¿Toni kijtoua Biblia ika ángeles?

Dios se espíritu, yejua ika amo ueli tikitaj, ángeles no ijkon amo ueli tikinitaj, tein kijtosneki ke amo kipiaj “nakat nion iomiyouan”. Uan no, ángeles akin amo kikauaj Dios nemij iluikak uan moajsij iixpan yejuatsin (Lucas 24:39; Mateo 18:10; Juan 4:24, TNM).

Kemansa, ángeles mochiuanij kemej takamej uan ijkon kichiujkej seki tekimej tein Dios kinnauatij nikan taltikpak uan satepan, oksepa mokepkej espíritus (Jueces 6:11-23; 13:15-20).

Maski ángeles monakayotijkej kemej takamej uan Biblia ininka tajtoua kemej takamej, yejuan amo takamej nion siuamej. Amo monamiktiaj nion kipiaj ininkoneuan. Uan no, ángeles amo yejuan konemej oso akin uejueykej, akin ijkuak momikilijkej yajkej iluikak. Jiova kinchijchiuak, yejua ika Biblia kintokaytia “ikoneuan Dios akin melauak” (Job 1:6; Salmo 148:2, 5).

Biblia ika tajtoua “tajtolme den taka san” uan “keme in ángeles tajtoaj”, nejon kinextia ke ángeles uelij tajtouaj uan kipiaj inintajtol. Dios iniuan tajtouani taltikpakneminij inintenkopa ángeles, sayoj ke amo techkaua maj tikinueyichiuakan nion maj tikintataujtikan (1 Corintios 13:1; Apocalipsis [Revelación] 22:8, 9).

Moajsij majtakti mil panti majtakti mil ángeles, xa tel miak millones (Daniel 7:10; Apocalipsis 5:11).

Ángeles okachi chikaujkej uan okachi tamatinij ke tejuan. Uan no, uelij tel ijsiujka youij, okachi ke tein tejuan uelis tikajsikamatiskej (Salmo 103:20; Daniel 9:20-23).

Maski ángeles okachi tamatinij uan okachi chikaujkej, amo nochi ueli kichiuaj uan amo kimatij seki taman (Mateo 24:36; 1 Pedro 1:12).

Dios kinchijchiuak kemej ueliskiaj kinextiskej seki taman ijkon kemej yejuatsin uan kemej ueliskiaj taixpejpenaskej. Yejua ika, ijkon kemej tejuan, no uelis kiixpejpenaskej kichiuaskej tein kuali oso tein amo kuali. Tetayokoltij tikijtoskej, ke sekin kiixpejpenkej kiixnamikiskej Dios (Judas 6).