ਹੋਰ ਵਧੀਆ ਪ੍ਰਚਾਰਕ ਬਣੋ—ਕਾਰੋਬਾਰੀ ਇਲਾਕਿਆਂ ਵਿਚ ਪ੍ਰਚਾਰ ਕਰੋ

ਇਸ ਤਰ੍ਹਾਂ ਕਰਨਾ ਜ਼ਰੂਰੀ ਕਿਉਂ ਹੈ: ਬਹੁਤ ਸਾਰੇ ਲੋਕ ਘੰਟਿਆਂ-ਬੱਧੀ ਕੰਮ ਕਰਦੇ ਹਨ ਜਿਸ ਕਰਕੇ ਉਨ੍ਹਾਂ ਨੂੰ ਰਾਜ ਦਾ ਸੰਦੇਸ਼ ਸੁਣਾਉਣ ਦਾ ਸਭ ਤੋਂ ਵਧੀਆ ਤਰੀਕਾ ਹੈ ਉਨ੍ਹਾਂ ਦੀ ਕੰਮ ਦੀ ਜਗ੍ਹਾ ʼਤੇ ਪ੍ਰਚਾਰ ਕਰਨਾ। ਕਾਰੋਬਾਰੀ ਥਾਵਾਂ ʼਤੇ ਪ੍ਰਚਾਰ ਕਰਨਾ ਮਜ਼ੇਦਾਰ ਹੋ ਸਕਦਾ ਹੈ ਅਤੇ ਵਧੀਆ ਨਤੀਜੇ ਨਿਕਲ ਸਕਦੇ ਹਨ। ਕਿਉਂ? ਕਿਉਂਕਿ ਉੱਥੇ ਸਾਨੂੰ ਹਮੇਸ਼ਾ ਲੋਕ ਮਿਲਦੇ ਹਨ ਅਤੇ ਉੱਥੇ ਕੰਮ ਕਰਨ ਵਾਲੇ ਸਾਡੇ ਨਾਲ ਨਰਮਾਈ ਨਾਲ ਪੇਸ਼ ਆਉਂਦੇ ਹਨ ਕਿਉਂਕਿ ਉਹ ਸਾਨੂੰ ਆਪਣੇ ਗਾਹਕ ਸਮਝਦੇ ਹਨ। ਚੰਗੀ ਤਰ੍ਹਾਂ ਪ੍ਰਚਾਰ ਕਰਨ ਲਈ ਪਬਲੀਸ਼ਰਾਂ ਨੂੰ ਸਮਝਦਾਰੀ ਵਰਤਣੀ ਚਾਹੀਦੀ ਹੈ ਅਤੇ ਉਨ੍ਹਾਂ ਦਾ ਪਹਿਰਾਵਾ ਤੇ ਹਾਰ-ਸ਼ਿੰਗਾਰ ਢੁਕਵਾਂ ਹੋਣਾ ਚਾਹੀਦਾ ਹੈ। (2 ਕੁਰਿੰ. 6:3) ਇਸ ਲਈ ਸਰਵਿਸ ਓਵਰਸੀਅਰ ਨੂੰ ਧਿਆਨ ਰੱਖਣਾ ਚਾਹੀਦਾ ਹੈ ਕਿ ਕਾਰੋਬਾਰੀ ਇਲਾਕਿਆਂ ਵਿਚ ਕਿਸ ਨੇ ਕਿੰਨੀ ਵਾਰੀ ਪ੍ਰਚਾਰ ਕੀਤਾ ਹੈ।

ਇਸ ਤਰ੍ਹਾਂ ਕਿਵੇਂ ਕਰੀਏ:

