Yehova atwitegereza ku bw’ineza yacu

“Inyonga z’Uhoraho zinyuranganya mw isi yose hirya no hino, kugira ngo yerekane ububasha bgiwe bgo gutabara abafise imitima imutunganiye.”​—2 NGO. 16:9.

1. Ni kubera iki Yehova adusuzuma?

YEHOVA ni Umuvyeyi atunganye. Aratuzi neza ku buryo mbere azi n’“ivyiyumviro [vyacu] vyose.” (1 Ngo. 28:9) Ariko rero, ntadusuzuma kugira gusa adutore amahinyu. (Zab. 11:4; 130:3) Ahubwo, abigiranye urukundo aripfuza kudukingira ikintu cose coshobora kwonona ubucuti dufitaniye na we canke kubangamira ivyizigiro dufise vyo kuronka ubuzima budahera.​—Zab. 25:8-10, 12, 13.

2. Yehova agaragaza ububasha bwiwe ku bw’ineza ya bande?

² Yehova arafise ububasha butagira aho bugarukira kandi arabona ibintu vyose. Ku bw’ico, arashobora gufasha abasavyi biwe b’intahemuka igihe cose bamwituye kandi arashobora kubashigikira igihe bari mu bigeragezo. Mu 2 Ngoma 16:9 hagira hati: “Inyonga z’Uhoraho zinyuranganya mw isi yose hirya no hino, kugira ngo yerekane ububasha bgiwe bgo gutabara abafise imitima imutunganiye.” Urabona yuko Yehova akoresha ububasha bwiwe mu gutabara abamusukurira bafise umutima utunganye, ni ukuvuga umutima utyoroye kandi ukorana imvo zitarimwo uburyarya. Ariko rero abantu bakorana uruyeri canke abiyorobetsi ntabagaragariza mwene ubwo bwitwararitsi.​—Yos. 7:1, 20, 21, 25; Imig. 1:23-33.

Gendana n’Imana

3, 4. ‘Kugendana n’Imana’ bisobanura iki, kandi ni uburorero ubuhe bwo muri Bibiliya budufasha gutahura ico kintu?

³ Ku batari bake, bisa n’ibitumvikana kwumva ko Umuremyi w’ikirere cacu amahanga yemerera abantu kugendana na we mu buryo bw’ikigereranyo. Yamara ico ni co neza na neza Yehova ashaka ko dukora. Mu bihe vya Bibiliya, Henoki na Nowa ‘bagendana n’Imana.’ (Ita. 5:24; 6:9) Musa “yagumye ashikamye nk’aho abona Umwe ataboneka.” (Heb. 11:27) Umwami Dawidi yaragendanye na Se wiwe wo mw’ijuru abigiranye ukwicisha bugufi. Yavuze ati: ‘Kuko [Yehova] ari iburyo bwanje sinzonyiganyizwa.’​—Zab. 16:8.

⁴ Ego ni ko, ntidushobora gufata Yehova ukuboko nya kumufata hanyuma ngo tugendane na we. Ariko turashobora kubigira mu buryo bw’ikigereranyo. Uti gute? Umwanditsi wa zaburi Asafu yandika ati: “Namana nawe na ntaryo, umfashe ukuboko kw’i buryo. Uzondōngōza inama ungīriye.” (Zab. 73:23, 24) Tubivuze mu buryo butomoye, tugendana na Yehova igihe dukurikiza twitonze impanuro aduha, zino tukaba tuzironka canecane biciye kw’Ijambo ryiwe ryanditse be no ku “mushumba w’umwizigirwa kandi w’ubwenge.”​—Mat. 24:45; 2 Tim. 3:16.

5. Ni gute Yehova agumiza ijisho ryiwe rya kivyeyi ku basavyi biwe b’intahemuka, kandi dukwiye kwiyumva gute ku bimwerekeye?

