’Gi Ala Yu Ten’ fu Du Yu Diniwroko
1 Te wi e leisi taki na apostel Paulus ben meki tenti di a ben de na Korente, dan kande wi e denki taki a no ben abi furu ten fu preiki. Ma toku, Tori fu den Apostel 18:5 e taki: „Paulus ben bigin fu gi ala en ten fu preiki a wortu, fu di a ben gi den Dyu kotoigi fu sori den taki Yesus na a Krestes.” Fu san ede Paulus ben gi so furu ten na a preikiwroko? Srefi awansi furu sma na Korente ben kon tron bribiman kaba, toku Masra ben taigi Paulus taki den ben o abi fu meki furu disipel ete na ini a foto dati (Tori. 18:8-11). Wi abi a srefi sortu reide fu gi ala wi ten na ini a diniwroko fu wi? Iya. Wi kan feni furu sma ete di wi musu leri a waarheid.
2 Du Moro Furu ini a Diniwroko na ini April: Kande wan fu den sani di yu wani tan du ibri mun na fu preiki a bun nyunsu. Ma wan tu mun de spesrutu, di e gi wi moro okasi fu „gi ala wi ten” fu du a wroko disi. Wan fu den na a mun april, a heimarki fu a pisi ten fu a Memrefesa. A situwâsi fu yu ben gi yu pasi fu teki a yepi-pionierwroko noso fu du moro muiti na ini a diniwroko? Furu preikiman di e du dati kisi bun furu blesi (2 Kor. 9:6). Efu yu e du ala san yu man, dan hori na prakseri taki Yehovah breiti nanga a diniwroko di yu e du nanga yu heri sili (Luk. 21:2-4). Awinsi fa a situwâsi fu yu de, meki a de so taki yu abi a marki fu „gi ala yu ten” fu du a diniwroko fu yu ini april. No frigiti fu gi yu preikiwroko raportu na a kaba fu a mun, so taki den kan teri a muiti di yu ben du makandra nanga di fu trawan fu Yehovah en pipel.
3 Go na den Nyunwan Di Ben Kon na a Memrefesa: A yari di pasa, 6051 sma na Sranan ben kon na a Memrefesa. Wi no sabi ete omeni sma ben kon a yari disi. Ma den sani di wi kisi fu yere e sori taki wi musu du wan tumusi bigi kotiwroko ete (Mat. 9:37, 38). Fu dati ede, sreka sani so esi leki a kan fu go na den wan di ben kon na a Memrefesa so taki yu kan yepi den na yeye fasi. Te wi e draidrai fu go na den sma disi, dan dati o gi ’a godelowsu sma na okasi fu hari puru san ben sai na ini den ati’ (Mat. 13:19). Te yu e go wantewante na den sma dan dati e sori taki yu e ’gi yu ten’ trutru fu du a diniwroko.
4 Tan Yepi den Wan Di No E Preiki Moro: Na ini februari den gemeente ben bigin du spesrutu muiti fu yepi den wan di no e preiki moro. Moi langa na fesi bifo a kaba fu april, den owruman musu seti sani fu go luku den sma di den no fisiti ete. Den owruman o meki spesrutu muiti fu luku san na a trutru problema fu a sma èn san na a moro bunfasi fu yepi en fu dini Yehovah fayafaya baka. A yepi disi di gi na wan lobi-ati fasi e sori taki den owruman e teki a frantwortu di den abi leki skapuman fu wei „na ipi fu Gado” leki wan seryusu sani (1 Petr. 5:2; Tori. 20:28). Na uitgave fu De Wachttoren fu 15 september 1993, bladzijde 22, 23 e gi moi rai di owruman kan gebroiki te den e si taki na sma di no e preiki moro abi wan fu den feifi spesrutu problema. A ben o moi, efu son wan fu den ben kan bigin baka nanga a preikiwroko ini april.
5 Yepi Moro Sma fu Kon Tron Preikiman Di No Dopu Ete: Den pikin fu yu doro den markitkiki kaba fu de wan nyun preikiman fu a bun nyunsu? Fa a de nanga den tra sma di e studeri Bijbel nanga yu? Efu den owruman e feni dati bun, dan april no ben sa de wan tumusi moi ten gi den fu bigin nanga a preikiwroko? Efu wan sma e meki go na fesi, èn efu a studeri a San Gado e aksi-brochure nanga a Sabi-buku kaba, dan yu kan go moro fara nanga a bijbelstudie fu di yu e studeri wan di fu tu buku nanga en. A buku disi kan de a Gods woord-buku, a Ware vrede-buku noso a Verenigd in de aanbidding-buku. A sani di yu wani doro na taki a studenti e frustan a waarheid moro bun, taki a kan doro den markitiki fu de wan preikiman di no dopu ete, èn taki a kan kon tron wan dopu Kotoigi di gi ensrefi abra na Yehovah.—Ef 3:17-19; 1 Tim. 1:12; 1 Petr. 3:21.
6 Te yu e tan sori taki yu e broko yu ede trutru nanga den bijbelstudenti fu yu, dan te fu kaba dati kan yepi den fu meki a waarheid kon tron wan pisi fu den libi. Wan Kotoigi ben miti wan owru trowpaar di ben wani studeri Bijbel trutru. Ma dri wiki baka makandra a trowpaar ben skoifi a studie poti na wan tra dei. Te fu kaba a studie ben bigin. Dan a trowpaar no ben studeri ibri wiki. Ma te fu kaba, na uma ben go na fesi te leki a teki dopu. „Baka di a dopu”, a brada e taki, „en ai ben furu nanga watra soso fu koloku ede, èn dati ben meki taki den ai fu mi nanga mi wefi ben kon furu tu nanga watra-ai fu koloku ede.” Iya, te sma e „gi den ten” na a bun nyunsu dan dati e meki sma koloku trutru!
7 Bijbel profeititori nanga den sani di e pasa na grontapu e sori taki wi e libi langa ten kaba na ini a ten fu a kaba. Now na a ten taki ala sma fu Gado pipel musu ’gi ala den ten’ fu meki tra sma kon sabi a bun nyunsu. Na apostel Paulus ben gi sma a dyaranti taki, so wan wroko trutru „no de fu soso ini a tori fu Masra.”—1 Kor. 15:58.