ARTICOLO STUDIOSCHE 47
Te încăras zurali amari iubirea iech caring aver
„Te iubisaras-ame mai dur iech averes, anda codoia că i iubirea si le Devlestar.” (1 IOAN 4:7)
GHILI 109 Te iubisaras anda ilo!
SO VA DICHAIAa
1, 2. a) Sostar o apostolo Pavel daisardea te phenel că i iubirea si „i mai bari” calitatea? b) Ca so pușimata va avela te arachas răspunso?
CANA o apostolo Pavel dea duma anda o pachiamos, i speranța hai i iubirea vo phendea că „i mai bari anda lende si i iubirea”. (1 Cor. 13:13) Sostar daisardea o Pavel te phenel cadaia? Ando viitorii ci va mai trebula amenghe pachiamos andrl promisiuni le Devlesche anda i lumea nevi sau speranța că cadala va pherdiona-pe anda codoia că va avela te dichas-le amare iachența. Tha, va trebula sea o timpo te sicavas iubirea caring o Iehova hai caring le manușa. Mai but, amari iubirea caring lende va bariola veșnico.
2 Anda codoia că trebul amenghe iubirea sea o timpo, si importanto te arachas o răspunso cadale pușimatande: 1) Sostar trebul te iubisaras-ame iech averes? 2) Sar sicavas amari iubirea iech caring aver? hai 3) Sar daisaras te încăras zurali amari iubirea iech caring aver?
SOSTAR TREBUL TE IUBISARAS-AME IECH AVERES?
3. Sostar trebul te sicavas iubirea iech caring aver?
3 Sostar si importanto te iubisaras-ame iech averes? Anda codoia că i iubirea sicavel că sam le ciace creștini. O Isus phendea caring pesche apostoli: „Prin cadaia va jianena savore că san mânre discipoli: cana si iubirea mașcar tumende”. (Ioan 13:35) Mai but, i iubirea încărel-ame unime ande iech than. O Pavel phendea că i iubirea „si o phanglimos perfecto cai unil-ame”. (Col. 3:14) Tha, si vi aver motivo anda soste trebul te iubisaras-ame iech averes. O apostolo Ioan scriisardea pesche phralenghe: „Con iubil le Devles trebul te iubil vi pesche phrales”. (1 Ioan 4:21) O ciacimos si că, cana sicavas iubirea iech caring aver, sicavas iubirea caring o Del.
4, 5. So phanglimos si mașcar i iubirea anda o Del hai i iubirea cai sicavas-la caring amare phrala hai pheia? Cheren iech ilustrarea.
4 So phanglimos si mașcar amari iubirea caring o Del hai i iubirea cai sicavas-la caring amare phrala hai pheia? Caște hachiaras mai mișto, te gândisaras-ame ca so phanglimos si mașcar amaro ilo hai aver părți anda amaro corpo. Cana iech medico, lel amaro pulso catar o vast caște dichel dacă si baro sau țâno, vo daștil te jianel chichiva buchia anda sar si amaro ilo. So daisaras te sichioas anda cado exemplo?
5 Cadea sar iech medico daștil te jianel chichi de sastevesto si amaro ilo cana lel o pulso, sa cadea i iubirea cai si amen caring amare phrala daștil te sicavel chichi de bari si amari iubirea anda o Del. Dacă das amari sama că i iubirea caring amare phrala covliardea-pe, cadaia daștil te sicavel că amari iubirea anda o Del astardea te covliol sea mai but. Tha, cana sicavas iubirea caring le phrala, sicavas că amari iubirea anda o Del si zurali.
6. Sostar trebul te daras cana dichas că i iubirea caring amare phrala hai pheia covliardea-pe? (1 Ioan 4:7-9, 11)
6 Trebulas te daras dacă i iubirea caring amare phrala hai pheia covliardea-pe? Da, anda codoia că sam ando pericolo te hasaras amaro amalimos le Iehovaia. O apostolo Ioan phendea claro cado ciacimos: „Con ci iubil pesche phrales, cas dichel, ci daștil te iubil le Devles, cas ci dichel”. (1 Ioan 4:20) Cadea că, sam dichle mișto andel iacha le Iehovasche numai cana iubisaras-ame iech averes. (Citisar 1 Ioan 4:7-9, 11.)
