‘ਪਰਮੇਸ਼ੁਰ ਦਾ ਬਚਨ ਗੁਣਕਾਰ ਹੈ’
1 ਪੌਲੁਸ ਰਸੂਲ ਨੇ ਲਿਖਿਆ: ‘ਪਰਮੇਸ਼ੁਰ ਦਾ ਬਚਨ ਜੀਉਂਦਾ ਅਤੇ ਗੁਣਕਾਰ ਹੈ।’ (ਇਬ. 4:12) ਇਹ ਕਹਿਣ ਤੋਂ ਉਸ ਦਾ ਕੀ ਮਤਲਬ ਸੀ? ਬਾਈਬਲ ਵਿਚ ਪਾਏ ਜਾਂਦੇ ਪਰਮੇਸ਼ੁਰ ਦੇ ਬਚਨ ਜਾਂ ਸੰਦੇਸ਼ ਦਾ ਲੋਕਾਂ ਉੱਤੇ ਕਾਫ਼ੀ ਅਸਰ ਪੈ ਸਕਦਾ ਹੈ। ਬਾਈਬਲ ਵਿਚ ਪਾਈ ਜਾਂਦੀ ਬੁੱਧ ਵਿਚ ਐਨੀ ਤਾਕਤ ਹੈ ਕਿ ਉਹ ਇਕ ਵਿਅਕਤੀ ਦੀ ਜ਼ਿੰਦਗੀ ਨੂੰ ਬਦਲ ਸਕਦੀ ਹੈ। ਬਾਈਬਲ ਵਿੱਚੋਂ ਜੋ ਦਿਲਾਸਾ ਤੇ ਆਸ਼ਾ ਮਿਲਦੀ ਹੈ, ਉਨ੍ਹਾਂ ਕਰਕੇ ਇਨਸਾਨ ਆਪਣੇ ਜੀਵਨ-ਦਾਤਾ ਯਹੋਵਾਹ ਪਰਮੇਸ਼ੁਰ ਦੇ ਨੇੜੇ ਆਉਂਦੇ ਹਨ। ਇਸ ਦਾ ਸੰਦੇਸ਼ ਚੰਗੇ ਦਿਲ ਵਾਲੇ ਲੋਕਾਂ ਨੂੰ ਸਦਾ ਦੀ ਜ਼ਿੰਦਗੀ ਵੱਲ ਜਾਂਦੇ ਰਾਹ ਤੇ ਪਾ ਸਕਦਾ ਹੈ। ਇਸ ਲਈ, ਜਦੋਂ ਅਸੀਂ ਦੂਜਿਆਂ ਨੂੰ ਗਵਾਹੀ ਦਿੰਦੇ ਹਾਂ, ਤਾਂ ਸਾਨੂੰ ਬਾਈਬਲ ਦਾ ਇਸਤੇਮਾਲ ਕਰਨਾ ਚਾਹੀਦਾ ਹੈ।
2 ਹਰ ਮੌਕੇ ਤੇ ਇਕ ਆਇਤ ਪੜ੍ਹੋ: ਦੇਖਣ ਵਿਚ ਆਇਆ ਹੈ ਕਿ ਬਹੁਤ ਸਾਰੇ ਪ੍ਰਕਾਸ਼ਕ ਪ੍ਰਚਾਰ ਕਰਨ ਸਮੇਂ ਬਾਈਬਲ ਇਸਤੇਮਾਲ ਨਹੀਂ ਕਰਦੇ। ਕਿਤੇ ਤੁਸੀਂ ਤਾਂ ਨਹੀਂ ਇੱਦਾਂ ਕਰਦੇ? ਕਿਉਂਕਿ ਬਹੁਤ ਸਾਰੇ ਲੋਕਾਂ ਕੋਲ ਲੰਬੀ ਗੱਲਬਾਤ ਕਰਨ ਦਾ ਸਮਾਂ ਨਹੀਂ ਹੁੰਦਾ, ਇਸੇ ਕਰਕੇ ਸ਼ਾਇਦ ਤੁਸੀਂ ਸਿਰਫ਼ ਕਿਤਾਬਾਂ-ਰਸਾਲੇ ਹੀ ਦੇ ਦਿੰਦੇ ਹੋ ਜਾਂ ਕਿਸੇ ਆਇਤ ਨੂੰ ਪੜ੍ਹੇ ਬਿਨਾਂ ਹੀ ਉਸ ਦੀ ਵਿਆਖਿਆ ਕਰ ਦਿੰਦੇ ਹੋ। ਅਸੀਂ ਸਾਰੇ ਪ੍ਰਕਾਸ਼ਕਾਂ ਨੂੰ ਉਤਸ਼ਾਹਿਤ ਕਰਦੇ ਹਾਂ ਕਿ ਜਦੋਂ ਤੁਸੀਂ ਖ਼ੁਸ਼ ਖ਼ਬਰੀ ਦਿੰਦੇ ਹੋ, ਤਾਂ ਬਾਈਬਲ ਵਿੱਚੋਂ ਘੱਟੋ-ਘੱਟ ਇਕ ਆਇਤ ਪੜ੍ਹਨ ਦੀ ਪੂਰੀ ਕੋਸ਼ਿਸ਼ ਕਰੋ। ਇਸ ਤਰ੍ਹਾਂ ਕਰਨ ਤੇ ਲੋਕਾਂ ਨੂੰ ਇਹ ਪਤਾ ਲੱਗੇਗਾ ਕਿ ਸਾਡਾ ਸੰਦੇਸ਼ ਪਰਮੇਸ਼ੁਰ ਦੇ ਬਚਨ ਵਿੱਚੋਂ ਹੈ।