⁵ Kubera yuko Yehova akunda abagendana na we, abagumizako ijisho ryiwe rya kivyeyi, akabitwararika, akabakingira akongera akabigisha. Imana ivuga iti: “Nzokwigisha nkwereke inzira ucamwo, nzokugīra inama, ijisho ryanje rizokugumako.” (Zab. 32:8) Niwibaze uti: ‘Noba niha ishusho ndiko ndagendana na Yehova ndamufashe ukuboko, numviriza ubukerebutsi bwiwe kandi ngatahura ko ampanze ijisho mu buryo buranga urukundo? Gutahura ko ari hafi yanje, vyoba bigira ico bikoze ku vyiyumviro vyanje, ku majambo mvuga canke ku vyo nkora? Vyongeye igihe nakoze ikosa, noba mbona Yehova ko ari Umuvyeyi afise igishika kandi w’imbabazi yipfuza gufasha abigaya ngo basubire kugiranira na we ubucuti bwa hafi, aho kumubona nk’Imana ikaze kandi itegereka?’​—Zab. 51:17.

6. Ni igiki Yehova arushije umuvyeyi asanzwe?

⁶ Rimwe na rimwe, Yehova yoshobora kudufasha n’imbere yuko dufata ingendo itabereye. Nk’akarorero, yoshobora kubona yuko umutima wacu ufise impengamiro yo kwibesha utanguye kwipfuza ibintu bitabereye. (Yer. 17:9) Muri ico gihe, arashobora kugira ico akoze mbere ningoga kuruta uko abandi bavyeyi bobigira, kubera yuko “amaso yiwe aca ibibatsi” afise ubushobozi bwo kuraba ibiri imbere muri twebwe, ni ukuvuga gusuzuma ivyiyumviro vyacu vy’ibwina. (Zab. 11:4, NW; 139:4; Yer. 17:10) Raba ukuntu Imana yavyifashemwo ku bijanye n’ikintu cashitse mu buzima bwa Baruki, uno akaba yari umukarani n’umugenzi somambike w’umuhanuzi Yeremiya.

Yarabereye Baruki Umuvyeyi nyakuri

7, 8. (a) Baruki yari nde, kandi ni ivyipfuzo bitabereye ibihe ashobora kuba yari atanguye gutsimbataza mu mutima wiwe? (b) Yehova yerekanye gute ko yitwararika Baruki nk’umuvyeyi?

⁷ Baruki yari umwanditsi abizi neza yakoranye na Yeremiya adahemuka mu gikorwa cahavuye gicika ikitoroshe, kino kikaba cari ico gutangaza urubanza Yehova yari yaciriye Ubuyuda. (Yer. 1:18, 19) Harageze aho Baruki, uwushobora kuba yava mu muryango utunze, atangura kwironderera “ibintu bihambaye.” (NW) Kumbure yatanguye kwitsimbatazamwo imigambi yo kwironkera ibintu canke icipfuzo co gusagamba mu vy’umubiri. Uko vyari kwose, Yehova yarabonye yuko ivyo vyiyumviro biteye akaga vyariko biratsimbatara mu mutima wa Baruki. Abicishije kuri Yeremiya, Yehova yaciye atunganya iyo ngorane adatebaganye, abwira Baruki ati: “Wavuze, uti Mbonye ibara, kuk’Uhoraho yongereje intuntu ku mubabaro wanje! Kuniha kurandambiye, simbona akaruhuko.” Maze Imana yaciye ivuga iti: “Uguma wironderera ibintu bihambaye. Ntugume ubirondera.” (NW)​—Yer. 45:1-5.

⁸ Naho Yehova yari ashikamye mu vyo yabwiye Baruki, ntiyavyifashemwo mu buryo buranga ishavu, ahubwo yabigiranye ubwitwararitsi nyakuri bwa kivyeyi. Biboneka yuko Imana yabonye ko ivyipfuzo vy’uwo mugabo bitagaragaza ko afise umutima mubi canke urimwo ubugunge. Yehova kandi yari azi yuko Yeruzalemu n’Ubuyuda vyari mu misi yavyo ya nyuma, kandi ntiyipfuza ko Baruki ata umurongo muri ico gihe kigoye. Ku bw’ivyo, kugira ngo Imana ifashe umusavyi wayo gusubira kubona ibintu mu buryo bubereye, yaramwibukije yuko ‘yagira izane ivyago ku bafise umubiri bose,’ yongera ivuga yuko Baruki yorokoye igufa aramutse akoze mu buryo buranga ubukerebutsi. (Yer. 45:5) Ni nk’aho Imana yavuze iti: ‘Nubone ibintu mu buryo bwiza Baruki. Nugumize ku muzirikanyi ibigiye gushikira abantu bakora ivyaha bo mu Buyuda n’i Yeruzalemu. Nugume uri umwizigirwa kugira ngo ubeho! Nzogukingira.’ Biboneka yuko Yehova yakoze Baruki ku mutima, kubera ko yakiriye neza impanuro yahawe araheza ararokoka isangangurwa rya Yeruzalemu, iryabaye haciye imyaka 17 inyuma y’aho.

