Ditshupiso tsa Bukana ya Seboka sa Bophelo le Tshebeletso ya Rona
6-12 NOVEMBER
MATLOTLO A TSWANG BIBELENG | AMOSE 1-9
“Batlang Jehova, Mme le Nne le Phele”
(Amose 5:4) “Etswe sena ke seo Jehova a se boleletseng ba ntlo ya Iseraele, ‘Mpatleng, mme le nne le phele.
(Amose 5:6 Batlang Jehova, mme le nne le phele, e le hore a se ke a sebetsa jwalo ka mollo, Lona ba ntlo ya Josefa, mme o se ke wa tjhesa, mme Bethele e tle e se ke ya hloka le ya mong ya e timang.
w04 11/15 24 ¶20
Batlang Jehova, ya Hlahlobang Dipelo
20 E tlameha ebe ho ne ho se bonolo ho mang kapa mang ya neng a phela Iseraele mehleng eo ho dula a tshepahala ho Jehova. Kajeno, Bakreste ba batjha le ba hodileng ba tseba hantle hore ha ho bonolo ho ba mokgelo. Empa ho rata Modimo le ho batla ho mo kgahlisa ho ile ha fela ha susumelletsa Baiseraele ba bang ho phelela borapedi ba nnete. Jehova o ile a ba mema ka mofuthu jwalo ka ha ho tlalehilwe ho Amose 5:4, e reng: “Mpatleng, mme le nne le phele.” Ka ho tshwanang kajeno, Molimo o bontsha mohau ho ba bakang ba bile ba mo batla ka hore ba rue tsebo e nepahetseng ya Lentswe la hae mme ba etse thato ya hae. Ho phehella tsela ena ha ho bonolo, empa ho isa bophelong bo sa feleng.—Johanne 17:3.
(Amose 5:14, 15) Batlang se molemo, eseng se sebe, e le hore le nne le phele; le hore ka tsela ena Jehova Modimo wa mabotho a ka ba le lona, feela jwalo ka ha le boletse. 15 Hloyang se sebe, le rate se molemo, mme le fe toka sebaka hekeng. Mohlomong Jehova Modimo wa mabotho o tla bontsha mohau ho ba setseng ba Josefa.’
jd 90-91 ¶16-17
Sebeletsa Jehova ho ya ka Melao ya Hae e Phahameng
16 Motho wa pele, Adama, o ile a etsa bowatla ha a ne a kgetha hore na ke melao ya mang e molemo ka ho fetisisa ya se setle le se sebe. Na rona re tla kgetha ka bohlale? Amose o ile a re kgothalletsa hore re nke taba ena ka botebo, a re: “Hloyang se sebe, le rate se molemo.” (Amose 5:15) William Rainey Harper ya seng a hlokahetse, eo e neng e le moprofesa wa dipuo le dingolwa tsa Basema Univesithing ya Chicago, o ile a re ka temana ena: “Kelellong ya [Amose], molao o laolang hore na se setle kapa se sebe ke sefe ke o dumellanang le thato ya Yahweh.” Ena ke yona taba ya sehlooho eo re ithutang yona dibukeng tsa baprofeta ba 12. Na re ikemiseditse ho amohela melao ya Jehova mabapi le hore na se setle le se sebe ke sefe? Re senoletswe melao eo e phahameng ka Bibeleng mme e hlaloswa ke Bakreste ba hodileng moyeng, bao e leng kgale ba di bona, ba etsang sehlopha sa “lekgoba le tshepahalang le le masene.”—Matheu 24:45-47.
17 Ho hloya bobe ho re thusa ho qoba ho etsa dintho tse halefisang Modimo. Ka mohlala, monna a ka nna a tseba kotsi ya ditshwantsho tse manyala tse hlephisang boitshwaro Inthaneteng mme a leka ho qoba ho di sheba. Le ha ho le jwalo, ‘motho eo a leng yena ka hare’ o ikutlwa jwang ka ditshwantsho tse manyala tse hlahang Inthaneteng? (Baefese 3:16) Haeba a sebedisa kgothatso ya Modimo e ho Amose 5:15, o tla fumana ho le bonolo hore a hlaolele ho hloya se sebe. Ka hoo, a ka hlola ntwa ya hae ya moya.
Batlisisa Matlotlo a Patilweng
(Amose 2:12) ‘Empa la nna la fa Banazari veine hore ba nwe, mme la laela baprofeta, la re: “Le se ke la profeta.”
w07 10/1 14 ¶8
Dintlhakgolo Tsa Buka ya Joele le Amose
2:12. Ha re ya lokela ho nyahamisa bopula madiboho ba sebetsang ka thata, balebedi ba tsamayang, baromuwa kapa ditho tsa lelapa la Bethele ka ho ba kgothalletsa hore ba tlohele tshebeletso ya bona ya nako e tletseng ba ilo phela bophelo boo ho thweng ke bo tlwaelehileng. Ho ena le hoo, re lokela ho ba kgothalletsa hore ba tswele pele ka mosebetsi oo wa bona o motle.
