Bendicioná Jehova “Henter Dia”
1 Salmo 145:2 ta contené un promesa cu Rey David a haci na Jehova: “Henter dia lo mi bendicioná bo, i lo mi alabá bo nomber te na tempu indefiní, asta pa semper.” Nos tambe tin motibu pa bendicioná i alabá nos Tata celestial! Pero con nos por imitá e ehempel di David den halsa Jehova su soberania “henter dia”?
2 Yena Nos Curason cu Aprecio pa Jehova: Studio regular di e Palabra di Dios ta profundisá nos gratitud pa loke Jehova a haci, ta haciendo i lo haci ainda pa nos. Segun cu nos ta crece den aprecio pa su obranan maraviyoso, nos lo haña nos mes ta papia sin stop tocante su bondad. (Sal. 145:7) Ansiosamente nos lo alabá Jehova na tur ocasion apropiado.
3 Alabá Jehova den Combersacion Diario: Ora nos ta combersando cu bisiñanan, compañeronan di scol, coleganan i otro hende cu nos ta topa diariamente, nos por haña oportunidadnan pa compartí nos speransa cu nan. Un bisiña tal bes ta expresá preocupacion tocante crímen den e comunidad; un compañero di scol por tin ansiedad tocante abusu di droga of inmoralidad; un colega di trabou tal bes ta expresá su opinion tocante un of otro cuestion político. Nos por señalá na e principionan i promesanan den e Palabra di Dios cu ta mustra e proceder corecto pa sigui awor i e eventual solucion pa e problemanan aki. Tal palabranan papiá na e “tempu oportuno” por ta un bendicion!—Pro. 15:23.
4 Papia Tocante Jehova Tempu Completo: E persona cu aprecio profundo pa Jehova kier compartí e bon nobo cu mas tantu otro hende cu ta posibel. (Sal. 40:8-10) Relacioná cu esaki nos mester puntra nos mes, ‘Mi ta haciendo tur loke mi circunstancianan ta permití?’ Hopi ruman a ripará cu haciendo algun ahuste razonabel, nan por a bira pioneronan regular. Si circunstancianan actual no ta permití esei, nos por inscribí como pioneronan auxiliar? Ya cu e binidero temporada di Memorial ta un tempu pa mas actividad, e lunanan di mart cu april lo ta un tempu excelente pa aumentá nos sirbishi dor di traha como pionero auxiliar.
5 Yuda Esnan Nobo pa Djoin Nos den Bendicioná Jehova: E celebracion dje Memorial di Jesus su morto semper ta recordá nos di motibunan pa ta gradicidu na Jehova i pa alabá Su nomber. Esaki ta un tempu specialmente bon pa animá nos studiantenan di Bijbel pa djoin nos den papia públicamente tocante Jehova su reinado. Insta nan pa refleccioná huntu cu oracion riba loke ta ser declará den §7-9 na página 173-5 dje buki Conocimentu cu Ta Hiba na Bida Eterno. Si nan ta cualificá, nan no tin motibu pa keda sin predicá djis pasobra nan falta experencia. Publicadornan capacitá ta disponibel pa mustra nan con e trabou di predicacion di Reino ta ser hací. Si esnan nobo por tuma un curashi pa papia tocante e bon nobo, nan por ta sigur cu Jehova lo yuda nan.—Echo. 4:31; 1 Tes. 2:2.
6 Nos ta trece beneficionan eterno pa nos mes i tambe pa otronan ora nos ta busca maneranan pa bendicioná Jehova henter dia.