Sigcine Kahle
Uyatisebentisa Yini Letincwajana?
LiBhayibheli—Ngumuphi Umlayeto Leliwucuketse?
Letincwajana tentelwe kukhanga labo labanelwati loluncane ngeliBhayibheli, ikakhulukati labo labasetinkholweni letingesito tebuKhristu
Indlela yekuyihambisa: “Singatsandza kuva umbono wakho mayelana nanaku lokushiwo ngulomBhalo (nobe lokushiwo ngulencwadzi lengcwele). [Fundza Tihlabelelo 37:11, leticashunwe encenyeni 11.] Ucabanga kutsi lomhlaba utawuba njani nasesigcwalisekile lesiphrofetho? [Lindzela imphendvulo.] Lesi sibonelo selitsemba kanye nendvudvuto bantfu bato tonkhe tive kanye netinkholo labangayitfola eBhayibhelini.” Fundza sigaba lesisekucaleni kwelikhasi 3, bese uyayihambisa.
Ungetama nalena: Nangabe uchubela umuntfu losenkholweni lengesiyo yebuKhristu sifundvo ngencwadzi letsi Lokufundziswa LiBhayibheli, sebentisa imizuzu lembalwa ekucaleni nobe ekuphetseni kwesifundvo ngasinye ucoce naye ngencenye yinye yalencwajana kute umsite atfole umcondvo walokuseBhayibhelini.
Indlela Leya Ekuphileni Lokuphakadze—Sewuyitfolile Yini?
Lencwajana yentelwe kusita bantfu babone kutsi akusito tonkhe tinkholo letemukelekako kuNkulunkulu
Indlela yekuyihambisa: Kunetinkholo letinyenti letehlukehlukene. Nkulunkulu utemukela tonkhe yini? Fundza Matewu 7:13, 14. Jesu longumphrofethi waNkulunkulu, watsi kunetindlela letimbili kuphela, lenye iholela ekuphileni lokuphakadze kantsi lenye iholela ekubhujisweni. Lencwajana itakusita kutsi utfole indlela leholela ekuphileni lokuphakadze.
Ungetama nalena: Hlela kubuyela kute ufundze lencwajana nemnikati welikhaya, nifundze nemibhalo lekhonjiwe eBhayibhelini. Nangabe ubona kufaneleka, yetfula incwadzi letsi Lokufundziswa LiBhayibheli.
Ungaba Ngumngani WaNkulunkulu!
Lencwajana yentelwe kukhanga labo labangakafundzi lokuyaphi nobe labangakhoni kufundza kahle
Indlela yekuyihambisa: “Ucabanga kutsi kungenteka yini kutsi tsine sibe bangani baNkulunkulu? [Lindzela imphendvulo bese ufundza Jakobe 2:23.] Lencwajana yentelwe kutsi isisite sibe bangani baNkulunkulu njengobe na-Abrahama abengumngani wakhe.”
Ungetama nalena: Ekuhambeleni kwekucala nome nawubuyela kumuntfu lococe naye, mkhombise indlela yekuchuba sifundvo seliBhayibheli ngekufundza naye sonkhe sifundvo 1 nome incenye yaso.
Imimoya Yabafileyo—Ingakusiza Noma Ingakulimaza? Ingabe Ikhona Ngempela?
Lencwajana yentelwe kuniketa bufakazi bekutsi labaphilako akukafaneli babesabe labafile nebekutsi labafile angeke basisite
Indlela yekuyihambisa: Bantfu labanyenti bayabesaba labafile futsi bakholelwa kutsi kukhona labangabentela kona. Lifundzisani liBhayibheli? Fundza Umshumayeli 9:5, 6, 10. Ngekwalombhalo, labafile bangakhombisa yini kutsi bayabatsandza nome bayabatondza labaphilako? Lencwajana inetimphendvulo leticacile naletenetisako temibuto bantfu labanyenti labanayo mayelana nesimo salabafile.
Ungetama nalena: Nangabe yemukelwa lencwajana, hlela kubuyela kute nicoce ngalendzaba uphindze uphendvule nemibuto lokungenteka umnikati welikhaya unayo. Yetfula incwadzi letsi Lokufundziswa LiBhayibheli ngekushesha.
The Guidance of God—Our Way to Paradise
Lencwajana yentelwe kukhanga emaSulumane lahlala endzaweni langase akhululeke kuyo kutadisha liBhayibheli
Indlela yekuyihambisa: “Bantfu labanyenti batsi emaSulumane akholelwa kuNkulunkulu munye weliciniso nakubo bonkhe baphrofethi. Kuliciniso yini loko? [Lindzela imphendvulo.] Ngitsandza kucoca nawe ngesiphrofetho lesikhuluma ngekuguculwa kwemhlaba ube lipharadisi. Ngicela kukufundzela loko lokwabhalwa ngumphrofethi ngaso. [Fundza Isaya 11:6-9.] Bantfu labanyenti bayatibuta kutsi Nkulunkulu utawutiletsa njani letingucuko emhlabeni. Lencwajana ikhombisa loko lokushiwo baphrofethi ngalendzaba.”