(Amose 8:1, 2) Sena ke seo Mmusi Morena Jehova a ileng a etsa hore ke se bone, mme, bonang! ho ne ho ena le baskete ya ditholwana tsa lehlabula. 2 Jwale a re: “O bona eng, Amose?” Ka hoo ka re: “Baskete ya ditholwana tsa lehlabula.” Jehova a tswela pele a re ho nna: “Bofelo bo tlile ho batho ba ka ba Iseraele. Nke ke ka hlola ke ba lokolla molatong.
w07 10/1 14 ¶6
Dintlhakgolo Tsa Buka ya Joele le Amose
8:1, 2—“Baskete ya ditholwana tsa lehlabula” e ne e tshwantshetsa eng? E ne e tshwantshetsa hore letsatsi la Jehova le haufi. Ditholwana tsa lehlabula di kgolwa ho ya qetellong ya nako ya kotulo, e leng ho elella qetellong ya selemo sa temo. Ha Jehova a ne a etsa hore Amose a bone “baskete ya ditholwana tsa lehlabula,” sena se ne se bolela hore bofelo bo ne bo le haufi Iseraele. Ka lebaka leo, Jehova o ile a bolella Amose: “Bofelo bo tlile ho batho ba ka ba Iseraele. Nke ke ka hlola ke ba lokolla molatong.”
Mmalo wa Bibele
(Amose 4:1-13) “Utlwang lentswe lena, lona dikgomo tsa Bashane, tse thabeng ya Samaria, tse etsetsang ba tlase bolotsana, tse hatellang mafutsana, tse reng ho beng ba tsona, ‘Tlisang, mme a re nweng!’ 2 Mmusi Morena Jehova o hlapantse ka kgalalelo ya hae, ‘ “Bonang! Matsatsi aa le tlela, mme ka sebele o tla le phahamisa ka dihakisi tsa nama mme karolo ya lona ya ho qetela e be ka dilope. 3 Le tla tswa ka makgalo, e mong le e mong a lebile pele ka ho toba; mme ka sebele le tla lahlelwa Harmone,” ho bolela Jehova.’ 4 “ ‘Tloong Bethele mme le etse tlolo. Le etse tlolo kgafetsa Gilgale, mme le tlise mahlabelo a lona hoseng; ka letsatsi la boraro, le tlise dikarolo tsa lona tsa leshome. 5 Ho se lomositsweng etsang hore mosi wa sehlabelo sa diteboho o kubelle, mme le phatlalatse dinyehelo tsa boithaopo; di phatlalatseng, etswe ke tsela eo le ratileng ka yona, Lona bara ba Iseraele,’ ho bolela Mmusi Morena Jehova. 6 “ ‘Le nna ke ile ka le fa bohlweki ba meno metseng yohle ya lona le ho hloka bohobe dibakeng tsohle tsa lona; empa ha le a ka la kgutlela ho nna,’ ho bolela Jehova. 7 “ ‘Ha e le nna, ke ile ka boela ka le hanela ka pula ya ditlwebelele ha ho sa ntse ho e na le dikgwedi tse tharo pele ho kotulo; mme ka nesa pula motseng o mong, empa motseng o mong ke ne ke sa nese pula. Ho ne ho e ba le tshimo e neng e nelwa ke pula, empa tshimo eo ke neng ke etsa hore e se ke ya nelwa ke pula e ne e omella. 8 Metse e mmedi kapa e meraro e ne e thekesella motseng o le mong ho ya nwa metsi, mme e ne e sa kgore; empa ha le a ka la kgutlela ho nna,’ ho bolela Jehova. 9 “ ‘Ka le otla ka komello le phori. Dirapa tsa lona le dirapa tsa lona tsa morara tsa ata, empa difate tsa lona tsa feiga le difate tsa lona tsa mohlware di ne di jewa ke popane; empa le ha ho le jwalo ha le a ka la kgutlela ho nna,’ ho bolela Jehova. 10 “ ‘Ka romela hara lona lefu la sewa le sebopehong sa la Egepeta. Ka bolaya bahlankana ba lona ka sabole, hammoho le ho hapa dipere tsa lona. Ka nna ka etsa hore monko o mobe wa diahelo tsa lona o nyolohele esita le dinkong tsa lona; empa ha le a ka la kgutlela ho nna,’ ho bolela Jehova. 11 “ ‘Ka baka ho dihuwa hara lona, jwalo ka ho dihuwa ha Sodoma le Gomora ke Modimo. La tshwana le lefatsa le hlwibitsweng mollong; empa ha le a ka la kgutlela ho nna,’ ho bolela Jehova. 12 “Ka hona sena ke seo ke tla se etsa ho wena, Iseraele. Ka lebaka la hore ke tla etsa ntho ena ho wena, o itokisetse ho kopana le Modimo wa hao, Wena Iseraele. 13 Etswe, bona! Moetsi wa dithaba le mmopi wa moya, le Ya bolellang motho wa lefatshe monahano wa hae wa kelello, Ya etsang hore mafube a fifale, le Ya hatakelang hodima dibaka tse phahameng tsa lefatshe, lebitso la hae ke Jehova Modimo wa mabotho.”
