Hisqiʼel
32 Achiis waggaa 12ffaatti, jiʼa 12ffaatti, jiʼicha keessaas guyyaa tokkoffaatti ammas dubbiin Yihowaa akkana jedhu gara koo ni dhufe: 2 “Yaa ilma namaa, Faraʼoon mootii Gibxii ilaalchisee faaruu gaddaa faarfadhu, akkana isaan jedhi:
‘Ati saboota gidduutti akka leenca saafela cimaa taʼee turte,
Taʼus callisiifamteetta.
Ati akka uumama galaanaa guddaa taʼetti+ lageen kee borcaa,
Miila keetiinis bishaan booressaa, akkasumas lageen* xureessaa turte.’
3 Yihowaan Gooftaa Ol Aanaan akkana jedha:
‘Ani yaaʼii saboota hedduutti fayyadamee saaphana koo si irratti nan diriirsa,
Isaanis saaphana kootiin harkisanii si baasu.
4 Ani lafa irratti sin gata;
Dirree irrattis sin darbadha.
Simbirroonni samii hundi akka si irra qubatan nan godha,
Bineensota bosonaa guutummaa lafaas foon keetiin nan quubsa.+
5 Foon kee gaarota irratti nan gata,
Sululawwanis reeffa keetiin nan guuta.+
6 Dhiiga kee isa akka malee dhangalaʼuun gaaronni akka jiidhan nan godha,
Dhiigni kee lageen keessas ni guuta.’*
7 ‘Yommuu ati balleeffamtu, ani samiiwwan haguugee urjiilee isaanii nan dukkaneessa.
Aduu duumessaan nan haguuga,
Addeessis ifa ishii hin kennitu.+
8 Sababii keetiin maddawwan ifaa samiiwwan keessa jiran hundumaa nan dukkaneessa,
Biyya kees dukkanaan nan haguuga’ jedha Yihowaan Gooftaa Ol Aanaan.
9 ‘Yommuun warra si keessaa boojiʼaman gara saboota kan birootti,
Gara biyyoota ati hin beeknetti geessutti+ garaan namoota hedduu akka dhiphatu nan godha.
10 Namoonni hedduun akka sodaatan nan godha,
Mootonni isaaniis yommuu ani isaan duratti goraadee koo mirmirsutti sababii keetiin sodaadhaan ni hollatu.
Guyyaa kufaatii keetti
Tokkoon tokkoon isaanii lubbuu isaaniitiif sodaatanii yeroo hundumaa ni romʼu.’
11 Sababiin isaas, Yihowaan Gooftaa Ol Aanaan akkana jedha:
‘Goraadeen mootii Baabilon si irratti ni dhufa.+
12 Namoonni hedduun sii wajjin jiran goraadee loltoota ciccimootiin akka kufan nan godha,
Hundi isaanii iyyuu saboota hundumaa caalaa gara jabeeyyii dha.+
Isaan of tuulummaa Gibxii gad ni buusu, namoonni hedduun ishii keessa jiran hundis haxaaʼamanii ni balleeffamu.+
13 Horii ishii hundumaa bishaanota ishii warra hedduu taʼan biratti nan balleessa,+
Miilli namaas taʼe kotteen horii lammata isaan hin booressu.’+
14 ‘Yeroo sanatti ani bishaan isaanii nan qulqulleessa,
Lageen isaaniis akka zayitiitti akka yaaʼan nan godha’ jedha Yihowaan Gooftaa Ol Aanaan.
15 ‘Yommuun biyya Gibxii kan gogde, onaa fi biyya wanta ishii keessa guute hundumaa dhabde godhutti,+
Yommuun namoota ishii keessa jiraatan hundumaa rukututti,
Isaan ani Yihowaa taʼuu koo dhugumaan ni hubatu.+
16 Kun faaruu gaddaa ti, namoonni dhugumaan isa ni faarfatu;
Ijoolleen durbaa sabootaas isa ni faarfatu.
Isaan Gibxii fi namoota hedduu ishii keessa jiraniif isa ni faarfatu’ jedha Yihowaan Gooftaa Ol Aanaan.”
17 Achiis waggaa 12ffaatti, jiʼicha keessaas guyyaa 15ffaatti dubbiin Yihowaa akkana jedhu gara koo ni dhufe: 18 “Yaa ilma namaa, namoota hedduu Gibxii keessa jiraataniif booʼi; ishiis taʼe ijoollee durbaa saboota ciccimoo sana warra gara boollaatti* gad buʼaa jiranii wajjin gara iddoo lafa jalaatti gad buusi.
19 “‘Ati bareedinaan eenyuun caalta? Gad buʼiitii warra dhaqna hin qabanne bira ciisi!’
