Kalohk ong Aramas en Soangen Lokaia oh Kaudok Koaros
1 Kristian kan en mahs kin ngoangki arail kalohk ong aramas me kin doadoahngki lokaia teikan oh aramas me kin iang kaudok teikan. Ihme kahrehda, “ni pahr 100 C.E., kahnimw kan limwahn Sehd en Mediderenien kin dirkihla Kristian kan.”—History of the Middle Ages.
2 Nan United States, aramas tohto kak lokaiaki lokaia kan likin lokaiahn wai (English). Kahnimw tohto kin audaudki aramas tohto me kohsang wehi kan likin United States. Aramas tohto pil iang kaudok teikan, iangahki irail me dene kaidehn irail Kristian kan duwehte Buddhist oh Hindu iangahki me rar rar kei me iang pelien lamalam en mehn Suhs oh Muslim. Pwehki soangsoangen lokaia kan oh kaudok kan, e inenen apwal en ese iaduwen kitail pahn koasoiong aramas pwukat oh kalohk ong irail. E kin duwehte ma pein kitail misineri kei nan pein sahpwatail. Iaduwen kitail kak idawehn kehkehlik en Sises en “kalohkihseli rongamwahu ong aramas koaros” nin duwen kitail pahn kalohk ong aramas me kin doadoahngki lokaia teikan oh iang kaudok teikan?—Wiewia 10:42 (New World Translation).
Kalohk ong Aramas me Kin Doadoahngki Lokaia Teikan
3 Mie kekeirada laud en sounkalohk kapw kan sang rehn irail me kin doadoahngki lokaia teikan nan state 48 nan wasahn kalohk en United States. Mwomwohdiso kapw 17 wiawihda sang rehn irail me kin lokaiahki lokaia likin lokaiahn wai, oh pwihn kapw kan wiawihda sang lokaia 7 likin lokaiahn wai. Ahpw, mie pil koasoandi kan me laud sang mehpwukat me pahn wiawi.
4 Sewese Irail me Kin Doadoahngki Lokaia Teikan: E sansal me aramas kin sukuhliki mehkot mwahu ma sounpadahko kin doadoahngki en aramaso lokaia. “Pwehki rongamwahu” oh pwe kitail ‘en iang pwaisanki kamwahupe kan,’ brother oh sister tohto kin sukuhliki lokaia kapw kan. (1 Kor. 9:23) Mendahki emen sister me kin doadoahngki lokaiahn waite kin kohla rehn emen lih me kin doadoahngki lokaiahn China ahnsou koaros pwehn kihong ih makasihn kan (magazine route), liho sohte mwahuki sistero en onop reh. Ahpw ni ahnsou me emen sister tohrohr, me kin sukuhliki lokaiahn China, kihong ih pwuhk ehu ni lokaiahn China oh idek reh ma e men onop Paipel, liho pwungki. E perenki rong sang keriaun sistero me kohla reh pwe sister menet doadoahngki ekei lepin lokaia kan ni pein ahn liho lokaia.—Pil tehk Wiewia 22:2.
5 Ihme kahrehda, Watchtower en November 1, 1992 koasoia: “Sukuhliki lokaia kapw ehu . . . kaidehn ihte pahn sewese me pwulopwul kan en koahiekla ni madamadau ahpw pil sapwellimen Siohwa pwihn kak doadoahngki irail laud.” Tohto me iang kisehn peneinei en Bethel kin sukuhliki lokaia kapw kan. Ihme kahrehda, mwomwohdiso kan me kin anahne brother kan kin ale sawas rehrail. Ma ke ese lokaia tohrohr ehu de ke men sukuhliki pil ehu lokaia kapw, ke kak sewese mwomwohdiso kan de pwihn kan me kin doadoahngki lokaia teikan.—Madiu 9:37, 38.
