Tajaajila Keessan Irratti Weebsaayitii jw.org Fayyadamaa

Weebsaayitiin keenya, meeshaa gaarii misiraachicha “hamma andaara lafaatti” lallabuuf nu gargaaru dha. (HoE. 1:8) Namoonni haasofsiisnu hedduun ofii isaaniitiin Weeb saayitii keenya jw.org jedhamu beekuu hin dandaʼan. Kanaa mannaa, waaʼee Weeb saayitii kanaa baruu kan dandaʼan babalʼisaan tokko erga isaanitti argisiisee booda dha.

Daawwataan olaanaan tokko, viidiyoo Macaafa Qulqulluu Qayyabachuu Kan Qabnu Maaliifi? jedhamu bilbila isaa irratti garagalfatee carraa argatu hundatti fayyadamuudhaan namootatti argisiisa. Fakkeenyaaf, Manaa gara manaatti yommuu tajaajilu akkas jedha: “Namoonni gaaffiiwwan barbaachisoo taʼan sadiif deebii akka argatan gargaaraan jira: Biyyi lafaa rakkoowwan hedduudhaan kan guutame maaliifi? Waaqayyo rakkoowwan kanaaf furmaata akkamii kenna? Hamma yeroo sanaatti rakkoowwan kana dandeenyee jiraachuu kan dandeenyu akkamitti? Viidiyoo gabaabaan kun gaaffiiwwan kanaaf deebii kenna.” Achiis viidiyoo sana taphachiisuu jalqabuudhaan wanta nama sanatti dhagaʼamu ilaala. Viidiyoon sun baayʼee kan nama hawwatu waan taʼeef, namoonni hedduun hamma dhumutti ijasaanii irraa hin buqqifatan. Achiis daawwataa olaanaan sun akkas jedhee isaan gaafata: “Weeb saayitii keenyatti fayyadamuudhaan qayyabannaa Macaafa Qulqulluu gaafachuu akka dandeessu dhageesseetta. Amma garuu ani waanan si bira jiruuf, akkamitti Macaafa Qulqulluu qayyabachuun akka dandaʼamu gabaabseen sitti argisiisa.” Namni inni haasofsiisaa jiru sun yoo irratti walii gale, Birooshura Misiraachoo jedhamutti fayyadamee qayyabannaa jalqabsiisa. Namni sun yoo yeroo hin qabu taʼe immoo, yommuu deebiʼee deemu akka isa jalqabsiisuu dandaʼutti beellama qabata. Hafuura fudhachuuf yommuu kaaffeetti gorus, nama isatti dhihoo jiru karaa namatti toluun erga haasofsiisee booda, akkuma gararraatti caqasame godha. Isin hoo tajaajila keessan irratti Weeb saayitii kanatti fayyadamaa jirtuu?