Julio

Jesusqa Tatan jinapuni runaspaj sonqoyoj karqa, pay jinataj piensarqa. Chaytaj sutʼi rikukorqa imatachus parlasqanpi, imatachus ruwasqanpi, milagrosta ruwasqanpipis (Juan 14:9). ¿Imatá Jesuspa milagrosninmanta yachakusunman? Jesuswan Tatanwanqa maytapuni munakuwanchej. Jesusqa kay jallpʼapi kashaspa, runasta maytapuni munakusqanrayku llakiypi kajkunata yanapananpaj atiyninwan milagrosta ruwarqa. Uj kutipi, iskay cieguitos Jesusmanta qhaparispa yanapata mañakorqanku (Mat. 20:30-34). Bibliataj nin Jesusqa “mayta khuyakuspa” ñawisninkuta llankharispa sanoyachisqanta. Griego parlaypi ‘mayta khuyakuy’ nisqanqa uj runaj sonqon mayta nanasqanta, cuerpontaj chay nanayta sientesqanta niyta munan. Jesús paykunata chay jinatapuni khuyakusqanqa, runasta mayta munakusqanta rikuchin. Chayrayku yarqhachikojkunata mikhucherqa, uj lepra onqoyniyoj runatataj sanoyacherqa (Mat. 15:32; Mar. 1:41). Chaytaj sutʼita reparachiwanchej ‘jatun khuyakuyniyoj’ Jehová Diosninchejpis, Wawanpis maytapuni munakuwasqanchejta, sufrejtinchejtaj sonqonku mayta nanasqanta (Luc. 1:78; 1 Ped. 5:7). Paykunaqa maytapuni munashanku runaspa tukuy llakiyninkuta chinkachiyta. w23.04 pág. 3 párrs. 4, 5

Satanaspa mundonqa millay imaswan juntʼa kashan. Chayrayku mana imatapis leenallachu, nitaj uyarinallachu. Yuyayninchejta jarkʼanapaj, chaymantaj allin imasta juntʼachinapajqa Bibliata leenanchej tiyan, estudiananchejtaj tiyan. Chantapis tantakuykunaman rinanchej tiyan, predicacionmanpis. Jehovataj niwanchej mana saqenanta, mana aguantay atinata juchaman tanqasqa kananchejta (1 Cor. 10:12, 13). Kay qhepa llakiy tiempospi Jehovata sirvinallapajpuneqa, ni jaykʼaj jina orakunanchej tiyan. Jehovaqa munan ‘sonqonchejpi kaj imasta payman willakunanchejta’ (Sal. 62:8). Chantapis payta jatunchana, tukuy imata ruwasqanmantataj agradecekuna. Paymanta yanapata mañakuna mana manchachikuspa predicanapaj, llakiykunata aguantanapaj, juchaman tanqasqa kajtinchejtaj mana urmanapaj. Amapuni saqenachu ni pipis, nitaj imapis Jehovamanta mañakojta jarkʼanawanchejta. w23.05 pág. 7 párrs. 17, 18

¿Imaraykutaj reunionesman rinchej? Astawanqa Jehovata jatunchanapaj (Sal. 26:12; 111:1). Chantapis reunionesman rillanchejtaj kay llakiy tiempospi purajmanta kallpachanakunapaj (1 Tes. 5:11). Comentaspataj chay iskay imasta ruwayta atinchej. Jinapis wakin imasrayku mana comentayta atillasunmanchu. Ichapis comentayta manchachikusunman, chayri comentanapaj ashkhata makita oqharejtinchejpis, mana tukuyninpichu comentachiwasunman. Apóstol Pablo ‘purajmanta kallpachanakunanchej’ kasqanta nerqa. Creeyninchejta rikuchinapaj may pisisitullata comentajtinchejpis, hermanosta kallpachayta atisunman. Chayta yuyarikuytaj yanapawasun comentayta mana manchachikunapaj. Mana munasqanchejman jinachu ashkhata comentachiwajtinchejtaj, mayta kusikusun wajkunapis comentayta atisqankumanta (1 Ped. 3:8). w23.04 pág. 20 párrs. 1-3

Judiosqa 70 watastaña Babiloniapi presos kasharqanku, chayllapitaj nikorqa Babiloniamanta llojsipuspa llajtanku Israelman kutipuyta atisqankuta (Esd. 1:2-4). Chaytaj karqa Jehová yanapasqanraykulla. Imaraykuchus babiloniosqa presosninkuta mana kacharipuyta yachajchu kanku (Isa. 14:4, 17). Babiloniaqa atipasqa karqa, chay mosoj gobiernotaj nerqa judíos llajtankuman kutipuyta atisqankuta. Chayraykutaj tukuy judiosqa, astawanraj tatasqa, ajllananku karqa Babiloniapi quedakuytachus chayri Jerusalenman ripuytachus. Ichapis wakinpajqa chayqa mana atikullarqachu. Wakin judiosqa manchay mayorcitosña karqanku. Chayrayku mana chay jina karuta viajayta atinkumanchu karqa. Babiloniapi tiyakoj judiosqa casi tukuyninku chaypiña nacekorqanku. Chayrayku paykunapajqa chaylla llajtanku karqa. Israel llajtatataj ñaupa tatasninkoj llajtankuta jinalla qhawaj kanku. Chantapis ichá wakin judiosqa Babiloniapi qhapajyaykorqanku. Ichapis chayrayku mana atillarqankuchu sumaj wasisninkuta chayri negociosninkuta saqepuyta, mana rejsisqanku llajtapitaj tiyakamuyta. w23.05 pág. 14 párrs. 1, 2

