Daștis te arăsăs te cheres le buchia anda o Iehova cai șiutean-le tuche andi goghi!

1. Prin so zumaimata daisaras te nachas but jene anda amende?

ȘIUTEAN tuche andi goghi te aves iech creștino mai lașio sau te lașiares iech buchi prin savi anes închinarea le Iehovasche, sar avelas i citirea la Bibliachi, o sicaimos cai cheres-les corcoro sau i predicarea, tha ci daisardean te arăsăs te cheres cadaia? Dacă da, ci san o corcoro. Sar exemplo, o Philip camlea te lașiarel pesche manglimata hai te manghel-pe ande fiesavo ghies, tha sas lesche pharo te arachel timpo te cherel cadaia. I Erika șiutea ande peschi goghi te arăsăl ca le întruniri anda i predicarea angla te astaren, tha butivar avelas pala so astarenas le întruniri. O Tomáš camlea mai butivar te citil sea i Biblia. Vo phenel: „Ci placiaia-ma te citiv andai Biblia. Astardem trin-var te citisarav-la, tha niciechdata ci nachlem mai dur catar o lil Levitico”.

2. Sostar ci trebul te avas perade, dacă ci cărdeam ji acana so șiuteam ande amari goghi?

² Dacă cames te cheres iech buchi anda o Iehova hai ci daisardean te cheres-la ji acana, na av perado. Vi anda iech țâni buchi trebul te araches tuche timpo hai te cheres sea so daștis anda late. Cana des chi zor te cheres so șiutean ande chi goghi, sicaves că chio amalimos le Iehovaia silo zurales cuci anda tute hai cames te des-les sea so si tut mai lașio. O Iehova dichel lașe iachența că des sea chi zor. Mai but, vo ci ajucărel tutar mai but sar daștis te cheres. (Ps. 103:14; Mica 6:8) Cadea că, cana șios ande chi goghi te cheres mai but anda o Iehova, alosar iech buchi vareso cai daștis te arăsăs te cheres-la. Sar? Mai dur, va avela te dichas sar daisaras te cheras cadaia.

TREBUL TE ȚÂRDEL-AME O ILO TE CHERAS IECH BUCHI

3. Sostar trebul te țârdel-ame o ilo caște daisaras te cheras so șiuteam ande amari goghi?

³ Caște arăsas te cheras so șiuteam ande amari goghi, trebul vi te țârdel-ame o ilo. Cadaia si sar iech zuralimos cai ajutil-ame te das amari zor anda i buchi cai camas te cheras-la. Cana țârdel-ame o ilo te cheras iech buchi si sar cana iech barval phurdel andel pânze catar iech barca. Cana i barval phurdel, i barca daștil te jial angle sea o timpo. Hai cana i barval si vi mai zurali, i barca arăsăl mai sigo co than cai trebul. Sa cadea, sam mai pașă te cheras so șiuteam ande amari goghi cana vi țârdel-ame o ilo te cheras cadaia. O David, iech phral anda El Salvador, phenel: „Cana țârdel-tu o ilo, cheres sea so daștis caște arăsăs ca so șiutean tuche andi goghi hai ci meches ca niciech buchi te așiavel-tu”. Cadea că, so daștis te cheres caște țârdel-tu o ilo vi mai but te cheres so șiutean ande chi goghi?

4. Anda so daisaras te mangas-ame? (Filipeni 2:13) (Dich vi i imaginea.)

⁴ Mang-tu caște țârdel-tu o ilo. Prin o spirito sfânto, o Iehova daștil te ajutil-tu te țârdel-tu o ilo te cheres so șiutean ande chi goghi. (Citisar Filipeni 2:13.) Poiechdata, camas te cheras iech buchi numai anda codoia că jianas că cadea trebul, hai cadaia si mișto. Tha, daștil-pe că ci țârdel-ame o ilo te cheras so șiuteam ande amari goghi. Iech phei po anav Norina anda Uganda nachlea prin cadai buchi. Voi camelas te astarel varecasa iech studio biblico, tha ci prea țârdelas-la o ilo te cherel cadaia, anda codoia că pachialas că ci jianelas te sicavel cadea de mișto le manușen. So ajutisardea-la? Voi phenel: „Manglem-ma le Iehovasche ande fiesavo ghies caște ajutil-ma te camav te încărav iech studio biblico. Pala codoia, dem sea mânri zor te cherav cadea sar manglem-ma hai te lașiarav o modo sar sicavav averen. Pala chichiva șiona, dem mânri sama că sea mai but țârdelas-ma o ilo te astarav varecasa iech studio biblico. Ande codo bărș, astardem dui studii biblico”.

