Kuwonjezera Luso Lathu mu Utumiki—Muziphunzitsa Ofalitsa Atsopano

N’chifukwa Chiyani Kuchita Zimenezi N’kofunika? Ophunzira a Yesu atsopano ayenera kuphunzitsidwa kusunga “zinthu zonse” zimene Yesu anatilamula. (Mat. 28:19, 20) Zina mwa zinthu zimenezi ndi kuphunzitsa ena choonadi. Ofalitsa ambiri atsopano anayamba kale kukamba nkhani za m’Sukulu ya Utumiki wa Mulungu, kulalikira kwa achibale komanso kwa anzawo. Komabe akaphunzira zambiri n’kuyamba kuzindikira kuti Yehova akufuna kuti anthu amve uthenga wabwino, amafuna kuti ayambe kulalikira kunyumba ndi nyumba. (Aroma 10:13, 14) Anthu amenewa akavomerezedwa kukhala ofalitsa osabatizidwa, amafunika kuwaphunzitsa kuti asamakhale ndi mantha akamagwira ntchito imeneyi.—Luka 6:40.

Kodi Tingachite Bwanji Zimenezi?

Muzithandiza anthu amene mukuwaphunzitsa kulalikira kupeza zinthu monga mabuku, magazini, timabuku kapena timapepala, zoti akagwiritse ntchito polalikira komanso pophunzitsa. Asonyezeni mabuku amene mumaika m’chikwama chanu mukamapita mu utumiki ndipo afotokozereni mmene mumagwiritsira ntchito buku lililonse.
Muzisankhira limodzi chitsanzo cha ulaliki mu Utumiki Wathu wa Ufumu kenako n’kuyeserera chitsanzocho. Auzeni kuti sakufunika kunena mawu a m’chitsanzocho ndendende. Angathe kunena m’mawu awoawo. Yesererani njira zosiyanasiyana za ulaliki zomwe zingakhale zogwirizana ndi gawo lanu. Mungasankhe njirazi patsamba 82, m’buku la Sukulu ya Utumiki. Auzeninso kufunika kovala ndi kudzikongoletsa moyenera.—2 Akor. 6:3, 4.
Musasiye kuwaphunzitsa. Asonyezeni khadi la gawo lanu komanso aphunzitseni mmene angalembere zokhudza anthu amene akumana nawo polalikira kunyumba ndi nyumba. Asonyezeni mmene angalembere zokhudza anthu amene asonyeza chidwi. Aphunzitseni mmene pawokha angagwiritsire ntchito webusaiti yathu ya jw.org/ny komanso kabuku kakuti, Uthenga Wabwino wa Anthu a Mitundu Yonse akakhala mu utumiki. Aphunzitseninso zomwe angachite kuti athandize anthu omwe asonyeza chidwi.—1 Akor. 3:6.
Muzikhala oleza mtima ndipo muziwayamikira. (Miy. 25:11) Muziwasonyezanso chitsanzo chabwino. Mukamakonda kulalikira komanso mukamasonyeza kuti mumawakonda, zingawachititse kuti nawonso azikonda kulalikira.

Tayesani Kuchita Izi Mwezi Uno:

Yendani ndi munthu amene mukumuphunzitsa kulalikira ndipo mulalikire naye kunyumba ndi nyumba komanso mupite naye ku ulendo wobwereza kapena ku phunziro. Ngati palibe munthu amene mukumuphunzitsa kulalikira, mungayende ndi wofalitsa amene alibe luso kwenikweni.