Yohaannis Sadaffaa
1 Maanguddicha* irraa, Gaayos jaallatamaa isa ani garaadhaa jaalladhuuf.
2 Yaa obboleessa jaallatamaa, akkuma amma gaarii siif taʼee jiru, waan hundumaatiin akka siif milkaaʼuu fi fayyaa gaarii akka qabaattu siif nan kadhadha. 3 Obboloonni dhufanii dhugaa qabattee akka jirtu yommuu natti himan baayʼeen gammade; dhugaa keessa deddeebiʼuu kee itti fufteetta.+ 4 Ijoolleen koo dhugaa keessa deddeebiʼaa akka jiran dhagaʼuu caalaa wanti gammachuu guddaa naaf argamsiisu* hin jiru.+
5 Yaa obboleessa jaallatamaa, ati isaan beekuu baattus, wanta obbolootaaf gooteen amanamaa taʼuu kee argisiisteetta.+ 6 Isaan waaʼee jaalala keetii gumicha duratti ragaa baʼaniiru. Maaloo atis karaa Waaqayyoon gammachiisuun isaan geggeessi.+ 7 Sababiin isaas, isaan saboota kaan irraa homaa utuu hin fudhatin kan baʼan maqaa isaatiif jedhanii ti.+ 8 Kanaafuu, nutis dhugaa keessatti isaanii wajjin akka hojjennuuf, namoota akkasii keessummummaa simachuuf dirqamni nu irra jira.+
9 Ani wanta tokko gumichaaf barreesseen ture; taʼus, Diyooxiraaxis inni isaan gidduutti dura buʼaa taʼuu barbaadu+ waan tokko illee kabajaan+ nu irraa hin fudhatu. 10 Ani yoon dhufe, hojii inni hojjetu, jechuunis dubbii hamaa inni waaʼee keenya babalʼisu kanan saaxilu kanaafi.+ Kun iyyuu isatti hanqatee, obboloota+ kabajaan hin simatu; warra isaan simachuu barbaadanis dhowwuu fi gumii keessaa ariʼuuf yaala.
11 Yaa obboleessa jaallatamaa, fakkeenya warra wanta gaarii hojjetanii hordofi malee, fakkeenya warra wanta gadhee hojjetanii hin hordofin.+ Namni wanta gaarii hojjetu kan Waaqayyoo ti.+ Namni wanta gadhee hojjetu Waaqayyoon hin argine.+ 12 Dimeexiros hunda isaanii biratti maqaa gaarii qaba, dhugaanis kana mirkaneesseera. Nutis waaʼee isaa ragaa baʼaa jirra; wanti nuti ragaa baanu dhugaa taʼuu isaa beekta.
13 Ani wantan siif barreessu hedduu qaban ture; garuu kana caalaa biirii fi qalamiidhaan siif barreessuu hin barbaadu. 14 Haa taʼu malee, dhiheenyatti akkan si argu nan abdadha; yeroo sanatti fuulaa fuulatti waliin haasofna.
Nagaan siif haa taʼu.
Michoonni as jiran nagaa siif dhaamaniiru. Michoota achi jiranitti tokko tokkoon nagaa koo naaf himi.