BUKA EA PELE EA MARENA

1 Morena Davida o ne a tsofetse+ haholo hoo le hoja a ne a apesoa likobo a neng a sa futhumale. 2 Bahlanka ba hae ba re ho eena: “Morena, re lumelle hore re u batlele ngoanana eo e ntseng e le moroetsana, o tla u sebeletsa ’me a u hlokomele. A robale sefubeng sa hao e le hore u futhumale.” 3 Ba batlana le ngoanana e motle naheng eohle ea Iseraele ’me ba fumana Abishage+ oa Moshuneme+ eaba ba mo tlisa ho morena. 4 Ngoanana eo o ne a le motle haholo. O ile a hlokomela morena le ho mo sebeletsa empa morena ha aa ka a robala le eena.

5 Adonija+ mora oa Hagithe o ne a iphahamisa a re: “Ke tl’o ba morena!” O ile a re a etsetsoe kariki ea ntoa le hore ho be le bapalami ba lipere le banna ba 50 ba mathang ka pel’a hae.+ 6 Empa ntate oa hae o ne a e-s’o ka a mo khalemela* a re: “Ke hobane’ng ha u entse ntho ee?” Adonija o ne a le motle haholo ’me a hlahlama Absalome. 7 A buisana le Joabe mora oa Tseruja le moprista Abiathare+ eaba baa mo thusa le ho mo tšehetsa.+ 8 Empa moprista Tsadoke,+ Benaia+ mora oa Jehojada, moprofeta Nathane,+ Shimei,+ Rei le masole a Davida a matla+ ha baa ka ba tšehetsa Adonija.

9 Adonija a etsa sehlabelo+ ka linku, likhomo le liphoofolo tse nonneng lejoeng la Zohelethe haufi le Ene-rogele. O ile a mema bana babo bohle e leng bara ba morena le banna bohle ba Juda e leng bahlanka ba morena. 10 Empa o ne a sa mema moprofeta Nathane, Benaia, masole a matla le Solomone ngoan’abo. 11 Nathane+ a re ho Bathe-sheba+ ’mè oa Solomone:+ “Na ha oa utloa hore Adonija+ mora oa Hagithe e se e le morena ’me Morena Davida ha a tsebe letho ka taba ee? 12 Ke kopa u tle ke tl’o u eletsa e le hore u ka pholosa bophelo ba hao le ba mora oa hao Solomone.+ 13 E-ea ho Morena Davida ’me u re ho eena, ‘Na ha se uena moren’a ka ea ileng a hlapanyetsa ’na mohlanka oa hao oa re: “Mora oa hao Solomone e tla ba morena ka mor’a ka ’me ke eena ea tla lula teroneng ea ka”?+ Joale ke hobane’ng ha Adonija e le morena?’ 14 Ha u ntse u bua le morena, ke tla fihla ’me ke mo bolelle hore taba eo u e buang ke ’nete.”

15 Bathe-sheba a ea ho morena ka kamoreng ea hae ea ho robala. Morena o ne a tsofetse haholo ’me Abishage+ oa Moshuneme o ne a mo sebeletsa. 16 Bathe-sheba a khumama* ka pel’a morena ’me morena a re: “U kopa eng?” 17 A re: “Moren’a ka, ke uena ea ileng a hlapanyetsa ’na mohlanka oa hao ka Jehova Molimo oa hao oa re, ‘Mora oa hao Solomone e tla ba morena ka mor’a ka ’me ke eena ea tla lula teroneng ea ka.’+ 18 Empa Adonija e se e le morena ’me ha u tsebe letho ka taba ena moren’a ka.+ 19 O entse mahlabelo ka lipoho, liphoofolo tse nonneng le linku tse ngata ’me o memme bara bohle ba morena, moprista Abiathare le molaoli oa sesole e leng Joabe.+ Empa ha aa mema mohlanka oa hao Solomone.+ 20 Moren’a ka, Baiseraele bohle ba emetse hore u ba bolelle hore na ke mang eo e tla ba morena ka mor’a hao. 21 Ho seng joalo, ha u shoa,* ’na le mora oa ka Solomone re tla nkoa re le lira.”

22 Ha Bathe-sheba a ntse a bua le morena, moprofeta Nathane a fihla.+ 23 Ba re ho morena: “Moprofeta Nathane ke enoa!” A tla ho morena a khumama ka pel’a hae. 24 Nathane a re: “Moren’a ka, na u itse Adonija e tla ba mohlahlami oa hao?+ 25 Kajeno o il’o etsa sehlabelo+ ka lipoho, liphoofolo tse nonneng le linku tse ngata ebile o memme bara bohle ba morena, balaoli ba masole le moprista Abiathare.+ Ba na le eena moo ba ntse ba ja ebile ba noa ’me ba ntse ba re, ‘Morena Adonija a ke a phele!’ 26 Empa ’na, moprista Tsadoke, Benaia+ mora oa Jehojada le mora oa hao Solomone ha rea mengoa. 27 Na moren’a ka u lumelletse taba ee u sa mpolella hore na ke mang ea lokelang ho u hlahlama?”

28 Morena Davida a re: “Mpitsetseng Bathe-sheba.” A tla ’me a ema ka pel’a morena. 29 Morena a ikana a re: “Ke hlapanya ka Jehova Molimo ea phelang, ea mpholositseng mathateng ’ohle a ka+ 30 feela joalokaha ke u hlapanyelitse ka Jehova Molimo oa Iseraele ka re, ‘Mora oa hao Solomone o tla ntlhahlama ’me ke eena ea tla lula teroneng ea ka sebakeng sa ka!’ Ke eona ntho eo ke tla e etsa kajeno.” 31 Bathe-sheba a khumama ka pel’a morena ’me a re: “E se eka Morena Davida a ka phela ka ho sa feleng!”

32 Morena Davida a re: “Mpitsetseng moprista Tsadoke, moprofeta Nathane le Benaia+ mora oa Jehojada.”+ Ba tla ho morena. 33 Morena a re ho bona: “Tsamaeang le bahlanka ba ka ’me le palamise mora oa ka Solomone ’moulo*+ oa ka le mo ise Gihone.+ 34 Moprista Tsadoke le moprofeta Nathane ba tla mo tlotsetsa+ moo hore e be morena oa Iseraele ’me le letse lenaka le re, ‘Morena Solomone a ke a phele!’+ 35 Le mo latele ’me o tla kena a lule teroneng ea ka. E tla ba morena sebakeng sa ka ’me ke tla mo khetha hore e be moeta-pele oa Iseraele le oa Juda.” 36 Benaia mora oa Jehojada a re ho morena: “Amen! E se eka Jehova Molimo oa moren’a ka a ka tiisa taba ena. 37 E se eka Jehova a ka ba le Solomone+ feela joalokaha a ile a ba le uena hape a etse hore ’muso oa hae o be matla ho feta ’muso oa Morena Davida.”+

38 Moprista Tsadoke, moprofeta Nathane, Benaia+ mora oa Jehojada, Bakerethe le Bapelethe+ ba tsamaea ’me ba palamisa Solomone ’moulo oa Morena Davida,+ ba mo isa Gihone.+ 39 Moprista Tsadoke a nka lenaka le tšetseng oli+ ka tenteng+ eaba o tlotsa Solomone.+ Ka mor’a moo, ba letsa lenaka ’me batho bohle ba hoeletsa ba re: “Morena Solomone a ke a phele!” 40 Ka mor’a moo, batho bohle ba tsamaea le eena ba mo latela, ba ne ba thabile haholo ’me ba letsa makolilo, ba entse lerata hoo lefatše le ileng la thothomela.+