3 ਹਾਲਾਂਕਿ ਬਹੁਤ ਘੱਟ ਲੋਕ ਬਾਈਬਲ ਪੜ੍ਹਦੇ ਹਨ, ਪਰ ਫਿਰ ਵੀ ਆਮ ਤੌਰ ਤੇ ਲੋਕ ਇਸ ਦਾ ਆਦਰ ਕਰਦੇ ਹਨ। ਜਦੋਂ ਕੋਈ ਸੰਦੇਸ਼ ਸਿੱਧੇ ਤੌਰ ਤੇ ਪਰਮੇਸ਼ੁਰ ਦੇ ਬਚਨ ਵਿੱਚੋਂ ਪੜ੍ਹ ਕੇ ਸੁਣਾਇਆ ਜਾਂਦਾ ਹੈ, ਤਾਂ ਕੰਮਾਂ-ਕਾਰਾਂ ਵਿਚ ਰੁੱਝੇ ਲੋਕ ਵੀ ਅਕਸਰ ਇਸ ਸੰਦੇਸ਼ ਨੂੰ ਸੁਣਨ ਲਈ ਇਕ-ਦੋ ਮਿੰਟ ਜ਼ਰੂਰ ਕੱਢ ਲੈਂਦੇ ਹਨ। ਜਦੋਂ ਇਕ ਢੁਕਵੀਂ ਆਇਤ ਨੂੰ ਦਿਲੀ ਭਾਵਨਾਵਾਂ ਨਾਲ ਪੜ੍ਹਿਆ ਜਾਂਦਾ ਹੈ ਤੇ ਥੋੜ੍ਹੇ ਸ਼ਬਦਾਂ ਵਿਚ ਉਸ ਨੂੰ ਸਮਝਾਇਆ ਜਾਂਦਾ ਹੈ, ਤਾਂ ਸੁਣਨ ਵਾਲਿਆਂ ਉੱਤੇ ਯਹੋਵਾਹ ਦੇ ਬਚਨ ਦੀ ਤਾਕਤ ਚੰਗਾ ਪ੍ਰਭਾਵ ਪਾ ਸਕਦੀ ਹੈ। ਪਰ ਤੁਸੀਂ ਕਿੱਦਾਂ ਗੱਲਬਾਤ ਸ਼ੁਰੂ ਕਰਨ ਤੋਂ ਬਾਅਦ ਬਾਈਬਲ ਵਿੱਚੋਂ ਇਕ ਆਇਤ ਪੜ੍ਹ ਸਕਦੇ ਹੋ?
4 ਰਸਾਲੇ ਵੰਡਣ ਸਮੇਂ ਆਇਤ ਪੜ੍ਹਨ ਦੀ ਕੋਸ਼ਿਸ਼ ਕਰੋ: ਇਕ ਸਫ਼ਰੀ ਨਿਗਾਹਬਾਨ ਜਦੋਂ ਰਸਾਲੇ ਵੰਡਣ ਵਿਚ ਹਿੱਸਾ ਲੈਂਦਾ ਹੈ, ਤਾਂ ਉਹ ਬਾਈਬਲ ਦੀ ਚੰਗੀ ਵਰਤੋਂ ਕਰਦਾ ਹੈ। ਉਹ ਛੋਟੀ ਬਾਈਬਲ ਨੂੰ ਆਪਣੀ ਜੇਬ ਵਿਚ ਲੈ ਕੇ ਜਾਂਦਾ ਹੈ। ਰਸਾਲੇ ਦੇਣ ਅਤੇ ਉਨ੍ਹਾਂ ਵਿੱਚੋਂ ਕਿਸੇ ਇਕ ਲੇਖ ਉੱਤੇ ਥੋੜ੍ਹੇ ਸ਼ਬਦਾਂ ਵਿਚ ਟਿੱਪਣੀ ਕਰਨ ਤੋਂ ਬਾਅਦ, ਉਹ ਬਿਨਾਂ ਹਿਚਕਿਚਾਏ ਬਾਈਬਲ ਖੋਲ੍ਹਦਾ ਹੈ ਤੇ ਲੇਖ ਨਾਲ ਸੰਬੰਧਿਤ ਆਇਤ ਪੜ੍ਹਦਾ ਹੈ। ਸ਼ਾਇਦ ਤੁਸੀਂ ਵੀ ਇਹ ਸਵਾਲ ਪੁੱਛ ਕੇ ਇੱਦਾਂ ਕਰ ਸਕਦੇ ਹੋ: “ਇਸ ਹੌਸਲਾਦਾਇਕ ਵਾਅਦੇ ਬਾਰੇ ਤੁਹਾਡਾ ਕੀ ਖ਼ਿਆਲ ਹੈ?” ਤੇ ਫਿਰ ਇਕ ਚੋਣਵੀਂ ਆਇਤ ਪੜ੍ਹੋ।
5 ਹਰੇਕ ਸੁਣਨ ਵਾਲੇ ਨੂੰ ਬਾਈਬਲ ਵਿੱਚੋਂ ਇਕ ਜਾਂ ਦੋ ਆਇਤਾਂ ਪੜ੍ਹ ਕੇ ਸੁਣਾਉਣ ਦਾ ਟੀਚਾ ਰੱਖੋ। ਬਾਈਬਲ ਦੀ ਪ੍ਰੇਰਣਾਦਾਇਕ ਤਾਕਤ ਹੋਰ ਲੋਕਾਂ ਲਈ ਪਰਮੇਸ਼ੁਰ ਦੇ ਨੇੜੇ ਆਉਣ ਦਾ ਰਾਹ ਖੋਲ੍ਹ ਸਕਦੀ ਹੈ।—ਯੂਹੰ. 6:44.