“Kumwail Mwasamwasahn Ni Mehkoaros”

“Aramas pweipwei kan kin kamehlele mehkoaros; aramas loalokong kin kanahieng arail kahk koaros.”—LEPIN PADAHK 14:15.

1, 2. (a) Mehn kasukuhl dah me kitail sukuhliki sang dahme wiawihong Lohd? (b) Ia wehwehn lepin mahsen “kumwail mwasamwasahn”?

AHNSOU me Eipraam mweidohng Lohd en pilada mahs mehnia sahpw me e men kousoanla ie, Lohd irihrongseli oh kilangada sahpw me diren pihl likamwete “sapwellimen Siohwa mwetuwel.” Wasaht mwomwen wia wasa keieu kaselel me ih oh eh peneinei kak kousoanla ie, pwehki “Lohd pilada sahpw patapat en Sordan” oh kauwada imwe impwal kan limwahn Sodom. Mwomwen lingan en wasa kan limwahn kahnimw en Sodom pitihedi ih, pwe nan kahnimw en Sodom mie “aramas suwed kei, oh aramas dipan ekei mwohn silangin Siohwa.” (Senesis 13:7-13) Mwuhr, Lohd oh eh peneinei lelohng kahpwal laud kan. Imwilahn met, ih oh nah serepein ko anahne kohla oh kousoanla nan pwoar ehu. (Senesis 19:17, 23-26, 30) Dahme mwomwen kaselel ohng ih nin tepio uhd wiahla wasa suwed ehu.

² Dahme wiawihong Lohd wia mehn kasukuhl mwahu ehu ohng sapwellimen Koht ladu kan nan rahnpwukat. Ahnsou kan me kitail anahne wiahda pilipil kan, kitail anahne tehk kanahieng soangen kahpwal kan me kak pwarada oh pil kanahieng pwe soahng kan me kitail kilang de pitihkitaildi. Kahrehda, e inenen konehng Mahsan en Koht me kin kangoangehkin kitail: “Kumwail mwasamwasahn ni mehkoaros.” (1 Piter 1:13) Lepin lokaiahn Krihk me kawehwehda “kumwail mwasamwasahn” kin wehwehki “en amas.” Emen ohl me samanih Paipel me ede Richard C.H. Lenski kawehwehda me en amas wehwehki me en “ahneki irair en madamadau me meleilei oh kak teneki oh kapatahda irair kan me konehng oh met pahn sewese kitail en kak wiahda pilipil kan me pwung.” Kitail pahn tehkpene ekei soangen irair kan me konehng kitail en mwasamwasahn kanahieng.

Teneki Elen Wia Soangen Pisnis Ehu

3. Dahme kahrehda kitail anahne tehk kanahieng mehkoaros ni ahnsou kan me elen wia pisnis kohwong kitail?

³ Iaduwen ma aramas wahu emen, ele emen soun papah Siohwa men, kamangaiong uhk elen wia pisnis ehu. E kin ngoangki duwen eh kak pweida oh kangoange iuk ken mwekid mwadang pwe ke de luhs sang ahnsou mwahu. Ele ke medewehla mour mwahu me kowe oh ahmw peneinei pahn ahneki, oh mwein pil medewehiong me met pahn kahrehda ken kak kihong ahmw ahnsou laud ohng soahng kan me ngenin. Ahpw, Lepin Padahk 14:15 kaweidki: “Aramas pweipwei kin kamehlele mehkoaros; aramas loalokong kin kanahieng arail kahk koaros.” Ni ahnsou kan me emen kin perenkihda elen tapihada pisnis kapw ehu, e kin mwein ele sohte nohn lemehiong me keper kan me pidada met me laud, e kin pohnsouwehla kahpwal kan me pidada met, oh sohte nohn medewe duwen soangen irair akan me kakete pwarada. (Seims 4:13, 14) Nan soangen irair wet, ia uwen kesempwal en kin mwasamwasahn ni mehkoaros!