SAR DAISARAS TE SICAVAS IUBIREA IECH CARING AVER?
7, 8. Sar daisaras te sicavas amari iubirea iech caring aver? Den chichiva exemplea.
7 Ando Lil le Devlesco arachas butivar i porunca ‘te iubisaras-ame iech averes’. (Ioan 15:12, 17; Rom. 13:8; 1 Tes. 4:9; 1 Pet. 1:22; 1 Ioan 4:11) Tha, i iubirea si iech sentimento cai avel de andral anda o ilo, hai niciech manuș ci daștil te dichel amaro ilo. Cadea că, so daisaras te cheras caște dichiol-pe amari iubirea? Daisaras te sicavas-la prin so phenas hai so cheras.
8 Daisaras te sicavas iubirea amare phralenghe hai pheianghe prin mai but buchia. Ita chichiva exemplea: „Phenen tumenghe o ciacimos iech averesche!” (Zah. 8:16), „Încăren i pacea mașcar tumende” (Mar. 9:50), „Cana trebul te sicaven pachiv iech averesche, aven dintune” (Rom. 12:10), „Primisaren tumen anda ilo iech averes” (Rom. 15:7), ‘Iertin tumen vi mai dur anda sea o ilo iech averes’ (Col. 3:13), „Phiraven mai dur iech averesche pharimata” (Gal. 6:2), „Zuriaren tumen vi mai dur iech averes” (1 Tes. 4:18), ‘Vazden tumen vi mai dur iech averes’ (1 Tes. 5:11), „Manghen tumen le Devlesche iech anda aver” (Iac. 5:16).
Sar daisaras te ajutisaras ieche phrales cai nachel prin pharimata? (Dich le paragrafea 7-9)
9. Sostar o fapto te zuriaras averen sicavel amari iubirea caring lende? (Dich vi le imagini.)
9 Te dichas iech buchi prin savi daisaras te sicavas amari iubirea caring le coaver. O Pavel phendea: „Zuriaren tumen vi mai dur iech averes”. Iech lil phenel sostar o fapto te zuriaras averen si iech buchi prin savi daisaras te sicavas amari iubirea caring lende. Cade phenel-pe că i duma grecisco traducime prin „te zuriares” camel te phenel „te beșes pașa iech manuș caște sastiares lesco ilo cana nachel prin bare pharimata”. Cadea că, cana zuriaras varecas cai silo duchado hai perado, ajutisaras-les te vazdel-pe hai te jial mi dur po drom la viațaco. De fiesavi data cana zuriaras amare phralen sicavas chichi de bari si amari iubirea caring lende. (2 Cor. 7:6, 7, 13)
10. So phanglimos si mașcar i mila hai o fapto te zuriaras averen?
10 I mila hai o fapto te zuriaras le coaveren sile zurales phangle mașcar pende. Iech manuș pherdo mila camel te zuriarel le coaveren hai te del peschi zor te sastiarel lenghi duch. Cadea că, cana simțosaras mila, camas anda sea o ilo te zuriaras le coaveren prin so cheras. O Pavel sicavel că si iech baro phanglimos mașcar i mila le Iehovaschi hai sar vo zuriarel le manușen. O Pavel phenel că o Iehova silo „o Dad la milaco duioso hai o Del orisavea mângâiereaco”. (2 Cor. 1:3) Vo folosil i duma „la milaco duioso” caște sicavel sar silo vo pașa le manușa. Sa cadea, phenel-pe că o Iehova silo „o Dad la milaco duioso” anda codoia că vo camel anda sea o ilo te zuriarel-ame. Cadaia cherel-les te „mângâil-ame ande sea amare pharimata”. (2 Cor. 1:4) Cadea sar iech haing anda savi thabdel pai ujo, del zuralimos codolen trușale, sa cadea o Iehova vazdel hai del zuralimos codolenghe perade. Sar daisaras te las-ame pala o Iehova cana simțosaras mila anda aver hai cana zuriaras-len? Iech buchi cai daisaras te cheras-la si te bariaras ande amare ile calități save cheren-ame te sicavas mila. Save si chichiva anda cadal calități?