5. Ca so daisaras te gândisaras-ame caște țârdel-ame o ilo te cheras so șiuteam ande amari goghi?

⁵ Gândisar-tu ca so cărdea o Iehova anda tute. (Ps. 143:5) O apostolo Pavel gândisardea-pe ca o lașimos nemeritime cai sicadea-les lesche o Iehova, hai cadaia zuriardea-les te cherel mai but anda leste. (1 Cor. 15:9, 10; 1 Tim. 1:12-14) Sa cadea, chichi gândisares-tu mai but ca so cărdea o Iehova anda tute, cadichi mai but va țârdela-tu o ilo te cheres so șiutean ande chi goghi. (Ps. 116:12) Sar exemplo, iech phei anda Honduras camelas te cherel pionierato regularo. Voi phenel: „Gândisardem-ma chichi de but iubil-ma o Iehova. Vo țârdea-ma peste hai andea-ma ande pesco poporo. Vo lel sama mandar hai feril-ma. Cadal buchia zuriarde mânro amalimos leia hai cărde-ma te camav vi mai but te dav mânri zor te astarav o pionierato”.

6. So mai daștil te ajutil-ame te țârdel-ame vi mai but o ilo te cheras so camas?

⁶ Gândisar-tu ca so miștimata daștin te aven-tu pala so cheres so șiutean tuche andi goghi. I Erika, anda savi deam duma mai anglal, șiutea pesche andi goghi te arăsăl mai sigo ca le întruniri anda i predicarea. Voi phenel: „Hachiardem că hasardem but buchia anda codoia că arăslemas târzio ca le întruniri anda i predicarea. Dacă arăslemas mai sigo, daisardemas te salutiv le phralen hai te dav duma lența. Vi mai but, daisardemas te așunav buchia cai te ajutin-ma te avav mai lași hai mai bucurime andi predicarea”. Anda codoia că gândisardea-pe ca le miștimata cai sila cana arăsăl co timpo, i Erika daisardea te cherel so șiutea ande peschi goghi. Tu ca so miștimata daștis te gândis-tu? Dacă șiutean ande chi goghi te citis i Biblia sau te lașiares che manglimata, gândisar-tu sar zuriaren cadala chio amalimos le Iehovaia. (Ps. 145:18, 19) Dacă șiutean ande chi goghi te aves iech creștino mai lașio, gândisar-tu sar ajutil-tu cadaia te avel tut iech amalimos mai lașio averența. (Col. 3:14) Cher tuche iech lista sostar cames te cheres so șiutean tuche andi goghi hai dich pe late atento ande fiesavo ghies. O Tomáš, anda savo deam duma mai anglal, phenel: „Cana gândiv-ma sea mai but sostar camav te cherav so șiutem ande mânri goghi, som vi mai zuriardo te na mechav-ma”.

7. So ajutisardea le phrales Julio hai lesca rromnia te cheren so șiute ande penghi goghi?

⁷ Aș pașa codola cai ajutin-tu te cheres so șiutean ande chi goghi. (Prov. 13:20) Te dichas so ajutisardea le phrales Julio hai lesca rromnia te jian mai but andi predicarea. Vo phenel: „Alosardeam amenghe amala cai ajutisarde-ame te cheras so șiuteam amenghe andi goghi. Deam duma lența butivar anda so camleamas te cheras. But jene anda lende arăsle deja te cheren le buchia cai camleamas te cheras-le vi amen, cadea că von daisarde te den-ame lașe sfaturi. Sa cadea, amare amala pușenas-ame sar jial amari buchi hai zuriarenas-ame sea o timpo cana sas-ame nevoia”.