6 Emen brother nan Florida (United States) me sukuhliki lokaiahn Vietnam mwohn e pidelong nan padahk mehlel kin perenki kalohkong irail me kin doadoahngki lokaiahn Vietnam rongamwahu. Pwehki e mwahuki sapwellimen Siohwa pwihn en doadoahngki ih laud, ih oh eh peneinei kasaula ehu wasa me doh sang Florida pwehn sewese irail me kin doadoahngki lokaiahn Vietnam nan Florida. Pwehki e kin mihmi nan Florida ahnsouwet, e kin onop Paipel rehn aramas tohto me kohsang Vietnam.
7 Emen sister me kin pioneer nan California (United States) tuhwong aramas salengopon kei nan wasahn kalohk. E kapakap ong Siohwa pwehn sewese ih en rapahki emen me kak kasukuhlikihong ih lokaiahki peh pwe e men padahkiong aramas salengopon padahk mehlel. Ehu rahn, ahnsou me e netinet nan sidohwa, e tuhwong emen lih salengopon me anahne sawas en rapahki dipwisou ehu. Mwurin sistero sewese liho rapahki dipwisouo, sistero ntingihdi nan doaropwe ehu me e men sukuhliki lokaiahki peh pwehn sewese aramas salengopon oh e kihong liho en wadek. Lih salengopono ntingihdi, “Dahme kahrehda ke men sewese aramas salengopon kan?” Sistero ntingihdi: “Ngehi emen Sounkadehdehn Siohwa kan, oh I men sewese aramas salengopon kan en wehwehkihla Pwuhk Sarawi. I kak padahkiong uhk Pwuhk Sarawi ma ke pahn kasukuhlikiong ie lokaiahki peh.” Sistero koasoia: “Ke sohte pahn kamehlele uwen liho perenki oh liho uhd ntingihdi me e pwungki aht koasoandi.’ ” Sistero kin kohla imwen liho ni soutik koaros wihk weneu. Sistero sukuhliki lokaiahki peh, oh lih salengopono sukuhliki padahk mehlel oh papidaisla! Met wiawi sounpahr 30 samwalahro oh sistero kin padahki aramas salengopon kan lao lel met oh ni ahnsouwet e iang mwomwohdiso ehu me kin lokaiahki peh.
8 Ma ke wehwehki lokaia tohrohr ehu oh men kasaula nan ehu wasa me kin anahne sawas, dahme ke soh koasoiong elder kan nan mwomwohdiso duwen ire wet. Ma e konehng ke en kasaula nan wasao me anahne sawas, idek rehn Sounapwalih en Circuit ma mie wasa ieu me keren me ke kak sewese. Ma soh, ke kak nting ong Society, ahnsou me elder kan kak pil ntingihda kisin likou me pid duwen dahme re kilang nin duwen ahmw koahiek ni pali ngehn oh pil ahmw koahiek nin duwen lokaia tohrohro.”—Kilang Watchtower en August 15, 1988, pali 21-23.
9 Doadoahngki Pwuhk, Brochure, Makasihn oh Doaropwe kan me Society wiahdahr: Neitail pwuhk, brochure, makasihn oh doaropwe kan wiawihdahr nan lokaia tohto. E pahn mwahu ma ke weuwa doaropwe kan ni lokaia tohrohr kan—de ma sohte sounkalohk kan me kin doadoahngki lokaiao kin kalohk wasao, ke kak weuwa brochure Kupwurki pwehn kak kalohk ong aramas me kin doadoahngki lokaia teikan. Ma e sansal me aramaso kin doadoahngki lokaiahn wai ahpw lokaiahn wai kaidehn pein eh lokaia, idek rehn aramaso mehnia lokaia e kin mengeiki wadek. Met pahn sewese iuk en doadoahngki pwuhk de brochure de makasihn de doaropwe nan lokaia me e kin keieu wehwehki. Karasepe ieu, pali laud en mehn Hindu kan me kin lokaiahn Punjabi de Urdu kin kak wadek lokaiahn Arabic.