4. Iaduwen kitail kak ‘tehk kanahieng atail kahk kan’ ni ahnsou kan me kitail kin teneki irair en pisnis ehu?

⁴ Aramas loalokong men kin kasawih kanahieng irair akan me pidada elen wia pisnis ehu mwohn eh pahn wiahda eh pilipil. (Lepin Padahk 21:5) Soangen kasau wet kin kapwarehda soangen keper kan me mie. Nna, medewehla irair wet: Aramas emen me raparapahki mwohni pwehn kak tapihada ehu pisnis padahkiong uhk me e pahn kapwurehiong uhk mwohni laud ma ke pahn kihong ih mwohni pwehn kak tapihada eh pisnis. Ele met pahn mwomwen ngoaramwahu, ahpw soangen keper dah kan me pidada met? Aramas menet me pweipwand ohng uhk padahkiong uhk me e pahn kapwungewei noumw mwohnio mendahte ma pisniso pahn pweida de soh, de e pahn kapwurehwei ihte ma pisniso pweida? Iaduwen, ke kak luhs sang noumw mwohnio ma pisniso sohte pweida? Ke kak ele pil idek: “Dahme kahrehda e peki mwohni sang rehn aramas teikan? Pangk kan soh medewe me elen pisniso me nohn keper?” Ni ahmw pahn kihong ahnsou pwehn medewe keper kan me kak pwarada, met pahn sewese ken kak wia tenek mwahu.—Lepin Padahk 13:16; 22:3.

5. (a) Soangen mwekid en loalokong dah me Seremaia wiahda ni ahnsou me e pwainda mwaht ehu? (b) Dahme kahrehda e konehng en ntingihdi soahng koaros me pidada koasoandi en pisnis ehu?

⁵ Ahnsou me soukohp Seremaia pwainda mwaht ehu sang rehn emen eh peneinei, me wia sounpapah en Siohwa men, e wiahda kisinlikou en kasapwasapw mwohn emen me wia sounkadehde. (Seremaia 32:9-12) Nan rahnpwukat, emen me loalokong pahn ahnsou koaros tehk pwehn wiahda kisinlikou de mehkot me ntingdi mehn wia kasalepen soangen pisnis kan koaros me e kin wia, pil iangahki soangen pisnis kan me e kin ehukihong eh peneinei keren kan oh pil rie kan nan pwoson.a En wiahda kisinlikou me sansal oh ntingihdi duwen soahng kan me re pwungkihpene pahn irehdi soangen sawehwe kan me kak pwarada oh pahn kolokol meleilei. Ni pali teio, en sohte wiahda kisinlikou kin wia mehn kahpwal laud ehu ni ahnsou kan me kahpwal kin pwarada nanpwungen sapwellimen Siohwa ladu kan. E inenen kansensuwed pwe soangen kahpwal pwukat kin kahrehda nsensuwed, kailok, oh pil luwetala en pali ngehn.

6. Dahme kahrehda kitail anahne pere kitail sang noahrok?

⁶ Kitail anahne pere kitail sang noahrok. (Luk 12:15) Inoupen en alehdi uwen mwohni laud ehu kak kahrehiong emen en maskunieng soangen kahpwal akan me pidada soangen irair en pisnis pweipwei ehu. Ekei irail akan me kin ale pwukoah kesempwal kan nan sapwellimen Siohwa doadoahk kin lohdi nan soangen lidip wet. Mahsen en Koht kaweidki: “Kumwail dehr noahroke mwohni, ahpw kumwail nsenamwahukihte dahme kumwail ahneki.” (Ipru 13:5) Ni ahnsou me emen Kristian kin medemedewe duwen elen pisnis ehu, e konehng en medewe, ‘E uhdahn anahn ien wia met?’ En kihsang nan atail mour soahng soh katepe kan oh kihong atail kaudok ohng Siohwa en wia mehkot me keieu kesempwal nan atail mour pahn pere kitail sang “soangen suwed koaros.”—1 Timoty 6:6-10.