CANA CI ȚÂRDEL-AME O ILO

8. So daștilas te întâmplol-pe dacă cheras buchi ca so șiuteam ande amari goghi numai cana țârdel-ame o ilo? (Dich vi i imaginea.)

⁸ Poiechdata, savore simțosaras că ci prea țârdel-ame o ilo te cheras vareso. Tha, însemnol cadaia că ci daisaras te cheras so șiuteam ande amari goghi? Nici. Te jias parpale ca o exemplo de mai anglal. Iech zurali barval daștil te spidel iech barca cai sila pânze caring o than cai trebul te arăsăl. Cu sea cadala, poiechdata, i barval ci marel cadea de zurales, hai ande aver ghiesa ci phurdel. Însemnol cadaia că o manuș cai tradel i barca așel pe thaneste? Nici. Sar exemplo, si bărci saven silen motoro hai averen, silen vâsle. Cadea că, codo cai tradel i barca daștil te folosil iech anda lende caște jial mai dur. Sa cadea, poiechdata, camas te cheras anda sea o ilo so șiuteam ande amari goghi, hai aver data, daștil-pe că ci țârdel-ame o ilo. Dacă alosaras te cheras mai but buchia numai cana țârdel-ame amaro ilo, daștil-pe te na arăsas niciechdata te cheras so șiuteam ande amari goghi. Cadea sar o manuș cai tradel i barca arachel iech modo sar te arăsăl ando than cai trebul, sa cadea vi amen daisaras te arachas iech modo prin savo te arăsas te cheras so șiuteam ande amari goghi vi cana ci țârdel-ame o ilo. Chiar cana va avela tuche pharo te cheres cadaia, dacă des sea chi zor, va avena tut but miștimata. Angla so te dichas so daisaras te cheras, va avela te arachas o răspunso ca iech pușimos.

9. Si nasul te das amari zor te cheras so șiuteam ande amari goghi chiar cana ci țârdel-ame o ilo? Explichin.

⁹ O Iehova camel te slujisaras lesche pherde bucuria hai anda sea o ilo. (Ps. 100:2; 2 Cor. 9:7) Cadea că, trebulas te das amari zor te cheras so șiuteam ande amari goghi chiar cana ci țârdel-ame o ilo? Te dichas o exemplo cai mechlea-les amenghe o apostolo Pavel. Vo phendea: „Marav mânro corpo dumuchența hai îngărav-les sar iech sclavo”. (1 Cor. 9:25-27, n.s.) Aver varesar phendo, cana o Pavel ci camelas sau ci țârdelas-les o ilo te cherel so si orta, vo delas sea peschi zor te oblighil-pe te cherel cadaia. Dichlea o Iehova lașe iachența i buchi cai cărdea-la o Pavel? Sar te na! O Iehova chiar pochindea-les anda codoia că vo cărdea sea so daisardea anda leste. (2 Tim. 4:7, 8)

10. So miștimata si amen cana das amari zor te cheras so șiuteam ande amari goghi chiar cana ci țârdel-ame o ilo?

¹⁰ Vi aghies, o Iehova bucuril-pe cana dichel că das amari zor te cheras so șiuteam ande amari goghi, chiar cana ci țârdel-ame o ilo. Vo bucuril-pe cana dichel că chiar cana ci placial-ame sea o timpo iech buchi, vo jianel că cheras-la anda codoia că iubisaras-les. Cadea sar o Iehova dea miștimata le Pavelos, daisaras te pachias ciaces că vo va dela-le vi amenghe. (Ps. 126:5) Cana dichas că o Iehova silo pașa amende, astarel te țârdel-ame o ilo sea mai but te cheras so șiuteam ande amari goghi. Iech phei po anav Lucyna, anda i Polonia, phenel: „Poiechdata, ci avel manghe te jiav andi predicarea, vi mai but cana som chini. Tha, pala so jiav andi predicarea, i bucuria cai pherel mânro ilo si iech șucar daro”. Te dichas mai dur so daisaras te cheras cana ci țârdel-ame o ilo.