Diospa Palabranqa niwanchej aguantayta, khuyakuyta, munakuyta ima astawan yachakunanchejta. Lucas 21:19 nin: “Aguantasqaykichejrayku salvakunkichej”, nispa. Colosenses 3:12 nillantaj: “Pʼachawan jina pʼachallikuychej: tukuy sonqo khuyakuywan”, nispa. 1 Tesalonicenses 4:9, 10 versiculostaj nin: “Diosqa purajmanta munanakunaykichejta yachachisorqachej. […] Chaywanpis hermanosníy, mañakuyku astawanraj munakuypi wiñanaykichejta”, nispa. Tukuy chay yuyaychaykunaqa karqa pikunachus aguantayta, khuyakuyta, munakuyta rikuchisharqankuña chaykunapaj, jinapis kallpachakunallankupuni karqa. Noqanchejpis kikillantataj ruwananchej tiyan. Chayrayku imaynatachus chay kinsa imasta ñaupa tiempomanta cristianos rikuchisqankuta, imaynatachus qanpis paykuna jina ruwanaykita yachakuy. Chaytaj yanapasonqa manchay ñakʼariy tiempopaj wakichisqa kanaykipaj. Manchay ñakʼariy tiempo chayamojtintaj wakichisqaña kanki aguantanaykipaj, aguantallaytapunitaj munanki. w23.07 págs. 3, 4 párrs. 4, 8

Chay ñanpi kasqanchejrayku kunan tiempopi Jehovata yupaychayta atinchej llajtan ukhupi. Aswan qhepamantaj Diospa Gobiernonpi ashkha bendicionesta japʼisun. Chayrayku ajllasqa cristianospis ‘waj ovejasmanta’ kajkunapis, chay ñanllapipuni kananchej tiyan (Juan 10:16). 1919 watamantapacha may chhika qharis, warmis, wawas ima, Jatun Babiloniamanta llojsipunku, nisunman llulla religionesmanta, kay santo ñanpitaj purishanku. Judíos Babiloniamanta kutinpunankupajqa, Jehová ñanninkuta pichachiporqa (Isa. 57:14). Kunan tiempopirí, ¿‘Santo Ñanta’ pichachillarqatajchu? Arí. Ashkha watas ñaupajta niraj 1919 wata kashajtin, Jehovaqa payta respetaj runaswan chay ñanta pichachiyta qallarerqa Jatun Babiloniamanta runas llojsipunankupaj (Isaías 40:3, kikinchay). Paykunaqa wakin imasta ruwarqanku ñanta wakichinankupaj, ajinamanta aswan qhepaman allin sonqoyoj runas Jatun Babiloniamanta llojsipuyta atinankupaj, Diospa llajtanmantaj yaykunankupaj. Chaypeqa Jehovallata yupaychay watejmanta sayarichisqa kashan. w23.05 pág. 16 párrs. 8, 9

Jehovaqa munan tukuy sonqo kusisqa payta sirvinanchejta (2 Cor. 9:7). Ruwayta munasqanchejta juntʼanapaj sonqonchej mana aysawajtinchejpis, ¿kallpachakunallanchejpunichu kanman? Arí. Apóstol Pablopi tʼukurina. Pay nerqa: “Cuerpoyta castigani, uj esclavota jinataj kamachini” (1 Cor. 9:25-27). Pabloqa obligakorqa imatachus Jehová ruwananta munarqa chayta ruwananpaj, chaypaj sonqon mana aysajtinpis. Jehovaqa kusisqa kasharqa Pablo imatachus payta sirvinanpaj ruwasqanmanta, ajinata kallpachakusqanraykutaj bendicerqa (2 Tim. 4:7, 8). Jehovaqa imatachus ruwayta munasqanchejta juntʼanapaj kallpachakojtinchej mayta kusikun, chaypaj sonqonchej mana aysawajtinchejpis. Imatachus ruwananchejta nikorqanchej chayta ruway mana gustawajtinchejpis, Jehovata munakusqanchejrayku chayta ruwanapaj kallpachakunchej. Chayrayku payqa kusikun. Jehovaqa Pablota bendicerqa, noqanchejtapis kallpachakojtinchejqa bendecillawasuntaj (Sal. 126:5). Jehová kallpachakusqanchejta bendecisqanta reparaspaqa, ichá astawan sonqonchej aysawasun ruwayta munasqanchejta juntʼanapaj. w23.05 pág. 29 párrs. 9, 10

Apóstol Pabloqa nerqa Jehová Diospa pʼunchayninpi mana salvakojkunaqa puñusqas jina kashasqankuta. Puñuspaqa mana reparakunchejchu imaschus muyuyninchejpi kasqanta, ni tiempo pasasqantapis. Chayrayku ima pasajtinpis mana reparanchejchu, nitaj imatapis ruwayta atinchejchu. Kay tiempomanta casi tukuy runaspis puñushankumanpis jina kashanku (Rom. 11:8). Qhepa pʼunchaykunapi kausakushasqanchej sutʼi reparakojtinpis, paykunaqa mana chaypi creenkuchu. Manallataj creenkuchu manchay ñakʼariy tiempo qayllitapiña kashasqanta (2 Ped. 3:3, 4). Noqanchejtaj yachanchej, días pasasqanman jina astawanraj rijchʼarisqas kananchej kasqanta (1 Tes. 5:6). Chayrayku, ¿imaraykutaj sonqo tiyasqa kananchej tiyan, manataj manchikuywan atipachikunanchejchu tiyan? Imaraykuchus facilta chhapuykukusunman politicaman, kay mundomanta waj imasmanpis. Jehová Diospa pʼunchaynin qayllaykamusqanman jinataj astawan tanqasqas kasunchej chay imasman chhapukunapaj. Jinapis mana llakikunachu tiyan ajina tanqasqa kaspa imatachus ruwanamanta. Imajtinchus Dios yanapawasun espíritu santonwan sonqo tiyasqa kanapaj, manchikuywan mana atipachikunapaj, allin yuyaywantaj imatapis ajllanapaj (Luc. 12:11, 12). w23.06 pág. 10 párrs. 6, 7