41 Adonija le batho bohle bao a neng a ba memme ba utloa lerata lena ha ba qeta ho ja.+ Ha Joabe a utloa molumo oa lenaka a re: “Ke hobane’ng ha ho e-na le lerata le lekaa motseng?” 42 Ha a sa ntse a bua, Jonathane+ mora oa moprista Abiathare a fihla. Adonija a re: “Kena hobane u monna ea lokileng* ’me e tlameha ebe u tlisitse litaba tse monate.” 43 Empa Jonathane a araba Adonija a re: “Che, ha kea tlisa litaba tse monate, Morena Davida o entse Solomone morena. 44 O ile a mo tsamaisa le moprista Tsadoke, moprofeta Nathane, Benaia mora oa Jehojada, Bakerethe le Bapelethe, a palame ’moulo oa morena.+ 45 Moprista Tsadoke le moprofeta Nathane ba mo tlotselitse Gihone hore e be morena. Ka mor’a moo, ba khutla ba thabile ’me batho ba motse ba ntse ba keteka. Ke lona lerata leo le neng le le utloa. 46 Ho feta moo, Solomone o se a bile a lutse teroneng ea borena. 47 Hape bahlanka ba Morena Davida ba ile ho eena ho ea mo lebohisa ba re, ‘E se eka Molimo a ka etsa hore lebitso la Solomone le tsebahale ho feta la hao le ’muso oa hae o be matla ho feta oa hao!’ Eaba morena o inama a le betheng. 48 Morena le eena o itse, ‘Ho rorisoe Jehova Molimo oa Iseraele eo kajeno a khethileng motho ea tla lula teroneng ea ka, ea ntumeletseng hore ke bone seo.’”

49 Batho bohle ba neng ba menngoe ke Adonija ba tšoha haholo eaba e mong le e mong oa tsamaea. 50 Adonija le eena o ne a tšohile Solomone. Kahoo, a tsamaea a ea aletareng ’me a fihla a tšoara manaka a eona.+ 51 Solomone a bolelloa sena: “Adonija o tšohile Morena Solomone ’me o tšoere manaka a aletare o re, ‘Morena Solomone a ke a ntlhapanyetse hore a ke ke a mpolaea ka sabole.’” 52 Solomone a re: “Haeba e le monna ea itšoereng hantle, a ke ke a lematsoa* empa haeba a etsa ntho leha e le efe e mpe+ o tla bolaoa.” 53 Morena Solomone a romela batho hore ba mo late aletareng. A kena ’me a inamela Morena Solomone. Ka mor’a moo, Solomone a re ho eena: “E-ea ntlong ea hao.”

2 Ha Davida a le haufi le ho shoa, a fa mora oa hae Solomone litaelo tsena: 2 “Ke haufi le ho shoa, kahoo e-ba matla+ ’me u be sebete joaloka monna.+ 3 U mamele Jehova Molimo oa hao ka hore u tsamaee litseleng tsa hae, u mamele litaelo, melao le likhopotso tsa hae joalokaha li ngotsoe Molaong oa Moshe.+ Ha u etsa joalo, u tla atleha linthong tsohle tseo u li etsang le hohle moo u eang teng. 4 Jehova o tla etsa seo a ntšepisitseng sona ha a ne a re: ‘Haeba bara ba hao ba ka lula ba ntšepahalla ka lipelo tsohle tsa bona le ka moea*+ oohle oa bona, ho tla lula ho e-na le e mong oa leloko la hao* ea lutseng teroneng ea Iseraele.’+

5 Hape u tseba seo Joabe mora oa Tseruja a nkentseng sona le seo a se entseng balaoli ba babeli ba masole a Iseraele e leng Abnere+ mora oa Nere le Amasa+ mora oa Jethere. O ile a ba bolaea+ nakong eo ho neng ho e-na le khotso, a tšela lebanta la hae leo a neng a le tlamme thekeng le lieta* tsa hae ka mali. 6 U etse lintho ka bohlale ’me u se ke oa mo tlohela hore a phele ho fihlela a tsofala empa u mo bolaee.*+

7 U be mosa* ho bara ba Barzilai+ oa Mogileade ’me ba be har’a batho ba jang tafoleng ea hao hobane ba ile ba ntšehetsa+ ha ke ne ke baleha abuti oa hao Absalome.+

8 U hopole le Shimei mora oa Gera oa Benjamine ea tsoang Bahurime. Ke eena ea ileng a nthohaka+ ha ke ne ke ea Mahanaime.+ Empa ha a tla ho tla kopana le ’na Jordane, ke ile ka ikana ho eena ka Jehova ka re: ‘Nke ke ka u bolaea ka sabole.’+ 9 U mo fe kotlo+ hobane u monna ea bohlale ’me u tseba seo u lokelang ho mo etsa sona. U mo bolaee.”*+

10 Davida a shoa* ’me a pateloa Motseng oa Davida.+ 11 Davida o busitse Iseraele ka lilemo tse 40, a busa Hebrone+ ka lilemo tse supileng ’me Jerusalema eona ka lilemo tse 33.+

12 Solomone a lula teroneng ea ntate oa hae Davida ’me butle-butle ’muso oa hae oa e-ba matla.+

13 Ha nako e ntse e ea, Adonija mora oa Hagithe a tla ho Bathe-sheba ’mè oa Solomone. Bathe-sheba a re: “Na u tlile ka khotso?” Adonija a re: “Ke tlile ka khotso.” 14 A boela a re: “Ho na le taba eo ke batlang ho e bua le uena.” Bathe-sheba a re: “Bua.” 15 Adonija a re: “U tseba hantle hore ke ne ke lokela ho ba morena ’me Baiseraele bohle ba ne ba lebeletse hore e be ’na morena.+ Empa seo ha sea ka sa etsahala hobane Jehova o ile a khetha ngoan’eso hore e be eena morena.+ 16 Ke kopa ntho e le ’ngoe ho uena ’me u se ke oa hana.” Bathe-sheba a re ho eena: “Bua.” 17 Adonija a re: “Ke kopa u bue le Morena Solomone hore a mphe Abishage+ oa Moshuneme hore e be mosali oa ka kaha uena o tla u mamela.” 18 Bathe-sheba a re: “Ho lokile, ke tla bua le morena.”

19 Bathe-sheba a ea ho Morena Solomone ho ea buella Adonija. Morena a ema ho ea kopana le eena ’me a inama ka pel’a hae. A lula teroneng ea hae ’me a re ’mè oa hae a beheloe terone e le hore a ka lula ka lehlakoreng la hae le letona. 20 Bathe-sheba a re: “Ho na le ntho e nyenyane eo ke e kopang ho uena ’me u se ke oa hana.” Morena a re ho eena: “E kope, nke ke ka hana.” 21 A re: “E-re Abishage oa Moshuneme e be mosali oa ngoan’eno Adonija.” 22 Morena Solomone a re ho ’mè oa hae: “Ke hobane’ng ha u kopa hore Abishage oa Moshuneme a fuoe Adonija? Ke hore u hle u mo kopele le borena+ hobane ke abuti oa ka+ ’me o tšehetsoa ke moprista Abiathare le Joabe+ mora oa Tseruja.”+

23 Morena Solomone a hlapanya ka Jehova a re: “E se eka Molimo a ka mpha kotlo e boima haeba nke ke ka bolaea Adonija ka lebaka la kopo ena. 24 Adonija o tla bolaoa+ kajeno, ke hlapanya ka Jehova Molimo ea phelang, ea mpehileng teroneng ea ntate oa ka Davida le ea tiisitseng puso ea ka+ ’me a nkahela ntlo*+ feela joalokaha a ne a tšepisitse.” 25 Ka potlako Morena Solomone a romela Benaia+ mora oa Jehojada hore a e’o bolaea Adonija.