13-19 NOVEMBER
MATLOTLO A TSWANG BIBELENG | OBADIA 1–JONASE 4
“Ithute ho Tswa Diphosong Tsa Hao”
(Jonase 3:1-3) Jwale lentswe la Jehova la hlaha ho Jonase ka lekgetlo la bobedi, la re: 2 “Ema, o ye Ninive motseng o moholo, mme o phatlalatse ho yona phatlalatso eo ke o bolellang yona.” 3 Ya ba Jonase o a ema mme o ya Ninive tumellanong le lentswe la Jehova. Jwale ho Modimo Ninive e ne e le motse o moholo, o nang le sebaka se ka tsamauwang matsatsi a mararo.
ia 114 ¶22-23
Ithute ho Tswa Diphosong Tsa Hao
22 Jonase o ile a etsa jwang? Na o ile a ithuta ho bontsha kananelo ka hore a mamele Jehova? Hantle haholo. Ka mora matsatsi a mararo le masiu a mararo, tlhapi eo e ile ya tlisa Jonase lebopong moo “e ileng ya hlatsetsa Jonase naheng e omileng.” (Jon. 2:10) Nahana feela—ka mora dintho tsena tsohle, ho ne ho sa hlokahale hore Jonase a sese ho ya lebopong! Ke nnete hore o ile a lokela ho ipatlela tsela ya ho tloha lebopong leo, ho sa tsotellehe hore na le ne le le hokae. Le ha ho le jwalo, nakwana hamorao, ho ile ha fihla nako ya hore a bontshe hore na o na le kananelo kapa tjhe. Jonase 3:1, 2, e re: “Jwale lentswe la Jehova la hlaha ho Jonase ka lekgetlo la bobedi, la re: ‘Ema, o ye Ninive motseng o moholo, mme o phatlalatse ho yona phatlalatso eo ke o bolellang yona.’ ” Jonase o ne a tla etsang?
23 Jonase ha aa ka a tsilatsila. Tlaleho e baleha tjena: “Ya ba Jonase o a ema mme o ya Ninive tumellanong le lentswe la Jehova.” (Jonase 3:3) Ka sebele, o ile a mamela. Ho hlakile hore o ile a ithuta diphosong tsa hae. Le ntlheng ena, re lokela ho etsisa tumelo ya Jonase. Kaofela ha rona re etsa dibe; ebile re etsa diphoso. (Bar. 3:23) Empa na re a baka, kapa na re ithuta diphosong tseo re di entseng ebe re mamela Modimo mme re a mo sebeletsa?
Batlisisa Matlotlo a Patilweng
(Obadia 10) Ka lebaka la pefo ho moreno Jakobo, dihlong di tla o kwahela, mme o tla lokela ho fediswa ho isa nakong e sa lekanyetswang.
w07 11/1 13 ¶5
Dintlhakgolo Tsa Buka ya Obadia, Jonase le Mikea
10—Edomo e ile ya “fediswa ho isa nakong e sa lekanyetswang” jwang? Jwalo ka ha ho boletswe esale pele, setjhaba sa Edomo, se neng se e na le mmuso le batho karolong e itseng ya lefatshe, se ile sa nyamela ka ho feletseng. Morena Nabonidase wa Babylona o ile a hapa Edomo hoo e ka bang bohareng ba lekgolo la botshelela la dilemo B.C.E. Hoo e ka bang lekgolong la bone la dilemo B.C.E., naha ya Edomo e ile ya dulwa ke Manatabaea, mme Baedomo ba ile ba tlameha ho ya dula karolong e ka borwa ya Judea, e leng sebaka se haufi le Negebe seo hamorao se ileng sa tsejwa e le Idumea. Ka mora hore Baroma ba timetse Jerusalema ka 70 C.E., Baedomo ha baa ka ba hlola ba e ba teng.
