Kodi Kungokhala Munthu Wabwino N’kumene Kungachititse Kuti Tikhale Ndi Tsogolo Labwino?

Kwa zaka zambiri, anthu akhala akuona kuti kukhala munthu wabwino kungathandize kuti munthu akhale ndi tsogolo labwino. Mwachitsanzo, anthu ambiri ku Asia ankagwirizana ndi zimene wafilosofe wina wotchuka dzina lake Confucius ananena. Iye anati: “Zimene simukufuna kuti anthu ena akuchitireni, inunso musamawachitire.”a

ZIMENE ANTHU AMBIRI AMACHITA

Anthu ambiri amakhulupirira kuti kukhala ndi makhalidwe abwino n’kumene kungawathandize kukhala ndi tsogolo labwino. Iwo amayesetsa kuchita zinthu mwaulemu, kukhala ndi makhalidwe abwino, amayesetsa kukwaniritsa maudindo awo ndiponso amayesetsa kukhala ndi chikumbumtima chabwino. Mayi wina wa ku Vietnam dzina lake Linh, anati: “Ndakhala ndikukhulupirira kuti ndingadzakhale ndi tsogolo labwino ndikamachita zinthu moona mtima ndiponso mwachilungamo.”

Mayi yemwe uja akugawira chakudya anthu osauka komanso osowa pokhala.

Anthu ena amachita zinthu zabwino chifukwa cha zimene amakhulupirira kuchipembedzo chawo. Bambo wina wa ku Taiwan dzina lake Hsu-Yun, anati: “Ndinaphunzitsidwa kuti zimene munthu amachita ali moyo zingachititse kuti akadzamwalira adzasangalale ndi moyo kwamuyaya kapena kuzunzidwa kwamuyaya.”

KODI ZOTSATIRA ZAKE ZIMAKHALA ZOTANI?

Pambuyo pogwira ntchito mwakhama tsiku lonse, mayi uja watopa ndipo akusamalira mwana wake.

N’zoona kuti timakhala osangalala tikamachitira anthu ena zabwino. Komabe, anthu ambiri omwe amayesetsa kuchitira anthu ena zabwino ndi mtima wawo wonse amaona kuti si nthawi zonse pamene anthu enawonso amawachitira zabwino. Mayi wina yemwe amakhala ku Hong Kong, dzina lake Shiu Ping, anati: “Zimene zinandichitikira zinandithandiza kuzindikira kuti si nthawi zonse pamene anthu amene unawachitira zabwino angadzakuchitirenso zabwino. Ndinkayesetsa kusamalira bwino banja langa komanso kulichitira zabwino. Koma banja langa linasokonekera ndipo mwamuna wanga anachoka n’kundisiya ndekha ndi mwana wanga.”

Anthu ambiri amaona kuti si nthawi zonse pamene anthu omwe ali m’chipembedzo amakhala abwino. Mayi wina wa ku Japan dzina lake Etsuko, anati: “Ndinalowa m’kagulu kenakake kachipembedzo, kenako ndinakhala mtsogoleri wa achinyamata. Ndinadabwa kuona kuti anthu ena m’chipembedzo changa anali ndi makhalidwe oipa, ankalimbirana maudindo komanso ankagwiritsa ntchito molakwika ndalama zampingo.”

“Ndinkayesetsa kusamalira bwino banja langa komanso kulichitira zabwino. Koma banja langa linasokonekera ndipo mwamuna wanga anachoka n’kundisiya ndekha ndi mwana wanga.”—SHIU PING, wa ku HONG KONG

Anthu ena omwe amadzipereka kwambiri kuchipembedzo chawo komanso amayesetsa kuchita zabwino, amakhumudwa akaona zinthu zoipa zikuwachitikira pa moyo wawo. Zimenezi n’zimene zinachitikira mayi wina wa ku Vietnam dzina lake Van. Iye anati: “Tsiku lililonse ndinkagula zipatso, maluwa komanso zakudya n’kumazipereka nsembe kwa makolo anga omwe anamwalira ndipo ndinkaganiza kuti zinthu zizindiyendera bwino komanso ndikhala ndi tsogolo labwino. Ngakhale kuti ndinkayesetsa kuchita zabwino komanso kutsatira miyambo yachipembedzo chathu kwa zaka zambiri, mwamuna wanga anadwala kwambiri. Kenako mwana wanga wamkazi yemwe ankaphunzira kudziko lina anamwalira ali ndi zaka 20 zokha.”