Soangen Apwal akan me Irail Kristian me Sohte Pwopwoud kan kin Lelohng

7. (a) Soangen irair apwal dah kan me Kristian kiripw kan kin lelohng? (b) Iaduwen atail pilipil en ihs me kitail pahn pwoudiki pidada en lelepek ohng Koht?

⁷ Tohto irail ladu en Siohwa kan me kin men pwopwoud ahpw saikinte diarada ahr pwoud. Nan ekei sahpw akan, aramas akan kin kasik emen en mwadang pwopwoudla. Ahpw, e sohte kin ahnsou koaros mengei en diarada emen me mih nan padahk mehlel. (Lepin Padahk 13:12) Ahpw, Kristian kan wehwehki me en kapwaiada kehkehlik en Paipel me en pwoudikihda “emen Kristian” wia irair en lelepek ohng Siohwa. (1 Korint 7:39) Pwehn kak powehdi kasongosong me irail lelohng, Kristian kiripw kan anahne mwasamwasahn ni mehkoaros.

8. Soangen irair en kasongosong dah me emen serepein en Sulam lelohng, oh iaduwen lih Kristian akan ele kin lelohng nan soangen irair wet?

⁸ Nan Melkahkahn Melkahka kan, e kasalehda me nanmwarkio mwahukihda serepein en Sulam semwehmwe men. E kasongehki serepein menet eh kepwehpwe, lapalap, oh masamwahu mendahkihte serepeino eh limpoak ohng emen ohl me pwulopwul. (Melkahkahn Melkahka kan 1:9-11; 3:7-10; 6:8-10, 13) Ma kowe emen lih Kristian, mwein ele ekei pak, aramas akan me ke sohte men irail en tehk uhk pahn kin tehk uhk. Emen iengomw tohn doadoahk, mwein ele me ahneki pwukoah laud, mwein kin tepida kapinga iuk, kadek ohng uhk, oh men ianguhkseli. Kanahieng soangen aramas me kin mwomwen tehk de kapinga iuk. Ele aramas menet sohte mwahukin uhk, ahpw pali laud en ahnsou, ih kahrepen emen kin men tehk emen. Nantihong kahlemengih serepein en Sulam meipwono me wia “dihd ehu.” (Melkahkahn Melkahka kan 8:4, 10) Kehlailiong oh nda soh ohng soangen aramas pwukat me kin tehk uhk pwehki irail mwahukin uhk. Padahkihong iengomw tohndoadoahk kan ni ahnsou me ke tepida doadoahk, me ke wia emen Sounkadehdehn Siohwa oh nantihong isaneki ahnsou mwahu koaros en kalohk ohng irail. Met pahn wia perepomw.

9. Ia keperpen en tapihada karanih emen aramas me ke sehse me ke tuhwong nan Internet? (Menlau pil tehk kakon me mih nan pali 21.)

⁹ Aramas tohto kin kohla wasa kan nan Internet me kin wiawihda ohng irail me kiripw kan pwe irail en kak rapahkihda ahr pwoud. Ekei kin medewe me met wia elen esehla aramas akan me ke sohte anahne tuhwong. Ahpw en tuhwong emen me ke sohte ese inenen keper. Nan Internet, e apwal emen en ese dahme mehlel oh dahme sohte mehlel. (Melkahka 26:4) Kaidehn koaros me kin nda me irail sapwellimen Siohwa ladu kan kin mehlel. Pil patehng met, irail akan me kin tuhpene nan Internet kak mwadang en ahnekihda pepehm ohng mehteio oh kahrehda eh sohte kak wia tenek mwahu. (Lepin Padahk 28:26) Mehnda ma kowe oh emen kin tuhpene nan Internet de ni soangen ekei ahl akan, e sohte wia elen loalokong ken tapihada karanih emen me ke sohte nohn ese.—1 Korint 15:33.

