Nathani​—Yaraburaniye ugusenga gutyoroye adahemuka

Ntivyoroshe kwumvisha umuntu w’umunyabubasha yuko inzira ziwe zononekaye be n’uko akeneye kugira ivyo ahinduye. Woba woturukira umuntu nk’uwo nka hamwe woba uzi yuko yishe umuntu kugira gusa yirinde kuboneka nabi?

Umwami Dawidi wa Isirayeli ya kera yari yarenze ibigo na Batisheba, uno aca aribungenga. Kugira ngo Dawidi ahishe ico gicumuro, yaricishije umugabo wa Batisheba aca aracura Batisheba. Haraciye amezi n’ayandi Dawidi afise ubuzima burimwo tubiri, akaba ata gukeka ko yabandanya kurangura amabanga yiwe. Mugabo Yehova ntiyaretse ngo ibicumuro vy’uwo mwami bibe akamizwe n’ingoma. Yararungitse umuhanuzi wiwe Natani kugira ngo amwagirize.

Ico cari igikorwa kitoroshe. Niwishire mu kibanza ca Natani. Nta gukeka ko kuba Natani yari intahemuka kuri Yehova akaba kandi yarumira ku ngingo mfatirwako z’Imana ari vyo vyamuvyuriye umutima wo kwibutsa Dawidi ibicumuro yari yakoze. None uwo muhanuzi yari gushobora gute gukora ico kintu, akumvisha Umwami Dawidi yuko akeneye kwigaya?

YARI UMWIGISHA AKORESHA UBUGENGE

Ubona gute ufashe akanya gatoya ugasoma 2 Samweli 12:1-25? Nufate yuko uri mu kibanza ca Natani igihe yariko yiganira Dawidi iyi nkuru igira iti: “Mu gisagara kimwe hari abagabo babiri; umwe yari umutunzi uwundi akaba ntahonikora. Nya mugabo w’umutunzi yari afise intama n’inka nyinshi cane; ariko nya mugabo ntahonikora nta kintu yari afise atari akagazi k’intama k’agashashi gatoyi yari yaraguze. Yarakazigamira ubuzima, kagakurira hamwe na we be n’abahungu biwe, bose hamwe. Karya ku kimanyu ciwe c’umukate, kakanywa ku gikombe ciwe kandi kakaryama mu gikiriza ciwe; kamubera nk’umukobwa yivyariye. Haciye igihe, haza umushitsi kwa nya mugabo w’umutunzi, ariko uno areka gutora zimwe mu ntama ziwe n’inka ziwe ngo azitegurire nya ngenzi yari yinjiye iwe. Nuko atora ka kagazi k’intama ka wa mugabo ntahonikora, aba ariko ategurira uwo mugabo yari yinjiye iwe.”​—2 Sam. 12:1-4.

Biragaragara ko Dawidi, uwari yarabaye umwungere, yemeye yuko ico kintu cari cabaye koko. Incabwenge imwe ivuga iti: “Natani ashobora kuba yari amenyereye kuza iwe kugira ngo aburanire ababa bagiriwe nabi, bano bakaba batari gushobora gutunganirizwa atabigiyemwo, kandi Dawidi yiyumviriye ko n’ico gihe ari vyo vyari bimuzanye.” Naho vyari kuba vyifashe gutyo, kugira ngo Natani avugishe uwo mwami nk’uko yabigize, vyasavye ko aba intahemuka ku Mana akongera akagira umutima rugabo. Iyo nkuru ya Natani yatumye Dawidi ashangashirwa. Yavuze ati: “Ndahiye ukubaho kwa Yehova, umugabo yakoze ico kintu akwiriye gupfa!” Natani yaciye amubwira aya majambo atuma umuntu amaramara agira ati: “Uwo mugabo ni wewe!”​—2 Sam. 12:5-7.