11. So ajutil-ame te iubisaras le coaveren hai te zuriaras-len? (Coloseni 3:12; 1 Petru 3:8)
11 Cana șioas-ame ando than amare phralengo, sicavas lenghe iubirea phralicani hai lașimos, daisaras vi mai dur te zuriaras-ame iech averes. (Citisar Coloseni 3:12; 1 Petru 3:8.) Sar va ajutin-ame cadal calități? Cana i mila hai le sentimentea cai silen phanglimos laia cheren partea anda amari viața, camas anda sea o ilo te zuriaras codolen cai nachen prin pharimata. Cado ciacimos sas phendo vi le Isusostar: „Anda sea o ilo del duma o mui. O manuș lașio încalavel lașe buchia anda pesco lașio barvalimos”. (Mat. 12:34, 35) Iech anda le mai importanto buchia prin save daisaras te sicavas iubirea caring amare phrala hai pheia si te zuriaras-len.
SAR DAISARAS TE ÎNCĂRAS ZURALI AMARI IUBIREA IECH CARING AVER?
12. a) Sostar trebul te las sama? b) So pușimos va avela te dichas mai dur?
12 Savore camas „te iubisaras-ame vi mai dur iech averes”. (1 Ioan 4:7) Cu sea cadala, si importanto te na bâstras so phendea o Isus: „Le mai butenghi iubirea va șudrola”. (Mat. 24:12) O Isus ci phendea că le mai but anda lesche discipoli ci va mai sicavena iubirea iech caring aver. Tha, trebul te las sama ca i iubirea șudri le manușenghi te na rimosarel o modo ande savo phiravas-ame iech averesa. Acana că si amen cadai buchi andi goghi, te gândisaras-ame ca o pușimos cai avel: So va ajutil-ame te jianas chichi de zurali si amari iubirea caring amare phrala hai pheia?
13. So daștil te șiol co zumaimos amari iubirea?
13 Sicavas chichi de zurali si amari iubirea prin sar phiravas-ame cana nachas prin anumime situații. (2 Cor. 8:8) Ande pesco lil, o Petru sicavel iech anda cadal situații. Vo phenel: „Mai opral sar oriso, te avel tumen iech iubirea zurales bari iech caring aver, că i iubirea pachiarel but păcatea”. (1 Pet. 4:8) Cadea că, le covlimata hai le imperfecțiuni le coaverenghe daștin te șion co zumaimos amari iubirea.
14. Cadea sar phenel-pe ando 1 Petru 4:8, sar trebul te avel amari iubirea? Cheren iech ilustrarea.
14 Andi dintuni partea anda o verseto 8, o apostolo Petru phendea sar trebul te avel amari iubirea: „iech iubirea zurales bari”. I duma grecisco anda „zurales” însemnol „zinghiardo”. I duito partea anda o verseto sicavel că cana si amen iech iubirea zurali anda le coaver, pachiaras lenghe păcatea. Te gândisaras-ame că i iubirea si sar iech cotor pohtan cai încăras-les duie vastența hai zinghiaras-les ji cana pachiarel na iech sau dui păcatea, tha „but păcătea”. I duma „te pachiaras” însemnol te iertisaras .Cadea sar iech cotor pohtan daștil te pachiarel iech defecto, sa cadea dacă si amen iech iubirea zurali anda amare phrala hai pheia, daisaras te pachiaras lenghe imperfecțiuni hai covlimata”.
15. So va avela te cheras dacă amari iubirea caring amare phrala hai pheia si zurali? (Coloseni 3:13)
15 Amari iubirea anda le phrala hai pheia trebul te avel cadea de zurali caște daisaras te iertisaras-le chiar cana na-i amenghe ușoro. (Citisar Coloseni 3:13.) Tha, cana cheras cadai buchi sicavas că amari iubirea caring lende si zurali hai că camas te avas mișto dichle andel iacha le Iehovasche. So aver vareso daștil te ajutil-ame te iertisaras le coaveren hai te na holiaras-ame sigo pe le buchia cai cheren-le?
