Tiraaktiitti Fayyadamtanii Marii Jalqabuu kan Dandeessan Akkamitti?

Amajjii 2018tii eegalee, fuulli jalqabaa Barreeffama Qoʼannaa Walgaʼii Jireenyaa fi Tajaajila Kiristiyaanaa mariiwwan fakkeenya taʼan qabatee baʼuu jalqabeera. Akkasumaan barreeffama kennuu mannaa namootaa wajjin marii jalqabuu irratti akka xiyyeeffannu jajjabeeffamaa jirra. Babalʼistoonni akkuma haala isaatti akkaataa dhiheenyaa isaanii akka jijijjiiran gargaaruuf, viidiyoowwan maree fakkeenya taʼu qabatanii fi Kitaaba Qulqulluutti qofa fayyadamanii akkamitti marii jalqabuun akka dandaʼamu ibsan qophaaʼaa jiru. Kana jechuun garuu yeroo manaa gara manaa lallabnutti barreeffamootatti fayyadamuu hin qabnu jechuu dhaa? Lakki! Fakkeenyaaf, tiraaktonni karaa buʼa qabeessa taʼeen marii jalqabuuf nu gargaaruu dandaʼu. Tiraaktii kam iyyuu mala armaan gadiitti argamuun fayyadamnee namootaaf kennuu dandeenya:

1. Gaaffiiwwan deebii filannoo gara garaa qabanii fi fuula jalqabaa irra jiranitti fayyadamaa.

2. Deebii Kitaabni Qulqulluun kennuu fi jalqaba fuula lammaffaa irra jiru itti argisiisaa. Yoo yeroo qabaattan, odeeffannoo tiraakticha keessa jiran dubbisaatii irratti mariʼadhaa.

3. Tiraakticha nama haasofsiistaniif kennaa, isa hafe immoo yeroo isaaf mijatetti akka dubbisu isa jajjabeessaa.

4. Deemuu keessan dura, mata duree “Wantoota Kanarratti Yaadi” jedhu itti argisiisaatii yeroo itti aanu deebii Kitaabni Qulqulluun kennu irratti mariʼachuuf haala mijeessaa.

Deebitanii yommuu dhaqxan, deebii isaa irratti mariʼadhaa; akkasumas gaaffii kan biraa yeroo itti aanu irratti mariʼattan gaafadhaa. Gaaffii weebsaayitii keenya irra jirutti ykn fuula dhumaa barreeffamoota keenya irra jirutti fayyadamuu dandeessu. Yeroo sirrii taʼetti, birooshura Misiraachoo Waaqayyo Biraa Dhufe! jedhamu ykn barreeffama Meeshaalee Barsiisuuf Itti Fayyadamnu keessa jiru tokko kennaafii.