(Obadia 12) Ha o a tshwanela ho shebella pono letsatsing la moreno, letsatsing la tsietsi ya hae; ha o a tshwanela ho thabela bara ba Juda letsatsing la ho timela ha bona; mme ha o a tshwanela ho ba le molomo o moholo letsatsing la mahlomola a bona.
jd 112 ¶4-5
Ho Tshwara ba Bang ka Tsela eo Modimo a Batlang ka Yona
4 Ho na le seo o ka ithutang sona mantsweng a Modimo ha a ahlola Edomo, e leng naha e neng e le haufi le Iseraele, a reng: “Ha wa tshwanela ho shebella pono letsatsing la moreno, letsatsing la tsietsi ya hae; ha wa tshwanela ho thabela bara ba Juda letsatsing la ho timela ha bona.” (Obadia 12) Mohlomong Batyre e ne e le “barababo” Baiseraele ditabeng tsa kgwebo, empa Baedomo e ne e hlile e le “barababo” Baiseraele hantle ka hobane e ne e le ditloholo tsa Esau, eo e neng e le lefahla le Jakobo. Esita le Jehova o ile a re Baedomo ke “barababo” Baiseraele. (Deuteronoma 2:1-4) Kahoo, ruri Baedomo ba ile ba bontsha lehloyo ka ho thaba ha Bababylona ba futuhela Bajuda.—Ezekiele 25:12-14.
5 Ho hlakile hore Modimo ha aa ka a rata kamoo Baedomo ba ileng ba tshwara barababo bona ba Bajuda kateng. Le ha ho le jwalo, re ka botsa, ‘Modimo o ne a tla ikutlwa jwang ha a hlahloba tsela eo ke tshwarang barabeso ka yona?’ Ntlha e nngwe eo re lokelang ho e hlokomela ke hore na re ikutlwa jwang kapa hore na re tshwara morabo rona jwang ha ditaba di sa tsamaye hantle. Ka mohlala, ha re re Mokreste o ile a o kgopisa kapa a qwaketsana le e mong wa beng ka wena. Haeba o e na le “sesosa sa pelaelo,” na o tla mo jara ka pelo o se ke wa lebala ka bothata boo, kapa o se ke wa leka ho bo rarolla? (Bakolose 3:13; Joshua 22:9-30; Matheu 5:23, 24) Ho etsa jwalo ho ka ama tsela eo o tshwarang moreno ka yona, o ka nna wa mo hlokela botswalle, wa mo qoba kapa wa mo bua hampe. Ha re atolosa mohlala ona, ha re re hamorao mora enwa wabo rona o etsa phoso, mohlomong ho hlokahala hore a eletswe kapa a kgalemelwe ke baholo ba phutheho. (Bagalata 6:1) Na o tla bontsha moya wa Baedomo mme o nyakalle ha e le moo moreno a le bothateng? Modimo o ne a tla rata hore o etseng?
Mmalo wa Bibele
(Jonase 3:1-10) Jwale lentswe la Jehova la hlaha ho Jonase ka lekgetlo la bobedi, la re: 2 “Ema, o ye Ninive motseng o moholo, mme o phatlalatse ho yona phatlalatso eo ke e bolellang yona.” 3 Yaba Jonase wa ema mme o ya Ninive tumellanong le lentswe la Jehova. Jwale ho Modimo Ninive e ne e le motse o moholo, o nang le sebaka se ka tsamauwang matsatsi a mararo. 4 Qetellong Jonase a qala ho kena motseng sebaka se ka tsamauwang letsatsi le le leng, mme a nna a phatlalatsa a re: “Ho setse matsatsi a mashome a mane feela, mme Ninive e tla dihuwa.” 5 Batho ba Ninive ba qala ho beha tumelo ho Modimo, yaba ba phatlalatsa hore ho itingwe dijo mme ho aparwe lesela la mokotla, ho tloha ho e moholo ho bona esita le ho ya ho e monyenyane ho bona. 6 Ha lentswe le fihla ho morena wa Ninive, jwale a ema teroneng ya hae mme a hlobola seaparo sa hae se kgethehileng yaba o ikwahela ka lesela la mokotla mme o dula fatshe moloreng. 7 Ho feta moo, a etsa hore ho etswe mohoo, mme a etsa hore ho bolelwe Ninive, ho ya ka molaotaelo wa morena le ba baholo ba hae, o reng: “Ha ho motho le phoofolo e ruuwang, ha ho mohlape wa diphoofolo tse kgolo le mohlape wa dikgutshwane, ya lokelang ho latswa letho. Ha ho le ya mong ya lokelang ho ja dijo. Esita le metsi ha ba a lokela ho a nwa. 8 Ba ke ba ikwahele ka lesela la mokotla, motho le phoofolo e ruuwang; ba ke ba hweletse ho Modimo ka matla mme ba kgutle, e mong le e mong tseleng ya hae e mpe le pefong e neng e le matsohong a bona. 9 Ke mang ya tsebang hore na ebe Modimo wa nnete a ka kgutla mme a ikutlwe a swabile yaba o kgutla bohaleng ba hae bo tukang, e le hore re se ke ra timela?” 10 Modimo wa nnete a bona mesebetsi ya bona, hore ba ne ba kgutlile ditseleng tsa bona tse mpe; kahoo Modimo wa nnete a ikutlwa a swabile ka lebaka la tlokotsi eo a neng a buile hore o tla ba bakela yona; mme ha aa ka a e baka.