Sansonmanta parlajta uyarispa, ¿imataj yuyayninchejman jamun? ¿May kallpasapa kasqancharí? Arí, payqa may kallpasapa runapuni karqa. Jinapis uj kuti pantarqa, chayraykutaj may llakiypi rikhurerqa. Jehovatajrí, Sansón tukuy kausayninpi sinchʼi creeyniyoj kasqanta astawan qhawarqa. Chaytataj Jehovaqa Bibliapi qhelqacherqa, noqanchej paymanta yachakunanchejpaj. Jehovaqa Sansonnejta tʼukuna imasta ruwarqa llajtan Israelrayku. Sansón wañupusqanmanta may chhika watasninmantaj, Jehovaqa apóstol Pablota yuyaycharqa Sansonpa sutinta creeyniyoj kajkunamanta qhelqashaspa churananpaj (Heb. 11:32-34). Sansonqa tukuy imapipuni Jehovapi atienekoj. Sansonmanta yachakoyqa kallpachawanchej, kausayninchejpipis yanapawanchej. w23.09 pág. 2 párrs. 1, 2

Aguantanapajqa Jehovaman tukuy llakiyninchejta willakunapuni (1 Tes. 5:17). Ichapis kunitanqa mana sinchʼi problemasniyojchu kashanchej. Pero, ¿imatá ruwayta yachanchej phiñasqa kaspa, imatachus ruwananchejta mana yachaspa, chayri saykʼusqa kaspa? ¿Jehovaj yuyaychaynintachu maskʼayta yachanchej? Kunanmantapachaña llakiykunapi rikukuspa Jehovaj yanapayninta maskʼanchej chayqa, aswan qhepaman jatuchaj llakiykunapi rikukojtinchejpis, paypa yanapayninta maskʼayta atillasuntaj. Nitaj iskayrayasunchu Jehová yanapanawanchejmanta. Payqa sutʼita yachan maykʼajchus, imaynatatajchus yanapanawanchejta (Sal. 27:1, 3). Kay tiempopi pruebasta aguantayta atisun chayqa, manchay ñakʼariy tiempopipis aguantayta atillasuntaj (Rom. 5:3). ¿Imajtintaj ajinata ninchej? Ashkha hermanos ninku uj pruebata aguantajtinku, astawan kallpata japʼisqankuta jamoj pruebasta aguantanankupaj. Jehovaj yanapayninwan uj pruebata aguantajtinku, Jehová yanapaytapuni munasqanpi astawan creenku. Ajina creeyniyoj kasqankurayku, waj pruebas jamojtinpis aguantayta atillanku (Sant. 1:2-4). w23.07 págs. 3, 4 párrs. 7, 8

Jehovaqa kʼumuykukoj sonqo kasqanrayku, khuyakojtaj kasqanrayku mana nisqantapunichu valechin. Payqa Sodoma llajtamanta may sajra runasta chinkachinanpajña kashajtin, kʼumuykukoj sonqo kasqanta rikucherqa. Jehovaqa angelesninwan Lotman nichimorqa orqosman ayqekunanta. Lottaj manchachikorqa chayman ayqekuyta, chayrayku Jehovamanta rogarikorqa paytawan familiantawan Zoarman ayqekojta saqenanta. Chay llajtitatapis Diosqa chinkachinallantaj karqa. Jehovaqa Lotta niyta atinman karqa nisqanman jinapuni ruwananta. Jinapis mana chaytachu ruwacherqa. Payqa Lotpa mañakusqanta uyarerqa, Zóar llajtitata manaña chinkarpachinanchu kajtinpis (Gén. 19:18-22). Ashkha watasninmantaj Jehovaqa Ninivepi tiyakoj runasta khuyakorqa. Payqa profeta Jonasta kacharqa, chay llajtayojkunata nimunanpaj juchankurayku llajtankupis paykunapis chinkarparichisqa kanankuta. Pero ninivitas arrepientekojtinku Jehovaqa paykunamanta khuyakorqa, llajtankutapis manaña chinkarparicherqachu (Jon. 3:1, 10; 4:10, 11). w23.07 pág. 21 párr. 5

¿Imatá yachakunchej Jehoaspa kausayninmanta? Payqa mana ukhu saphisniyoj sachʼa jina karqa, mana urmananpajtaj pipis yanapanantaraj necesitarqa estacawanpis japʼiykuchinkuman jina. Chay yanapajnintaj kuraj kaj sacerdote Jehoiadá karqa. Chayrayku Jehoiadá wañupojtin, Diosta wasanchajkunataj rikhurimojtin, Jehoasqa Jehovamanta karunchakaporqa. ¿Imatá Jehoasmanta yachakunchej? Mana waj hermanos chayri familiaresninchej Jehovata kasukusqankuraykullachu, nitaj paykuna yanapawasqanchejraykullachu Jehovata kasukuna tiyan. Jehovaj qayllallanpipuni kanapajqa, payta astawan munakuna, astawantaj respetana. Chaypajtaj Bibliata estudiayta, tʼukuriyta, orakuytapis mana saqenachu (Jer. 17:7; Col. 2:6, 7). Jehovaqa imastachus ruwayta atisqallanchejta mañawanchej. Imatachus mañawasqanchejtaj Eclesiastés 12:13 versiculopi kashan. Chaypi nin: “Cheqa Diosta manchachikuy, kamachisqasnintapis kasukuy. Chayllatamin runaqa astawan ruwanan tiyan”, nispa. Jehovata manchachikusun chayqa ima llakiytapis aguantayta atisun, sinchʼitataj sayasun. Ajinapi Jehovamantaqa ni pi karunchayta atiwasunchu. w23.06 págs. 18, 19 párrs. 17-19