10. Iaduwen kitail kak kangoange riatail Kristian kan me kiripw?

¹⁰ Siohwa “me diren kadek” ohng sapwellime ladu kan. (Seims 5:11) E kin mwahngih soangen apwal oh kansensuwed kan me irail Kristian kiripw kan me sohte kak diar ahr werek kin lelohng, oh e kin kesempwaliki arail loalopwoat. Iaduwen meteikan kak kangoange irail? Kitail anahne ahnsou koaros kapinga irail ki arail kin peik oh kasalehda ngenin tounmetei. (Sounkopwung 11:39, 40) Kitail pil kak luhke irail ohng soangen koasoandi en patpene kan me kin kihda kangoang. Ke songehr wia met ni ehu ahnsou me keren? Pil laudsang me, kitail kak kapakapkin irail oh peki Siohwa en ketin sewese irail en kin kolokolete ahr irair en toupahrek ni pali ngehn oh ahr peren en papah Ih. Kitail en kin kasalehda sang nan loalatail mehlel me kitail kalahnganki irail pwukat me kin kasalehda ahr loalopwoat duwehte Siohwa eh kin ketin kalahnganki irail.—Melkahka 37:28.

Mehn Sawas kan ohng Soumwahu kan

11. Soangen kahpwal dah kan me kin pwarada pwehki soangen soumwahu laud kan?

¹¹ Ia uwen kansensuwed ahnsou me kompoakpatail kan kin lelohng nan soumwahu laud kan! (Aiseia 38:1-3) Ni atail kin song rapahki soangen mehn sawas kan me keieu mwahu, e kesempwal kitail en peikiong kaweid en Paipel. Karasepe ehu, Kristian akan kin nsenohki peikiong kosonned en Paipel me pid duwen en liksang nta, oh soangen wiepen wini kan me kin pidada wunahni. (Wiewia 15:28, 29; Kalesia 5:19-21) Oh pil, ohng irail kan me sohte ale kasukuhl en palien wini, e kin apwal ohng irail oh wia mehkot laud ehu ohng irail en pilada soangen sawas en wini dah me konehng irail. Dahme pahn kak sewese kitail en kak mwasamwasahn ni mehkoaros?

12. Iaduwen Kristian emen kak kolokol irair en toupahrek ni eh pilipil kan en soangen sawas en wini kan me konehng?

¹² “Aramas loalokong kin kanahieng arail kahk koaros” ni arail kin wia soangen petehk kan nan Paipel oh neitail pwuhk kan. (Lepin Padahk 14:15) Nan wasa kan me malaulau toahkte kan oh imwen wini kan, ele ihte wini kan me kin kohsang ni soangsoangen tuhke kan me kak doadoahk. Ma ih soangen wini wet me kitail medemedewe en ale, kitail kak ale soangen sawas kan sang nan The Watchtower en April 15, 1987, pali 26-29. E kin padahkiong kitail soangen kahpwal kan me kitail en tehk kanahieng pwe kitail de lelohng. Kitail anahne tehkada ire kan me duwehte: Iaduwen, soun wia winio kin wia ndandki eh kin doadoahngki wunahni? Sawas en wini kin wiawi ni madamadau me dene soumwahu oh mehla kin kohsang koht akan (de ngehn en ahr pahpa kahlap oh nohno kahlap ako me melahr) me lingeringerda de me emen imwintihti me doadoahngki wunahni oh winiehdi? Iaduwen, mie meirong, de soangen wiepen lokaia kan, de ekei soangen wiepen wunahni kan kin wiawi ni ahnsou me winio kin wiawi? (Deuderonomi 18:10-12) Soangen mehn petehk kan me duwehte met kak sewese kitail en idawehn iren kaweid en Paipel wet: “Kumwail kasawih mehkoaros: kumwail eri kolokol me mwahu kan.”b (1 Deselonika 5:21) E pahn kin sewese kitail en toupahrek.