Rimbura igituma Natani yatoreye umuti iyo ngorane muri ubwo buryo. Ntivyoroshe yuko umuntu amaze gukunda cane uwundi abona ibimwerekeye nk’uko biri koko. Twese usanga turondera kwisigura igihe twakoze ibintu biteye amakenga. Mugabo ikigereranyo Natani yakoresheje catumye Dawidi yiyamiriza atabiciye n’ikanda ivyo yari yakoze. Uwo mwami yarabonye neza yuko inyifato Natani yadondoye yari ibabaje cane. Ariko rero, aho Dawidi amariye kwiyamiriza iyo nyifato ni ho gusa Natani yahishura yuko ico kigereranyo cerekeye uwo mwami. Dawidi yarashobora rero kubona uburemere bw’igicumuro ciwe. Ivyo vyatumye umuzirikanyi wiwe witegurira kwakira igikangiro. Yariyemereye yuko yari ‘yasuzuguye’ koko Yehova mu nyifato yagaragaje mu bijanye na Batisheba, kandi aremera igikangiro akwiriye.​—2 Sam. 12:9-14; Zab. 51, akajambo k’intangamarara.

Ivyo none bitwigisha iki? Intumbero umwigisha wa Bibiliya aba afise ni iyo gufasha abamwumviriza gushika ku ciyumviro kibereye. Natani yarubaha Dawidi akaba ari co gituma yamuvugishije abigiranye ubugenge. Natani yari azi ko Dawidi akunda ubugororotsi n’ubutungane mu mutima wiwe. Mu gukoresha ico kigereranyo, uwo muhanuzi yafatiye kuri izo kamere zishimwa n’Imana. Na twebwe nyene turashobora gufasha abantu b’imitima nziraburyarya gutahura ukuntu Yehova abona ibintu. Uti gute? Mu gufatira ku gatima bafise ko gukora ibigororotse, tukabigira tutabereka na gato ko tubaruta mu vyo kumenya ikibereye n’ikitabereye canke mu vy’impwemu. Mu bijanye no kumenya ikibereye n’ikitabereye, Bibiliya ni yo twisunga aho kwisunga ivyiyumviro vyacu.

Ukudahemuka ku Mana ni kwo canecane kwatumye Natani ashobora gukangira uwo mwami w’umunyabubasha. (2 Sam. 12:1) Ukudahemuka nk’ukwo kuzotuma tugira umutima rugabo wo gushigikira dushikamye ingingo ngenderwako za Yehova zigororotse.

YARASHIGIKIRA UGUSENGA GUTYOROYE

Biboneka ko Dawidi na Natani bari bafitaniye ubugenzi bukomeye, kuko Dawidi yise umwe mu bahungu biwe Natani. (1 Ngo. 3:1, 5). Natani avugwa ubwa mbere muri Bibiliya ari kumwe na Dawidi. Bompi barakunda Yehova. Biragaragara ko uwo mwami yizigira ukuntu Natani abona ibintu, kuko yahishuriye uwo muhanuzi icipfuzo yari afise co kwubakira urusengero Yehova. Dawidi yavuze ati: “‘Raba ubu jewe mba mu nzu y’amasederi mu gihe isandugu y’Imana y’ukuri yoyo iba hagati mu bitambara vy’ihema.’ Natani [yaciye] abwira umwami ati: “Ikintu cose kiri mu mutima wawe​—genda ugikore, kuko Yehova ari kumwe nawe.’”​—2 Sam. 7:2, 3.

Kubera ko Natani yari umusavyi wa Yehova w’umwizigirwa, yarashigikiye abigiranye umunezero uwo mugambi Dawidi yari afise wo kwubaka ahantu ha mbere hogumye ari intimatima y’ugusenga gutyoroye kw’isi. Ariko rero, biboneka ko ico gihe Natani yashikirije ukuntu we ubwiwe abona ibintu aho kuvuga mw’izina rya Yehova. Muri iryo joro, Imana yarategetse uwo muhanuzi wayo gushira uwo mwami ubutumwa butandukanye n’iciyumviro yari yashikirije, ubwavuga yuko Dawidi atokwubatse urusengero rwa Yehova. Uworwubatse yobaye umwe muri bene Dawidi. Mugabo Natani yaramenyesheje yuko Imana yagira igiranire isezerano na Dawidi ku buryo intebe y’ubwami yiwe ‘yoshimangiwe gushika igihe kitagira urugero.’​—2 Sam. 7:4-16.

Ivyo Imana yagomba ntivyari bihuye n’ukuntu Natani yabona ibintu ku bijanye n’iyubakwa ry’urusengero. Ariko rero, uwo muhanuzi yicisha bugufi yaremeye umugambi wa Yehova atidodomba maze arawushigikira. Ese ukuntu ari akarorero keza twokurikiza bishitse Imana ikadukosora mu buryo bunaka! Ibikorwa Natani yakoze ari umuhanuzi inyuma y’aho, birerekana ko Imana yabandanije kumutonesha. Nkako, biboneka ko Yehova yahumekeye Natani hamwe na Gadi umubonyi kugira ngo bayobore Dawidi mu bijanye no kwungunganya abacuraranzi 4.000 mu gikorwa co ku rusengero.​—1 Ngo. 23:1-5; 2 Ngo. 29:25.