11. Sar daștil o Iehova te ajutil-ame te daisaras te încăras-ame parpale vi mai but?

¹¹ Mang-tu te daștis te încăres-tu parpale. Cadaia ajutil-ame te încăras tela controlo so si ande amaro ilo hai sar phiravas-ame. Butivar, cadai expresia însemnol te încăras-ame parpale caște na cheras vareso nasul. Cu sea cadala, trebul te încăras-ame parpale vi cana camas te cheras so si mișto, vi mai but cana iech buchi si phari sau cana ci țârdel-ame o ilo. Te na bâstras că o fapto te încăras-ame parpale cherel partea anda o rodo le spiritosco sfânto. Cadea că, te mangas le Iehovas te del-ame spirito sfânto te bariaras cadai calitatea șucar. (Luca 11:13; Gal. 5:22, 23) O David, anda savo deam duma mai anglal, șiutea pesche andi goghi te sichiol andai Biblia mai butivar corcoro anda o Iehova. Vo phenel sar ajutisardea-les o manglimos te cherel cadaia: „Manglem le Iehovas te ajutil-ma te daștiv te încărav-ma parpale. Lesche ajutoroia, daisardem te cherav manghe iech lașio programo anda o studio hai te încărav-ma lestar”.

12. Sar ajutil-ame o Eclesiasto 11:4 te cheras so șiuteam amenghe andi goghi?

¹² Na ajucăr ca chi situația te avel perfecto. Ande cadai lumea, ci va avela amen niciechdata iech situația perfecto. Dacă ajucăras-la, daștil-pe că niciechdata ci va avela te cheras so șiuteam amenghe andi goghi. (Citisar Eclesiasto 11:4.) Iech phral po anav Dayniel phenel: „Na-i chanicas iech situația perfecto. Amen cheras amenghe i mai lași situația cana astaras te cheras vareso”. Iech phral anda Uganda po anav Paul phenel iech aver motivo sostar ci si mișto te mechas le buchia de pe iech ghies pe aver: „Cana astaras te cheras vareso, chiar cana sam ande iech situația phari, mechas than le Iehovasche te ajutil-ame”. (Mal. 3:10)

13. Sostar si mișto te astaras țâne buchianța?

¹³ Astar țâne buchianța. Daștil-pe te na mai țârdel-ame o ilo te cheras chanci, dacă si prea pharo so șiuteam amenghe andi goghi te cheras. Dacă vi anda tute si sa cadea, so daștis te cheres? Daștis te astares te cheres buchia mai țâne. Sar exemplo, dacă cames te bariares iech calitatea, mai anglal de chi zor te sicaves-la ande țâne buchia. Dacă cames te citis sea i Biblia, daștis te astares țâra po țâra ande fiesavo ghies. O Tomáš anda savo deam duma co începuto, camlea te citil i Biblia ande iech bărș, tha ci daisardea. Vo phenel: „Dem mânri sama că alosardem te citisarav-la prea sigo. Cadea că mai astardem iech data, tha, acana alosardem te citisarav numai iech cotor anda iech capitolo ande fiesavo ghies hai dem mânri zor vi te gândisarav-ma leste. Cadea, i citirea la Bibliachi astardea te anel manghe bucuria”. Anda codoia că o phral Tomáš arachelas sea mai but bucuria, vo astardea te citil sea mai but anda late. Ji la urmă, vo citisardea sea i Biblia.b

NA MECH-TU PERADO CANA DES PARPALE

14. So buchia daștin te așiaven-ame te cheras so șiuteam ande amari goghi?

¹⁴ Chiar cana camas te cheras iech buchi anda sea o ilo, daștilas te avel vareso cai cherel-ame te das parpale. Sar exemplo, „le buchia cai ci ajucăras-le” daștin te cioren amaro timpo cai șiuteam-les de iech rig anda so camas te cheras. (Ecl. 9:11) Daisaras te nachas prin iech pharimos cai peravel-ame hai cai lel amendar i zor. (Prov. 24:10) Anda codoia că sam imperfecți, daștil-pe te cheras chichiva greșeli cai așiaven-ame te cheras le buchia cai șiuteam-le ande amari goghi. (Rom. 7:23) Sau daștil-pe că simțosaras-ame chine. (Mat. 26:43) So daștilas te ajutil-ame te nachas părdal iech ghies calo sau vareso cai cherel-ame te das parpale?