13, 14. (a) Iaduwen kitail kak kasalehda atail doadoahngki elen loalokong ni atail kin tehk kanahieng duwen roson en paliwaratail? (b) Dahme kahrehda e inenen konehng en doadoahngki elen loalokong ni ahnsou kan me kitail kin koasoi ohng meteikan duwen roson en paliwar oh soangen wini de sawas en wini kan me mie?

¹³ En doadoahngki atail loalokong inenen anahn ni soahng koaros, me pil iangahki epwel en atail roson en paliwar. (Pilipai 4:5) Ni atail kin apwalih kanahieng paliwaratail, e kin kasalehda atail kalahnganki kisakis en mour. Ni atail kin soumwahuda, e konehng kitail en nsenohki duwen roson en paliwaratail. Ahpw, kitail sohte kak ahneki roson me unsek lao lel ahnsou me Koht pahn ketin “kamwahuwihala tohn wehi kan.” (Kaudiahl 22:1, 2) Kitail anahne kanahieng pwe kitail de nohn nsenohkihla atail roson en paliwar oh pohnsouwehla atail anahn en pali ngehn kan me keieu kesempwal.—Madiu 5:3; Pilipai 1:10.

¹⁴ Kitail anahne toupahrek oh doadoahngki atail loalokong ni ahnsou kan me kitail kin koasoia duwen roson en paliwar oh soangen sawas en wini kan rehn meteikan. Ire pwukat en dehr wia ire me keieu kesempwal rehtail ni ahnsou kan me kitail kin koasoakoasoi rehn riatail kan me kitail kin tuhwong nan mihding de kapokon kan. Patehng met, pilipil kan me pid soangen sawas en wini kan me emen pilada kin pidada kaweid en Paipel kan, en emen nsen mwakelekel, oh eh nanpwung mwahu rehn Siohwa. Kahrehda, e sohte pahn wia elen limpoak ma kitail idingki emen riatail ni pali ngehn en idawehn atail pilipil oh soikala pilipil en eh nsen mwakelekel. Mendahki e konehng kitail en tuhwong emen me mah ni pali ngehn pwehn ale sawas, emen emen Kristian anahne “pein wa ah mehn wisik” me pid duwen pwukoah en wiahda pein eh pilipil, oh “emenemen kitail pahn pwukoahki pein ah mour mwohn Koht.”—Kalesia 6:5; Rom 14:12, 22, 23.

Ahnsou kan me Kitail kin Pwunod

15. Iaduwen irair kapwunod kan kak kamwekid kitail?

¹⁵ Irair en kapwunod kan kin kak kahrehda sapwellimen Siohwa ladu me lelepek kan en ekei pak wia lokaia oh mwekid kan ni elen pweipwei. (Eklesiasdes 7:7) Ahnsou me Sohp lelohng nan apwal laud, e ekis sohla ahneki lamalam en toupahrek oh anahne ale sawas en kapwungala eh madamadau. (Sohp 35:2, 3; 40:6-8) Mendahki “Moses me keieu aktikitik rehn aramas en sampah kan” ehu pak e lingeringerda oh lokaia kehlail. (Nempe 12:3; 20:7-12; Melkahka 106:32, 33) Depit kin kasalehda kanengamah oh sohte kemehla Nanmwarki Sohl, ahpw ahnsou me Napal kasarowehdi lokaia lemei ohng sapwellime ohl ako, Depit lingeringerda oh sohla ahneki lamalam en toupahrek. Ni Apikail eh pwarala reh pwehn kauhdi ih, ih ahnsou me e pehmada me e sapwung, oh e kereniongete en wiahda sapwung kowahlap ehu.—1 Samuel 24:2-7; 25:9-13, 32, 33.