10 Mendahki ke sohte kak lokaiahki lokaiahn aramaso me ke tuhwong nan kalohk, ke kak kalohk ong ih. Iaduwen? Ni ahmw pahn doadoahngki booklet me oaralap koasoia Good News for All Nations. Mie ekei parakrap kan loale me ntingihdi ni lokaia 59. Nin duwen dahme pali 2 kin kawehwe, mwurin ke pahn esehda mehnia lokaia me tohnihmw kin keieu perenki wadek, mweidong ih en wadek nan booklet wasao me ntingihdi ni lokaiao. Mwurin e wadek wasao, kasalehong ih pwuhk de brochure de makasihn de doaropwe ni lokaiao. Ma sohte, kasalehong ih pwuhkohte ni lokaiahn wai. Nantiong kawehwe ong ih me ke pahn pwurodo oh wahdo pwuhk de brochure de makasihn de doaropwe ni lokaiao me e kin perenki wadek. Idek reh mwareo, oh ntingihdi mwaren aramaso oh iangahki wasao me e kin mihmi ie. Ke kak kihong mwomwohdiso de pwihn me kin lokaiahki lokaiao mwaren aramaso oh wasao me e kin mihmi ie, doadoahngki doaropwe me adaneki “Foreign Language Follow-up” (S-70a). Ma ke anahne sawas, idek rehn brother kan me kin apwalih palien sewese aramas me kin doadoahngki lokaia teikan, oh pil kilang Atail Doadoahk Ong Wehi (lokaiahn wai) en October 1993 pali 7. Ma sohte sounkalohk men me kin lokaiahki lokaia me tohnihmwo kin doadoahngki me kak pwurehng pwurala reh, mwein ke kak pwurehng pwurala rehn tohnihmwo oh nantiong onop Paipel reh ni ahmw doadoahngki pwuhk de brochure de makasihn de doaropwe ni lokaiahn wai.—1 Kor. 9:19-23.
Kalohk ong Aramas me kin Iang Kaudok kan me Sohte Kin Kamehlele Krais
11 Ma kitail wehwehki dahme aramas kin kamehlele, met kin sewese kitail en kalohk ong irail. Pwuhken Mankind’s Search for God kin sewese kitail en wehwehki kaudok teikan pwehn wehwehki dahme aramas kamehlele oh met kin sewese kitail en ehukihong irail padahk mehlel.
12 Koakon ni pali 6 kin koasoia pwuhk kan me sapwellimen Siohwa pwihn ntingihdi pwehn kalohk ong aramas me iang kaudok kan me sohte kin kamehlele Krais. Ni atail kin wadek pwuhk pwukat, kitail pahn wehwehki iaduwen kitail kak koasoiong irail. Menlau dehr manokehla en pil doadoahngki noumw pwuhken Reasoning. Ni pali 21-24 nan pwuhko kin kihda iren sawas kan me kak sewese kitail ahnsou me kitail kin tuhwong irail me iang pelien lamalam en Buddhist, Hindu, Mehn Suhs oh Muslim kan.
13 Kanaieng Dahme Kitail Nda: Kitail anahne kanaieng dehr lemeleme me aramas koaros me kin ahneki pelien lamalam ehute kin duwepenehte nin duwen dahme re kamehlele. Ahpw, ke anahne tehk duwen dahme pein tohnihmwo kin kamehlele. (Wiewia 10:24-35) Salimoon, emen me kin iang pelien lamalam Muslim mahs, kin kamehlele me Koran iei mahsen en Koht. Ahpw e sohte kin kamehlele dahme Muslim teikan kin kamehlele me Koht, me kin diren mahk, pahn kak kaloke aramas nan kisiniei me kin lullul nan ehl. Ehu rahn, Sounkadehde kan en Siohwa luhke ih en iang towehda mihding. E mwadang kasawiada padahk mehlel, oh kin papah Koht ni peren nin duwen emen elder en mwomwohdiso en Kristian.
14 Ni ahnsou me kitail pahn kalohk ong irail me sohte kin kamehlele Krais, kitail anahne kanaieng dahme kitail pahn tepin koasoiaiong tohnihmw kan duwen rongamwahu. (Wiewia 24:16) Ekei aramas me iang kaudok teikan sohte pwungki ma emen pahn songen sewese irail en iangala ehu pelien lamalam tohrohr. Eri, ke anahne rapahkihda ire kan me kumwa kak pwungkihpene oh met pahn sewese irail en wehwehki padahk mehlel pwon en Mahsen en Koht. Irail me rasehng sihpw kan pahn mwekidki padahk kadek oh padahk kan me kin kasalehda ni sansal padahk mehlel.