20 “‘Isaan warra goraadeedhaan ajjeefaman gidduutti ni kufu.+ Ishiin goraadeetti dabarfamtee kennamteetti; namoota hedduu ishii keessa jiraatan hundumaa wajjin harkisaatii ishii gataa.
21 “‘Loltoonni ishii warri hundumaa caalaa ciccimoo taʼan Awwaala* gad fagoo keessaa isattii fi warra isa gargaaranitti ni dubbatu. Isaan dhugumaan gad ni buʼu; goraadeedhaan ajjeefamaniis akkuma warra dhaqna hin qabanneetti ni ciciisu. 22 Asoor yaaʼii ishii hundumaa wajjin achi jirti. Awwaalli isaanii isatti marsee jira; hundi isaanii iyyuu goraadeedhaan kufaniiru.+ 23 Awwaalli ishii boolla* gad fagoo keessa jira; guutummaan yaaʼii ishii awwaala ishiitti marsanii jiru; isaan biyya warra jiraatoo keessatti sodaan akka jiraatu waan godhaniif hundi isaanii iyyuu goraadeedhaan ajjeefamaniiru.
24 “‘Eelaam+ namoota hedduu ishii keessa jiraatanii fi goraadeedhaan kufan hundumaa wajjin awwaala ishii bira jirti. Warri biyya warra jiraatoo keessatti jeequmsa uuman utuu dhaqna hin qabatin gara iddoo lafa jalaatti gad buʼaniiru. Warra gara boollaatti* gad buʼanii wajjinis salphina isaanii ni baatu. 25 Isaan namoota ajjeefaman gidduutti siree tokko ishiidhaaf qopheessaniiru; namoonni ishii warri hedduu taʼan hundis awwaala ishiitti marsanii jiru. Hundi isaanii iyyuu dhaqna kan hin qabanne dha; isaan biyya warra jiraatoo keessatti jeequmsa waan uumaniif goraadeedhaan dhumaniiru; warra gara boollaatti* gad buʼanii wajjinis salphina isaanii ni baatu. Inni warra ajjeefaman gidduu kaaʼameera.
26 “‘Meesheek, Tuubaalii+ fi namoonni hedduun isaanii* wajjin jiran hundi achi jiru. Awwaalli isaanii* isatti marsee jira. Hundi isaanii iyyuu dhaqna kan hin qabanne dha; isaan biyya warra jiraatoo keessatti sodaan akka jiraatu waan godhaniif goraadeedhaan waraanamaniiru. 27 Isaan loltoota jajjaboo dhaqna hin qabannee fi kukkufan warra meeshaa waraanaa isaanii wajjin gara Awwaalaatti* gad buʼanii wajjin ni ciciisu mitii? Loltoonni jajjaboon kun biyya warra jiraatoo keessa sodaan akka jiraatu waan godhaniif, isaan goraadee isaanii mataa* isaanii jala, cubbuu isaaniis lafee isaanii irra ni kaaʼu. 28 Ati garuu namoota dhaqna hin qabanne gidduutti ni caccabda; warra goraadeedhaan ajjeefaman biras ni ciista.
29 “‘Edoomis+ taate mootonnii fi geggeessitoonni ishii warri utuma ciccimoo taʼanii jiranii warra goraadeedhaan ajjeefaman gidduu ciciisan sun achi jiru; isaanis warra dhaqna hin qabannee+ fi warra gara boollaatti* gad buʼan bira ni ciciisu.
30 “‘Bulchitoonni* kaabaa hundi Siidoonota+ hundumaa wajjin achi jiru; isaan jabina isaaniitiin sodaan akka uumamu kan godhan taʼus warra ajjeefamanii wajjin salphinaan gad buʼaniiru. Isaan utuma dhaqna hin qabatin warra goraadeedhaan ajjeefaman bira ni ciciisu; warra gara boollaatti* gad buʼanii wajjinis salphina isaanii ni baatu.
31 “‘Fara’oon wantoota kana hundumaa ni arga; wanta namoota hedduu isaa wajjin jiran irra gaʼe hundumaa irraas jajjabina ni argata;+ Fara’oonii fi guutummaan raayyaa waraanaa isaa goraadeedhaan ni ajjeefamu’ jedha Yihowaan Gooftaa Ol Aanaan.
32 “‘Faraʼoon biyya warra jiraatoo keessa sodaan akka jiraatu waan godheef, innii fi namoonni hedduun isaa wajjin jiran hundi warra dhaqna hin qabannee fi goraadeedhaan ajjeefaman gidduu boqochuuf ni ciciisu’ jedha Yihowaan Gooftaa Ol Aanaan.”