Ungetama nalena: Nangabe umnikati welikhaya ayemukela lencwajana, ungatsi: “Lencwadzi yaNkulunkulu itsi ekucaleni bantfu bebahlala epharadisi. Nangibuya ngingatsandza kuphendvula umbuto lotsi, ‘Bantfu basishiya njani sicondziso saNkulunkulu base balahlekelwa kuphila epharadisi?’” Nawubuyela, cocani ngekwatiswa lokucala ekhasini 6.
Real Faith—Your Key to a Happy Life
Lencwajana yentelwe kukhanga emaSulumane lahlala endzaweni langase akhululeke kuyo kutadisha liBhayibheli
Indlela yekuyihambisa: Mkhombise sitfombe lesisekhasini 16-17 bese utsi: “Lesikubona lapha kwehlukile kuloko lesikubonako emhlabeni lamuhla. Ucabanga kutsi kuyoke kwenteke yini ngalelinye lilanga kutsi umhlaba ubenjena? [Lindzela imphendvulo.] Asewunake naku lokwetsenjiswa ngulencwadzi yaNkulunkulu. [Fundza munye umbhalo lokhonjiwe eBhayibheli lakho.] Lencwajana isisita kutsi sikukholelwe kutsi letetsembiso titawugcwaliseka.”
Ungetama nalena: Nawucedza kucoca nemnikati welikhaya kwekucala, mcele akhetse umbuto munye ekhasini lelingemuva lalencwajana. Hlela kubuyela kute nitfole imphendvulo yawo kuyo.
The Pathway to Peace and Happiness
Lencwajana yentelwe kukhanga emaBuddha
Indlela yekuyihambisela umBuddha losakhulile: “Mhlawumbe tsine sobabili sikhatsateke ngentfo lefananako, lokukwenyuka kwelizinga lemibono lekhutsata kutiphatsa kabi kanye nemiphumela yayo kubantfwana betfu. Ucabanga kutsi kungani lizinga lekutiphatsa kabi kwebantfu labasha lenyuke kangaka? [Lindzela imphendvulo.] Bewati yini kutsi loko kwashiwo encwadzini leyacala kubhalwa esikhatsini lesidze ngembikwekutsi kube khona inkholo yebuKhristu, yebuHindu kanye neyebuSulumane? [Fundza 2 Thimothi 3:1-3.] Asewunake nekutsi letimo tiyachubeka ngisho nobe bantfu bafundziswa kakhulu ngalendzaba. [Fundza livesi 7.] Lokucuketfwe ngulencwajana kungisitile kutsi ngiwacondze emaciniso bantfu labanyenti labangakaze bawafundze. Ungatsandza yini kuyifundza?”
Ungetama nalena: Nawubuyela kumuntfu lococe naye, ngemuva kwekwakha sifiso sakhe sekufundza liBhayibheli, mkhombise imibuto lesekhasini lelingemuva kanye nesiceshana lesinencwadzi letsi Lokufundziswa LiBhayibheli. Mchazele kutsi uyiphetse lencwadzi kute ayibone nakangatsandza. Mkhombise luhla lwalokungekhatsi kulencwadzi bese nifundza sigaba sinye nome timbili esehlukweni lasikhetsile.
Why Should We Worship God in Love and Truth?
Lencwajana yentelwe kukhanga ema-Hindu
Indlela yekuyihambisa: “Umthandazo wemaNdiya lowatiwa kakhulu ufaka ekhatsi sicelo sekutfola liciniso nekukhanya. Ucabanga kutsi kubalulekile yini kukhonta Nkulunkulu ngobe simtsandza futsi simkhonte ngeliciniso? [Lindzela imphendvulo.] Asewunake loko Jesu lakusho ngalendzaba.” Fundza Johane 4:24 nesigaba 4 ekhasini 3 bese uyayihambisa lencwajana.
Ungetama nalena: Nangabe umnikati welikhaya ayemukela lencwajana, ungatsi: “Letinye tihlakaniphi letingemaHindu titsi liciniso lifihlwe etinhlitiyweni tetfu. Letinye titsi liciniso litfolakala emibhalweni lengcwele. Nangibuya ngingatsandza kutsi sicoce ngembuto losekugcineni kwesigaba 3 ekhasini 4 lotsi: ‘Singalitfolaphi liciniso lelivela kuNkulunkulu?’”
Lasting Peace and Happiness—How to Find Them
Lencwajana yentelwe kukhanga emaShayina
Indlela yekuyihambisa: “Lamuhla kuphila kunetinsayeya letinyenti letingasenta singajabuli. Yini lekwenta kutsi ujabule ngisho unetinkinga? [Lindzela imphendvulo.] Bantfu labanyenti batfole injabulo nabasebentisa seluleko seliBhayibheli. [Fundza Tihlabelelo 119:1, 2.] Labanye batsi liBhayibheli yincwadzi yebelungu. Kodvwa-ke asewunake naku. [Cocani ngesigaba 16 lesisekhasini 17.] Lencwajana ikhuluma ngendlela yekutfola kuthula kanye nenjabulo lengapheli.”
Ungetama nalena: Nangabe umnikati welikhaya ayemukela lencwajana, fundzani imisho yekucala lemitsatfu esigabeni 18 ekhasini 17, bese utsi: “Nangibuya ngingatsandza kukukhombisa loko lesingakulindzela lokushiwo liBhayibheli.” Nawubuyela, cocani ngeliphuzu linye kulawa lasesigabeni 6 ekhasini 30.