Jehová garantiata jina qowasqanchejpeqa ñaupajta kay jinata nin: “Kamachina tiyanapi tiyasqa kajqa nerqa”, nispa (Apo. 21:5 qallariynin). Chaytaj may sumajpuni, Apocalipsis libropi Jehová kinsa kutista parlasqanpa qallariynin kasqanrayku. Chayrayku Jehová kikinpuni chay garantiata qowanchej, manataj uj atiyniyoj angelchu, nitaj Jesuschu. Chaytaj qhepan versiculospi imastachus nisqanpi astawan atienekunapaj yanapawanchej. Imajtinchus Jehovaqa “mana jaykʼaj llullakoj” Dios (Tito 1:2). Chayrayku imatachus Apocalipsis 21:5, 6 nisqanpeqa atienekuyta atinchejpuni. Chantá Diosqa nin: “Tukuy imata mosojyachishani”, nispa. Chaypi Jehovaqa imastachus aswan qhepaman ruwananmanta parlashan. Jinapis chaymanta parlan chayta ruwashanmanñapis jina, juntʼanantapuni yachasqanrayku (Isa. 46:10). w23.11 págs. 3, 4 párrs. 7, 8

Apóstol Pedroqa kallpachakorqa wakin imasta atipananpaj. Qhawarina imaspichus kallpachakusqanta. Jesusqa uj pacha discipulosninman nerqa, Bibliaj profeciasnin nisqanman jina sufrinanpuni kasqanta, wañuchisqapunitaj kanan kasqanta. Pedrotaj chayta uyariytawan payta kʼamerqa (Mar. 8:31-33). Ashkha kutispitaj Pedrowan chay waj apostoleswanqa, mayqenninkuchus kurajpaj qhawasqa kasqankumanta siminakorqanku (Mar. 9:33, 34). Jesusta wañucherqanku chay ñaupaj chʼisin, Pedroqa uj runaman correykuspa ninrinta mururparerqa (Juan 18:10). Chantapis Pedroqa chay chʼisillataj, manchachikusqanrayku kinsa kutipi amigon Jesusta mana rejsisqanta nerqa (Mar. 14:66-72). Chaymantataj sonqo nanayta waqarikorqa. Pedroqa manchay desanimasqa kasharqa, Jesustaj mana saqerparqachu. Payqa kausarimuytawan, saqerqa Pedro payta munakusqanta rikuchinanta. Chayrayku ovejitasninta kʼumuykukoj sonqowan michipunanta nerqa (Juan 21:15-17). Pedrotaj wakichisqa kasharqa chayta ruwananpaj. Chayrayku payqa Pentecostés pʼunchaypi Jerusalenpi kasharqa, espíritu santowan ñaupajta ajllasqa karqanku chaykunamanta ujnintaj karqa. w23.09 pág. 22 párrs. 6, 7

Apóstol Pedroqa ancianosllataj karqanku chay cristianosman nerqa: “Diospa ovejasninta michiychej”, nispa (1 Ped. 5:1-4). Yachanchej ancianosqa hermanosta mayta munakusqankuta, cuidaytataj munasqankuta. Chaywanpis ichapis wakin kutisqa yuyankuman, chayta ruwayta mana atisqankuta, manchay ocupasqa kashasqankurayku, chayri saykʼusqa kashasqankurayku. Qanpis ajinata yuyanki chay, ¿imatá ruwawaj? Jehovaman willariy imaynachus kashasqaykita. Pedro nerqa: “Pipis wajkunata sirvin chayqa, Dios kallpata qosqanpi atienekuspa sirvichun”, nispa (1 Ped. 4:11). Ichapis hermanospa problemasninkoqa mana kay tiempopi allinchakuyta atenqachu. Jinapis yuyarikuypuni Jesucristo “kuraj michej” kasqanta. Paytaj qanmanta nisqaqa kunanpis paraisopipis hermanosta astawan yanapayta atin. Jehovaqa kay imasta ancianos ruwanankuta munan: hermanosta munakunankuta, paykunata cuidanankuta, hermanos yachakunankupaj jinataj kausakunankuta. w23.09 págs. 29, 30 párrs. 13, 14