Cadea sar șioas de iech rig le șucar poze hai chosas codola cai ci încliste mișto, sa cadea încăras ande amari goghi le șucar amintiri cai si amen amare phralența hai chosas codola nasul. (Dich le paragrafea 16, 17)
16, 17. So aver vareso daștil te ajutil-ame te nachas părdal le buchia nasul cai cheren-le le coaver? Cheren iech ilustrarea. (Dich vi le imagini.)
16 Ando than te gândisaras-ame ca le buchia nasul cai cheren-le amare phrala, trebul te încăras ande amari goghi le lașe buchia cai cheren-le. Te cheras iech ilustrarea. Gândisar-tu că san ande iech than mai bute phralența hai pheianța, hai angla te tiliaren, cheren tumenghe iech poza. Mai but, cheren încă iech sau dui poze, anda codoia că daștil-pe că i dintuni ci înclistea mișto. Tha, diches că iech phral ci asal ande iech poza. So va avela te cheres? Daștil-pe că va avela te choses-la anda codoia că mai si tut dui poze ande save savore, chiar vi codo phral, asan.
17 Cadal poze si sar le amintiri cai alosaras te încaras-le ande amari goghi. Mai butivar, si amen șucar amintiri amare phralența hai pheianța. Tha, daștil-pe că poiechdata iech phral sau iech phei va phenena amenghe vareso cai ci ciaiol-ame. Va avela te încăras cadai buchi ande amari goghi sau va avela te das amari zor te chosas-la sar iech poza cai ci înclistea mișto? (Prov. 19:11; Ef. 4:32) Daisaras te bâstras le buchia nasul cai cheren-le amare phrala anda codoia că încăras ande amari goghi le șucar buchia prin save nachleam lența. Cadala sile cuci amintiri cai camas te încăras-le ande amari goghi.
SOSTAR TREBUL-AME IUBIREA ACANA MAI BUT SAR ORICANA?
18. So sichileam anda i iubirea anda cado articolo?
18 Ande cado articolo, sichileam că si importanto te avel-ame iech iubirea zurali iech caring aver, anda codoia că cadea sicavas că iubisaras vi le Iehovas. Iech buchi prin savi daisaras te sicavas amari iubirea caring amare phrala, si cana zuriaras-len. Caște ‘zuriaras-ame mai dur iech averes’, trebul te avel-ame mila. Tha, sar daisaras te încăras zurali i iubirea cai si mașcar amende? Cana cheras sea so daisaras caște iertisaras le coaverenghe greșeli.
19. Sostar si zurales importanto aghies te sicavas iubirea iech caring aver?
19 Sostar si zurales importanto te sicavas aghies iubirea iech caring aver? O apostolo Petru phendea sostar: „O sfârșito sea le buchiango pașilo. Anda codoia, . . . te avel tumen iech iubirea zurales bari iech caring aver”. (1 Pet. 4:7, 8) Ando timpo so o sfârșito cadala lumeaco nasul pașiol sea mai but, so daisaras te ajucăras? O Isus phendea de mai anglal pesche discipolenghe: „Va avena urâme sea le themendar anda mânro anav”. (Mat. 24:9) Daisaras te nachas părdal i holi cadala lumeachi numai dacă așias chidine iech pașa aver. Dacă iubisaras amare phralen hai pheian, o Satan ci daștil te hulavel-ame niciechdata, anda codoia că i iubirea si, „o phanglimos perfecto cai unil-ame”. (Col. 3:14; Filip. 2:1, 2)
GHILI 130 Te iertisaras!
a Acana, mai but sar oricana trebul te sicavas iubirea caring amare phrala hai pheia. Sostar si cadea de importanto hai sar daisaras te sicavas iech iubirea vi mai bari?