9. Wokwishura gute ibibazo vyabajijwe mu ngingo?

⁹ Uko uzirikana ku nkuru yerekeye Baruki, nurimbure ibi bibazo be n’ivyanditswe bikurikira: Uburyo Imana yakosoye Baruki buhishura iki ku bijanye na Yehova be n’inyiyumvo agirira abasavyi biwe? (Soma Abaheburayo 12:9.) Turavye ibihe bitoroshe tubayemwo, ni igiki dushobora kwigira ku mpanuro Imana yahaye Baruki be n’ingene Baruki yayakiriye? (Soma Luka 21:34-36.) Mu kwigana Yeremiya, abakurambere bakirisu bashobora gute kwigana ukuntu Yehova yitwararika abasavyi biwe?​—Soma Abagalatiya 6:1.

Umwana yariganye urukundo rwa Se

10. Yezu yaronkejwe gute ibikenewe kugira ngo arangure neza ibanga ryiwe ry’ukuba Umutwe w’ishengero rya gikirisu?

¹⁰ Mu gihe c’imbere y’ubukirisu, urukundo Yehova yari afitiye abasavyi biwe rwaragaragaye biciye ku bahanuzi be no ku bandi basavyi biwe b’abizigirwa. Muri kino gihe cacu, ruragaragara canecane biciye ku Mutwe w’ishengero rya gikirisu ari wo Yezu Kristu. (Ef. 1:22, 23) Ni co gituma mu gitabu c’Ivyahishuwe, Yezu adondorwa nk’umwagazi w’intama ufise “amaso indwi, ayo maso akaba agereranya za mpwemu indwi z’Imana zatumwe mw’isi yose.” (Ivyah. 5:6) Vy’ukuri, kubera ko impwemu nyeranda nyinshi y’Imana yahaye Yezu ububasha, arafise ugutahura kutagira agahaze. Na we nyene arabona ico turi imbere, kandi nta kantu na kamwe kamucika.

11. Ni uruhara uruhe Kristu arangura, kandi ukuntu adufata bigaragaza gute uko Se wiwe adufata?

¹¹ Ariko rero, cokimwe na Yehova, Yezu si umupolisi aducungera ari mw’ijuru. Adusuzuma abigiranye urukundo. Rimwe mu mazina y’icubahiro Yezu afise ni “Data wa twese ahoraho,” rikaba ritwibutsa uruhara azorangura mu guha ubuzima budahera abamwizera bose. (Yes. 9:6) Vyongeye, kubera ko Kristu ari Umutwe w’ishengero rya gikirisu, arashobora gutuma abakirisu bahumuye mu vy’impwemu bafise umutima ukunze, canecane abakurambere, baronsa impumurizo canke impanuro abari n’ivyo bakeneye.​—1 Tes. 5:14; 2 Tim. 4:1, 2.

12. (a) Amakete yandikiwe amashengero indwi yo muri Aziya Ntoya ahishura iki ku vyerekeye Yezu? (b) Abakurambere bagaragariza gute ubusho bw’Imana agatima nk’aka Kristu?

¹² Ukuntu Kristu yitwararika bimwe bigera kure ubusho biragaragarira mu makete yandikiye abakurambere b’amashengero indwi yo muri Aziya Ntoya. (Ivyah. 2:1–3:22) Muri ayo makete, Yezu yarerekanye ko azi neza ivyariko biraba mw’ishengero rimwerimwe ryose, be n’uko yitwararika bimwe bigera kure abayoboke biwe. No muri kino gihe ni ko bimeze, mbere ku rugero runini kuruta, kubera yuko iryo yerekwa ryo mu Vyahishuwe riranguka mu kiringo co “mu musi w’Umukama.”a (Ivyah. 1:10) Urukundo rwa Kristu akenshi ruragaragara biciye ku bakurambere basukura ari abungere b’ishengero. Arashobora kuvyurira umutima izo “ngabirano z’abagabo” kugira ngo batange impumurizo, indemesho canke impanuro igihe biba bikenewe. (Ef. 4:8; Ibik. 20:28; soma Yesaya 32:1, 2.) Woba ubona utwigoro bagira ko ari ikintu cerekana ko Kristu akwitwararika ku giti cawe?

