Bible—Wanfala Buk for Living
“WORD bilong God hem laef and garem paoa and hem sharp winim eni tu-saed sword . . . and hem fit for luksavve long tingting and samting wea heart want for duim.” (Hebrews 4:12) Disfala toktok abaotem samting wea Word bilong God savve duim hem markem Bible olsem buk wea winim wei for olsem wanfala gudfala buk nomoa.
Wanfala man wea raet abaotem religion tok stret olsem: “Message bilong hem barava important long living bilong iumi olsem wei for tek-wind.” Then hem sei moa: “Taem iu tingim wei for barava laekem and needim healing distaem and iu readim Bible witim datfala tingting, iu kasem barava gud samting.” Olsem wanfala lamp wea shaen braet, Bible hem mekem klia planti hardfala kwestin and problem bilong living distaem.—Psalm 119:105.
Tru tumas, wisdom wea stap insaed Bible garem paoa for sheipim tingting bilong iumi, helpem iumi stretem olketa problem, mekem living bilong iumi kamap moabeta, and redyim iumi witim savve for deal witim olketa samting wea iumi kanduit changem. Barava important, Bible helpem iumi for savve and lovem God.
Buk wea Givim Purpose
Man wea Raetem Bible, Jehovah God, hem ‘savve gud long evri wei bilong iumi.’ Hem savve long moa samting abaotem olketa need bilong iumi saed long body, feeling, and spiritual wei winim iumiseleva. (Psalm 139:1-3) From hem tingim man, hem putim olketa klia spialaen for man saed long fasin. (Micah 6:8) Hem followim gudfala tingting for iumi lukaotem wei for minim olketa spialaen and direction hia and lane for live followim olketa. Hapi nao man wea “hapi long law bilong Jehovah,” man wea raetem psalm hem talem. “Evri samting wea hem duim bae win.” (Psalm 1:1-3) Hem barava fitim iumi for faendaot moa abaotem kaen chance olsem.
Maurice, wanfala skulteacher wea retire, hem olowe bin bilivim hao Bible hem storyim history and hem gudfala buk. Nomata olsem, hem daotem wei wea datwan kam from God. Bihaen hem lisin long samwan wea explainim long hem why God givim kam Word bilong hem long olketa man, Maurice lukluk long olketa difren Bible profesi. Olsem wanfala young man, hem studyim history, literature, science, and geography. Hem talem wei wea hem tingse hem garem bigfala savve tumas dastawe hem no lukim planti example wea saportim wei wea Bible hem tru. “Mi pas insaed long wei for barava aftarem gudfala living, riches, and olketa samting wea mekem man hapi. Sorre tumas, mi go ahed for no garem information and for no garem savve long naesfala and trufala samting bilong nambawan buk wea winim evri buk.”
Maurice, wea winim 70 year distaem, hem sei witim thankiu, taem hem story abaotem wei wea Jesus showimaot hemseleva long aposol Thomas: “Hand bilong mi hem go kasem ‘hol wea blood kamaot long hem’ wea bae aotem for olowe from mind bilong mi evri daot hao Bible hem nao truth.” (John 20:24-29) Olsem aposol Paul talem stret, Bible hem showimaot olketa samting wea heart want for duim, and givim mining long laef. Hem barava wanfala buk for living.
Mekem Laef wea Garem Trabol Hem Stedy
Bible givim kaonsel tu wea helpem pipol for aotem olketa nogud wei wea olketa bin faendem hem hard for lusim. Daniel hem fit for winim dirty samting olsem smoke, and tu for no go long olketa wild party and ova tumas long alcohol. (Romans 13:13; 2 Corinthians 7:1; Galatians 5:19-21) Tru nao, for man aotem kaen fasin olsem and for werem “niu fasin” hem need for waka hard. (Ephesians 4:22-24) Daniel sei: “Hem wanfala challenge bikos iumi barava no perfect.” Nomata olsem, hem win. Distaem Daniel readim Word bilong God evriday, and datwan keepim hem klos long Jehovah.
Taem hem bin growap, Daniel evritaem garem bigfala respect for Bible—nomata hem nating readim—and hem prea long God evri naet. Nomata olsem, wanfala samting hem miss. Hem no hapi. Bigfala change kam taem hem lukim nem bilong God insaed long Bible for firstaem. (Exodus 6:3; Psalm 83:18) Bihaen datwan, hem evritaem iusim nem bilong Jehovah taem hem prea, and olketa prea bilong hem barava go for wanfala person. “Jehovah kamap barava klos person long mi, and hem still barava klos fren bilong mi.”