15 Kitail anahne pilida mwahu lepin lokaia kan me kitail kin doadoahngki, pwe ma soh, mwein e pahn kahreong aramas en sohte rong kitail. Karasepe ieu, ma kitail mwadang nda me kitail Kristian kan, tohnihmwo pahn mwadang medemedewe me kitail iang pelien lamalam kan en Kristendom, oh met kak kahrehda re sohte men rong ahmw padahk. Mwein e pahn mwahu en koasoi duwen Paipel nin duwen “Nting Sarawi kan.”—Madiu 21:42; 2 Tim. 3:15.
16 Ma ke tuhwong emen me iang pelien lamalam me sohte kin kamehlele Krais oh ke sohte kaunopada en kalohk ong ih ahnsouwo, ke kak kihdi reh kisin doaropwe oh padahkiong ih mwaromwi oh idek reh mware. Mwurin rahn ehu de riau, ke kak pwurehng pwurala oh koasoia dahme ke kaunopada.—1 Tim. 4:16; 2 Tim. 3:17.
17 Kalohk ong Buddhist kan: (Kilang chapter 6 nan pwuhken Mankind’s Search for God.) Aramas koaros me iang Buddhist kin wekpeseng nin duwen dahme re kamehlele. Irail sohte kin kamehlele Koht, ahpw re kin kamehlele ohl en India me ede Gautama (Buddha) me momour nan keweneun senturi B.C.E. Ni ahnsou me e kilang ohl men me soumwahu oh pil emen ohl me mahla oh pil emen ohl me mehlahr, Gautama pwonopwonki kahrepen mour. ‘Aramas ipwidi pwehn lokolok, oh mahla, oh mehla?’ e medemedewe. Ahpw, ni mehlel, kitail kak sapengla peidek pwukat sang nan Pwuhk Sarawi ong irail Buddhist kan me uhdahn men wehwehki duwen ire pwukat.
18 Ni ahnsou me ke koasoiong irail me iang Buddhist, koasoiahte ire mehlel oh sansal kan sang nan pwuhko me keieu lapalap nanpwungen pwuhk sarawi kan me iei Paipel. Duwehte aramas tohto, irail me iang Buddhist men ese duwen popohl oh tiahk mwahu oh mour en peneinei oh re kin men koasoia ire pwukat. Koasoia ire pwukat kak kahrehda ken koasoia me ihte Wehin Koht me pahn kak kamwahuiala kahpwal akan en aramas akan.
19 Ni ahnsouwet, mehn China tohto me iang Buddhist oh lamalam teikan me sohte kin kamehlele Koht kasaula nan wasa tohto nan United States. Irail tohto kin iang sukuhl laud kan en United States. Emen sister nan Montana (United States) kilangada kilang emen ohl en China nan sidowa en mwenge oh e kihong ih doaropwe ni pein en ohlo lokaia oh luhke ih ong mihding kan. Ohl idek rehn sistero: “Ke koasoia duwen Pwuhk Sarawi? I raparapahkier met erein ahi mour!” Ohlo tepida onop Pwuhk Sarawi wihkohte oh tepida iang towehda mihding koaros.
20 Pohnangin sounpahr eisek samwa, emen sister me kin pioneer nan Nevada (United States) kin padahkiong tohnsukuhl akan en mehn China duwen padahk mehlel. Ehu rahn, ahnsou me e kalohk nan imwen apartment me mie apartment waluh me tohnsukuhl en mehn China kin mihmi loale, sistero kapakap ong Siohwa oh peki ma Siohwa kak sewese ih en tepida ehu onop en Paipel rehn emen nan apartment koaros. E diarada mehkot me tohnsukuhl koaros kin nsenohki—koaros rapahki peren oh nsenamwahu mehlel. Ahnsou koaros re kin men rong. E kin doadoahngki brochure Lasting Peace and Happiness—How to Find Them me ntingihda pwehn kahrehong mehn China en men rong. Mwurin e wia onop en brochure pak limau rehn emen tohnsukuhl en mehn China, tohnsukuhlo padahkiong ih me ahnsou wereilahr me e kin raparapahki padahk mehlel oh e ahpwtehn diarada padahk mehlel.
