Na seti foe na gemeenteboekoestudie
Pisi 3: Na presi foe kon na wan gi na velddienst
1 Boiti taki a presi pe a gemeenteboekoestudie e hori e gi okasi foe groepoestudie, a kan doe wroko toe leki presi gi velddienstkonmakandra. Den ten te den velddienstkonmakandra dati e hori, moesoe de boen gi moro foeroe foe den preikiman, èn den konmakandra moesoe gi praktis jepi ini na orga foe den preikiman gi na velddienst.
2 Groepoe di orga boen gi na studie nanga na velddienst e bow boen jejefasi. Soema no ben abi winimarki foe deki-ati noso toemoesi boen rai foe a fasi fa foe joe kan handri den genstaki, fa joe kan bigin wan takimakandra, fa joe kan pristeri wan bijbelstudie, noso san joe moesoe taki na wan gobaka? Disi de a srefi jepi di kompe preikiman nanga pionier e gi di e konmakandra na a boekoestudie presi. — Gal. 6:9, 10.
3 A rol foe a studieleider: A gemeenteboekoestudieleider e teki fesi èn a abi a frantiwortoe foe orga na aktiviteit foe a groepoe. A e wroko doronomo makandra nanga den preikiman ini a veld (1 Petr. 5:2, 3). Na den velddienstkonmakandra di sreka boen, den e gi bijbel èn praktis leri di e sreka a groepoe gi a veld. So leki fa a gwenti de dan a moro boen taki ibri boekoestudie groepoe abi en eigi velddienst konmakandra na presi foe ala groepoe e kon na wan na a srefi adres. Ma toe pikin groepoe ben kan moksi efoe dati de fanowdoe. Efoe velddienst e kon baka na Waktitoren-studie, dan a velddienstkonmakandra moesoe de sjatoe. Baka dati ibri boekoestudieleider sa sorgoe foe en eigi groepoe.
4 Fasti velddienstseti e gi deki-ati foe teki prati doronomo na a dienst. Efoe den velddienstkonmakandra e hori na a ten èn a presi di den seti a fesi foe dati dan den preikiman sa meki plan nanga disi ini prakseri èn den sa kisi a deki-ati nanga a sabi taki gebied sa de èn taki den sa abi tra sma foe kan wroko nanga den. (Teki gersi Lukas 10:1.) Srefi efoe a studieleider no sa man de, a sa sorgoe gi na gebied èn seti sani gi a groepoe (om blz. 45, 46). Efoe bekwaam brada no de foe tiri a velddienstkonmakandra, dan a studieleider kan sori wan sisa foe doe disi (om blz. 80; km 3/88 blz. 3, bakratongo). Te a groepoe e kon doronomo na wan, tapoe a ten èn a presi di den gwenti dan disi e kibri wi foe broeja. Ibri kenki foe wan pisiten moesoe meki bekènti wan wiki na fesi efoe a kan.
5 Wrokomakandra de fanowdoe: Ala sma moesoe doe moeiti foe abi wan prati di wani taki wan sani na den difrenti pisi foe a dienst. Preikiman kan bigin foe sreka densrefi makandra nanga jepi foe a ten foe oefen, pe den e behandel genstaki di joe kan miti nanga situwâsi di leki fa a sori kan kon na ini a gebied.— Spr. 27:17.
6 Joe ben sa feni en boen efoe wan preikiman nanga ondrofeni ben sa jepi joe foe kon moro koni ini a meki foe disipel? Efoe dati de so, dan taki nanga joe gemeente boekoestudieleider. A kan regel en so kande, taki wan bekwaam preikiman kan gi joe jepi. Efoe joe wani abi wini foe disi, dan gebroiki den rai di joe e kisi fajafaja èn hori joe na den mofo di meki.
7 Den sma di na boekoestudieleider ben gi na wroko foe gi sma di de drape jepi, moesoe wani jepi nanga prisiri èn den moesoe de reidelek ini a froewakti foe den. Na ondrofeni sori taki den sma di abi wan positief nanga balansi loekoe tapoe na velddienst èn di abi wan praktis fasi foe bigin takimakandra nanga sma, na den moro boen sma foe jepi tra sma (km 8/79 blz. 3; 9/79 blz. 7, Bakratongo). Te sma e go na fesi, dan alaten wi moesoe foe prèise den nanga wortoe. Dan njoen marki kan poti. — Teki gersi Lukas 19:17-19.
8 Wi wani jepi makandra foe kisi boen marki ini a preiki foe a boen njoensoe èn a meki foe disipel! Den situwâsi di e kon takroe moro nanga moro e poti krakti tapoe a tranga fanowdoe foe a wroko disi. Libi abi foe doe nanga a tori disi, èn Jehovah e meki a tjari kon a wan disi foe sma go moro esi (Jes. 60:22). Te wi hori na prakseri sortoe diniwroko den gi wi, dan wi sa wroko krosibei makandra nanga wi gemeente-boekoestudiegroepoe foe kan doe a wroko di wi kisi dorodoro, aladi wi e froemane makandra èn e gi deki-ati na makandra. — Rom. 12:6-8; 2 Tim. 4:1, 2, 5.