarfien Li Jwassal Għall-​Ħajja Taʼ Dejjem. Il-​ktieb b’mod ċar iwieġeb mistoqsijiet taʼ taħbil il-​moħħ dwar il-​ħajja u l-​mewt, billi jidderieġi lill-​qarrej lejn iż-​żmien meta l-​Ġenna se tiġi rrestawrata.

² F’Marzu se noffru l-​ktieb Għarfien bil-​mira li nibdew studji tal-​Bibbja fid-​djar. (Mt. 28:​19, 20) Imbagħad se nerġgħu nżuru lil dawk kollha li juru interess fil-​messaġġ tas-​Saltna. B’dan il-​mod nistgħu nnisslu f’oħrajn it-​tama taʼ ħajja taʼ dejjem. (Titu 1:2) Biex twettaq dan, tistaʼ ssib is-​suġġerimenti li ġejjin taʼ għajnuna.

³ Meta tagħmel iż-​żjara inizjali, tistaʼ ssaqsi din il-​mistoqsija:

◼ “Qatt tħassibt għala l-​bnedmin jixxennqu għal ħajja itwal? [Agħti ċans għal tweġiba.] Il-​Buddisti, il-​Kristjani, il-​Ħindu, il-​Musulmani, u oħrajn ilkoll għandhom it-​tama taʼ xi ħajja wara l-​mewt.” Iftaħ il-​ktieb Għarfien f’kapitlu 6, “Għala Nixjieħu u Mmutu?,” u aqra paragrafu 3. Irraġuna fuq l-​iskritturi ċitati. Billi tirreferi għaż-​żewġ mistoqsijiet fl-​aħħar tal-​paragrafu, staqsi lill-​inkwilin jekk jixtieqx jara t-​tweġibiet għalih innifsu. Jekk jixtieq hekk, kompli iddiskuti l-​ftit paragrafi li jmiss. Qiegħed jinbeda studju! Inkella, ħallilu l-​ktieb biex jaqrah, u agħmel pjanijiet biex terġaʼ tmur, preferibbilment fi żmien jum jew tnejn, biex tiddiskuti t-​tweġibiet.

⁴ Meta terġaʼ tmur wara li tkun ħallejt il-​ktieb “Għarfien,” tistaʼ tgħid:

◼ “Erġajt ġejt biex nikkunsidraw iż-​żewġ mistoqsijiet dwar il-​mewt li ħallejna bla tweġiba.” Fakkar lill-​inkwilin il-​mistoqsijiet. Imbagħad iddiskuti l-​informazzjoni f’kapitlu 6 taħt is-​sottitlu “Komplott Malinn.” Skond iċ-​ċirkostanzi, jew kompli bl-​istudju jew inkella uża l-​aħħar mistoqsija fit-​tmiem taʼ paragrafu 7 biex tħejji l-​bażi għas-​sessjoni li jmiss. Agħmel pjanijiet definiti biex terġaʼ tmur. Agħti lill-​inkwilin handbill, u iddeskrivi fil-​qosor kif isiru l-​laqgħat tal-​kongregazzjoni. Stiednu mill-​qalb biex jattendi.

⁵ Waqt xogħol minn dar għal dar jew waqt għoti taʼ xiehda informali, tistaʼ tibda konversazzjoni billi tgħid:

◼ “Qatt tħassibt dwar x’hemm maħżun fil-​futur għalina u għall-​art? [Agħti ċans għal tweġiba.] Il-​Bibbja tiġbor il-​futur f’kelma waħda​—Ġenna! Tispjega li fil-​bidu, Alla għamel porzjon mill-​art ġenna sabiħa fejn poġġa l-​koppja umana li kien ħalaq. Huma kellhom jimlew l-​art kollha bin-​nies, u ftit ftit jittrasformawha f’ġenna. Innota din id-​deskrizzjoni taʼ kif x’aktarx li kienet.” Iftaħ il-​ktieb Għarfien f’paġna 8, u aqra paragrafu 9, taħt is-​sottitlu “Il-​Ħajja Fil-​Ġenna.” Imbagħad iddiskuti l-​punti f’paragrafu 10, u aqra l-​iskrittura ċitata, Isaija 55:​10, 11. Offri li tkompli d-​diskussjoni dwar kif il-​ħajja fil-​Ġenna restawrata se tkun u li tgħaddu paragrafi 11-​16 flimkien. Jew inkuraġġixxi lil dak li jkun biex jaqra dan għalih waħdu, u ftiehem biex terġgħu tiltaqgħu u tiddiskutuh.

⁶ Jekk ma ġiex stabbilit studju fil-​bidu, tistaʼ tipprova tagħmel dan fiż-​żjara lura billi tgħid:

◼ “Bħalma ddiskutejna fl-​aħħar konversazzjoni tagħna, huwa l-​iskop taʼ Alla li l-​art kollha kemm hi tiġi ttrasformata f’ġenna. Dan iqajjem il-​mistoqsija, Kif se tkun il-​Ġenna?” Iftaħ il-​ktieb Għarfien f’kapitlu 1, u studjaw paragrafi 11-​16, taħt is-​sottitlu “Il-​Ħajja Fil-​Ġenna Rrestawrata.” Wara uri lill-​individwu l-​istampa f’paġni 4-5, u staqsih jekk jixtieqx jgħix f’ambjent sabiħ bħal dan. Imbagħad aqra l-​ewwel sentenza taʼ paragrafu 17 f’paġna 10. Skond iċ-​ċirkostanzi, jew kompli bl-​istudju jew inkella għid li fiż-​żjara li jmiss se tispjega x’inhu meħtieġ biex wieħed jgħix fil-​Ġenna restawrata. Agħti handbill lill-​individwu, spjegalu l-​iskeda tal-​laqgħat, u stiednu mill-​qalb biex jattendi fis-​Sala tas-​Saltna.

⁷ Il-​ktieb Għarfien huwa għodda eċċellenti biex jintuża f’li nirrivelaw lil oħrajn il-​“ħajja taʼ dejjem” imwiegħda minn Alla. Li tikkonduċi studji tal-​Bibbja fid-​djar man-​nies jistaʼ jnissel fihom din it-​tama grandjuża li hija ispirata minn dak Alla “li ma jigdibx.”