15. Sostar daisaras te jias mai dur vi cana das parpale? Explichin. (Psalmo 145:14)

¹⁵ Na bâstăr că daștis te jias mai dur vi cana des parpale. I Biblia phenel că daisaras te nachas prin but pharimata. Cu sea cadala, voi sicavel amenghe că daisaras te vazdas-ame de fiesavi data le ajutoroia le Iehovasco. (Citisar Psalmo 145:14.) O phral Philip, anda savo deam duma mai anglal, phenel sar dichel vo le buchia: „Na-i importanto chichi-var perav, tha chichi-var vazdav-ma caște jiav mai dur”. Sa cadea, o phral David anda savo deam duma phenel: „Cana dav parpale sau nachav prin cale ghiesa, ci dichav-le sar pharimata cai așaven-ma, tha sar ocazii prin save sicavav le Iehovasche chichi de but iubiv-les”. Si ciaces, poiechdata, daisaras te das parpale, tha dacă ci mechas-ame, sicavas le Iehovasche că camas te avas cuci ande lesche iacha. Chichi de but bariol o ilo le Iehovasco cana dichel că camas zurales but te cheras so șiuteam ande amari goghi!

16. So daștis te sichios cana des parpale?

¹⁶ Sichio anda fiesavi buchi cai cherel-tu te des parpale. Gândisar-tu sostar arăslean cade hai so daștis te cheres te na mai des parpale. (Prov. 27:12) Poiechdata, dacă ci daisardean te cheres so șiutean ande chi goghi, cadaia daștilas te sicavel că so camlean te cheres sas prea pharo anda tute. Dacă si cadea, gândisar-tu pale ca so șiutean ande chi goghi caște diches dacă si tut o zuralimos te arăsăs ciaces te cheres cadaia.c O Iehova ci va pachiala că san iech manuș covlo anda codoia că ci daisardean te cheres so șiutean ande chi goghi, dacă cadai buchi sas prea phari anda tute. (2 Cor. 8:12)

17. Sostar si mișto te încăras ande amari goghi le lașe buchia cai cărdeam-le ji acana?

¹⁷ Încăr ande chi goghi so cărdean ji acana. I Biblia phenel: „O Del na-i neorta caște bâstrel tumari buchi”. (Evr. 6:10) Cadea că, nici tu ci trebulas te bâstres-la. Gândisar-tu ca le buchia cai cărdean-le deja. Daștil-pe că, phanglean iech amalimos chidino le Iehovaia, dean duma averența anda leste sau boldean-tu. Cadea sar daisardean ji acana te cheres so șiutean ande chi goghi, av siguro că daștis te cheres cadaia vi mai dur. (Filip. 3:16)

18. So ci trebulas te bâstras cana das amari zor te cheras so șiuteam ande amari goghi? (Dich vi i imaginea.)

¹⁸ Le ajutoroia le Iehovasco vi tu daștis te cheres so șiutean ande chi goghi, cadea sar iech manuș cai tradel iech barca daștil te arăsăl bucurime ando than cai trebul. Tha încăr andi goghi, că but manușa cai traden iech barca bucurin-pe catar o drom. Sa cadea, ando timpo so des chi zor te cheres so șiutean andi chi goghi, na bâstăr te bucuris-tu cana diches sar ajutil-tu o Iehova hai so but miștimata del-tu vo. (2 Cor. 4:7) Dacă ci meches-tu, va avela te primis vi mai but miștimata. (Gal. 6:9)