Isaayyaas
6 Bara Ooziyaan Mootichi duʼetti,+ Yihowaan teessoo dheeraa fi ol kaʼaa taʼe irra taaʼee nan arge;+ fiixeen uffata isaatiis mana qulqullummaa guutee ture. 2 Suraafelonni isa gararraa dhaabbatanii turan; tokkoon tokkoon isaaniis qoochoowwan* jaʼa jaʼa qabu turan. Tokkoon tokkoon isaanii* qoochoowwan lamaan fuula isaanii, akkasumas qoochoowwan lamaan miila isaanii haguuganii turan; qoochoowwan lama lamaan immoo ni barrisu turan.
3 Isaaniis sagalee isaanii ol kaasanii,
“Qulqulluu, qulqulluu, qulqulluu dha Yihowaan Gooftaan Raayyaa.+
Guutummaan lafaas ulfina isaatiin guutamteetti” waliin jedhu turan.
4 Wiirtuuwwan gubanii balbalaas sagalee iyyuun* ni sochoʼan; manichis aaraan guutamee ture.+
5 Anis, “Anaaf wayyoo!
Nama hidhiin isaa xuraaʼe waanan taʼeef,
Uummata hidhiin isaa xuraaʼe+ gidduu waanan jiraadhuuf,
Ijji koos Mooticha, Yihowaa Gooftaa Raayyaa waan argeef,
Duʼuun koo hin oolun!”* jedhe.
6 Yeroo kanatti suraafelota keessaa tokko barrisee gara koo dhufe; barbadaan*+ inni iddoo aarsaa irraa qabduudhaan fudhates harka isaa irra jira ture.+ 7 Innis afaan koo tuqee,
“Kunoo, kun hidhii kee tuqeera.
Yakki kee si irraa balleeffameera,
Cubbuun kees siif dhiifameera” naan jedhe.
8 Achiis sagaleen Yihowaa, “Eenyuunan ergadha? Eenyutu nuuf dhaqa?”+ yeroo jedhu nan dhagaʼe. Anis, “Kunoo ani jira! Ana ergi!” nan jedhe.+
9 Innis akkana jedhee naaf deebise: “Dhaqiitii saba kanaan akkana jedhi:
‘Isin irra deddeebitanii ni dhageessu,
Garuu hin hubattan;
Irra deddeebitanii ni argitu,
Garuu beekumsa tokko illee hin argattan.’+
10 Isaan ija isaaniitiin akka hin argineef,
Gurra isaaniitiinis akka hin dhageenyeef,
Garaan isaanii akka hin hubanneef,+
Isaanis gara kootti akka hin deebinee fi akka hin fayyineef,
Garaan saba kanaa didaa akka taʼu,
Gurri isaaniis duudaa akka taʼu godhi;+
Ija isaaniis walitti fayyisi.”
11 Yeroo kanatti ani, “Yaa Yihowaa, hamma yoomiitti?” nan jedhe. Innis akkana naan jedhe:
“Hamma magaalonni diigamanii namni keessa jiraatu dhabamutti,
Hamma manneen namoota malee hafanitti,
Hamma biyyattiin diigamtee ontutti;+
12 Hamma Yihowaan namoota iddoo fagootti geessutti,+
Akkasumas, hamma biyyattiin garri caalaan ishii ontutti.
13 “Haa taʼu malee, harka kudhan keessaa harki tokko ishii keessatti ni hafa; inni ammas ni gubama; akkuma muka guddaa fi akkuma muka qilxuu warra erga muramanii booda gufuu isaanii hambisaniis ni taʼa; gufuun ishii keessatti hafes sanyii qulqulluu ni taʼa.”