Ama kay mundomanta runas jinachu yuyana. Imajtinchus kay mundomanta runas jina yuyayta qallarisun chayqa, Jehovamanta karunchakusunman, niñataj kamachiykunasninta kasukusunmanchu (1 Cor. 3:19). “Kay mundoj yachaynenqa” munasqallanchejta ruwanapaj tanqawanchej. Qhawarina imachus kasqanta Pergamopiwan Tiatirapiwan kaj congregacionespi. Wakin cristianosqa chay tiempomanta runas jina yuyayta qallarerqanku, chay runasqa khuchichakojkuna karqanku, santosta yupaychajkunataj. Jesusqa chay iskay congregacionesta sinchʼita kʼamerqa khuchichakojkunata japʼikushallasqankurayku (Apo. 2:14, 20). Kunan tiempopipis runasqa yuyasqankuman jina yuyananchejpaj tanqawasunman. Ichapis familiaresninchej chayri rejsisqasninchej niwasunman sonqonchej munasqanman jinalla ruwanata, nitaj Jehovaj kamachiykunasninta kasukunata. Ichapis paykunaqa niwasunman munayninchejman jina ruwayqa allillan kasqanta, Bibliaj kamachiykunasnintaj ñaupa tiempo runasllapaj kasqanta. Wakin kutisqa ichapis yuyasunman Jehovaj wakin kamachiykunasnenqa mana chaykama sutʼichu kasqanta. Chayraykutaj wakin kutisqa “qhelqasqapi kasqanman jinalla” ruwanamantaqa, astawan kamachiykunata yapaykuyta munasunman (1 Cor. 4:6). w23.07 pág. 16 párrs. 10, 11

María Jesuspa maman kallpata necesitarqa, payqa ni piwan puñuykuspalla onqoj rikhurinan karqa. Mariaqa chayta yachaspa nichá ni imanakuyta aterqachu. Paypataqa manaraj ni uj wawitanpis karqarajchu, chay wawitantaj Mesías kanan karqa. Chantapis Mariaqa ni piwan puñuykusqanrayku, Joseman sutʼinchanan karqa imaynamantachus onqoj rikhurisqanta. Josewanqa casarakunanpaj parlasqaña karqa (Luc. 1:26-33). ¿Maymantá María kallpata japʼerqa? Wajkunawan yanapachikorqa. Mariaqa ángel Gabrielta nerqa astawan sutʼinchananta, ajinamanta Jehovaj nisqanta sumajta juntʼananpaj (Luc. 1:34). Pisi tiemponman Mariaqa may karuta viajarqa “orqos chaynejman”, Judaj ujnin llajtanman, chaypi parienten Elisabetta visitananpaj. Elisabetqa Mariata mayta felicitarqa, espíritu santonejtataj wawanmanta uj sumaj profeciata nerqa (Luc. 1:39-45). Chayta uyarispa Mariaqa Jehová “tʼukuna imasta atiyninwan” ruwasqanta nerqa (Luc. 1:46-51). Jehovaqa ángel Gabrielnejta, Elisabetnejta ima Mariata kallpacharqa. w23.10 págs. 14, 15 párrs. 10-12

144.000 cristianosqa espíritu santowan ajllasqa kanku, chayraykutaj Diospa wawasnin jina kanku. Paykunaqa Jesuswan khuska sacerdotes jina cielopi sirvenqanku (Apo. 14:1). Santo Lugarqa ninakun ajllasqa cristianosta kay jallpʼapiraj kashajtinku Diosninchej wawasninta jina rejsikapusqanwan. Chaytataj ruwan espíritu santonwan paykunata ajllaspa (Rom. 8:15-17). Aswan Santo Lugartaj cielowan ninakun, maypichus Jehová tiyakun chaywan. Santo Lugarta, Aswan Santo Lugarmanta tʼaqarqa chay cortinataj Jesuspa cuerponwan ninakun. Runa jina aycha cuerpoyoj kasqanrayku, Jesusqa mana cieloman yaykuyta atinmanchu karqa, Diospa mana rikukoj templonpi aswan Kuraj kaj Sacerdote jina kananpaj. Cuerponta runasta kacharichinanpaj jaywasqanrayku, Jesusqa tukuy ajllasqa cristianospaj uj ñanta kicharerqa, cieloman rinankupaj. Ajllasqa cristianospis cielopi tʼinkankuta japʼinankupajqa aycha cuerponkuta saqepunanku tiyan (Heb. 10:19, 20; 1 Cor. 15:50). w23.10 pág. 28 párr. 13

Gedeonqa Efraín ayllumanta kajkuna paywan siminakojtinku mana phiñakorqachu (Jue. 8:1-3). Astawanpis kʼumuykukoj sonqo karqa, paykunata uyarerqa, chantapis kʼachallamanta phiñakuyninkuta thasnucherqa. Yachayniyoj ancianosqa Gedeón jina kanku. Pipis imata nejtin sumajta uyarinku, llampʼu sonqowantaj kutichinku (Sant. 3:13). Ajinamanta congregacionpi allin kausay kananpaj yanapakunku. Madianitasta atipasqanmanta Gedeonta alabajtinku, payqa Jehovata alabanankuta nerqa, mana paytachu (Jue. 8:22, 23). ¿Imaynamantá ancianos Gedeón jina ruwankuman? Imata ruwajtinkupis Jehovatapuni jatunchaspa (1 Cor. 4:6, 7). Sichus uj ancianota sumajta yachachisqanmanta felicitanku chayqa, payqa ninman yachachisqanqa Diospa Palabranmanta jamusqanta, tukuypis Jehovaj llajtan yachachiwasqanchejrayku ashkha imasta yachakusqanchejta. Ancianosqa sapa kuti tapurikunanku tiyan yachachisqankuwan Jehovatachus jatunchashasqankuta chayri paykunallachus jatunchachikusqankuta. w23.06 pág. 4 párrs. 7, 8