20-26 NOVEMBER
MATLOTLO A TSWANG BIBELENG | MIKEA 1-7
“Jehova o Batla Eng ho Rona?”
(Mikea 6:6, 7) Ke tla kgahlanyetsa Jehova ka eng? Ke tla inamela Modimo ya leng phahameng ka eng? Na ke tla mo kgahlanyetsa ka dinyehelo tse feletseng tsa secheso, ka manamane a nang le selemo? 7 Na Jehova o tla kgahlwa ke dikete tsa dipheleu, ke mashome a dikete a melapo e phoroselang ya oli? Na ke tla fana ka mora wa ka wa letsibolo bakeng sa bofetohedi ba ka, ditholwana tsa mpa ya ka bakeng sa sebe sa moya wa ka?
w08 5/15 6 ¶20
Re Lokela ho Tshwara Batho ba Bang Jwang?
20 Modimo o nka kamano ya rona le barababo rona e le karolo ya bohlokwa ya borapedi ba nnete. Mahlabelo a diphoofolo a ne a se na thuso ho Jehova haeba ba a nyehelang ba ne ba sa tshware batho ba bang hantle. (Mik. 6:6-8) Kahoo, Jesu o ile a kgothalletsa barutuwa ba hae hore ba ‘lokise ditaba kapele.’ (Mat. 5:25) Pauluse o ile a ngola taba e tshwanang le ena: “Halefang, le ha ho le jwalo le se ke la etsa sebe; letsatsi le se ke la le dikella le halefile, hape le se ke la dumella Diabolose sebaka.” (Baef. 4:26, 27) Haeba re e na le lebaka le utlwahalang la ho halefa, re lokela ho potlakela ho lokisa ditaba e le hore re se ke ra dula re halefile yaba re dumella Diabolose sebaka sa hore a re sebedise.—Luka 17:3, 4.
(Mikea 6:8) Wena motho wa lefatshe, o o boleletse se molemo. Jehova o batla eng ho wena haese hore o sebedise toka o rate mosa mme o inyenyefatse ha o tsamaya le Modimo wa hao?
w12 11/1 22 ¶4-7
“Jehova o Batla Eng ho Wena?”
“O sebedise toka.” Ho latela buka e nngwe, lentswe la Seheberu le bolelang “toka,” “le akarelletsa ho sebedisana le batho ba bang ka tsela e lokileng le e hlokang leeme.” Modimo o batla hore re tshware batho ba bang ka tsela e lokileng le e hlokang leeme ho latela se ka melaong ya hae. Re bontsha toka ka hore re hloke leeme, re be ba lokileng mme re tshepahale ha re sebedisana le batho ba bang. (Levitike 19:15; Esaia 1:17; Baheberu 13:18) Ha re tshwara batho ba bang ka toka, le bona ba ka nna ba susumelletseha hore ba re tshware ka toka.—Matheu 7:12.
“O rate mosa.” Modimo ha a batle hore re bontshe mosa feela empa o batla hore re o rate. Lentswe la Seheberu le fetoletsweng e le “mosa” (tjheʹsedh) le ka boela la fetolelwa e le “mosa o lerato” kapa “ho bontsha lerato ka botshepehi.” Setsebi se seng sa Bibele se re: “Lentswe [tjheʹsedh] le ke ke la fetolelwa e le feela lerato, mohau le mosa ka ha mantswe ana aa haella, empa le bolela ditshobotsi tsena di kopane.” Haeba re rata mosa, ha re o bontshe ka lekgonono mme seo se etsa hore re thabele ho thusa batho ba hlokang. Kahoo, re fumana thabo e tliswang ke ho fana.—Liketso 20:35.
“O inyenyefatse ha o tsamaya le Modimo wa hao.” Ka Bibeleng, polelwana e reng, “ho tsamaya” e bolela “ho latela tsela e itseng.” Re tsamaya le Modimo ka hore re latele tsela ya bophelo eo a e boletseng ka Bibeleng. Re lokela ‘ho inyenyefatsa’ ha re ntse re latela tsela eo. Jwang? Ha re inyenyefatsa ka pela Modimo re hlahloba boemo ba rona ka pela hae mme re amohela mefokolo ya rona. Kahoo, ‘ho tsamaya le Modimo o inyenyefaditse’ ho bolela hore re utlwisisa ka ho hlakileng hore na o hloka eng ho rona le seo rona re ka fanang ka sona.
