Paieki Mour ni Lemmwiki Siohwa
“Kumwail sapwellime aramas akan koaros, kumwail wauneki KAUN-O, irail koaros me kin peikiong pahn ahneki soahng koaros me re anahne.”—MELKAHKA 34:9.
1, 2. (a) Soangen madamadau wekpeseng dah kan mie me pid duwen lemmwiki Koht nan pali en Kristendom? (b) Soangen peidek dah kan kitail pahn tehkpene ni ahnsou wet?
NI AHNSOU me sounpadahk kan en pali en Kristendom kin padahngki me aramas akan anahne lemmwiki Koht, re kin kalapw doadoahngki padahk ieu me sohte kohsang nan Paipel me dene Koht kin ketin kaloke me dipan akan kohkohlahte nan kisiniei nan ehl. Soangen padahk wet kin uhwong dahme Paipel kin padahngki duwen Siohwa me wia Koht limpoak oh kopwungpwung. (Senesis 3:19; Deuderonomi 32:4; Rom 6:23; 1 Sohn 4:8) Sounpadahk teikan en pali en Kristendom kin ahneki madamadau me uhdahn weksang met. Irail sohte kin padahngki me kitail anahne masak kansensuwedih Koht. Ni pali teio, re kin padahngki me Koht kin ketin mweidada soahng koaros oh kupwurperenki kereniong aramas koaros sohte lipilipil soangen mour dah re kin momourki. Met pil kaidehn dahme Paipel kin padahngki.—Kalesia 5:19-21.
2 Ni mehlel, Paipel kin kangoange kitail en lemmwiki Koht. (Kaudiahl 14:7) Padahk wet kin kahrehda ekei peidek kan en kin kohda. Dahme kahrehda Koht limpoak men kin ketin kupwurki kitail en lemmwiki ih? Ni ahl dahieu Siohwa ketin kupwurki kitail en lemmwiki ih? Iaduwen atail kin lemmwiki Koht kak wia kamwahupatail? Kitail pahn tehkpene peidek pwukat ni atail pahn pousehla tehkpene irelaud 34 en pwuhken Melkahka.
Dahme Kahrehda Kitail en Lemmwiki Koht
3. (a) Ia ahmw madamadau ohng kaweid me pid en lemmwiki Koht? (b) Dahme kahrehda irail akan me kin lemmwiki Koht kin nsenamwahu?
3 Nin duwen Sounkapikada oh Kaunepen lahng oh sampah, e konehng kitail en lemmwiki Siohwa. (1 Piter 2:17) Ahpw, soangen masak wet weksang pepehm en masak koht lemei kan. E wia masak ni wahu pwehki kitail ese soangen Koht dah Siohwa. Met pil kin wia masak kansensuwedih ih. Lemmwiki Koht kin inenen konehng oh kamwahuiala mouren aramas, oh e sohte kin katoutou oh nohn kamasepwehk. Siohwa, “Koht kalahngan,” ketin kupwurki sapwellime aramas kapikipikdah kan en paieki mour. (1 Timoty 1:11) Ahpw pwehn paieki mour, kitail anahne mourki mour me kin pahrekiong sapwellimen Koht koasoandi kan. Ong me tohto, met wehwehki en wekidala arail mour. Koaros me kin wekidala arail mour kin ahneki soangen pepehm me Depit kasalehda: “Kumwail pein rapahki ia uwen kalahngan en KAUN-O. Meid pai irail kan me kin diar sileparail pahn kupwure. Kumwail sapwellime aramas akan koaros, kumwail wauneki KAUN-O, irail koaros me kin peikiong pahn ahneki soahng koaros me re anahne.” (Melkahka 34:8, 9) Pwehki irail kin ahneki nanpwungmwahu rehn Koht, irail koaros me kin lemmwiki Siohwa sohte kin katihasang mehkan me katapanparail poatopoat.
4. Soangen mehn kamehlel dahieu Depit oh Sises kin kihda?
4 Depit wauneki nah ohl kan ni ah likwerih irail “sapwellime aramas akan.” Irail wia kisehn sapwellimen Koht wehi sarawi. Irail pil tounmeteikihla arail mour pwehn idawehn Depit. Mendahki irail kin tangasang rehn Nanmwarki Sohl, Depit kin kamehlele me Siohwa pahn ketin ketikihong irail arail anahn akan. Depit ntingihdi: “Laion kan pil kin duhpengkihla eh sohte mwenge, ahpw irail kan me kin peikiong KAUN-O, sohte pahn luhs sang mehkot mwahu.” (Melkahka 34:10) Sises pil ketikihong sapwellime tohnpadahk kan soangen mehn kamehlel duwehte met.—Madiu 6:33.
