Oshikonga shokuhiya aantu kEdhimbuluko otashi tameke mo 17 gaMaalitsa
1. Oshikonga shini tashi ka tameka mo 17 gaMaalitsa?
1 Edhimbuluko ndyoka hali ningwa kehe omumvo oli lile po okuhokolola eso lyaJesus. (1 Kor. 11:26) Nomolwaashono otwa hala yalwe ye ye ya gongale pamwe natse yo ya pulakene kombinga yomagano gekulilo ngoka Jehova e tu pa. (Joh. 3:16) Omvula ndjino oshikonga shetu shokuhiya aantu kEdhimbuluko otashi tameke mOlyomakaya, 17 gaMaalitsa. Mbela owa tegelela nondjuulukwe wu ka longe nuudhiginini?
2. Otatu vulu okutya shike manga inaatu gandja okafo kehiyo?
2 Shoka tatu vulu oku ka tya: Onawa ngele tatu kala twi ilongekidha sha oshihupi shoka tatu ka popya. Otatu vulu okutya: “Mwa lala po! Otwe ya tu mu hiye koshituthi sha simana shedhimbuluko hashi dhanwa kehe omumvo, shoka tashi ka dhanwa muuyuni auhe mu 5 gaApilili. Otaku ka gandjwa oshipopiwa shoka tashi fatulula kutya eso lyaJesus olya ningitha shike tashi wapa nosho wo kutya ota longo shike ngashingeyi. Ehala nethimbo lyokugongala huka oya nyolwa mokafo haka kehiyo.” Uuna tatu hiya aantu mehuliloshiwike, otatu vulu okugandja wo iifo ngele onkalo otayi shi pitike.
3. Ongiini tatu vulu okuhiya aantu oyendji ngaashi tashi vulika?
3 Hiya aantu oyendji ngaashi tashi vulika: Elalakano lyetu olyo okuhiya aantu oyendji ngaashi tashi vulika. Onkee ano, shilipaleka kutya owa hiya aakonakoni yoye, mboka wa li wa ninga omaishunoko kuyo, aakwanezimo, aaniilonga pamwe nangoye, aanasikola ooyakweni, aashiinda nosho wo aashiwikile yalwe. Aakuluntugongalo yomegongalo lyeni otaye ke mu pa omalombwelo gankene tamu vulu okulonga oshitopolwa sheni mu shi mane ko. Oshikonga shetu shokuhiya aantu kEdhimbuluko shoka hashi ningwa omumvo kehe ohashi eta lela iizemo iiwanawa. Sho omukiintu gumwe a li e ya mokugongala pedhimbuluko lyomumvo gwa zi ko, omumwatate ta yakula okwa li e mu pula e mu ithanene ngoka e mu hiya kokugongala. Ihe omukiintu okwa ti kutya kapu na ngoka e shi mokugongala nonokutya okwa li owala a pewa ehiyo kugumwe ngoka a li ta longo egumbo negumbo esiku ndyoka.
4. Omolwomatompelo geni tu na okulonga nuulaadhi moshikonga shokuhiya aantu?
4 Otashi vulika gumwe e ke ye kEdhimbuluko molwaashoka wa li we mu hiya. Kutya nduno omuntu ngoka wa hiya okwe ya kEdhimbuluko nenge hasho, oonkambadhala ndhoka to ka ninga otadhi ka gandja owala uunzapo natango. Ehiyo ndyoka to ka gandja otali ka longa omuntu kutya Jesus oku li ngashingeyi Omukwaniilwa omunankondo. Okukutha ombinga kwoye nuulaadhi otaku ka gandja uunzapo kwaayehe moshitopolwa, kaauvithi ooyakweni, nuunene tuu kuJehova kutya owu na olupandu omolwomagano gekulilo. — Kol. 3:15.