Se thabisang ke hore ha ho mohla Jehova a batlang se fetang seo re ka fanang ka sona. Wa thaba ha re etsa sohle se matleng a rona ho mo sebeletsa. (Bakolose 3:23) Jehova o utlwisisa mefokolo ya rona. (Pesaleme ya 103:14) Haeba ka boinyenyefatso re amohela mefokolo ya rona, seo se tla etsa hore re thabele ho tsamaya le Modimo. Ke hobaneng ha o sa ithute hore na o ka etsang hore o tsamaye le Modimo? Seo se tla etsa hore a o hlohonolofatse haholo.—Liproverbia 10:22.
Batlisisa Matlotlo a Patilweng
(Mikea 2:12) Ka sebele ke tla bokella Jakobo, kaofela ha lona; ruri ke tla phutha ba setseng ba Iseraele. Ke tla ba beha bonngweng, jwalo ka mohlape ka lesakeng, jwalo ka mohlape o leng hara lekgulo la oona; moo ho tla tlala lerata la batho.’
w07 11/1 15 ¶6
Dintlhakgolo Tsa Buka ya Obadia, Jonase le Mikea
2:12—Boprofeta ba ho “phutha ba setseng ba Iseraele” bo ile ba phethahatswa neng? Bo ile ba phethahala ka lekgetlo la pele ka 537 B.C.E. ha masala a Bajuda a tloha kgolehong Babylona mme a e ya naheng ya habo ’ona. Mehleng ya kajeno, boprofeta bona bo phethahala ho “Iseraele ya Modimo.” (Bagalata 6:16) Ho tloha ka 1919, Bakreste ba tlotsitsweng ba nnile ba phutheha “jwalo ka mohlape o leng hara lekgulo.” Ka ha “bongata bo boholo” ba “dinku tse ding” bo ntse bo kena hara bona, haholo holo ho tloha ka 1935, ba ‘tletse lerata la batho.’ (Tšenolo 7:9; Johanne 10:16) Ba ntshetsa pele borapedi ba nnete hammoho ka tjheseho.
(Mikea 7:7) Empa ha e le nna, ke tla nne ke lebelle Jehova. Ke tla letela Modimo wa poloko ya ka. Modimo wa ka o tla nkutlwa.
w03 8/15 24 ¶20
Ke Eng Seo Jehova a se Lebeletseng ho Rona?
20 Ho fumana tlhohonolofatso ya Jehova ho re susumelletsa ho ba le boikutlo bo kang ba Mikea. O re: “Ke tla letela Modimo wa poloko ya ka.” (Mikea 7:7) Mantswe aa a amana jwang le ho tsamaya ha rona le Modimo ka boinyenyefatso? Ho ba le boikutlo ba ho leta, kapa ho se fele pelo, ho re thusa ho qoba ho sarelwa ka lebaka la hore ebe letsatsi la Jehova ha le e so fihle. (Liproverbia 13:12) Ke nnete hore kaofela ha rona re labalabela bofelo ba lefatshe lena le kgopo. Le ha ho le jwalo, beke e nngwe le e nngwe ho na le batho ba dikete bao e leng hona ba qalang ho tsamaya le Modimo. Ho tseba sena ho re fa lebaka le utlwahalang la hore re be le boikutlo ba ho leta. Paki e nngwe ya kgale e ile ya re: “Ha ke hetla morao dilemong tse fetang 55 ke le mosebetsing wa boboledi, ke kgodisehile hore ha ke a lahlehelwa ke letho ka ho letela Jehova. Ho e na le hoo, ke qobile masisa pelo a mangata.” Na le wena o bile le phihlelo e tshwanang?