Imatachus mañakusqanchejta Jehová mana qowajtinchejqa, kayta tapurikuna: “¿Imatachus mañakusqay allinpunichu kashanman?”, nispa. Ashkha kutispi yuyanchej, imachus allinninchejpaj kasqanta sumajta yachasqanchejta. Jinapis chay mañakusqanchejqa, ichapis aswan qhepaman mana allinninchejpajchu kanman. Ichá mañakushanchej uj problemanchej yuyasqanchejman jina allinchakunanta. Pero ichapis waj jinamanta aswan sumajta allinchakunman. Chantapis wakin mañakuykunasninchejqa, ichá mana Jehovaj munayninman jinachu kankuman (1 Juan 5:14). Wakin tatasqa Jehovamanta mañakunku wawanku payta sirvinallanpajpuni. Ujta piensarispa chay mañakoyqa sumajlla kaspa jinan. Pero Jehovaqa ni pita obliganchu payta sirvinanpaj. Payqa munan tukuyninchej, wawasninchejpis, payta yupaychayta sapa ujninchej munasqanchejrayku ajllakunanchejta (Deu. 10:12, 13; 30:19, 20). Jina kajtin, ¿imatá tatamama Jehovamanta mañakunkuman? Mañakunkuman wawankoj sonqonman chayayta atinankupaj yanaparinanta. Ajinamanta wawanku Jehovata munakunanpaj, paypa amigontaj kayta munananpaj (Pro. 22:6; Efe. 6:4). w23.11 pág. 21 párr. 5; pág. 23 párr. 12

¿Imajtintaj ninchej wajkunata sonqochaspa munakuyninchejta paykunaman rikuchishasqanchejta? Bibliamanta sutʼinchaj uj libro nin, griego parlaypi “sonqochay” palabrata Pablo oqharisqanqa kayta niyta munasqanta: “Pipis sinchʼi llakiypi kashajtin payta kallpacharinapaj ladonman sayaykuy”. Chayrayku llakiypi kaj hermanonchejta sonqocharispaqa, Jehovata tukuy sonqo sirvinallanpajpuni yanaparishanchej. Uj hermanonchej chayri uj hermananchej manchay llakisqa kashajtin payta sonqocharinapaj ladonpi kashanchej chayqa, mayta munakusqanchejta nishanchej (2 Cor. 7:6, 7, 13). Pillatapis sonqocharinchej payta khuyakusqanchejrayku. ¿Imaraykú chayta ninchej? Pillatapis sufrishajta rikuspaqa, khuyakusqanchejrayku sonqochariytapuni munanchej, imaynallamantapis yanapariyta ima. Chayrayku ñaupajtaqa khuyakunchejraj, chay khuyakuyninchejtaj sonqonchejta aysan sonqocharinanchejpaj. Jehovawanpis ajinallataj. Pabloqa sutʼincharqa Diosqa runasta khuyakusqanrayku sonqochasqanta. Jehovamanta kayta nerqa: “Paymin may khuyakuyniyoj Tata, tukuy imapi sonqochaj Diostaj”, nispa (2 Cor. 1:3). w23.11 págs. 9, 10 párrs. 8-10

Tukuy cristianosqa llakiykunapi rikukunanchejta yachanchej. Piensarina imatachus apóstol Pablo Tesalonicamanta cristianosman nisqanpi. Pay nerqa: “Qankunawan kashajtiykoqa, ñaupajmantaña nej kayku ñakʼarinanchejta. Qankuna yachankichej jinataj, chayqa ajinapuni”, nispa (1 Tes. 3:4). Corintomanta cristianosmantaj nerqa: “Yachanaykichejta munayku […] ima llakiykunapichus kasqaykuta. […] ‘Wañusunchá’ nispataj nerqayku”, nispa (2 Cor. 1:8; 11:23-27). Kunanpis ajinallapuni kashan. Cristianosqa yachanchej llakiykunapi rikukunanchejta (2 Tim. 3:12). Jesuspi creesqaykimantapacha ichapis amigosniyki chayri familiaresniyki tukuy imasta ruwasorqanku. Tukuy imapi allintapuni purisqaykirayku, ¿trabajoykipi problemaspichu rikukorqanki? (Heb. 13:18). Suyakuyniykimanta wajkunaman parlarisqaykirayku, ¿gobierno churanakusorqachu? Imaspi rikukojtinchejpis, Pabloqa niwanchej kusikunata. w23.12 págs. 10, 11 párrs. 9, 10

Jacobtaqa ashkha llakiykuna qhatirerqa. Jacobpa wawasnin Simeonwan Leviwanqa familianta, Jehovaj sutintapis pisipaj qhawacherqanku. Chantapis munasqa warmin Raquelqa iskay kaj wawitanta nacechikushaspa wañuporqa. Machituña kashaspataj Jacobqa, unayta yarqhay kasqanrayku Egiptoman tiyakoj riporqa (Gén. 35:16-19; 37:28; 45:9-11, 28). Jacobqa ajina llakiykunapi rikukuspapis Jehovapi, nisqasninpipis creellarqapuni. Jehovataj paywanpuni kashasqanta sutʼita rikucherqa. Jacobqa ashkha imasniyoj karqa Jehová bendecisqanrayku. Chantapis wawan Josewan ashkha watasmanta watejmanta tinkukapuspa maytachá Diosman agradecekorqa, payqa yuyarqa chay wawan wañupusqantaña. Jacobqa Jehovaj sumaj amigon kasqanrayku tukuy chay llakiykunata aguantarqa (Gén. 30:43; 32:9, 10; 46:28-30). Noqanchejpis Jehovaj sumaj amigosnin kasun chayqa, mana yuyasqanchej llakiykuna chamuwajtinchej aguantayta atillasun. w23.04 pág. 15 párrs. 6, 7