21 Kalohk ong Hindu kan: (Kilang irelaud 5 nan pwuhken Mankind’s Search for God.) Irail me kin iang Hindu sohte kin kamehlele soahng teieu. Lamalam en mehn Hindu uhdahn oaretik. Hindu kan kin kamehlele me arail Koht emen Trinity me wehwehki koht silimen (Brahma—Sounkapikada oh Vishnu—Soundoarehla oh Siva—Sounkauwehla) kin patpene oh wiahda emente Koht Lapalap me iei Brahman. Re kin kamehlele me emen (soul) sohte kak mehla oh padahk wet kin utungada arail padahk en reincarnation (wehwehki me ma emen mour mwahu, ahnsou me e mehla, e pahn iasadahng emen mwahusang mahs; ahpw emen me mour suwed, ahnsou me e mehla, e pahn iasadahng emen suwedsang mahs [duwehte mahn]) oh padahk wet kin kahrehda Hindu tohto kin kamehlele me ahmw mour koasoanehdier sang mahs. (Kilang pwuhken Reasoning, pali 317-321, oh The Watchtower (lokaiahn wai), en May 15, 1997, pali 3-8.) Hindu kan kin kamehlele me padahk koaros mwahu oh pelien lamalam koaros kin wia padahk mehlel.
22 Ahnsou me ke men kalohkong emen me iang pelien lamalam en Hindu, ke kak kawehwe duwen atail koapworopwor en mour soutuk nan sampah me poahsoanda pohn Pwuhk Sarawi oh pil me Pwuhk Sarawi kak sapengla peidek kesempwal kan me aramas koaros kin medemedewe.
23 Kalohk ong Mehn Suhs kan: (Kilang irelaud 9 nan pwuhken Mankind’s Search for God.) Me weksang pelien lamalam en Kristian kan, pelien lamalam en mehn Suhs poahsoanda pohn poadoapoad en aramas, kaidehn padahk likamw en soi kan. Sang Nting Sarawi en Ipru, mie mehkot kesempwal me aramas kak diarada ma re men rapahki Koht mehlel. Ahpw mehlel, padahk ehu me re kin kamehlele nan rahn pwukat me kin uhwong Mahsen en Koht iei padahk me mour (soul) sohte kak mehla. Ahpw, ahnsou me ke tuhwong irail, mwein ma ke nda me kitail kin kamehlele Koht en Eipraam oh ndaiong irail me kitail koaros kin lelong kahpwal, re pahn men rong kitail.
24 Ma ke tuhwong emen mehn Suhs me sohte kin pwoson Koht, idek reh ma ih duwen eh pepehm sangete mahs oh ahmw idek reh duwen met mwein pahn sewese iuk en ese dahme pahn keieu sewese ih. Karasepe ehu, mwein e saikinte rong kawehwe mwahu duwen dahme kahrehda Koht kin mweidong suwed en mihmihki. Ma ke tuhwong mehn Suhs me kin rapahki dahme mehlel, ke kak kangoange ih en pwurehng kasawihada ihs Sises oh me ih Mesaia me irail mehn Suhs kan kin ntingihdi Nting Sarawi en Krihk kin kasalehda, kaidehn sang dahme Kristendom kin ntingihdi sapwung duwen ih.