Mmalo wa Bibele
(Mikea 4:1-10) Karolong e qetellang ya matsatsi thaba ya ntlo ya Jehova e tla tiiswa ka thata ka hodima ditlhoro tsa dithaba, mme ka sebele e tla phahamela maralla; mme ditjhaba di tla phallela ho yona. 2 Ka sebele ditjhaba tse ngata di tla ya mme di re: “Tloong, mme re nyoloheleng thabeng ya Jehova le ntlong ya Modimo wa Jakobo; o tla re rupela ka ditsela tsa hae, mme re tla tsamaya ditseleng tsa hae.” Etswe molao o tla tswa Sione, mme lentswe la Jehova le tswe Jerusalema. 3 Ka sebele o tla ahlola hara ditjhaba tse ngata, mme a lokise ditaba ditjhabeng tse matla tse hole haholo. Ba tla lokela ho tea disabole tsa bona hore e be mehoma le marumo a bona hore e be dikere tse faolang dimela. Setjhaba se ke ke sa phahamisetsa setjhaba se seng sabole, ha ba sa tla hlola ba ithuta ntwa. 4 Ka sebele e mong le e mong o tla dula tlasa sefate sa hae sa morara le tlasa sefate sa hae sa feiga, ho ke ke ha e ba le ya etsang hore ba thothomele; ka ha molomo wa Jehova wa mabotho o boletse. 5 Etswe ditjhaba tsohle di tla tsamaya se seng le se seng ka lebitso la modimo wa sona; empa re tla tsamaya ka lebitso la Jehova Modimo wa rona ho isa nakong e sa lekanyetswang, esita le ka ho sa feleng. 6 “Letsatsing leo,” ho bolela Jehova, “ke tla bokella ya neng a hlotsa; le ya neng a qhalakantswe ke tla mo phutha, esita le eo ke ileng ka mo tshwara hampe. 7 Ka sebele ke tla etsa ya neng a hlotsa masala, le ya neng a suthiseditswe hole ke mo etse setjhaba se matla; mme Jehova o tla busa e le morena wa bona Thabeng ya Sione, ho tloha jwale le ho isa nakong e sa lekanyetswang. 8 “Ha e le wena, tora ya mohlape, tutudu ya moradi wa Sione, e tla fihla ho wena, e, ka sebele puso ya pele e tla tla, mmuso wa moradi wa Jerusalema. 9 “Jwale ke hobaneng ha o ntse o howa ka lentswe le phahameng? Na ha ho na morena ho wena, kapa mweletsi wa hao o timetse, hoo o tshwerweng ke bohloko bo hlabang bo kang ba mosadi ya belehang? 10 Utlwa bohloko bo boholo mme o qhashohe, Wena moradi wa Sione, jwalo ka mosadi ya belehang, etswe jwale o tla tswa motseng, mme o tla lokela ho dula naheng. O tla lokela ho fihla Babylona. Moo o tla lopollwa. Moo Jehova o tla o rekolla diatleng tsa dira tsa hao.
27 NOVEMBER–3 DECEMBER
MATLOTLO A TSWANG BIBELENG | NAHUME 1–HABAKUKE 3
“Re Lokela ho Dula re Fadimehile Mme re le Mafolofolo”
(Habakuke 2:1-4) Ke tla nne ke eme sebakeng sa ka sa ho lebela, mme ke tla nne ke eme hodima lerako la tshireletso; ke tla dula ke lebetse, ho bona seo a tla se bua ka nna le seo ke tla araba ka sona ha ke kgalemelwa. 2 Jehova a nkaraba mme a re: “Ngola pono ena fatshe, mme o e betle ka ho hlakileng hodima mamatjana, e le hore ya e ballang hodimo a ka etsa jwalo ka mokgwa o phollatsi. 3 Etswe pono ena e sa ntse e le bakeng sa nako e behilweng, e ntse e potlakela bofelong, mme e ke ke ya bolela leshano. Esita le haeba e ka dieha, o dule o e lebeletse; ka ha ruri e tla phethahala. E ke ke ya siuwa ke nako. 4 “Bonang! Moya wa hae o hohomohile; ha wa otloloha ka hare ho yena. Empa ha e le ya lokileng, o tla nne a phele ka botshepehi ba hae.
w07 11/15 10 ¶3-5
Dintlhakgolo Tsa Buka ya Nahume, Habakuke le Sofonia
2:1. Re lokela ho etsisa Habakuke ka ho dula re fadimehile moyeng mme re le mafolofolo. Le rona re lokela ho ikemisetsa ho fetola tsela eo re nahanang ka yona tumellanong le ‘kgalemelo,’ kapa tayo le ha e le efe eo re e fuwang.
2:3; 3:16. Ha ka tumelo re ntse re letetse ho tla ha letsatsi la Jehova, a re se keng ra lebala hore nako e lekane motinyane.
2:4. E le hore re pholohe letsatsi la kahlolo ya Jehova, re tlameha ho mamella ka botshepehi.—Baheberu 10:36-38.
Batlisisa Matlotlo a Patilweng
(Nahume 1:8) Ka morwallo o fetang o tla fedisa sebaka sa hae ka ho tobileng, mme lefifi le tla lelekisa dira tsa hae.
(Nahume 2:6) Ka sebele diheke tsa dinoka tsa bona di tla bulwa, mme ntlo ya mmuso e tla qhibidiha.