5. (a) Soangen aramas dah kei me irail sapwellimen Sises tohnpadahk kan wia? (b) Soangen kaweid dahieu Sises ketikihda me pid duwen masak?
5 Pali laud en irail me kin rong sapwellimen Sises padahk iei aramas paisuwed kan, soangen mehn Suhs akan me aramas teikan kin mwamwahleki. Kahrehda, Sises “kin kupwureirailla, pwehki ar pwunod akan oh sohte epwelparail, pwe re rasehng sihpw kei me sohte silepahr.” (Madiu 9:36) Iaduwen, soangen aramas pwukat kak ahneki eimah pwehn idawehn Sises? Pwehn wia met, irail pahn anahne kakairada lemmwiki Siohwa, ah kaidehn aramas. Sises ketin mahsanih: “Kompoakepahi ko, kumwail dehr masak irail kan me kin kemehla paliwar, ahpw sohte kak wia mehkot palilahsang. I pahn padahkihong kumwail ihs me kumwail pahn kin masak: Koht me kumwail pahn kin masak, pwe e ketin kakohng kemehla oh pil kesepwekeikumwaillahng nan ehl [Gehenna, ni lokaiahn Krihk]. Ei, ihete me I ndaiong kumwail, kumwail en kin masak! Kisin menpihr limmen soh kin netila sens riau? Ahpw sohte emen rehrail me Koht kin ketin meliehla. Pil pitenmoangamwail kan koaros wadawadier. Eri, kumwail dehr perki mehkot; pwe kumwail inenen kesempwalsang menpihr tohto!”—Luk 12:4-7.
6. (a) Mehnia sapwellimen Sises mahsen kin kakehla Kristian akan? (b) Dahme kahrehda Sises ketin wia mehn kahlemeng me keieu mwahu me pid duwen en kasalehda lemmwiki Koht?
6 Ni ahnsou me imwintihti kan kin nantihong kauhdi irail akan me kin lemmwiki Siohwa sang arail papah Koht, re kak tamanda sapwellimen Sises kaweid wet: “Mehmen me pohnese ie mwohn aramas akan, ih me Nein-Aramas pahn pil pohnese mwohn tohnleng en Koht kan; a mehmen me pohnsehse ie rehn aramas akan ni pokon sansal, ih me Nein-Aramas pahn pil pohnsehse mwohn tohnleng en Koht kan.” (Luk 12:8, 9) Mahsen pwukat kin kakehle Kristian akan, keieu nan sahpw kan me kaudok mehlel kin irairdi. Irail pwukat kin nantihlahte kapikapinga Siohwa ni elen loalokong nan mihding en Kristian akan oh nan arail doadoahk en kalohk me kin wiawi ohng wehi pokon. (Wiewia 5:29) Sises ketin kasalehda mehn kahlemeng me keieu mwahu me pid en kasalehda “lemmwiki Koht.” (Ipru 5:7, NW) Me pid duwen Sises, mahsen en Kokohp kin kohpadahr: “E pahn ketin kupwurokongki ngenen KAUN-O. . . . E pahn ketin mwahngih kupwur en KAUN-O oh lemmwiki, pwe e pahn ketin perenki kapwaiada kupwure.” (Aiseia 11:2, 3) Kahrehda, Sises uhdahn kakehr padahkiong kitail kamwahupen lemmwiki Koht.
7. (a) Iaduwen Kristian akan, ni mehlel, kin mwekidki luhk ehu me duwehte sapwellimen Depit luhk? (b) Iaduwen pahpa oh nohno kan kak kahlemengih mehn kahlemeng mwahu en Depit?
7 Ni mehlel, koaros me kin kahlemengih mehn kahlemeng en Sises oh peikiong sapwellime padahk kan kin mwekidki luhk ehu me duwehte sapwellimen Depit luhk: “Kohdo, kumwail kompoakepahi pwulopwul kan, oh rong ie, pwe I pahn padahkihong kumwail duwen wauneki KAUN-O.” (Melkahka 34:11) E konehng Depit en likwerihki nah ohl kan “kompoakepahi pwulopwul kan” pwe re kin wiahki ih arail kaun. Depit kin kihong irail sawas en pali ngehn pwe ren kak miniminpene oh ahneki nanpwungmwahu rehn Koht. Ia uwen met eh wia mehn kahlemeng mwahu ehu ong pahpa oh nohno Kristian akan! Siohwa kin ketikihong irail manaman pohn neirail pwutak kan oh serepein kan en “kaiahneirailda nan padahk en [Kristian] oh dahme re uhdahn pahn wia nin duwen [Kristian].” (Episos 6:4) Sang ni arail kin koasoakoasoi ohng neirail seri kan rahn koaros duwen mehkan me ngenin oh ni arail kin kaukaule wia onop en Paipel rehrail, pahpa oh nohno kan kak sewese neirail seri kan en perenki soangen mour me kin kasalehda lemmwiki Siohwa.—Deuderonomi 6:6, 7.