26 Morena a re ho moprista Abiathare:+ “E-ea masimong a hao a Anathothe.+ U lokela ho shoa empa kajeno nke ke ka u bolaea hobane u ile oa jara Areka ea Jehova ’Musi oa Lintho Tsohle ha u ne u e-na le ntate oa ka Davida+ hape u ile oa tšehetsa ntate oa ka mathateng ’ohle a hae.”+ 27 Solomone a tlosa Abiathare hore a se ke a hlola a sebeletsa e le moprista oa Jehova, ho phethahatsa mantsoe ao Jehova a ileng a a bua Shilo+ ka ntlo ea Eli.+

28 Ha Joabe a utloa litaba tsena, a balehela tenteng ea Jehova+ ’me a tšoara manaka a aletare hobane o ile a thusa Adonija+ eseng Absalome.+ 29 Morena Solomone a bolelloa sena: “Joabe o balehetse tenteng ea Jehova ’me o pel’a aletare.” Solomone a romela Benaia mora oa Jehojada a re: “Tsamaea u e’o mo bolaea!” 30 Benaia a ea tenteng ea Jehova ’me a re ho Joabe: “Morena o re u tlohe mona.” Empa Joabe a re: “Che, ke tla shoella mona.” Benaia a isa molaetsa oo ho morena a re: “Joabe o nkarabile tjena.” 31 Morena a re ho eena: “Etsa seo a se buileng, u mo bolaee ’me u mo pate. U se ke oa lumella hore ’na le lelapa la ntate re ikarabelle bakeng sa batho ba se nang molato bao Joabe a ba bolaileng.+ 32 Jehova o tla etsa hore a ikarabelle bakeng sa lefu la hae hobane o bolaile banna ba babeli ba neng ba lokile ho mo feta, ntate oa ka Davida a sa tsebe. O bolaile Abnere+ mora oa Nere molaoli oa masole a Iseraele+ le Amasa+ mora oa Jethere molaoli oa masole a Juda.+ 33 Joabe le bana* ba hae ba tla ikarabella ka ho sa feleng bakeng sa lefu la bona.+ Empa e se eka Jehova a ka etsa hore ho be le khotso bakeng sa bana* ba Davida, ntlo ea hae le terone ea hae ka ho sa feleng.” 34 Benaia mora oa Jehojada a tsamaea ’me a bolaea Joabe eaba o pateloa ntlong ea hae lefeelleng. 35 Morena a khetha Benaia+ mora oa Jehojada hore e be eena molaoli oa masole sebakeng sa Joabe, a boela a khetha moprista Tsadoke+ sebakeng sa Abiathare.

36 Morena a bitsa Shimei+ ’me a re ho eena: “Ikahele ntlo Jerusalema ’me u lule moo. U se ke oa tloha moo ’me oa ea sebakeng leha e le sefe. 37 Letsatsing leo ka lona u tlohang moo ’me u tšela Khohlo ea Kidrone,+ u tsebe hore u tla shoa. U tla ikarabella bakeng sa lefu la hao.” 38 Shimei a re ho morena: “Ntho eo u e buileng ea utloahala. Ke tla etsa feela joalokaha u buile morena.” Shimei a lula Jerusalema nako e telele.

39 Empa qetellong ea lilemo tse tharo, makhoba a mabeli a Shimei a balehela ho Akishe+ mora oa Maaka morena oa Gathe. Ha Shimei a tlaleheloa hore makhoba a hae a Gathe, 40 a qhaneha tonki ea hae a ea ho Akishe ho ea batla makhoba a hae. Ha a khutla Gathe le makhoba a hae, 41 Solomone a bolelloa sena: “Shimei o ne a tsoile Jerusalema a ile Gathe ebile o se a khutlile.” 42 Morena a re ho bitsoe Shimei eaba o re ho eena: “Na ha kea etsa hore u hlapanye ka Jehova ka ba ka u lemosa ka re: ‘Letsatsing leo ka lona u tlohang mona ho ea sebakeng leha e le sefe, u tsebe hore u tla shoa’? Na ha oa ka oa re ho ’na, ‘Ntho eo u e buileng ea utloahala, ke tla etsa joalo’?+ 43 Ke hobane’ng ha u sa tšepahalla kano eo u e entseng ka pel’a Jehova le taelo eo ke u fileng eona?” 44 Morena a re ho Shimei: “U tseba hantle lintho tsohle tse bohloko tseo u li entseng ntate oa ka Davida+ ’me Jehova o tla etsa hore u ikarabelle ka tsona.+ 45 Leha ho le joalo Jehova o tla hlohonolofatsa Morena Solomone,+ a be a etse hore terone ea Davida e eme e tiile ka ho sa feleng.” 46 Morena a laela Benaia mora oa Jehojada hore a e’o mo bolaea.+

’Muso oa Solomone oa tiisoa ka thata.+

3 Solomone a etsa selekane sa lenyalo le Faro morena oa Egepeta. A nyala morali oa Faro+ ’me a mo tlisa Motseng oa Davida+ ho fihlela a qetile ho haha ntlo ea hae,+ ntlo ea Jehova+ le lerako le potolohang Jerusalema.+ 2 Sechaba se ne se ntse se etsetsa mahlabelo libakeng tse phahameng+ hobane ka nako eo ho ne ho e-s’o hahoe ntlo e tla tlisa thoriso lebitsong la Jehova.+ 3 Solomone a bontša hore o rata Jehova ka hore a latele melao ea ntate oa hae Davida, le hoja a ne a etsa mahlabelo ebile a chesa linyehelo libakeng tse phahameng.+

4 Morena Solomone a ea Gibeone ho ea etsa mahlabelo kaha e ne e le sona sebaka se phahameng ka ho fetisisa.+ O ile a fana ka mahlabelo a secheso a 1 000 aletareng eo.+ 5 Ha Solomone a le Gibeone, Jehova a hlaha ho eena torong bosiu a re: “Mpolelle hore na u batla ke u fe eng.”+ 6 Solomone a re: “U ile oa bontša mohlanka oa hao e leng ntate oa ka Davida hore u mo rata haholo* hobane o ile a tsamaea litseleng tsa hao ka botšepehi le ka ho loka. U ntse u mo bontša lerato lena le leholo le kajeno ka hore ebe u ile oa mo fa mora hore a lule teroneng ea hae.+ 7 Jehova Molimo oa ka, u nkentse morena sebakeng sa ntate oa ka Davida le hoja ke sa le mocha* ebile ke se na boiphihlelo.*+ 8 Mohlanka oa hao o busa sechaba seo u se khethileng,+ ke sechaba se seholo hoo se ke keng sa baloa. 9 Kahoo, nthuse hore ke mamele ho tsoa pelong e le hore ke khone ho ahlola sechaba sa hao+ le ho lemoha pakeng tsa se setle le se sebe+ kaha ha ho motho ea ka khonang ho ahlola sechaba sena sa hao se seholo.”*

10 Jehova a thabela kopo eo ea Solomone.+ 11 A re ho Solomone: “Kaha ha oa kopa ho phela nako e telele,* ho ba morui kapa hore lira tsa hao li shoe empa u kopile kutloisiso hore u khone ho ahlola linyeoe,+ 12 ke tla u fa seo u se kopileng.+ Ke tla u fa bohlale le kutloisiso+ tseo ho seng motho ea kileng a ba le tsona kapa ea tla ke a be le tsona.+ 13 Ke tla u fa le lintho tseo u sa li kopang+ e leng maruo le khanya+ e le hore ho se ke ha e-ba le morena le ea mong ea tšoanang le uena mehleng ea hao.*+ 14 Haeba u tsamaea litseleng tsa ka ka hore u mamele melao ea ka le litaelo tsa ka, feela joaloka ntate oa hao Davida,+ ke tla etsa hore u phele nako e telele.”*+

15 Ha Solomone a tsoha, a hlokomela hore e ne e le toro. A ea Jerusalema a ema ka pel’a areka ea selekane ea Jehova ’me a nyehela mahlabelo a secheso le linyehelo tse kopanetsoeng+ eaba o etsetsa bahlanka bohle ba hae mokete.