w07 11/15 9 ¶2
Dintlhakgolo Tsa Buka ya Nahume, Habakuke le Sofonia
2:6—Ke “diheke [dife] tsa dinoka” tse ileng tsa bulwa? Diheke tsena ke lesoba le phuntsweng ke metsi a Noka ya Tigris marakong a Ninive. Ka 632 B.C.E. ha mabotho a kopaneng a Bababylona le Bamede a ne a futuhela Ninive, ha ya ka ya tshoha. Ka ha e ne e sireleditswe ke marako a yona a phahameng, e ne e nka hore e ke ke ya keneha. Le ha ho le jwalo, Tigris e ile ya e ja ditlhokwa ka lebaka la dipula tsa ditlwebelele. Ho latela rahistori ya bitswang Diodorus, sena “se ile sa etsa hore karolo e itseng ya motse e kwahelwe ke metsi mme karolo e itseng ya lerako e helehe.” Diheke tsa noka di ile tsa bulwa ka tsela eo, mme jwalo ka ha ho profetilwe, Ninive e ile ya haptjwa ka potlako jwalo ka ha ditlhaka tse omeletseng di tjheswa ke mollo.—Nahume 1:8-10
(Habakuke 3:17-19) Le hoja sefate sa feiga se ke ke sa thunya, mme difate tsa morara di ke ke tsa beha ditholwana; mosebetsi wa sefate sa mohlware o ka nna wa fella ka ho hloleha, mme masimo a ka nna a se ke a hlahisa dijo; mohlape wa dikgutshwane o ka nna wa tloswa lesakeng, mme ho ka nna ha se ke ha e ba le mohlape wa diphoofolo tse kgolo ka masakeng; 18 Empa le ha ho le jwalo, ha e le nna, ke tla ithabela ho Jehova; ke tla inyakallela ho Modimo wa poloko ya ka. 19 Jehova Mmusi Morena ke mafolofolo a ka; mme o tla etsa hore maoto a ka a be jwalo ka a dikgama tse tshehadi, hape o tla etsa hore ke hate hodima dibaka tsa ka tse phahameng. Ho motsamaisi ka diletsa tsa ka tse dikgwele.
w07 11/15 10 ¶10
Dintlhakgolo Tsa Buka ya Nahume, Habakuke le Sofonia
3:17-19. Esita le ha re ka welwa ke mathata pele ho Armagedone kapa ha e tswela pele, re ka kgodiseha hore Jehova o tla etsa hore re be “mafolofolo” ha re tswela pele ho mo sebeletsa re thabile.
Mmalo wa Bibele
(Habakuke 2:15–3:6) “ ‘Ho madimabe ya fang metswalle ya hae se nowang, ya se tlatselletsang ka kgalefo le bohale ba hao, e le ho etsa hore ba tahwe, ka morero wa ho tadima ditho tsa bona tse hlabisang dihlong. 16 Ka sebele o tla kgoriswa haholo ka ho hlompholoha ho e na le thoriso. Le wena nwa, mme o nkwe o le ya sa bollang. Senwelo sa letsoho le letona la Jehova se tla fihla ho wena, mme ho tla ba le nyediso hodima thoriso ya hao; 17 hobane pefo e entsweng ho Lebanone ke sona se tlang ho o kwahela, le meharo hodima diphoofolo e di tshosang, ka lebaka la ho tshollwa ha madi a moloko wa batho le pefo e entsweng lefatsheng, motseng le ho bohle ba dulang ho wona. 18 Setshwantsho se betlilweng se bile le molemo ofe, ha moetsi wa sona a se betlile, seemahale se entsweng ka ho qhibidihiswa, le morupedi wa leshano? ha moetsi wa sebopeho sa sona a se tshepile, ho isa tekanyong ya ho etsa medimo ya lefeella e sa kgoneng ho bua? 19 “ ‘Ho madimabe ya reng ho sekoto sa lehong: “Tsoha!” ho lejwe le sa tsebeng ho bua: “Tsoha! Se tla fana ka thupelo”! Bonang! Se kwahetswe ka kgauta le silevera, mme ho hang ha ho phefumoloho ka hare ho sona. 20 Empa Jehova o ka tempeleng ya hae e halalelang. Kgutsa ka pela hae, lefatshe lohle!’ ”
3:1 Thapelo ya moprofeta Habakuke ka dipina tsa kodi ya malla: 2 Jehova, ke utlwile tlaleho e mabapi le wena. Jehova ke tshohile ka lebaka la mosebetsi wa hao.
Bohareng ba dilemo o ke o o phedise! Bohareng ba dilemo e se e ka o ka o tsebahatsa. Nakong ya pherekano, e se e ka o ka hopola ho bontsha mohau. 3 Modimo o tlile a tswa Temane, Ya Halalelang a tswa Thabeng ya Parane. Selah.
Ho hlompheha ha hae ho ile ha kwahela mahodimo; mme lefatshe la tlala thoriso ya hae. 4 Ha e le kganya ya hae, e ile ya e ba feela jwalo ka lesedi. O ne a e na le mahlasedi a mabedi a tswang letsohong la hae, mme matla a hae a ne a ipatile moo. 5 Lefu la sewa le ne le ntse le tsamaya ka pela hae, le feberu e tjhesang e ne e tsamaya maotong a hae. 6 O ile a ema a sa sisinyehe, e le hore a ka sisinya lefatshe. O ile a bona, jwale a etsa hore ditjhaba di tlole. Dithaba tsa ka ho sa feleng di ile tsa thuhakanngwa; maralla a hlolang ka nako e sa lekanyetswang a inama. Metsamao ya kgale ke ya hae.