16. Dahme kak sewese kitail en dehr mwadangete mwekid ni soh lamalam?

¹⁶ Pein kitail pil kak lelohng nan irair kapwunod kan me kak kahrehiong kitail en sohte wiahda pilipil mwahu kan. Atail kin teneki madamadau kan en meteikan, duwehte me Depit wia, kak sewese kitail en dehr mwadangete mwekid ni soh lamalam oh mwuhr pwupwudiong nan dihp. (Lepin Padahk 19:2) Patehng met, Mahsen en Koht kaweidki kitail: “Kumwail masak oh rerrer oh tokedihsang amwail kin wia dihp; kumwail medemedewe mwahu duwen met, ni amwail kin wendi nennenewei nan amwail peht kan.” (Melkahka 4:4) Ni ahnsou kan me kitail kak, e pahn wia elen loalokong ma kitail awih lao kitail meleileidi mwohn atail wia mehkot de wiahda atail pilipil. (Lepin Padahk 14:17, 29) Kitail kak rapahki sawas sang rehn Siohwa ni atail kin kaukaule wia kapakap, oh “sapwellimen Koht popohl, me inenen laudsang uwen atail dehdehki pahn nekinekid mohngiongatail oh pil atail lamalam rehn Krais Sises.” (Pilipai 4:6, 7) Popohl me Koht pahn ketikihong kitail pahn kakehleikitailda oh sewese kitail en kak mwasamwasahn ni mehkoaros.

17. Dahme kahrehda kitail en kin koapworopworki Siohwa en sewese kitail en kin mwasamwasahn ahnsou koaros?

¹⁷ Mendahki atail kin nantihong soikala soangen irair keper kan oh mwekid ni elen loalokong, kitail koaros kin wiahda sapwung. (Seims 3:2) Kitail ele mwein kereniong wiahda kahk sapwung ehu me pahn kauwekitailla, kitail ahpw sohte ese duwen met. (Melkahka 19:12, 13) Ahpw, laudsang met, ni atail wia aramas ekei, kitail sohte ahneki koahiek de pwung en pein kahluwa atail kahk kan likin koasoandi en Siohwa. (Seremaia 10:23) Ia uwen atail kalahnganki Siohwa ketin inoukihong kitail: “I pahn padahkihong uhk ahl me ke pahn weid ie; I pahn kaweid uhk oh panawihiuk.” (Melkahka 32:8) Ehi, ki sapwellimen Siohwa sawas, kitail kak mwasamwasahn ni mehkoaros.

[Nting tikitik me mi pahs]

Iaduwen Ahmw Pahn Sapeng?

Ia duwen kitail pahn kak mwasamwasahn ni mehkoaros?

• ma emen kamangaiong uhk elen pisnis ehu?

• ni ahnsou me ke raparapahki emen me ke en pwoudiki?

• ni ahnsou me ke kin soumwahu?

• ni ahnsou me ke kin pwunod?

[Kawehwehpen kilel kan nan ehu ehu pali 21]

Ke kak Likih?

Ire pwukat pwarada nan Web site ohng me kiripw kan:

“Mendahki se wia uwen aht kak koaros, se sohte kak uhdahn nda me se ese ihs aramas koaros.”

“Se sohte kak uhdahn nda me soahng kan me dierek wasaht me mehlel, unsek, oh katapan.”

“Madamadau, kaweid, lepin mahsen kan, luhk, de ire teikan me pwarada nan wasaht iei mahsen en irail kan me ntingihdi ire pwukat . . . oh ke sohte anahne uhdahn kamehlele.”

[Kawehwehpen kilel kan nan ehu ehu pali 19]

“Aramas loalokong kin kanahieng arail kahk koaros”

[Kawehwehpen kilel kan nan ehu ehu pali 20, 21]

Iaduwen lih Kristian kan kak idawehn mehn kahlemeng en meipwon en Sulamo?

[Kawehwehpen kilel kan nan ehu ehu pali 22]

“Kumwail kasawih mehkoaros: kumwail eri kolokol me mwahu kan”