16 Basali ba babeli ba matekatse ba tla ho morena ’me ba ema ka pel’a hae. 17 Mosali oa pele a re: “Moren’a ka, ’na le mosali enoa re lula ka tlung e le ’ngoe ’me ke ile ka ba le ngoana a ntse a le teng ka tlung. 18 Ka mor’a matsatsi a mararo ngoana oa ka a hlahile, mosali enoa le eena a ba le ngoana. Re ne re le babeli feela ka tlung. 19 Bosiu mora oa mosali enoa o ile a shoa hobane o ne a robetse holim’a hae. 20 A tsoha har’a bosiu eaba o nka mora oa ka a robetse pel’a ka ha ke ntse ke robetse ’me a mo beha sefubeng sa hae eaba o beha mora oa hae ea shoeleng sefubeng sa ka. 21 Ha ke re ke nyantša ngoana hoseng, ka hlokomela hore o shoele. Ka mo hlahlobisisa ’me ka bona hore ha se mora oa ka.” 22 Empa mosali oa bobeli a re: “Che, mora ea phelang ke oa ka, ea shoeleng ke oa hao!” Mosali oa pele a re: “Che, mora ea shoeleng ke oa hao, ea phelang ke oa ka.” Ke ka mokhoa oo ba neng ba phehisana kateng ka pel’a morena.

23 Qetellong morena a re: “Enoa o re, ‘Mora ea phelang ke oa ka ’me ea shoeleng ke oa hao!’ ’me e mong o re, ‘Che, mora ea shoeleng ke oa hao ’me ea phelang ke oa ka!’” 24 Morena a re: “Ntlisetseng sabole.” Ba mo tlisetsa eona. 25 Morena a re: “Arolang ngoana ea phelang likoto tse peli ’me le fe mosali e mong halofo e ’ngoe le e mong halofo e ’ngoe.” 26 ’Mè oa lesea le phelang a hauhela mora oa hae, hang-hang a kopa morena a re: “Moren’a ka, ke kopa u mo fe ngoana ea phelang! U se ke oa mo bolaea!” Empa mosali oa bobeli o ne a ntse a re: “E ke ke ea e-ba oa ka kapa oa hao! E-re ba mo arole!” 27 Morena a re: “Fang mosali oa pele ngoana ea phelang! Le se ke la bolaea ngoana eo hobane ke eena ’mè oa hae.”

28 Baiseraele bohle ba utloa ka kahlolo eo morena a neng a fane ka eona. Ba ile ba mo hlompha*+ hobane ba ne ba bona hore Molimo o mo file bohlale ba ho ahlola ka toka.+

4 Morena Solomone o ne a busa naha eohle ea Iseraele.+ 2 Bana e ne e le balaoli ba hae ba phahameng:* Azaria mora oa Tsadoke+ e ne e le moprista, 3 bara ba Shisha e leng Elihorefele le Akija e ne e le bangoli,+ Josafate+ mora oa Akilude e le motlalehi. 4 Benaia+ mora oa Jehojada e ne e le molaoli oa masole ’me Tsadoke le Abiathare+ e le baprista. 5 Azaria mora oa Nathane+ e ne e le molaoli oa matona, Zabude mora oa Nathane e le moprista ebile e le motsoalle oa morena.+ 6 Akishare o ne a hlokometse lelapa la morena ’me Adonirame+ mora oa Abda e le molaoli oa ba neng ba bitselitsoe ho tla sebeletsa morena.+

7 Solomone o ne a e-na le matona a 12 Iseraele eohle, a neng a fa morena le ba lelapa la hae lijo. Letona le leng le le leng le ne le fana ka lijo khoeli e le ’ngoe selemong.+ 8 Ana ke mabitso a matona ao: Mora oa Hure e ne e le molaoli oa sebaka se lithaba sa Efraime. 9 Mora oa Dekere e le molaoli oa Makaze, Shalbime,+ Bethe-shemeshe le Elone-bethe-hanane. 10 Mora oa Hesede e le molaoli oa Arubothe (hape e le molaoli oa Soko le naha eohle ea Hefere). 11 Mora oa Abinadabe e le molaoli oa maralla ’ohle a Dore (o ile a nyala Tafathe morali oa Solomone). 12 Baana mora oa Akilude e le molaoli oa Tanake, Megido+ le Bethe-sheane+ e pel’a Zarthane tlas’a Jezriele, ho tloha Bethe-sheane ho ea Abele-mehola le ho ea fihla Jokmeame.+ 13 Mora oa Gebere e le molaoli oa Ramothe-gileade+ (le Gileade+ metsaneng ea litente ea Jaire+ mora oa Manase le Argobe+ e Bashane:+ Metse e 60 e meholo e nang le marako le likeiti tse entsoeng ka koporo). 14 Akinadabe mora oa Ido e le molaoli oa Mahanaime.+ 15 Akimaze e le molaoli oa Nefthali (o ile a nyala Basmathe e leng e mong oa barali ba Solomone). 16 Baana mora oa Hushai e le molaoli oa Ashere le Bealothe. 17 Josafate mora oa Parua e le molaoli oa Isakare. 18 Shimei+ mora oa Ela e le molaoli oa Benjamine.+ 19 Gebere mora oa Uri e le molaoli naheng ea Gileade+ e leng naha ea Sihone+ morena oa Baamore le ea Oge+ morena oa Bashane. Ho ne ho boetse ho e-na le letona leo matona ana a neng a ikarabella ho lona.

20 Bajuda le Baiseraele ba ne ba le bangata joaloka lehlabathe le pel’a leoatle.+ Ba ne ba ja, ba noa ebile ba thabile.+

21 Solomone o ne a laola mebuso eohle ho tloha Nokeng*+ ho ea naheng ea Bafilista le ho ea fihla moeling oa Egepeta. Mebuso eo e ne e patala lekhetho* ’me e ile ea sebeletsa Solomone bophelo bohle ba hae.+

22 Lijo tsa Solomone tsa letsatsi le leng le le leng e ne e le lilithara tse 6 600* tsa phofo e sitsoeng hantle le lilithara tse 13 200* tsa phofo, 23 likhomo tse nonneng tse leshome, likhomo tse 20 tse fulisitsoeng le linku tse 100, ntle ho likhama, litšephe, matsa le mauoaneng* a nonneng. 24 O ne a laola ntho e ’ngoe le e ’ngoe e ka lehlakoreng lena la Noka,*+ ho tloha Tifsa ho ea Gaza,+ ho akarelletsa le marena ’ohle a ka lehlakoreng lena la Noka ’me o ne a phelisana ka khotso le marena a linaha tseo le linaha tse mo potolohileng.+ 25 Nakong eo Solomone a neng a busa, Bajuda le Baiseraele ba ne ba lula ba sireletsehile. E mong le e mong a lula tlas’a sefate sa hae sa morara le tlas’a sefate sa hae sa feie,* ho tloha Dane ho ea Beersheba.

26 Solomone o ne a e-na le litala* tsa lipere tse 4 000* le lipere tse hulang likariki tsa ntoa tse* 12 000.+

27 Matona ana a ne a tlisetsa Morena Solomone lijo le batho bohle ba neng ba ja le eena tafoleng ea hae. Letona le leng le le leng le ne le tlisa lijo ka khoeli ea lona ’me le etsa bonnete ba hore ha ho na letho le haellang.+ 28 Matona ana a ne a boetse a isa harese le joang hohle moo lipere tse hulang likariki tsa ntoa le lipere tse ling li leng hona teng, ho ea kamoo a neng a abetsoe kateng.