Iaduwen Kitail Kak Kasalehda Lemmwiki Koht nan Atail Mour
8, 9. (a) Dahme kahrehda kitail men kasalehda lemmwiki Koht nan atail mour? (b) Dahme pidada en dehr lokaia suwed?
8 Nin duwen kitail koasoiapene mwowe, lemmwiki Siohwa sohte kin kihsang atail peren. Depit idek: “Kumwail men nsenamwahu nan amwail mour? Kumwail anahne mour werei oh nsenamwahu?” (Melkahka 34:12) E sansal, lemmwiki Koht wia ire kesempwal pwehn paieki mour werei oh nsenamwahu oh kilang kamwahu kan. E mengei en ndahte “I lemmwiki Koht.” Ahpw e sohte mengei en kasalehda met ki atail wiewia kan. Kahrehda, Depit doulahte oh kawehwehda iaduwen kitail kak kasalehda atail lemmwiki Koht.
9 “Kumwail dehr lokaia suwed, oh dehr lokaia likamw.” (Melkahka 34:13) Ngehn sarawi kamwekid Piter en doadoahngki iretikitik wet en Melkahka irelaud 34 mwurin e kaweidih Kristian akan en limpoakpene oh kadekpene nanpwungarail. (1 Piter 3:8-12) En dehr lokaia suwed kin wehwehki me kitail anahne liksang lipahned. Ni pali teio, kitail pahn ahnsou koaros song en kangoange meteikan ni ahnsou me kitail pahn koasoi ong irail. Oh pil, kitail pahn song en eimah oh lokaia mehlel.—Episos 4:25, 29, 31; Seims 5:16.
10. (a) Kawehwehda ia wehwehn en sohpeisang me suwed. (b) Soahng dah kan me pidada en wia dahme mwahu?
10 “Kumwail sohpeisang me suwed oh wiahda me mwahu; kumwail nantihong kolokol popohl ni mohngiong unsek.” (Melkahka 34:14) Kitail kin liksang mehkan me Siohwa ketin kupwur suwedki, duwehte nenek, kilel suwed kan (pornography), pirap, wunahni, tiahk lemei, kamamsakau, oh doadoahngki wini kasahliel kan. Kitail pil kin liksang mehn kamweit kan me kin doadoahngki soangen wiewia suwed pwukat. (Episos 5:10-12) Ni pali teio, kitail kin doadoahngki atail ahnsou ong wia dahme mwahu. Wiewia me keieu mwahu me kitail kak wia iei en kaukaule iang doadoahk en kalohki Wehio oh doadoahk en katohnpadahk, sewese meteikan en kak komourla. (Madiu 24:14; 28:19, 20) Wiewia mehkan me mwahu pil kin pidada en kaunopada oh iang towehda mihding en Kristian akan, kihda sawas en mwohni ong doadoahk me wiawi nan sampah pwon, apwalih mwahu atail Kingdom Hall, oh nsenohki anahn en riatail Kristian akan me sohte paiamwahu.
11. (a) Iaduwen Depit kin kapwaiada sapwellime kaweid me pid duwen kolokol popohl? (b) Dahme ke kak wia pwehn ‘kolokol popohl’ nan mwomwohdiso?
11 Depit wia mehn kahlemeng mwahu me pid duwen kolokol popohl. Pak riau, e ahneki ahnsou mwahu e kak kemehla Sohl. Pak riau pwukat koaros, e liksang tiahk lemei oh mwuhr, e koasoiong nanmwarkio ni wahu pwe ira en kak pwurehng popohlpene. (1 Samuel 24:8-11; 26:17-20) Dahme kitail kak wia ni ahnsou me irair ehu kohda me kak kauwehla popohl en nan mwomwohdiso? Kitail anahne “nantihong kolokol popohl ni mohngiong unsek.” Kahrehda, ma kitailpehm me nanpwungen kitail oh riatail men nan pwoson sohte mwahu, kitail anahne peikiong sapwellimen Sises kaweid me mahsanih: “Kohwei oh kapwungala nanpwungamwa.” Mwurin mwo, kitail pahn pousehla wiewia ire teikan en kisehn kaudok mehlel.—Madiu 5:23, 24; Episos 4:26.