ਛੋਟੀ ਜਿਹੀ ਪੇਸ਼ਕਾਰੀ ਤਿਆਰ ਕਰੋ। ਜੇ ਅਸੀਂ ਕਰਮਚਾਰੀ ਦਾ ਬਹੁਤ ਜ਼ਿਆਦਾ ਸਮਾਂ ਲੈ ਲਿਆ, ਤਾਂ ਹੋ ਸਕਦਾ ਹੈ ਕਿ ਅਗਲੀ ਵਾਰ ਉਸ ਨਾਲ ਸਾਨੂੰ ਗੱਲ ਕਰਨ ਦਾ ਮੌਕਾ ਹੀ ਨਾ ਦਿੱਤਾ ਜਾਵੇ।
ਉਹ ਸਮਾਂ ਚੁਣੋ ਜਦੋਂ ਦੁਕਾਨਾਂ ʼਤੇ ਜ਼ਿਆਦਾ ਲੋਕ ਨਹੀਂ ਹੁੰਦੇ ਜਿਵੇਂ ਕਿ ਸਵੇਰ ਦੇ ਸਮੇਂ।
ਪਹਿਲਾਂ ਮੈਨੇਜਰ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕਰੋ। ਪਿਆਰ ਅਤੇ ਦੋਸਤਾਨਾ ਤਰੀਕੇ ਨਾਲ ਗੱਲ ਕਰੋ। ਤੁਸੀਂ ਕਹਿ ਸਕਦੇ ਹੋ, “ਅਸੀਂ ਥੋੜ੍ਹੇ ਸਮੇਂ ਲਈ ਉਨ੍ਹਾਂ ਲੋਕਾਂ ਨਾਲ ਕੰਮ ਦੀ ਥਾਂ ਤੇ ਗੱਲ ਕਰ ਰਹੇ ਹਾਂ ਜੋ ਸਾਨੂੰ ਘਰ ਨਹੀਂ ਮਿਲਦੇ।” ਮੈਨੇਜਰ ਨਾਲ ਛੋਟੀ ਜਿਹੀ ਗੱਲਬਾਤ ਕਰੋ ਅਤੇ ਫਿਰ ਕੋਈ ਟ੍ਰੈਕਟ, ਰਸਾਲੇ ਜਾਂ ਕੋਈ ਹੋਰ ਪ੍ਰਕਾਸ਼ਨ ਦਿਓ। ਅਸੀਂ ਨਹੀਂ ਚਾਹੁੰਦੇ ਕਿ ਲੋਕ ਸਾਨੂੰ ਚੀਜ਼ਾਂ ਵੇਚਣ ਵਾਲੇ ਸਮਝਣ, ਇਸ ਲਈ ਵਧੀਆ ਹੋਵੇਗਾ ਕਿ ਅਸੀਂ ਉਨ੍ਹਾਂ ਨਾਲ ਦਾਨ ਬਾਰੇ ਗੱਲ ਨਾ ਕਰੀਏ। ਇਸ ਬਾਰੇ ਉਦੋਂ ਹੀ ਗੱਲ ਕਰਨੀ ਚਾਹੀਦੀ ਹੈ ਜਦੋਂ ਉਹ ਪੁੱਛਦੇ ਹਨ ਕਿ ਸਾਡੇ ਕੰਮ ਦਾ ਖ਼ਰਚਾ ਕਿੱਥੋਂ ਆਉਂਦਾ ਹੈ।
ਜੇ ਮੈਨੇਜਰ ਦਾ ਸੁਭਾਅ ਚੰਗਾ ਹੈ, ਤਾਂ ਉਸ ਤੋਂ ਦੂਸਰੇ ਕਰਮਚਾਰੀਆਂ ਨਾਲ ਥੋੜ੍ਹੇ ਸਮੇਂ ਲਈ ਗੱਲ ਕਰਨ ਦੀ ਇਜਾਜ਼ਤ ਲਓ। ਕੁਝ ਦੁਕਾਨਾਂ ਤੇ ਪੁੱਛਣਾ ਵਧੀਆ ਹੋਵੇਗਾ ਕਿ ਤੁਸੀਂ ਉਸ ਥਾਂ ਤੇ ਕੁਝ ਪ੍ਰਕਾਸ਼ਨ ਛੱਡ ਸਕਦੇ ਹੋ ਕਿ ਨਹੀਂ ਜਿੱਥੇ ਕਰਮਚਾਰੀ ਰੋਟੀ ਖਾਂਦੇ ਜਾਂ ਆਰਾਮ ਕਰਦੇ ਹਨ।
ਗੱਲਬਾਤ ਕਰਨ ਲਈ ਸਮਝਦਾਰੀ ਨਾਲ ਵਿਸ਼ੇ ਚੁਣੋ। ਸੂਝ-ਬੂਝ ਤੋਂ ਕੰਮ ਲਓ ਤੇ ਹਾਲਾਤ ਮੁਤਾਬਕ ਢਲ਼ਣ ਲਈ ਤਿਆਰ ਰਹੋ। ਮਿਸਾਲ ਲਈ, ਜੇ ਕਰਮਚਾਰੀ ਕਿਸੇ ਗਾਹਕ ਨਾਲ ਗੱਲ ਕਰ ਰਿਹਾ ਹੈ, ਤਾਂ ਉਦੋਂ ਤਕ ਉਸ ਨਾਲ ਗੱਲ ਨਾ ਕਰੋ ਜਦੋਂ ਤਕ ਉਹ ਵਿਹਲਾ ਨਹੀਂ ਹੋ ਜਾਂਦਾ।

ਇਸ ਮਹੀਨੇ ਇੱਦਾਂ ਕਰਨ ਦੀ ਕੋਸ਼ਿਸ਼ ਕਰੋ:

ਆਪਣੀ ਅਗਲੀ ਪਰਿਵਾਰਕ ਸਟੱਡੀ ਦੌਰਾਨ ਇਕ ਛੋਟੀ ਜਿਹੀ ਪੇਸ਼ਕਾਰੀ ਦੀ ਪ੍ਰੈਕਟਿਸ ਕਰੋ ਜੋ ਤੁਸੀਂ ਕਾਰੋਬਾਰੀ ਇਲਾਕੇ ਵਿਚ ਵਰਤ ਸਕਦੇ ਹੋ।