29 Molimo a fa Solomone bohlale, temohisiso le kutloisiso ka bongata bo kang ba lehlabathe le lebopong la leoatle.+ 30 Solomone o ne a le bohlale ho feta batho bohle ba Bochabela le batho bohle ba Egepeta.+ 31 O ne a le bohlale ho feta motho leha e le ofe, a le bohlale le ho feta Ethane+ oa Moezra, Hemane,+ bara ba Mahole e leng Kalkole+ le Darda. O ile a tuma lichabeng tsohle tse haufi.+ 32 O ile a ngola* maele a 3 000+ a ba a qapa le lipina+ tse 1 005. 33 O ne a khona ho hlalosa lifate, ho tloha ka kedare e Lebanone ho ea ho hisopa+ e melang lerakong le liphoofolo,+ linonyana,*+ lintho tse hahabang*+ le litlhapi. 34 Batho ba ne ba tla ho tsoa lichabeng tsohle ho tla utloa bohlale ba Solomone, ho akarelletsa le marena a tsoang lefatšeng lohle a neng a utloile ka bohlale ba hae.+

5 Ha Hirame morena oa Tire+ a utloa hore Solomone o tlotsitsoe hore e be morena sebakeng sa ntate oa hae, a romela bahlanka ba hae ho Solomone kaha Hirame esale e le motsoalle oa Davida.*+ 2 Solomone le eena a romela molaetsa ho Hirame a re:+ 3 “Oa tseba hore ntate oa ka Davida ha aa ka a khona ho haha ntlo e tla tlisa thoriso lebitsong la Jehova ka lebaka la lintoa tseo a neng a li loana ho tsoa mahlakoreng ’ohle, ho fihlela Jehova a mo thusa ho hlola lira* tsa hae.+ 4 Empa Jehova Molimo oa ka o entse hore ke phomole ho lira tsohle tsa ka.+ Ha ho na motho ea ntoantšang ebile ha ho letho le lebe le etsahalang.+ 5 Kahoo, ke batla ho haha ntlo e tla tlisa thoriso lebitsong la Jehova Molimo oa ka feela joalokaha Jehova a tšepisitse ntate oa ka Davida a re: ‘Mora oa hao eo ke tla mo beha teroneng ea hao sebakeng sa hao, ke eena ea tla haha ntlo e tla tlisa thoriso lebitsong la ka.’+ 6 Bolella bahlanka ba hao hore ba ntšakhele lifate tsa kedare Lebanone.+ Bahlanka ba ka ba tla sebetsa le bahlanka ba hao ’me ke tla lefa bahlanka ba hao moputso oo u mpehelang oona kaha oa tseba hore ha ho na motho har’a rona ea tsebang ho sakha lifate joaloka Basidone.”+

7 Ha Hirame a utloa mantsoe a Solomone, a thaba haholo ’me a re: “Ho ke ho rorisoe Jehova kajeno hobane o file Davida mora ea bohlale hore a buse sechaba sena se seholo.”+ 8 Hirame a romela molaetsa ho Solomone a re: “Ke utloile molaetsa oo u nthomeletseng oona. Ke tla etsa sohle seo u se batlang ka hore ke tlise lifate tsa kedare le tsa junipere.+ 9 Bahlanka ba ka ba tla li theola ho tloha Lebanone ho ea leoatleng, ke tla li fasa ke be ke li kopanye ’me ke li tsamaise ka metsi a leoatle ho ea sebakeng seo u tla mpolella sona. Ke tla etsa hore u li fumane li fasolotsoe moo ’me u fihle u li nke. Uena u mpatale ka ho fa ba lelapa la ka lijo tseo ke tla li batla.”+

10 Hirame a fa Solomone lifate tsa kedare le tsa junipere tseo a neng a li batla. 11 Solomone a fa Hirame lilithara tse 4 400 000* tsa koro e le lijo bakeng sa ba lelapa la hae le lilithara tse 4 400* tsa oli e hloekileng ea mohloaare.* Solomone o ne a fa Hirame lijo tseo selemo le selemo.+ 12 Jehova a fa Solomone bohlale feela joalokaha a ne a mo tšepisitse.+ Ho ile ha e-ba le khotso pakeng tsa Hirame le Solomone ’me ka bobeli ba etsa selekane.

13 Morena Solomone a batla banna ba 30 000 Iseraele eohle hore ba tl’o mo sebeletsa.+ 14 O ne a ba romela Lebanone ka lihlopha tsa ba 10 000 ka khoeli. Ba ne ba qeta khoeli ba le Lebanone ’me ba qeta likhoeli tse peli ba le malapeng a bona, Adonirame+ e le molaoli oa bona. 15 Solomone o ne a e-na le basebeletsi ba 70 000 ba jarang meroalo* le ba 80 000 ba betlang majoe+ lithabeng+ 16 hammoho le matona+ a 3 300 a neng a etella basebetsi pele. 17 Ho latela taelo ea morena, ba fata majoe a maholo, a theko e phahameng+ hore ba etse motheo+ oa ntlo ka majoe a betliloeng.+ 18 Lihahi tsa Solomone, lihahi tsa Hirame le Bagebale+ tsa betla majoe ’me tsa lokisa lifate le majoe a tl’o haha ntlo.

6 Ka khoeli ea Zive*+ (e leng khoeli ea bobeli) Solomone a hahela Jehova* ntlo+ ka selemo sa bo480 ka mor’a hore Baiseraele* ba tsoe naheng ea Egepeta,+ ha a e-na le lilemo tse ’nè e le morena oa Iseraele. 2 Ntlo eo Morena Solomone a ileng a e hahela Jehova e ne e le bolelele ba limithara tse ka bang 27,* bophara ba limithara tse ka bang robong* le bophahamo ba limithara tse ka bang 13.*+ 3 Foranta+ e ka pel’a tempele* e ne e le bolelele* ba limithara tse ka bang robong,* e lekana le bophara ba ntlo. E le botebo ba limithara tse ka bang ’nè* ho tloha ka pel’a ntlo.

4 A etsetsa ntlo lifensetere tse kholo ka hare empa ka ntle li le nyenyane.+ 5 Hape a haha lerako pel’a lebota la ntlo, le neng le potoloha Sehalalelo* le Sehalalelisiso.*+ A boela a etsa likamore ka har’a lerako leo.+ 6 Kamore e ka tlase-tlase e ne e le bophara ba limithara tse ka bang peli,* e mahareng e le bophara ba limithara tse ka bang tharo* ’me e ka holimo e le bophara ba limithara tse ka bang tharo.* A etsa mabota ho potoloha ntlo, e le hore ho se ke ha e-ba le letho le itšoarellang marakong a ntlo.+

7 Ntlo eo e ile ea hahoa ka majoe a koari a seng a ntse a betliloe,+ e le hore ho se ke ha utloahala lihamore, lilepe kapa lithulusi tsa tšepe ha ho ntse ho hahoa. 8 Monyako oa kamore e ka tlase-tlase o ne o le lehlakoreng le ka boroa* la ntlo+ ’me ho ne ho e-na le litepisi tse isang mokatong o mahareng le ho tloha mokatong o mahareng ho ea mokatong o ka holimo. 9 A haha ntlo ’me a e qeta+ eaba o e rulela ka lipalo tsa kedare le ka mapolanka a kedare a entseng mola.+ 10 A haha likamore mahlakoreng ’ohle a ntlo,+ kamore e ’ngoe le e ’ngoe e le bophahamo ba limithara tse ka bang peli,* li kopantsoe le ntlo ka lifate tsa kedare.

11 Jehova a bua le Solomone a re: 12 “Haeba u mamela melao ea ka,+ le ’na ke tla phethahatsa tšepiso ea ka eo ke e etselitseng ntate oa hao Davida mabapi le ntlo ena eo u e hahang,+ 13 ke tla lula har’a Baiseraele+ ’me nke ke ka tlohela sechaba sa ka sa Iseraele.”+

14 Solomone a tsoela pele ho haha ntlo e le hore a e qete. 15 A haha mabota a ka hare a ntlo ka mapolanka a kedare. A kenya mapolanka ho tloha fatše, maboteng le marulelong eaba o boela o kenya mapolanka a junipere+ fatše. 16 A haha le karolo e ka morao ea ntlo ka mapolanka a kedare ho tloha fatše ho ea marulelong, e ne e le limithara tse ka bang robong* ’me ka har’a eona* a haha kamore e ka hare-hare e leng Sehalalelisiso.+ 17 Tempele*+ e leng karolo e ka pele ea ntlo e ne e le limithara tse ka bang 18.* 18 Mapolanka a kedare a ka har’a ntlo a ne a khabisitsoe ka mohope+ le lipalesa tse thuntseng.+ Hohle e ne e le kedare, ho se lejoe le bonahalang.