Lemmwiki Koht Kin Wahdo Kapai Tohto
12, 13. (a) Soangen kapai dah kan me irail akan me kin lemmwiki Koht kin ahneki rahnwet? (b) Soangen ketin laud dahieu me tohnkaudok lelepek kan pahn ale ni ahnsou keren?
12 “KAUNO kin ketin sinsile me pwung kan oh kin ketin karonge ar likwer kan.” (Melkahka 34:15) Soahng kan me kileldi me pid duwen sapwellimen Koht wiewia kan ong Depit kin kasalehda me mahsen pwukat me mehlel. Rahnwet, kitail kin ahneki peren oh popohl nan loalatail pwehki kitail kin ese me Siohwa kin ketin sinsile kitail. Kitail kin koapworopworki me e pahn ketikihong kitail atail anahn akan, pil iangahki ahnsou kan me kitail kin ahneki pwunod laud. Kitail ese me ni ahnsou keren, tohnkaudok mehlel kan koaros pahn lelong uhwong kan sang rehn Kok en Makok oh pil “rahn lapalap oh kamasepwehk” en Siohwa nin duwen me kokohpdahr. (Soel 2:11, 31; Esekiel 38:14-18, 21-23) Sohte lipilipil soangen irair dah kan kitail pahn anahne lelong, dahme Depit mahsanih pahn wiawiong kitail: “Me pwung kan kin likweriong KAUN-O oh e kin ketin karonge irail; e kin ketin kapitirailsang nan arail apwal akan koaros.”—Melkahka 34:17.
13 Ia wen eh pahn kaperen en kilang me Siohwa pahn ketin kalinganahda mware lapalap! Mohngiongatail pahn direkihla soangen wahu me kitail sohte ahneki mahs, oh imwintihti kan koaros pahn lelong kasohrala kanamenek. “E kin ketin pelian irail kan me kin wia me suwed, eri re pahn manokonokla ni ar pahn mehla.” (Melkahka 34:16) Ia wen eh pahn wia keting laud ehu en komourala oh pidelong nan sapwellimen Koht koasoandi kapw!
Inou kan me Kak Sewese Kitail en Dadaurete
14. Dahme pahn kak sewese kitail pwehn dadaurete mendahki kahpwal kan?
14 Ni ahnsowohte, kitail anahne dadaurete pwehn kaukaule peikiong Siohwa nan sampah suwed oh lemei wet. Lemmwiki Koht kin wia sawas laud pwe kitail en kakairada irair en peik. Pwehki kitail kin mih nan ahnsou apwal ekei, ekei sapwellimen Siohwa ladu kan kin lelong kahpwal laud kan me kin kansensuwedih irailla oh kauwehla arail pepehm kan. Ahpw, irail kak uhdahn kamehlele me ma re pahn likih Siohwa, e pahn ketin sewese irail en dadaurete. Mahsen en Depit kin kihda kamweit mehlel: “KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.” (Melkahka 34:18) Depit doulahte oh wia mahsen en kangoang wet: “Apwal tohto kin lelohng aramas mwahu men, ahpw KAUN-O kin ketin doarehsang nan eh apwal akan koaros.” (Melkahka 34:19) Sohte lipilipil uwen kahpwal me pahn lelong kitail, Siohwa sapwellimanki kehl en doarekitailla.
15, 16. (a) Soangen kahpwal dahieu Depit rongada mwurinte e wiahda pwuhken Melkahka irelaud 34? (b) Dahme pahn sewese kitail en dadaurete pahn kahpwal kan?
15 Mwurinte e wiahda pwuhken Melkahka irelaud 34, Depit rongada duwen kahpwal kan me lelong tohn kahnimw en Nop, ni ahnsou me Sohl kemeirailla oh pali laud en samworo kan. Ia uwen eh inenen nsensuwedkihla ni eh kin tamanda me ah mwemweitla nan kahnihmw en Nop me kahrehiong Sohl en lingeringerda! (1 Samuel 22:13, 18-21) E dehde mwahu me Depit sohpeiong Siohwa oh peki sawas, oh e kin ale kamweit sang eh kin koapworopworki duwen kaiasadahn “me mwahu” kan me pahn wiawi ni ahnsou kohkohdo.—Wiewia 24:15.