KUNGOKHALA MUNTHU WABWINO SIKUNGACHITITSE KUTI MUNTHU AKHALE NDI TSOGOLO LABWINO

Kukhala munthu wabwino ndi kofunika kwambiri. Komabe, sizitanthauza kuti munthu sungakumane ndi mavuto. N’chifukwa chiyani tikutero? Tiyeni tikambirane zimene Malemba Opatulika amanena.

ANTHU ENA SAFUNA KUCHITA ZABWINO

“Wochimwa mmodzi yekha akhoza kuwononga zabwino zochuluka.”—MLALIKI 9:18.

Ngakhale mutamayesetsa kuchita zinthu zabwino, mukhoza kukumanabe ndi mavuto chifukwa cha zochita za anthu ena odzikonda. Mwachitsanzo pa nthawi ya mliri, mungayesetse kumakhala kwanokha pomvera malangizo a akuluakulu aboma. Koma bwanji ngati anthu ena sakufuna kutsatira zimenezo? Zochita zawo zingachititse kuti anthu ena omwe akuyesetsa kutsatira malangizo adwale.

ANTHU ENA AKHOZA KUMAGANIZA KUTI AKUCHITA ZABWINO KOMA AKUCHITA ZOIPA

“Pali njira yooneka ngati yowongoka kwa munthu, koma mapeto ake ndi imfa.”—MIYAMBO 14:12.

Pali zitsanzo zambiri za anthu amene ankaganiza kuti akuchita zinthu zabwino, koma kenako anazindikira kuti zomwe ankachitazo zinali zolakwika. Ngakhale ankaganiza kuti akuchita zabwino, anakumanabe ndi mavuto chifukwa chosankha zinthu molakwika.

MOYO NDI WOSADALIRIKA

“Simukudziwa kuti moyo wanu udzakhala wotani mawa.”—YAKOBO 4:14.

Ngakhale munthu atakhala wabwino, akhoza kumwalira mwadzidzidzi. Mwachitsanzo, pa nthawi ya mliri wa COVID-19, anthu ambiri omwe anadzipereka kuthandiza ena anatenga matendawa n’kumwalira. Chitsanzo china ndi zimene zinachitikira mayi wina wa ku China, dzina lake Liting, yemwe bambo ake anamwalira pangozi ya galimoto. Iye anati: “Bambo anga anali munthu wachifundo, wolimbikira ntchito, wodzichepetsa komanso woona mtima. Koma anamwalira pangozi ya galimoto. Pa anthu onse omwe anakwera m’galimotoyo ndi wokha amene anamwalira. Sindinamvetse chifukwa chake munthu wabwino ngati ameneyu anamwalira.”

Ngati kungokhala munthu wabwino sikungachititse kuti munthu akhale ndi tsogolo labwino, ndiye n’chiyani chingathandize? Kuti tipeze yankho la funso limeneli, tiyenera kudziwa kumene tingapeze malangizo odalirika omwe angatithandize kuyankha mafunso athu komanso kudziwa zimene tingachite kuti tikhale ndi tsogolo labwino. Kodi malangizo amenewa tingawapeze kuti?

a Kuti mudziwe zambiri zokhudza zimene Confucius anaphunzitsa, onani mutu 7, ndime 31-35, m’buku la Chingelezi lakuti, Mankind’s Search for God, lofalitsidwa ndi Mboni za Yehova ndipo likupezekanso pa intaneti pa www.jw.org.