23 Salmopi Davidqa nerqa Jehová munakusqanmanta, manchay munakuywantaj cuidasqanmanta mana iskayrayasqanta. Chaypi Davidqa nerqa Jehovaqa ovejitanta jina michikusqanta. Davidqa Jehová michejnin jina cuidashasqanta yachasqanrayku mana manchachikorqachu, tukuy sonqotaj paypi atienekorqa. Davidqa yacharqa Jehovaqa kausashajtin munakunantapuni. ¿Imaraykutaj ajinata yuyarqa? Jehovaqa Davidman tukuy ima necesitasqanta qorqapuni. Chayrayku payqa repararqa Jehová sumajta cuidasqanta. Chantapis yachallarqataj amigon kasqanta, allinpajtaj qhawasqanta. Chayrayku mana iskayrayarqachu, ima pasajtinpis Jehovaqa tukuy ima necesitasqanta qonantapuni. Yacharqa Jehová manchayta munakusqanqa tukuy llakiykunasninmanta aswan jatun kasqanta. Chayrayku kusisqa karqa, sonqo juntʼasqataj (Sal. 16:11). w24.01 pág. 29 párrs. 12, 13

Segunda Guerra Mundial tukukusqantawan, Jehovaj kamachisnenqa ashkha lugarespi mana ima jarkʼayniyoj predicayta atillarqanku. Chayraykutaj ashkha runas Jehovata rejserqanku, kunantaj mundo enteropi predicakushan. Kay tiempopipis Diospa Llajtanta Kamachejkunaqa, Cristowan pusachikushallankupuni. Paykunaqa imatachus kamachisqanku Jehová yuyasqanman jina, Jesús yuyasqanman jinapuni kananta munanku. Chay kamachiykunatataj congregacionesta waturej hermanosnejta, chayri ancianosnejta congregacionesman chayachinku. Ajllasqa cristianosmanta ancianosqa Cristoj “paña makinpi” kashanku, chayllatataj nisunman tukuy ancianosmantapis (Apo. 2:1). Yachanchej jina ancianosqa pantaj runas kanku, chayrayku wakin kutisqa pantaykunku Moisés jina, Josué jina, apóstoles jinataj (Núm. 20:12; Jos. 9:14, 15; Rom. 3:23). Chaywanpis sutʼita yachanchej Jesusqa allin kamachi yuyayniyojta, ancianostapis sumajta yanapashasqanta, yanapallanqapunitaj. Chayrayku ni imarayku iskayrayananchejchu tiyan chay hermanosnejta pusashawasqanchejmanta. w24.02 págs. 23, 24 párrs. 13, 14

Jehovamanta parlasqanchejpi sutʼi rikukunan tiyan payman agradecekusqanchej, munakusqanchejtaj. Ajinamanta payta jatunchayta atinchej. Predicashaspaqa runasta yanapayta munanchej Jehovaman qayllaykunankupaj, noqanchej jinataj mayta munakunankupaj (Sant. 4:8). Maytapuni munanchej Bibliawan paykunaman rikuchiyta Jehová Diosqa may kʼacha kasqanta, munakuyninta, cheqan kajta ruwasqanta, yachayninta, atiynintapis. Chantapis pay jina ruwanapaj mayta kallpachakuspa jatunchallanchejtaj, sonqontataj kusichinchej. Chayta ruwajtinchejtaj ichapis runas reparanqanku mana waj runas jinachu kasqanchejta, tapukonqankutaj imaraykuchus ajina kasqanchejta (Mat. 5:14-16). Mayllapipis paykunawan kashaspa, ichapis chayta sutʼinchariyta atisunchej. Ajinamanta kʼacha sonqoyoj runasqa Diosninchejta rejsiyta munanqanku. Jehovata ajinasmanta jatunchaspaqa sonqonta kusichinchej (1 Tim. 2:3, 4). w24.02 pág. 10 párr. 7

Wiñay tukusqa cristiano kanaykipajqa, kausayniykipi yanapasunanpaj jina wakin imasta yachakunayki tiyan. Chayqa yanapasonqa congregacionpi astawan ruwanaspi yanapakunaykipaj, tukuywan allinta apanakunaykipaj, uj trabajota tarikunaykipaj, chay trabajomanta mana wijchʼuchikunaykipajpis. Ajinamanta ganakuyta atiwaj kausakunaykipaj, familiaykita yanapanaykipajpis. Allinta leeyta, escribiyta ima yachakuy. Bibliaqa nin pichus Bibliata sapa día leej, chaypitaj tʼukurejqa kusisqa kasqanta, tukuy ima ruwasqanpitaj allin risqanta (Sal. 1:1-3). Ajinamanta yachayta atin imatachus Jehová yuyasqanta. Chaytaj yanapanqa sumajta tʼukurinanpaj, chay leesqanman jinataj ruwananpaj (Pro. 1:3, 4). Congregacionpeqa tukuy necesitanchej hermanos yachachinawanchejta, Bibliawantaj sumajta yuyaycharinawanchejta. Sumajta leeyta, escribiyta yachanki chayqa, aswan facilta discursosta preparakunki, sumaj comentariostapis preparakunki, chaywantaj wajkunata kallpachayta atinki. Chantapis yachakusqaykita anotakuyta atinki. Ajinamanta creeyniyki astawan wiñanqa, waj hermanitostapis yanapariyta atinki. w23.12 págs. 26, 27 párrs. 9-11

