‘Ocupá Bo Intensamente’ cu Bo Ministerio
1 Ora nos lesa cu apostel Pablo tabata traha tent na Corinto, kisas nos por concluí cu esaki lo a dun’é ménos chens pa predicá. Sin embargo, Echonan 18:5 ta relatá: “Pablo a cuminsá ocupá su mes intensamente cu e palabra, dunando testimonio na e hudiunan pa duna prueba cu Jesus ta e Cristo.” Di con Pablo tabata asina ocupá cu e actividad di predicá? Maske hopi hende den Corinto a bira creyente caba, Señor a confirmá cu ainda tabatin hopi hende mas pa nan haci disipel den e stad ei. (Echo. 18:8-11) Nos awe tin motibunan similar pa ta intensamente ocupá cu nos ministerio? Sí. Ainda tin hopi hende mas cu nos por haña i siña e berdad.
2 Dedicá Mas Tempu na Sirbishi Durante April: Probablemente bo meta ta pa tur luna bo ta ocupá den predicá e bon nobo. Pero tin cierto lunanan cu ta duna nos mas chens pa ‘ocupá nos mes intensamente’ cu e actividad aki. Un dje lunanan ei ta april, e culminacion dje temporada di Memorial. Bo circunstancianan a permití bo traha pionero auxiliar of aumentá bo actividad den e ministerio e temporada aki? Hopi publicadó cu ta haciendo esei a ser bendicioná ricamente. (2 Cor. 9:6) Si bo ta haciendo tur loke bo por, corda cu Jehova ta contentu cu bo sirbishi di henter alma. (Luc. 21:2-4) Sea cual sea bo circunstancia, hacié bo meta pa ‘ocupá bo intensamente’ cu bo ministerio durante april. I no lubidá di entregá bo raport di sirbishi di veld na fin di luna di manera cu por suma bo esfuerso huntu cu esfuerso dje resto di Jehova su pueblo.
3 Bishitá Hende Nobo Cu A Asistí na Memorial: Aña pasá e asistencia di Memorial na islanan ABC tabata 6.071 persona. Nos tin cu wak ainda con e asistencia total lo ta e aña akí. Sin embargo, informenan ta indicá cu tin un maraviyoso potencial pa un “cosecha” mas grandi. (Mat. 9:37, 38) P’esei, haci areglo mas pronto posibel pa bishitá e hendenan interesá cu a asistí na Memorial pa yuda nan spiritualmente. Si nos posponé e bishitanan ei, e malbado lo por haña chens pa ‘ranca e palabra dje reino cu a ser sembrá den nan curason.’ (Mat. 13:19) Bishitá nan sin tarda lo mustra cu realmente bo ta ‘ocupá bo mes intensamente’ cu bo ministerio.
4 Sigui Yuda Esnan Inactivo: Na februari a start un intento special pa yuda esnan inactivo. Si tin algun cu ainda no a ricibí un bishita di pastoreo, e ancianonan mester haci areglo pa bishitá nan promé cu luna di april terminá. E ancianonan lo haci esfuerso pa determiná e causa básico dje persona su problema i con ta e mihó manera pa yud’é sirbi Jehova activamente atrobe. E yudansa amoroso aki ta mustra cu e ancianonan ta tuma na serio nan responsabilidad como wardadó di “e tou di Dios.” (1 Ped. 5:2; Echo. 20:28) E Toren di Vigilancia di 15 di september 1993, página 22-3, ta percurá excelente sugerencia cu ancianonan por usa ora nan ta trata un dje cincu problemanan típico cu kisas ta afectando esnan inactivo. Lo ta ideal si durante april mes por reactivá algun publicadó inactivo den e ministerio di veld.
5 Yuda Mas Persona Bira Publicadó No-Bautisá: Bo yunan a cualificá como publicadó nobo dje bon nobo? Ke tal dje personanan cu bo ta studia Bijbel cuné? Si e ancianonan aprobá e personanan ei, april lo no ta un bon luna pa nan cuminsá publicá? Si un persona ta haciendo progreso i a studia e foyeto Rekerí i e buki Conocimentu, por sigui cu e studio di Bijbel den un di dos buki. Esei por ta sea e buki E Palabra di Dios, e buki Berdadero paz of e buki Uní den Adoracion. Bo meta ta pa yuda e studiante gana un comprendimentu mas penetrante dje berdad, cualificá como publicadó no-bautisá i bira un Testigo dedicá i bautisá di Jehova.—Efe. 3:17-19; 1 Tim. 1:12; 1 Ped. 3:21.
6 E interes consistente i genuino cu bo ta mustra den bo studiantenan di Bijbel cu tempu por yuda nan haci e berdad di nan mes. Un Testigo a topa un pareha di edad cu a aceptá un studio di Bijbel cu entusiasmo. Pero pa tres siman tras di otro e pareha a posponé e studio. Cu tempu e studio a cuminsá. Despues, e pareha tabata cancelá e studia cada salta un siman. Pero finalmente, e esposa a progresá te na bautismo. E ruman homber ta corda: “Despues cu el a bautisá, su wowonan a yena cu awa di felicidad, loke a pone cu ami cu mi casá su wowonan tambe a yena cu awa di felicidad.” Sí, ‘ocupá bo mes intensamente’ cu e bon nobo ta trece gran goso!
7 Profecia bíblico i sucesonan mundial ta indicá cu nos ta bibando leu den e tempu di fin. Awor ta tempu cu henter e pueblo di Dios mester ta ‘intensamente ocupá’ cu haci e bon nobo conocí na otro hende. Apostel Pablo ta sigurá nos cu tal labor definitivamente “no ta en bano en relacion cu Señor.”—1 Cor. 15:58.