Bifor hem lane abaotem Bible, tingting bilong Daniel abaotem future hem no braet. “Hem no needim bigfala savve for luksavve long samting wea go ahed for happen long world,” hem talem. “Mi fraet, and mi trae for busy mekem mi no garem taem for tingim datwan.” Then hem lanem hao God bae startim justice for evriwan long wanfala klin earth, wea olketa man wea obey savve enjoyim peace and hapi for olowe. (Psalm 37:10, 11; Daniel 2:44; Revelation 21:3, 4) Distaem Daniel garem wanfala sure hope. Wei wea Bible mekem hem stedy helpem hem for tingim gudfala saed long laef.
Help for Winim Olketa Problem Saed Long Feeling
George hem seven year taem mami bilong hem dae. Hem fraet tumas for sleep long naet from hem no savve sapos hem bae wekap tu long next day. Then hem readim samting wea Jesus talem abaotem dae and resurrection: “Hour bae kam wea evriwan wea stap long olketa memory grev bae herem voice bilong [Jesus] and kamaot.” Disfala toktok bilong Jesus tu muvim hem: “Mi nao resurrection and laef. Man wea showimaot faith long mi, nomata hem dae, bae hem laef bak moa.” (John 5:28, 29; 11:25) Samting wea Jesus talem hem here olsem balance, fitim stretfala tingting, and givim comfort. George hem sei: “Disfala truth hem muvim heart and tu hem tasim heart.”
Daniel wea iumi storyim bifor, hem fraetem samfala samting tu. Mami bilong hem no savve lukaftarem hem, so olketa sendem hem for stap witim planti famili. Evritaem hem feel olsem hem man difren and hem laekem tumas for garem sef feeling from wei for part long wanfala loving famili. Gogo, hem faendem samting wea hem lukaotem thru long study bilong hem long Bible. Daniel kaban witim Christian kongregeson bilong Olketa Jehovah’s Witness and hem kamap part bilong wanfala spiritual famili, wea hem experiencem feeling for nara pipol acceptim and lovem hem. Tru nao, Bible hem givim gudfala samting long wei wea hem savve barava help and mekem man satisfae saed long feeling.
Remember, Jehovah lukim samting wea insaed long heart bilong iumi and hem savve wanem nao iumi lukaotem. God hem “lukluk gud long olketa heart,” and hem givim “long man wanwan for fitim wei bilong hem.”—Proverbs 21:2; Jeremiah 17:10.
Gudfala Kaonsel Long Famili Laef
Bible hem givim gudfala kaonsel long saed bilong wei for fren midolwan olketa man. George hem sei: “Problem wea kamap from wei wea evriwan garem difren fasin or wei for no minim narawan hem nao olketa barava hard samting long laef.” Hao nao hem deal witim diswan? “Sapos mi ting samwan hem feel nogud long mi, mi followim kliafala kaonsel from Matthew 5:23, 24: “Mek peace witim brata bilong iu.” Gud samting kamaot from mi savve story abaotem datfala raoa. Mi savve feelim peace bilong God wea Bible storyim. Hem waka. Hem barava fitim.”—Philippians 4:6, 7.
Taem hasband and waef no agree, tufala evriwan need for “kwiktaem for lisin, slow for toktok, slow for kros.” (James 1:19) Advaes hia hem mekem wei for story tugeta kamap moabeta. George sei moa: “Taem mi followim kaonsel for lovem and deal witim waef bilong mi olsem miseleva, mi stretawe kasem gud samting. Hem moa isi for hem respectim mi.” (Ephesians 5:28-33) Tru nao, Bible teachim iumi hao for luksavve and deal witim wei wea iumi no perfect and hao for win for deal witim nara pipol wea olsem tu.
Kaonsel wea Stap Olowe
Wise King Solomon sei: “Trust long Jehovah witim full heart bilong iu and no depend long savve bilong iuseleva. Long evri wei bilong iu, lisin long hem, and hemseleva nao bae stretem gogo bilong iu.” (Proverbs 3:5, 6) Olketa toktok hia simpol nomoa bat garem barava deep mining!
Bible hem wanfala paoa wea helpem man. Hem helpem pipol wea lovem God for stretem laef bilong olketa for fitim will bilong hem and for faendem hapi for “wakabaot followim law bilong Jehovah.” (Psalm 119:1) Nomata wanem kaen living nao iumi garem, Bible garem kaonsel wea iumi needim. (Isaiah 48:17, 18) Readim evriday, ting raonem samting iu readim, and followim. Hem bae mekem mind bilong iu klia and tingim nomoa olketa samting wea klin and gud. (Philippians 4:8, 9) Iu bae lanem wanem kaen living for followim and enjoyim laef and tu hao for lovem Creator bilong laef.
Taem iu followim gogo olsem, Bible bae kamap for iu—olsem for planti million nara pipol—moa samting winim wei for olsem wanfala gud buk nomoa. Hem bae barava kamap wanfala buk for living!
[Piksa long page 6]
Bible savve strongim disison bilong iu for winim olketa nogud wei
[Piksa long page 7]
Bible teachim iu hao for kam klosap long God