25 Kalohk ong Muslim kan: (Kilang irelaud 12 nan pwuhken Mankind’s Search for God.) Muslims (de Moslems) iei aramas me kin iang pelien lamalam en Islam (de Muhammadanism) oh re kin kamehlele me Allah me arail Koht oh Muhammad (570-632 C.E.) me ih iei soukohp en Allah me keieu kesempwal oh me mour keieu mwuhr. Pwehki Muslim kan sohte kin kamehlele me Koht sapwellimanki pwutak men, re kin kamehlele me Sises Krais iei soukohp en Koht emen me sohte nohn kesempwal. Neirail pwuhk sarawi, Koran, wiawihda sounpahr 1,400 samwalahro, oh ekei iren Nting Sarawi en Ipru oh Krihk kin mihmi loale. Mie soahng tohto me duwehpenete nanpwungen Islam oh Kadolik. Pelien lamalam riau pwukat kin kamehlele padahk pwukat: mour (soul) en aramas sohte kak mehla, oh mie ehu wasa adaneki purgatory, oh mie ehu wasa me adaneki ehl me kisiniei kin lullul ahnsou koaros.
26 Soahng kan me kitail oh irail Muslim kan kin kamehlele iei me Koht mehlel tehmen me mie oh Ih me kamwekid aramas en ntingihdi Paipel. Ma emen kin wadek kanaieng pwuhken Koran, met wehwehki me e wadek wasa kan me kohsang Torah, oh pwuhken Psalm (Melkahka kan), oh pwuhken Rongamwahu kan oh wadek me pwuhk pwukat kohsang Mahsen en Koht oh wehwehki me kitail anahne peikiong kaweid en pwuhk pwukat. Ihme ke kak onopki pwuhk pwukat rehn aramaso.
27 Ma ke tuhwong emen me iang Muslim, ke kak nda: “I sohte kin kalap koasoiong irail me iang Muslim, ahpw I wadek mehkot duwen ekei amwail padahk kan nan pwuhk wet. [Pakalahng pali 23 nan pwuhken Reasoning.] E koasoia me kumwail kin kamehlele me Sises iei emen soukohp, ahpw Muhammad iei soukohpo me keieu kesempwal oh me memour keieu mwuhr. Ke pil kin kamehlele me Moses emen soukohp mehlel? [Mweidong en sapeng.] I kak kasaleong uhk dahme Moses sukuhliki duwen Koht me pid mware?” Mwurin mwo, wadek Eksodus 6:2, 3. Ahnsou me ke pwurehng pwurala rehn aramaso, ke kak koasoia sawaspen oaralap “One God, One Religion” me mihmi ni pali 13 nan booklet The Time for True Submission to God.
28 Rahnwet, aramas tohto kin mwekidki dahme ntingihdi nan Aiseia 55:6 me mahsanih: “Kumwail sohpeiong Kauno [Siohwa] oh kapakapong nindoken eh sohte kin ketin dohsang kumwail.” Ire wet kin pid ong aramas me mongiong mehlel, mendahki mehnia lokaia me re kin lokaiahki oh mehnia pelien lamalam me re kin iang. Kitail kak kasikasik me Siohwa pahn kapaiada atail nannanti en kohwei oh “padahki tohn wehi kan koaros.”—Madiu 28:19.
[Koakon nan pali 6]
BROCHURE OH BOOKLET OH DOAROPWE KAN ME WIAHDA ONG IRAIL ME SOHTE KIN KAMEHLELE KRAIS
Buddhist kan
“Look! I Am Making All Things New” (Brochure)
In Search of a Father (Booklet)
Mehn China
Lasting Peace and Happiness—How to Find Them (Brochure)
Hindu kan
From Kurukshetra to Armageddon—And Your Survival (Booklet)
Our Problems—Who Will Help Us Solve Them? (Brochure)
The Path of Divine Truth Leading to Liberation (Booklet)
Victory Over Death—Is It Possible for You? (Booklet)
Why Should We Worship God in Love and Truth? (Brochure)
Mehn Suhs kan
A Peaceful New World—Will It Come? (Tract No. 17)
Jehovah’s Witnesses—What Do They Believe? (Tract No. 18)
Will There Ever Be a World Without War? (Brochure)
Muslim kan
How to Find the Road to Paradise (Tract)
The Time for True Submission to God (Booklet)