Imfashanyo iza ku gihe kibereye

13-15. Imana ishobora guhitamwo kwishura amasengesho yacu gute? Tanga uturorero.

¹³ Woba urigera usenga ukobeje usaba imfashanyo maze inyishu ukayironka biciye ku kugenderwa n’umukirisu ahumuye mu vy’impwemu akuremesha? (Yak. 5:14-16) Canke kumbure iyo mfashanyo wayironse biciye ku nsiguro yatanzwe kw’ikoraniro rya gikirisu kibure biciye ku makuru yasohowe muri kimwe mu bisohokayandikiro vyacu. Yehova akenshi yishura amasengesho muri ubwo buryo. Nk’akarorero, umukurambere umwe ahejeje gutanga insiguro, hari umuvukanyikazi yamwegereye, hakaba hari haciye indwi nka zingahe arenganijwe bimwe bikomeye. Aho kumuganyira amubwira ingorane yari afise, yaramukengurukiye bimwe bigera kure kubera ivyiyumviro bimwebimwe bishingiye ku vyanditswe yashikirije muri iyo nsiguro. Vyari bihuye n’ukuntu ivyiwe vyari vyifashe kandi vyaramuhumurije cane. Ese ukuntu yari ahimbawe no kuba yari yitavye iryo koraniro!

¹⁴ Ku bijanye n’imfashanyo turonka biciye kw’isengesho, rimbura akarorero k’abantu batatu bari bapfunzwe bamenyeye ukuri kwo muri Bibiliya mw’ibohero maze baba abamamaji batarabatizwa. Kubera ikintu c’ububisha cari cabaye, abanyororo bose bo muri iryo bohero barankiwe ibintu bimwebimwe bari bafitiye uburenganzira. Ivyo vyatumye haba umugumuko. Abanyororo bafashe ingingo yuko bahejeje gufungura imfungurwa zo mu gitondo co ku musi ukurikira, batosubije amasahani mu kwerekana ko bagararije. Ba bamamaji batatu batarabatizwa bari mu mbisi no mu zihiye. Baramutse bifatanije n’abandi muri uwo mugumuko, bobaye bariko bararenga ku mpanuro Yehova atanga mu Baroma 13:1. Batifatanije na bo na ho, bokwiteze yuko izindi mbohe zibagirira nabi.

¹⁵ Kubera ko batari bashoboye guhanahana amakuru, bose uko ari batatu barasenze basaba ubukerebutsi. Mu gitondo cakurikiye, bose uko ari batatu basanze bafashe ingingo imwe, ni ukuvuga gusa ko batokwakiriye izo mfungurwa zo mu gitondo. Igihe abacunga ibohero mu nyuma baza kwegeranya amasahani, ba bagabo batatu nta n’imwe bari bafise basubiza. Ese ukuntu bahimbawe no kuba Umwe ‘yumva ivyo asabwa’ yari hafi yabo!​—Zab. 65:2.

Duhange amaso kazoza umutima uri mu nda

16. Igikorwa co kwamamaza cerekana gute ko Yehova yitwararika abameze nk’intama?

¹⁶ Igikorwa co kwamamaza kirangurirwa kw’isi yose ni ikindi kimenyamenya c’uko Yehova yitwararika abantu b’umutima nziraburyarya, aho boba baba hose. (Ita. 18:25) Yehova, akenshi abicishije ku buyobozi butangwa n’abamarayika, arashobora kuyobora abasavyi biwe ku bantu bameze nk’intama, mbere naho boba baba mu turere tutarashikamwo inkuru nziza. (Ivyah. 14:6, 7) Nk’akarorero, biciye ku mumarayika, Imana yarayoboye Filipo, umwamamazanjili wo mu kinjana ca mbere ngo aje guhura n’umutegetsi w’Umunyetiyopiya kugira amusigurire Ivyanditswe. None vyavuyemwo iki? Uwo mugabo yaremeye inkuru nziza maze aracika umuyoboke wa Yezu yabatijwe.b​—Yoh. 10:14; Ibik. 8:26-39.

