Kuwonjezera Luso Lathu mu Utumiki—Tingatani Ngati Tapeza Munthu Waukali?

N’chifukwa Chiyani Kudziwiratu Zochita N’kofunika? Nthawi zambiri anthu amene timawalalikira amakhala aulemu. Komabe Yesu ananeneratu kuti anthu ena azidzadana nafe. (Yoh. 17:14) Choncho sizodabwitsa kuti tikamalalikira, nthawi zina timakumana ndi anthu aukali. Zikatere tiyenera kuchita zinthu zomwe zingasangalatse Yehova, chifukwa tikamalalikira timakhala tikuimira iyeyo. (Aroma 12:17-21; 1 Pet. 3:15) Zimenezi zingathandize kuti zinthu zisafike poipa komanso kuti munthuyo ndi anthu ena aone kuti ndife anthu a Mulungu. Zingathandizenso kuti nthawi ina adzamvetsere.—2 Akor. 6:3.

Kodi Tingachite Bwanji Zimenezi?

Khalani odekha ndipo musakhumudwe. Zimenezi zingachititse kuti musakangane. Muzikumbukira kuti chilichonse chomwe munthuyo anganene, sakunena inuyo koma a Mboni onse. (Mlal. 7:9) N’kuthekanso kuti munthuyo akuchita zimenezi, osati chifukwa chodana ndi uthenga wathu, koma chifukwa choti ali ndi mavuto ena kapena chifukwa choti mwamupeza pa nthawi yolakwika. Ngakhale zitakhala kuti akudana ndi uthenga wathu, kumbukirani kuti ambiri amachita zimenezi chifukwa choti anasocheretsedwa ndi ziphunzitso zabodza.—2 Akor. 4:4.
Yankhani mwaulemu. (Miy. 15:1) Kuchita zimenezi n’kofunika chifukwa n’kutheka kuti mwamudzutsa akugona kapena mwamusokoneza zinazake zomwe amachita. Ngakhale kuti ntchito yathu ndi yofunika kuposa chilichonse, muyenerabe kumupepesa chifukwa choti mwam’peza pa nthawi yolakwika. Kodi kapena amayankha mwaukali a Mboni akafika pakhomo pake chifukwa cha zinthu zabodza zomwe anamva zokhudza ifeyo? Ngati ndi choncho mungamuuze kuti: “Zimenezo zingakhaledi zokhumudwitsa. Koma zimene munamvazo si zoona. Kodi mungakonde kuti ndikufotokozereni bwinobwino nkhani imeneyi?” Kodi munthuyo amadana ndi zinthu zina zomwe timakhulupirira monga zokhudza ochotsedwa kapena magazi? Ngati ndi choncho, munganene kuti: “Ndikumvetsa maganizo anu, ndipo pali ambiri amene amaganizanso choncho. Kodi mungakonde ndikusonyezeni kuchokera m’Baibulo chifukwa chake timakhulupirira zimenezi?
Ngati akuoneka kuti wakwiya kwambiri, ndi bwino kungochokapo osalankhula chilichonse. Akanena kuti sakufuna kuti a Mboni adzafikenso pakhomo pakepo, muuzeni kuti tiyesetsa kuti tisamapiteko.

Tayesani Kuchita Izi Mwezi Uno:

Pa kulambira kwa pabanja, yesererani zimene mungachite mukakumana ndi munthu waukali.
Mukachoka panyumba ya munthu yemwe wakuyankhani mwaukali, uzani mnzanu amene mwayenda naye zinthu zina zomwe mumayenera kuchita.