16 Rahnwet, koapworopwor en kaiasada pil kin kakehlailih kitail. Kitail ese me sohte mehkot me atail imwintihti kan kak wia pwehn kauwehla kitail kohkohlahte. (Madiu 10:28) Depit pil kasalehda soangen pwosonohte ki mahsen pwukat: “KAUN-O kin ketin sinsile, sohte tih pwoat [rehn me pwung kan] me timpeseng.” (Melkahka 34:20) Iretikitik wet pweidahr rehn Sises. Mendahki Sises kamakamla ni elen lemei, sohte tih pwoat reh “katipwitimwpeseng.” (Sohn 19:36) Melkahka 34:20 pil doula oh kamehlelehiong kitail me sohte lipilipil soangen kahpwal dah kan Kristian me keidi kan oh iangarail “sihpw teikan” kin lelong, Siohwa pahn ketin sewese irail, oh e pahn katingih irail pwehki ahr kin dadaurete. Ni karasaras, tihrail kan sohte pahn katipwitimwpeseng.—Sohn 10:16.
17. Soangen kahpwal dahieu pahn lelohng irail akan me kin kailongki sapwellimen Siohwa aramas akan oh sohte koluhla?
17 Ong me suwed kan, arail irair weksang met. Ni ahnsou keren, irail pahn dolung dahme re padokedi. “Mehkot suwed pahn kemehla aramas suwed kan; irail kan me kin kailongki me pwung kan pahn ale lokolok.” (Melkahka 34:21) Irail koaros me kin pousehlahte uhwong sapwellimen Koht aramas akan pahn lelong kahpwal me keieu laud. Ni ahnsou me Sises Krais pahn wia kadeik, irail “pahn lokolongki kalokolok en mehla soutuk.”—2 Deselonika 1:9.
18. Ni ahl dahieu irail “pokon kalaimwun” kin lapwada, oh dahme pahn wiawiong irail ni ahnsou keren?
18 Melkahkahn Depit kin imwikihla mahsen en kangoang pwukat: “KAUN-O pahn ketin doarehla sapwellime aramas akan; irail kan me kin patohla reh pwe en ketin sinsile irail pahn mourla.” (Melkahka 34:22) Kerenlahng imwilahn eh kaunda me reireiki sounpahr 40, Nanmwarki Depit mahsanih: “[Koht] me ketin doareielahr sang nan ei kahpwal kan koaros.” (1 Nanmwarki 1:29) Duwehte Depit, ni ahnsou keren, irail kan me kin lemmwiki Siohwa pahn kilanglahng dahme wiawi mahs oh perenki arail lapwada sang diparail kan oh pitsang arail kahpwal akan koaros. Pali laud en Kristian me keidi kan alehier arail kating en nanleng. “Pokon kalaimwun” ehu sang wehi kan koaros kin iang luhwen rien Sises kan papah Koht oh pwehki met, re kin ahneki irair en mwakelekel mwohn silangin Siohwa. Met kin wiawi pwehki arail kin pwoson manaman en kamaiau me kohsang ntahn Sises me kakerediher. Erein Kaundahn Pahr Kid en Krais, kamwahupen meirong tomwo pahn pweida rehrail ni unsek, oh irail pahn wiahla aramas unsek kei.—Kaudiahl 7:9, 14, 17; 21:3-5.
19. Dahme irail kan me kisehn “pokon kalaimwun” kin koasoanehdi en wia?
19 Dahme kahrehda soangen kapai pwukat pahn kohwong “pokon kalaimwun” en tohnkaudok en Koht akan? Pwehki irail kin koasoanehdi nan kapehderail en doulahte kasalehda lemmwiki Koht, papahn ih ni wahu, oh peikiong ih. Ni mehlel, lemmwiki Siohwa kin kahrehiong atail mour en kaperen nan ahnsouwet oh kin sewese kitail en “lelohng ni mouro me uhdahn mour mehlel”—iei mour soutuk nan sapwellimen Koht koasoandi kapw.—1 Timoty 6:12, 18, 19, Kaudiahl 15:3, 4.
Ke Tamatamante?
• Dahme kahrehda kitail anahne lemmwiki Koht, oh ia wehwehn lemmwiki ih?
• Iaduwen lemmwiki Koht pahn kin kamwakid atail wiewia kan?
• Lemmwiki Koht kin wahdo soangen kapai dah kan?
• Soangen inou dah kan me kin sewese kitail en dadaurete?
[Kawehwehpen kilel kan nan ehu ehu pali 18]
Irail akan me kin lemmwiki Siohwa kin doadoahngki arail loalokong ni ahnsou me arail doadoahk kin irairdi
[Kawehwehpen kilel kan nan ehu ehu pali 20]
Wiewia me keieu mwahu me kitail kak wia ong mehn mpatail kan iei en ehukihong irail rongamwahu en Wehio