19 A lokisa kamore e ka hare-hare+ ea ntlo hore a behe areka ea selekane ea Jehova moo.+ 20 Kamore e ka hare-hare e ne e le bolelele ba limithara tse ka bang robong,* bophara ba limithara tse ka bang robong* le bophahamo ba limithara tse ka bang robong,*+ a e koahela ka khauta e hloekileng ’me aletare+ a e koahela ka mapolanka a kedare. 21 Solomone a koahela karolo e ka hare ea ntlo ka khauta e hloekileng+ ’me a beha liketane tsa khauta ka pel’a kamore e ka hare-hare+ e neng e koahetsoe ka khauta. 22 A koahela ntlo eohle ka khauta. A boela a koahela aletare+ eohle e neng e le pel’a kamore e ka hare-hare ka khauta.

23 Kamoreng e ka hare-hare a etsa likerubime+ tse peli ka sefate sa phaena,* kerubime e ’ngoe le e ’ngoe e le bophahamo ba limithara tse ka bang ’nè.*+ 24 Lepheo le le leng la kerubime e ne e le limithara tse ka bang peli.* Ho tloha ntlheng ea lepheo le leng ho ea ntlheng ea le leng e le limithara tse ka bang ’nè.* 25 Kerubime ea bobeli e ne e le limithara tse ka bang ’nè.* Likerubime tseo ka bobeli li ne li lekana ebile li tšoana. 26 Bophahamo ba kerubime ka ’ngoe e ne e le limithara tse ka bang ’nè.* 27 A beha likerubime+ ka kamoreng e ka hare-hare.* Mapheo a likerubime a ne a otlolohile ’me lepheo la kerubime e ’ngoe le thetsa lebota le lepheo la kerubime e ’ngoe le thetsa lebota le leng. Mapheo a tsona a ne a otlolohile ho ea fihla bohareng ba ntlo ’me a ne a thetsana. 28 Eaba o koahela likerubime tseo ka khauta.

29 A khabisa mabota ’ohle a ntlo ho potoloha likamore tse ka hare le ka ntle ka litšoantšo tsa likerubime,+ tsa lifate tsa palema+ le lipalesa tse thuntseng.+ 30 Likamoreng tse ka hare le tse ka ntle a koahela fatše ka khauta. 31 A etsetsa monyako oa kamore e ka hare-hare mamati ka lifate tsa phaena, lipilara tse lehlakoreng le likosene tsa menyako e le karolo ea bohlano.* 32 Mamati a mabeli a lifate tsa phaena o ne a a khabisitse ka likerubime, lifate tsa palema le lipalesa tse thuntseng ’me a a koahela ka khauta. A kokotela khauta holim’a likerubime le lifate tsa palema. 33 O ile a etsa ka tsela e tšoanang bakeng sa likosene tsa mamati a lifate tsa phaena a monyako oa tempele,* eo e neng e le karolo ea bone.* 34 A etsa mamati a mabeli ka lifate tsa junipere. Mamati ao ka bobeli a ne a khona ho bulehela ka ntle le ka hare.+ 35 A khabisa mamati ka likerubime, lifate tsa palema le lipalesa tse thuntseng eaba o a koahela ka khauta.

36 Ho etsa lebala le ka hare,+ a haha mela e meraro e eang holimo ka lejoe le betliloeng le mola o le mong ka mapolanka a kedare.+

37 Ka selemo sa bone khoeling ea Zive,* ha etsoa motheo oa ntlo ea Jehova.+ 38 Ka selemo sa bo11 khoeling ea Bule* (e leng khoeli ea borobeli), ntlo e ne e qetile ho hahoa ho latela polane ea eona.+ Solomone o nkile lilemo tse supileng ho e haha.

7 Solomone o nkile lilemo tse 13 ho haha ntlo* ea hae.+

2 A haha Ntlo ea Moru oa Lebanone+ e bolelele ba limithara tse ka bang 45,* bophara ba limithara tse ka bang 22* le bophahamo ba limithara tse ka bang 13* holim’a mela e mene ea lipilara tsa kedare. Ho ne ho e-na le mapolanka a kedare+ holim’a lipilara. 3 E ne e koahetsoe ka kedare lipalong tse neng li le holim’a lipilara. Lipalo tseo li ne li le 45, li le 15 moleng o mong le o mong. 4 Ho ne ho e-na le lifensetere tse tharo tse latellanang, fensetere ka ’ngoe e shebane le fensetere e ka lehlakoreng le leng. 5 Menyako eohle le likosene li ne li e-na le mahlakore a mane a lekanang le karolo e ka pele ea lifensetere tse tharo tse latellanang tse neng li shebane le tse ling.

6 A haha Holo* ea Lipilara e bolelele ba limithara tse ka bang 22* le bophara ba limithara tse ka bang 13.* Ka pel’a eona ho e-na le foranta e nang le lipilara le tente.

7 A boela a haha Holo* ea Terone+ moo a neng a tla ahlolela teng e leng Holo ea Kahlolo+ ’me ba e koahela ka kedare ho tloha fatše ho ea marulelong.

8 Ntlo* eo a neng a tl’o lula ho eona e neng e le lebaleng le leng,+ e ne e hahiloe hole le Holo* ’me e hahiloe ka tsela e tšoanang le eona. O ile a boela a haha ntlo e tšoanang le Holo eo bakeng sa morali oa Faro, eo Solomone a neng a mo nyetse.+

9 Mehaho ena kaofela e ne e entsoe ka majoe a betliloeng a theko e phahameng+ ho latela hore na ho hlokahala a makae. A ne a sehiloe ka lisakha tsa majoe ka ntle le ka hare, ho tloha motheong ho fihlela holimo le ka ntle ho fihlela lebaleng le leholo.+ 10 Motheo o ne o entsoe ka majoe a maholo a theko e phahameng, majoe a mang e ne e le limithara tse ka bang ’nè* le a mang e le limithara tse ka bang tharo.* 11 Ka holim’a oona ho ne ho e-na le majoe a betliloeng a theko e boima ho latela hore na ho hlokahala a makae. Ho ne ho boetse ho e-na le mapolanka a kedare. 12 Ho potoloha lebala le leholo ho ne ho e-na le mela e meraro ea majoe a betliloeng ’me ho e-na le mola oa mapolanka a kedare. Ho ne ho tšoana le lebaleng le ka hare+ la ntlo ea Jehova le foranta ea eona.+

13 Morena Solomone a re ho latoe Hirame+ ho tsoa Tire. 14 E ne e le mora oa mohlolohali ea tsoang lelokong la Nefthali ’me ntate oa hae e le Motire ea sebetsang ka koporo.+ Hirame o ne a e-na le tsebo, kutloisiso+ le boiphihlelo ba mesebetsi eohle ea koporo.* A tla ho Morena Solomone ’me a etsa mosebetsi oohle oa hae.

15 A etsa lipilara tse peli tsa koporo+ ’me e ’ngoe le e ’ngoe e ne e le bophahamo ba limithara tse ka bang robeli,* ho potoloha pilara ka ’ngoe*+ e ne e le limithara tse ka bang hlano* tsa khoele e lekanyang. 16 A etsetsa lipilara lihlooho tse peli tsa koporo. Hlooho ka ’ngoe e le bophahamo ba limithara tse ka bang peli.* 17 E ne e boetse e e-na le mekhabiso e supileng ea sefe le liketane.+ 18 A etsa mela e ’meli ea likharenate ho potoloha sefe e neng e koahetse lihlooho tsa lipilara. A etsa se tšoanang lihloohong tseo ka bobeli. 19 Lihlooho tsena tsa lipilara tse neng li le foranteng li ne li entsoe joaloka likhahla ’me li le bophahamo ba limithara tse ka bang peli.* 20 Li ne li le holim’a karolo e selika-likoe e neng e kopane le sefe. Ho ne ho e-na le mela ea likharenate tse 200 ho potoloha hlooho ka ’ngoe.+

21 A hloma lipilara tseo ka pel’a foranta ea tempele.*+ E ka letsohong le letona* a e reha Jakine* ’me e ka letsohong le letšehali* a e reha Boase.*+ 22 Ka holim’a lipilara ho ne ho e-na le mokhabiso o joaloka likhahla. Ho ne ho qetiloe ho etsoa lipilara.

