Чи дӕм байхъуыста, уыдонӕй алкӕмӕ дӕр ногӕй бацу
1 Махӕй бирӕтӕ абон Хуыцауӕн уый фӕрцы лӕггад кӕны, ӕмӕ хъусынгӕнджытӕй чидӕр йӕ хъус ӕрдардта, хорз хабармӕ цы цӕстӕй ракастыстӕм, уымӕ, ӕмӕ нӕм ӕнӕзивӕгӕй цыд (чи зоны, иу ӕмӕ дыууӕ хатты нӕ), цӕмӕй фылдӕр базыдтаиккам. Мах дӕр, иу гыццыл дӕр нӕм чи байхъуса, уыдонӕй алкӕмӕ дӕр хъуамӕ ногӕй цӕуӕм. Ӕцӕгдӕр, адӕммӕ ногӕй цӕуын хъӕуы, уымӕн ӕмӕ нӕ хӕс у ахуыргӕнинӕгтӕ цӕттӕ кӕнын (Матф. 28:19, 20).
2 Лӕмбынӕг у. Адӕймаг нын нӕ литературӕ куы нӕ иса, уӕддӕр йӕ цӕсгом, йӕ хъӕлӕсы уаг кӕнӕ йӕ ныхӕстӕй бӕрӕг вӕййы, хорз хабармӕ цы цӕстӕй ракаст, уый. Уымӕй бамбарӕм, ногӕй йӕм бацӕуын хъӕуы ӕви нӕ. Иу ӕфсымӕр фӕд-фӕдыл фондз къуырийы цыд иу нӕлгоймагмӕ, фӕлӕ-иу ын литературӕ нӕ ныууагъта. Ӕхсӕзӕм хатт ӕм куы бацыд, уӕд лӕг литературӕ райста ӕмӕ уый фӕстӕ Библи ахуыр кӕныныл дӕр сразы.
3 Кӕд дӕм адӕймаг иу гыццыл дӕр байхъуыста, уӕд ӕм ӕвӕстиатӕй бацу, зӕгъӕм, цалдӕр боны фӕстӕ. Адӕймаджы зӕрдӕйы цы байтыдтай, уый «Фыдбылызӕн» аскъӕфын ма бауадз (Матф. 13:19). Иугӕр бӕлвырд рӕстӕгмӕ баныхас кодтай, уӕд дӕ ныхасӕн хицау у ӕмӕ-иу ӕм бацу (Матф. 5:37).
4 Уынджы хъусын кӕнгӕйӕ. Уынджы кӕнӕ дын фадат куы фӕзыны, уӕд хъусын кӕнгӕйӕ фӕархайыс, цӕмӕй сын дарддӕр баххуыс кӕнай? Уӕ ныхасы кӕрон дӕ бон у зӕгъын: «Тынг ӕхсызгон мын уыд демӕ аныхас кӕнын. Кӕм ма у нӕ бон ногӕй фембӕлын?» Гӕнӕн куы вӕййы, уӕд иуӕй-иу хъусынгӕнджытӕ адӕймагӕн сӕ телефоны номыртӕ раттынц, йе та йын йӕхион дӕр райсынц. Адӕймаг дӕ уынджы уыцы иу ран хъусын кӕнгӕйӕ куы уына, уӕд дын, чи зоны, йӕ телефоны номыртӕ кӕнӕ йӕ адрис ратта. Кӕд нӕ, уӕддӕр ыл ӕндӕр хатт уынджы куы фембӕлай, уӕд бацархай, цӕмӕй та йемӕ аныхас кӕнай.
5 Ӕхсызгон нын куыннӕ вӕййы, дон кӕуыл кодтам, кӕмӕ зылдыстӕм, уыцы зайӕгойтӕ дидинӕг куыд ӕфтауынц, уымӕ кӕсын. Афтӕ стыр циндзинад нын хӕсдзӕн, адӕммӕ-иу ногӕй куы бацӕуӕм, цӕмӕй сӕ уырнындзинад фидар кӕна (1 Кор. 3:6). Дӕ нысан уӕд, гыццыл дӕр дӕм чи байхъуыста, уыдонӕй алкӕмӕ дӕр ногӕй бацӕуын.