YARABURANIYE UBWAMI

Natani yari azi ko Salomo ari we yari gusubirira Umwami Dawidi yari ageze mu zabukuru. Ku bw’ivyo, Natani yaragize ico akoze adatebaganye igihe Adoniya yagerageza kwigarurira ingoma mu myaka y’ubusaza ya Dawidi. N’ico gihe nyene Natani yarakoranye ubugenge n’ukudahemuka. Yabanje guhimiriza Batisheba ngo yibutse Dawidi indahiro yari yararahiye yuko yokwimitse umuhungu wabo Salomo. Mu nyuma, Natani ubwiwe yarinjiye iyo umwami Dawidi ari kugira ngo amubaze nimba ari we yari yatanze uburenganzira bw’uko Adoniya amusubirira. Uwo mwami yari ageze mu zabukuru amaze gutahura uburemere bw’ivyo bintu, yarategetse Natani n’abandi basuku b’intahemuka ngo barobanuze amavuta Salomo maze batangaze ko abaye umwami. Umugambi wa Adoniya wo kwigarurira ingoma wari umutekurukanye.​—1 Abm. 1:5-53.

YARI UMUTOHOZAKAHISE ATIYEMERA

Bivugwa ko Natani na Gadi ari bo banditse igitabu ca 1 Samweli ikigabane ca 25 gushika ku ca 31 hamwe n’ica 2 Samweli cose. Ku bijanye n’inkuru zerekeye kahise zahumetswe ziri muri ivyo bitabu, havugwa ibi: “Nayo ivya Dawidi umwami, ivya mbere n’ivya nyuma, ehe vyanditswe mu majambo ya Samweli rubonyi no mu majambo ya Natani umuhanuzi no mu majambo ya Gadi umubonyi.” (1 Ngo. 29:29) Bivugwa kandi ko Natani ari we yatunganije inkuru yerekeye “ivya Salomo.” (2 Ngo. 9:29) Birashoboka rwose ko ivyo bisobanura yuko Natani yabandanije kugira uruhara mu vyagirirwa ku kirimba i bwami n’inyuma y’aho Dawidi apfiriye.

Vyinshi mu vyo tuzi ku vyerekeye Natani vyoshobora kuba vyaranditswe n’uwo muhanuzi nyene. Yamara, kuba hariho ibintu bimwebimwe atavuga, biraduhishurira vyinshi ku bimwerekeye. Biragaragara ko Natani yari umutohozakahise atiyemera. Ntiyari umuntu yipfuza kuba rurangiranwa vyanse bikunze. Inyizamvugo imwe y’ivya Bibiliya ivuga yuko Bibiliya itadondora Natani uwo ari we canke ngo yerekane umuryango akomokamwo. Nta kintu na kimwe tuzi ku bijanye n’ubuzima bwiwe.

YABITUMWA N’UKO YARI INTAHEMUKA KURI YEHOVA

Dufatiye ku makuru makeyi yerekeye Natani dusanga mu Vyanditswe, biraboneka ko yari umuntu ashigikira indinganizo z’Imana, yicisha bugufi mugabo w’intwari. Yehova Imana yaramushinze amabanga akomeye. Nuzirikane kamere Natani yari afise, nko kuba yari intahemuka ku Mana be no kuba yaraha agaciro ivyo Imana isaba. Niwihatire kwigana izo kamere.

Birashoboka yuko utazosabwa gukangira abami barenze ibigo canke guhindura ubusa imigambi y’abarondera kwigarurira ubutegetsi. Ariko rero ubifashijwemwo n’Imana, urashobora kuba intahemuka kuri yo ukongera ugashigikira ingingo mfatirwako zayo zigororotse. Urashobora kandi kuba umuntu yigisha ukuri kandi ashigikira ugusenga gutyoroye, ivyo ukabigira n’umutima rugabo yamara ukoresheje ubugenge.

[Ifoto ku rup. 25]

Natani, uwaburanira ubwami, yavugishije Batisheba abigiranye ubugenge