Manchachikunchej chayqa, imatachus Jehová aswan qhepaman ruwananpi tʼukurina. Satanás manaña kajtin, ¿imayná kausay kanqa? 2014 watapi kinsa pʼunchaypaj jatun tantakuypi uj rikuchiy karqa. Chay rikuchiypi uj hermano familianwan parlarerqa 2 Timoteo 3:1-5 versiculospi imatachus ninanmanta sichus paraisopaj uj profecía kanman chayqa. Chaypi ninman: “Paraisopeqa kausay may kusiy kanqa. Runasqa mana paykunallatachu munakonqanku, mana qolqeta munakonqankuchu, mana alaracoschu kanqanku, mana jatunchakonqankuchu, mana Diospa contranta, ni wajkunaj contrantapis sajrata rimanqankuchu, tatasninkuta kasukonqanku, agradecekuyta yachanqanku, mana wasanchajkunachu kanqanku, familiankuta mayta munakonqanku, uj yuyayllaman chayanqanku, wajkunamanta allintapuni parlanqanku, mana munayninkuwan atipachikonqankuchu, mana phiñakonqankuchu, allin kajta munakonqanku, mana amigosninkoj contranpi sayaykonqankuchu, kasukojkuna kanqanku, mana runaykachanqankuchu, munaynillankuta ruwanankumantataj Diospa munayninta ruwanqanku, Diosta tukuy sonqo yupaychanqanku. Paykunamantaqa amapuni karunchakuychu”. ¿Familiaresninchejwan, chayri hermanosninchejwan parlariyta yachanchejchu imaynachus paraisopi kausay kananmanta? w24.01 pág. 6 párrs. 13, 14

Jehová Dios ‘kamachisninmanta kusikusqanta’ yachayqa may sumajpuni (Sal. 149:4). Chaywanpis wakenqa ichapis wakin kuti desanimakunkuman, yuyankumantaj: “Yachani Jehovaqa tukuy kamachisninta allinpaj qhawasqanta, pero noqataqa nisina allinpajchu qhawawanman”, nispa. Ñaupa tiempomanta Diospa ashkha kamachisninpis wakin kutisqa ajinallatataj yuyarqanku (1 Sam. 1:6-10; Job 29:2, 4; Sal. 51:11). Bibliaqa sutʼita niwanchej pantaj runas kajtinchejpis, Jehová Diosqa allinpaj qhawayta atiwasqanchejta. ¿Imatá chaypaj ruwananchej tiyan? Rikuchinanchej tiyan Jesucristopi creesqanchejta, bautizakunanchejtaj tiyan (Juan 3:16). Ajinapi tukuyman rikuchinchej juchasninchejmanta arrepientekusqanchejta, Diosmantaj kausayninchejta qopusqanchejta munayninta ruwanapaj (Hech. 2:38; 3:19). Jehovaqa maytapuni kusikun amigosnin kananchejpaj chay imasta ruwasqanchejmanta. Imatachus Jehovaman nisqanchejta juntʼanapaj sumajta kallpachakusun chayqa, payqa allinpaj qhawawasun, amigonta jinataj (Sal. 25:14). w24.03 pág. 26 párrs. 1, 2

Noqanchejpis chay discípulos jina ruwasunman, autoridades manaña predicananchejta kamachiwajtinchejpis. Jehová yanapawasun kamachiwasqanchej llankʼayta juntʼanapaj. Paymanta mañakuna mana manchachikoj kayta, allin yuyayniyoj kaytawan. Jehovamanta yanapata mañakuna llakiykunata aguantanapaj. Ashkhas llakisqas kashanchej uj familiarninchej wañupusqanrayku, qhatiykachasqa kasqanchejrayku, uj onqoyrayku chayri familiaresninchejrayku. Chantapis wañuchej onqoykuna rikhurisqanrayku, guerras kasqanrayku astawanraj chay llakiykuna yapakun. Chayrayku imachus sonqonchejpi kasqanta Jehovaman willakuna. Imaynatachus uj sumaj amigonchejman imatapis willakunchej, ajinallatataj paymanpis willakuna. Jehovaqa yanapawasunpuni, ama chaymanta iskayrayanachu (Sal. 37:3, 5). Mana saykʼuspa mañakojtinchejqa ñakʼariypi kaspa sinchʼita sayayta atisun (Rom. 12:12). Jehovaqa yachan imaspichus kamachisnin rikukushasqankuta. Payqa “yanapata mañakuspa qhaparikusqankuta uyarin” (Sal. 145:18, 19). w23.05 págs. 5, 6 párrs. 12-15

Kausayninchejpi jatuchej imasta ajllananchej kajtenqa, allinta reparananchej tiyan “imachus Jehová Diospa munaynin kasqanta”, chayman jinataj ruwananchej tiyan (Efe. 5:17). Sichus chayta ajllanapaj Bibliaj yuyaychaykunasninta maskʼasun chayqa, imatachus Jehová chaymanta yuyasqanta yachayta atisunchej. Chay yuyaychaykunaman jina ruwaspataj allin kajtapuni ajllasunchej. ‘Diabloqa’ maytachá kusikunman kay mundoj imasninwan musphajtinchej, Diosta sirvinapajtaj niña tiempoyojchu kajtinchej (1 Juan 5:19). Jehovata astawan sirvinapaj kallpachakunamantaqa, ichapis yuyayninchejqa kashanman qolqellapi, profesionniyoj kayllapi, chayri trabajollapi. Ajina kajtintaj sutʼi reparakunman kay mundoj yuyayninwan chimpachikushasqanchejta. Yachanchej jina chay imasqa mana juchachu kanku, jinapis ni jaykʼaj kausayninchejpi ñaupajpichu kanan tiyan. w24.03 pág. 24 párrs. 16, 17