E Prueba Penoso di Maggy i Mi Bendicion

Diamars, 2 di mei, 1995, tabata e dia cu mi yu muher a nace i mi esposa a muri. Lamentablemente, Maggy nunca a mira e cara di su baby. Awor ta mi speransa pa introducí Tamara na su mama ora e ser resucitá.

DESPUES di 16 aña di matrimonio, e dokter di mi esposa, Maggy, a bis’é cu e tabatin cancer na pechu i tabatin solamente un par di luna di bida. Esei tabata cincu aña pasá. Afortunadamente, Maggy por a biba basta normal durante e último añanan ei di su bida. Solamente na fin e dolor a bira casi insoportabel.

Debí n’e extensidad dje cancer, e dokternan a bisa cu tabatin poco probabilidad cu lo e sali na estado. Pues bo por imaginá nos shok ora cu, durante un control rutinario cu ultrasound pa chek con e tumornan canceroso tabata progresando, nan a mira un baby den su matris! E tabata un mucha muher! Maggy tabata cuater luna i mei na estado. E prospecto di bira mama pa promé biaha a yen’é cu goso.

Maggy a haci absolutamente tur loke e tabata por pa haci sigur cu e baby lo a nace salú. E tabata wak bon kico e ta come, i asta durante e último dos simannan di su bida, ora e dolor a bira insoportabel, e tabata tuma píldora pa calma dolor solamente ora cu e no por a wanta e dolor mas.

Bendicioná cu un Baby Salú

Diasabra, 29 di april, Maggy su curason a cuminsá bati duru i el a bisa: “Mi ta kere cu mi ta bai muri.” Mi a keda cerca dje henter e fin di siman. Despues di yama e dokter dialuna, di biaha mi a hib’é n’e hospital di Montreal, Cánada, no muchu leu for di nos cas na St. Jérôme.

Rond di 5:30 p.m. e siguiente mainta, un enfermera a cana pasa dilanti e kamber di Maggy i a ripará cu e tabata den dificultad. Aparentemente, e tabata hañando un atake di curason. Di biaha nan a yama un dokter dje otro kamber. Maske cu Maggy a muri, e tim médico a logra scapa nos baby. Tamara a nace dos luna i mei prematuro i a pisa 2 liber i 1 ons.

Ya cu Tamara su conteo di glóbulonan di sanger tabata abou, e dokternan kier a duna un transfusion di sanger. Sin embargo, nan a ser animá pa usa e hormon sintético erythropoyetin. Esei nan a haci, i ora e uso dje producto aki a resultá di tin éxito den subi su conteo di glóbulonan di sanger, un enfermera a bisa: “Pakico nan no ta usa esei cu tur e babynan?”

Tamara tabatin otro problemanan asociá cu e nacementu prematuro, pero a resolvé tur esakinan. De echo, ora Dr. Watters, un neurólogo, a samin’é mas despues, el a bisa e enfermera: “Mi kier sa cu bo a duná mi e baby robes pa saminá; e ta parcé mi perfectamente normal.”

Enfrentando Morto i Tratando cu e Situacion Despues

Tabata difícil pa mira Maggy muri. Mi a sintí mi asina impotente. Tabata hopi duru pa mi papia tocante e morto di Maggy. Pero, mi a haci esei ora mi rumannan cristian a bin n’e hospital. Poco-poco e dolor a kita miéntras mas mi a papia di dje. Ki ora cu mi lesa un artículo dje Toren di Vigilancia of Spierta! cu a tocá mi particularmente, mi tabata ward’é den un seccion chikitu personal di mi biblioteca i mi tabata sak’é i les’é segun mi a sinti e necesidad.

Un otro desafio tabata pa regresá na un cas bashí. Soledad ta duru pa enfrentá. Ainda e sintimentu aki ta bini ariba, maske mi ta beneficiá di compañerismo cristian edificante. Ami cu Maggy tabatin e custumber di haci tur cos huntu, i nos a papia tocante e problema cu lo mi haña cu soledad. Maggy tabata kier pa mi casa di nobo. Pero esei no ta bai asina fácil.

Apoyo di Compañeronan Cristian

Mi no sa kico lo mi a haci sin e apoyo dje Comité di Contacto cu Hospital (CCH) di Testigonan di Jehova. E mainta cu Maggy a fayecé, un Testigo dje CCH cu conocimentu dje materia tabata einan n’e hospital i a duná mi e yudansa cu mi tabatin mester.

E personal di hospital a keda impresioná cu e yudansa cu mi a haña for di nos congregacion cristian na St. Jérôme como tambe di otro congregacionnan den e área. E anochi cu nan a anunciá na nos reunion cristian cu Maggy a fayecé, mas cu 20 ruman kerí a reaccioná dor di ofrecé nan yudansa. E apoyo tabata en berdad abrumador.

Rumannan a prepará cuminda pa mi; e vriezer di mi frishider tabata yen-yen pa lunanan. Mi famia i rumannan cristian asta a soru pa busca paña pa mi yu muher. Nan a trece asina tantu cos, cu mi no tabatin suficiente lugá pa warda nan tur.

Placernan Actual i Futuro Prospectonan

Tamara ta yudá mi lubidá mi pérdida. El a conkistá mi curason completamente. Tur dia ora mi cumind’é cu un “bon dia” alegre, e ta debolbé un sonrisa grandi, ta cuminsá “papia,” i sagudí cu su brasa i pianan, yen di emocion.

Como un astrónomo amateur, mi ta spera cu anhelo e dia cu mi por tene Tamara riba mi scochi i lagu’é wak via mi telescop na e maraviyanan celestial di nos Magnífico Hacidor, Jehova. Pensa riba bida sin fin den Paradijs riba tera ta un berdadero fuente di consuelo. I sabiendo cu esaki ta e prospecto cu tin Tamara su dilanti ta duná mi mas goso ainda.—Salmo 37:9-11, 29.

Refleccionando bek riba e sucesonan dje último cincu añanan, mi por describí nan mihó como tantu traumático i gososo. Mi a siña hopi tocante mi mes i tocante bida mes. Cu deseo intenso mi ta spera e futuro ora, manera Bijbel ta describí, “morto lo no t’ei mas, tampoco lo tin mas lamento ni sclamacion ni dolor.”—Revelacion 21:3, 4.

Anto, den e resureccion, Maggy lo por hala un rosea profundo sin dolor. Mas cu tur cos, mi speransa i deseo firme ta pa ta einan pa introducí Tamara na Maggy, di manera cu e por mira e mucha muher chikitu pa ken el a haci asina tantu.—Manera Lorne Wilkins a relat’é.

[Plachi na página 26]

Cu mi esposa

[Plachi na página 26]

Nos yu muher, Tamara