23 A etsa Tanka* e selika-likoe ka tšepe.+ Boahlamo ba eona e ne e ka ba limithara tse ’nè* ’me bophahamo ba eona e le limithara tse ka bang peli.* E ne e ka pota-potoa ke khoele e lekanyang e bolelele ba limithara tse ka bang 13.*+ 24 Ho ne ho e-na le mekhabiso ea mehope+ tlas’a molomo oa Tanka* ho e potoloha. Lisenthimithareng tse ling le tse ling tse ka bang 45,* ho ne ho e-na le mekhabiso e leshome. Mekhabiso eo e ne e le mela e ’meli. 25 Tanka* e ne e le holim’a lipoho tsa koporo tse 12,+ tse tharo li shebile leboea, tse tharo bophirimela, tse tharo boroa le tse tharo bochabela ’me li furallane. 26 Botenya ba eona e le lisenthimithara tse ka bang supa* ’me molomo oa eona o entsoe joaloka molomo oa kopi, o joaloka thunthung ea khahla.* E ne e ka tšela lilithara tse ka bang 44 000* tsa metsi.

27 A etsa literoli* tse leshome+ tsa koporo. Teroli ka ’ngoe e le bolelele ba limithara tse ka bang peli,* bophara ba limithara tse ka bang peli* le bophahamo ba mithara.* 28 Literoli li ne li e-na le mabota mahlakoreng ’me mabota ao a le pakeng tsa litšepe tsa koporo. 29 Maboteng ao ho ne ho e-na le mekhabiso ea litau,+ lipoho le likerubime+ ’me ho entsoe le mekhabiso e tšoanang litšepeng tsa koporo. Hape ka holimo le ka tlas’a litau le lipoho ho e-na le mekhabiso. 30 Teroli ka ’ngoe e e-na le mabili a mane a koporo le litšepe tsa koporo tseo a neng a kentsoe ho tsona ’me lik’honeng ho e-na le litšepe tse ’nè tse tšoereng mabili. Beisine e lutse holim’a litšepe tse nang le mekhabiso. 31 Molomo oa teroli o ne o le ka har’a korone ’me ho ea holimo e le lisenthimithara tse ka bang 45,* o le selika-likoe, o le bophahamo ba lisenthimithara tse ka bang 67* ’me o e-na le mekhabiso. Literoli li ne li e-na le mabota a mane a lekanang, a seng selika-likoe. 32 Mabili a mane a ne a le tlase mahlakoreng ’me litšepe tse neng li tšehelitse mabili li ne li kopane le teroli, bophahamo ba lebili ka leng e le lisenthimithara tse ka bang 67.* 33 Mabili a tsona a ne a entsoe joaloka mabili a likariki. Litšepe tse a tšoarang, lirimi, lisepouku le linafo* tsa tsona li entsoe ka tšepe. 34 Ho ne ho e-na le litšepe tse ’nè lik’honeng tse ’nè tsa teroli e ’ngoe le e ’ngoe tse neng li e tšehelitse ’me litšepe tseo e ne e le karolo ea* teroli. 35 Ka holim’a teroli ho ne ho e-na le lebanta le selika-likoe le bophahamo ba lisenthimithara tse ka bang 22* ’me teroli hammoho le mahlakore a korone li ne li kopane. 36 Mahlakoreng o ne a khabisitse ka likerubime, litau le lifate tsa palema ho latela hore na sebaka se sekae hape ho e-na le mekhabiso ho potoloha.+ 37 Ke tsela eo a ileng a etsa literoli tseo tse leshome ka eona.+ Kaofela li ne li entsoe ka tsela e tšoanang+ ebile li lekana.

38 A etsa libeisine tse leshome tsa koporo.+ Beisine ka ’ngoe e ne e ka tšela metsi a lilithara tse ka bang 880.* Beisine e ’ngoe le e ’ngoe e ne e le limithara tse ka bang peli.* Teroli e ’ngoe le e ’ngoe e ne e e-na le beisine ea eona. 39 A beha literoli tse hlano lehlakoreng le letona la ntlo le tse hlano lehlakoreng le letšehali la ntlo ’me a beha Tanka* ka lehlakoreng le letona la ntlo, ho elella ka boroa-bochabela.+

40 Hirame+ a boela a etsa libeisine, likharafu+ le lijana.+

A qeta mosebetsi oohle oo a neng a o etsetsa Morena Solomone bakeng sa ntlo ea Jehova:+ 41 Lipilara tse peli+ le lihlooho tse bopehileng joaloka sejana tse neng li le holim’a lipilara tseo, lisefe tse peli+ ho koahela lihlooho tseo, 42 likharenate tse 400+ bakeng sa lisefe tse peli, mela e ’meli ea likharenate bakeng sa sefe ka ’ngoe ho koahela lihlooho tseo tse peli, 43 literoli tse leshome+ le libeisine tse leshome+ tse holim’a literoli, 44 Tanka*+ le lipoho tse 12 tse tlas’a eona, 45 linkho, likharafu, lijana le lisebelisoa tsohle tseo Hirame a li etselitseng Morena Solomone ka koporo e bentšitsoeng bakeng sa ntlo ea Jehova. 46 Morena a li etsetsa letsopeng seterekeng sa Jordane, pakeng tsa Sukothe le Zarthane.

47 Solomone ha aa ka a lekanya boima ba lisebelisoa tseo hobane li ne li le ngata haholo. Boima ba koporo ha boa ka ba tsebahala.+ 48 Solomone a etsa lisebelisoa tsohle bakeng sa ntlo ea Jehova e leng aletare+ ea khauta, tafole+ ea khauta e behang bohobe ba pontšo, 49 liluloana tsa mabone+ tsa khauta e hloekileng, tse hlano ka lehlakoreng le letona le tse hlano ka lehlakoreng le letšehali ka pel’a kamore e ka hare-hare le lithunthung,+ mabone le litong* tsa khauta,+ 50 libeisine, lintho tse timang mollo,+ lijana, likopi+ le lipane tsa mollo+ tsa khauta e hloekileng. A boela a etsa lihokelo tsa khauta bakeng sa mamati a kamore e ka hare-hare+ e leng Sehalalelisiso le bakeng sa mamati a ntlo ea tempele.+

51 Morena Solomone a qeta mosebetsi oohle oo a neng a lokela ho o etsa bakeng sa ntlo ea Jehova. A kenya lintho tseo ntate oa hae Davida a neng a li halalelitse.+ A boela a beha silevera, khauta le lintho tse ling ka matlotlong a ntlo ea Jehova.+

8 Solomone a bitsa+ baholo ba Iseraele, lihlooho tsohle tsa maloko le likhosana tsa malapa a Iseraele.+ Ba tlisa areka ea selekane ea Jehova Jerusalema ho Morena Solomone ho tsoa Sione+ Motseng oa Davida.+ 2 Banna bohle ba Iseraele ba tla ho Morena Solomone ha ho entsoe mokete* ka khoeli ea bosupa e leng Ethanime.*+ 3 Ha baholo bohle ba Iseraele ba fihla, baprista ba nka Areka.+ 4 Baprista le Balevi ba tlisa Areka ea Jehova, tente ea pokano+ le lisebelisoa tsohle tse halalelang tse neng li le ka tenteng. 5 Morena Solomone le batho bohle bao a neng a ba bitsitse ba ema ka pel’a Areka. Ho ile ha etsoa mahlabelo+ ka linku le likhomo tse ngata.