17. Ni kubera iki tudakwiye kwiganyira birenze ku bijanye na kazoza?

¹⁷ Uko ivy’ino si biguma vyegereza ku muhero wavyo, “ububabare nk’ubw’ibise” bwari bwarabuwe buzobandanya. (Mat. 24:8) Nk’akarorero, ibiciro vy’ibifungurwa vyoshobora kuduga bimwe bikomeye kubera igwirirana ry’abantu, ikirere cifashe nabi, canke ugucumbagira kw’ivy’ubutunzi. Vyoshobora kurushiriza kugora kuronka akazi, kandi abakozi boshobora gushirwako umukazo wiyongereye wo gukora amasaha menshi. Ivyoshika vyose vyaba ibihe, abantu bose baguma bashira ivy’impwemu mu kibanza ca mbere kandi bakaguma bafise ‘ijisho riremuruye’ ntibakwiye kwiganyira birenze. Barazi yuko Imana ibakunda be n’uko izobitwararika. (Mat. 6:22-34) Rimbura nk’akarorero ukuntu Yehova yaronkeje Yeremiya ivyo yari akeneye igihe ibintu vyari vyifashe nabi cane Yeruzalemu igira isangangurwe mu 607 B.G.C.

18. Yehova yagaragaje gute urukundo yakunda Yeremiya igihe Yeruzalemu yari yugarijwe?

¹⁸ Mu gice ca nyuma c’ikiringo Abanyababiloni bamaze bugarije Yeruzalemu, Yeremiya yari apfungiwe mu rugo rw’ibohero. None yari kuronka gute ibifungurwa? Iyo aza kuba afise umwidegemvyo, yari kubirondera. Yamara vyose yabiziga ku bari bamukikuje, benshi muri bo bakaba baramwanka. Naho ari ukwo, Yeremiya ntiyizigira abantu ahubwo yizigira Imana, iyari yarasezeranye ko izomwitwararika. None Yehova yoba yarashikije ivyo yasezeranye? Ego cane! Yaritwararitse ivy’uko Yeremiya aronka ku musi ku musi “umutsima . . . gushitsa ah’imitsima yose yahebūriwe mu gisagara.” (Yer. 37:21) Yeremiya, cokimwe na Baruki, Ebedumeleki be n’abandi, bararokotse ico kiringo c’amapfa, indwara be n’urupfu.​—Yer. 38:2; 39:15-18.

19. Uko duhanga amaso kazoza, ni umwiyemezo uwuhe dukwiye kugira?

¹⁹ Egome, “amaso ya Yehova ari ku bagororotsi, n’amatwi yiwe ari ku gutakamba kwabo.” (1 Pet. 3:12) Woba uhimbarwa n’ukuba Umuvyeyi wawe wo mw’ijuru akwitegereza? Woba wumva utekaniwe kandi ata kigukoma kubera yuko uzi ko akuraba ku bw’ineza yawe? Niwiyemeze rero kubandanya ugendana n’Imana naho kazoza koba kakubikiye iki. Turashobora guhera amazinda yuko Yehova azokwama arabira hafi nk’umuvyeyi abasavyi biwe bose b’intahemuka.​—Zab. 32:8; soma Yesaya 41:13.

[Utujambo tw’epfo]

Woshobora kubisigura?

• Dushobora kwerekana gute ko turiko ‘turagendana n’Imana’?

• Yehova yerekanye gute ko akunda Baruki?

• Bwa Mutwe w’ishengero rya gikirisu, Yezu agaragaza gute kamere nk’iza Se?

• Ni mu buryo ubuhe twokwerekana yuko twizigira Imana muri ibi bihe bitoroshe?

[Ifoto ku rup. 9]

Nka kurya Yeremiya yabigiriye Baruki, abakurambere bakirisu muri kino gihe baragaragaza ubwitwararitsi nk’ubwa Yehova

[Ifoto ku rup. 10]

Yehova ashobora gute gutanga imfashanyo ku gihe kibereye?