6 Baprista ba beha areka ea selekane sa Jehova kamoreng e ka hare-hare ea ntlo+ e leng ka Sehalalelisisong. E ne e lula moo tlas’a mapheo a likerubime.+

7 Likerubime li ne li otlolletse mapheo a tsona holim’a moo Areka e lulang teng ebile li koahetse Areka le lipalo tsa eona.+ 8 Lipalo+ li ne li le telele hoo li neng li bonahala ha u le ka Sehalalelong e leng ka pel’a kamore e ka hare-hare empa li ne li sa bonahale ha u le ka ntle. Li ntse li le teng le kajeno. 9 Ho ne ho se na letho ka Arekeng haese matlapa+ a mabeli ao Moshe a neng a a behile+ ha a le Horebe. E ne e le ha Jehova a etsa selekane+ le sechaba sa Iseraele ha se tsoa naheng ea Egepeta.+

10 Ha baprista ba tsoa sebakeng se halalelang, leru+ la tlala ntlo ea Jehova.+ 11 Baprista ba ne ba sa khone ho etsa mosebetsi oa bona ka lebaka la leru hobane khanya ea Jehova e ne e tletse ntlo ea Jehova.+ 12 Solomone a re: “Jehova o ile a re o tla lula lefifing.+ 13 Ke u hahetse ntlo eo u tla lula ho eona ka ho sa feleng.”+

14 Batho bohle ba Iseraele ba ne ba ntse ba eme ka pel’a morena eaba o sheba ka ho bona oa ba hlohonolofatsa.+ 15 A re: “Ho rorisoe Jehova Molimo oa Iseraele, ea phethahalitseng seo a se tšepisitseng ntate oa ka Davida a re, 16 ‘Ho tloha letsatsing leo ke ntšitseng sechaba sa ka sa Iseraele Egepeta, ha ke e-s’o khethe motse malokong ’ohle a Iseraele oo ho oona ke tla haha ntlo e tla etsa hore lebitso la ka le rorisoe.+ Empa ke khethile Davida hore a etelle pele sechaba sa ka sa Iseraele.’ 17 Ntate oa ka Davida o ne a batla ho haha ntlo e tla etsa hore lebitso la Jehova Molimo oa Iseraele le rorisoe.+ 18 Empa Jehova a re ho eena, ‘Ke hantle hore ebe u batla ho haha ntlo e tla etsa hore lebitso la ka le rorisoe. 19 Leha ho le joalo, u ke ke oa haha ntlo eo empa mora eo u tla ba le eena* ke eena ea tla e haha.’+ 20 Jehova o phethahalitse tšepiso ea hae hobane ke ’na morena ea hlahlamang ntate oa ka Davida ’me ke lutse teroneng ea Iseraele feela joalokaha Jehova a tšepisitse. Hape ke hahile ntlo e tla etsa hore lebitso la Jehova Molimo oa Iseraele le rorisoe.+ 21 Ke entse sebaka bakeng sa Areka e nang le selekane+ seo Jehova a ileng a se etsa le baholo-holo ba rona ha a ne a ba ntša naheng ea Egepeta.”

22 Solomone a ema ka pel’a aletare ea Jehova ka pel’a sechaba sohle sa Iseraele ’me a phahamisetsa matsoho a hae maholimong+ 23 a re: “Jehova Molimo oa Iseraele, ha ho na Molimo ea tšoanang le uena+ holimo maholimong kapa tlase lefatšeng. U tšepahalla selekane sa hao ebile u bontša bahlanka ba hao ba u sebeletsang ka lipelo+ tsohle hore oa ba rata.*+ 24 U phethahalitse tšepiso eo u ileng oa e etsetsa ntate oa ka Davida. U entse tšepiso ’me letsatsing lena u e phethahalitse.+ 25 Jehova Molimo oa Iseraele, phethahatsa tšepiso eo u e entseng ho ntate oa ka Davida ha u ne u re: ‘Ho tla lula ho e-na le e mong oa leloko la hao ea tla lula teroneng ea Iseraele haeba feela bara ba hao ba ka lula ba ntšepahalla joaloka uena.’+ 26 Molimo oa Iseraele, ke kopa u phethahatse tšepiso eo u e etselitseng ntate oa ka Davida mohlanka oa hao.

27 Empa na kannete Molimo o tla lula lefatšeng?+ Maholimo a maholimo ha a u lekane.+ Joale ntlo ee eo ke u hahetseng eona e tla u lekana joang?+ 28 Jehova Molimo oa ka, mamela thapelo eo ke e etsang ho uena kajeno le kopo ea ka, ’mamele ha ke lla ke kopa thuso. 29 E se eka u ka sheba ntlo ena bosiu le motšehare, ho mamela thapelo eo ’na mohlanka oa hao ke e etsang ka sebaka sena+ seo u itseng ka sona, ‘Lebitso la ka le tla ba mona.’+ 30 U mamele kopo ea ka le kopo eo sechaba sa hao sa Iseraele se e etsang se shebile sebakeng sena, u utloe u le maholimong+ moo u lulang teng ’me u re tšoarele.+

31 Haeba motho a fosetsa oa habo ’me oa habo a mo laela hore a ikane* hore ha a molato, ha motho eo ea ikanneng a tla ka pel’a aletare ea hao ntlong ena,+ 32 e se eka u ka utloa u le maholimong, oa ahlola bahlanka ba hao ka ho phatlalatsa hore ea khopo o molato* ’me u etse hore a ikarabelle ka ntho eo a e entseng le ka ho phatlalatsa hore ea lokileng ha a na molato* ’me u mo fe moputso ho ea ka lintho tse ntle tseo a li entseng.+

33 Ha sechaba sa hao sa Iseraele se hloloa ke lira tsa sona hobane se ile sa u fosetsa+ ’me se boela se khutlela ho uena, se rorisa lebitso la hao,+ se u rapela ebile se kopa hore u se hauhele se le ka tlung ena,+ 34 e se eka u ka utloa u le maholimong, oa tšoarela libe tsa sona ’me oa se khutlisetsa naheng eo u e fileng baholo-holo ba sona.+

35 Ha pula e sa ne+ hobane sechaba se u etselitse sebe+ ’me se rapela se shebile sebaka sena, se tlotlisa lebitso la hao se bile se tlohela ho etsa sebe hobane u entse hore se ikokobetse,*+ 36 e se eka u ka utloa u le maholimong ’me oa tšoarela libe tsa bahlanka ba hao e leng sechaba sa hao sa Iseraele hobane u tla se tataisa+ hore se tsamaee tseleng e nepahetseng, u be u nese pula naheng+ eo u se fileng eona e le lefa.

37 Haeba ho e-ba le tlala naheng,+ lefu la seoa, limela li cha, ho e-ba le phori,*+ litsie* tse ngata kapa litsie tse senyang, sechaba se hlaseloa ke lira motseng* leha e le ofe, ho e-ba le kotlo ea mofuta leha e le ofe le boloetse,+ 38 ha motho kapa Baiseraele bohle ba etsa thapelo kapa kopo+ ba shebile ntlong ena (kaha motho e mong le e mong o tseba bohloko bo ka pelong ea hae),+ 39 e se eka u ka utloa u le maholimong moo u lulang teng,+ oa ba tšoarela+ ’me oa ba thusa. U hlohonolofatse e mong le e mong ho ea ka mesebetsi ea hae+ hobane u tseba lipelo tsa bona (ke uena feela ea tsebang pelo ea motho e mong le e mong)+ 40 e le hore ba ka u tšaba le ho u hlompha bophelo bohle ba bona ha ba ntse ba lula naheng eo u e fileng baholo-holo ba rona.

41 Leha molichaba ea tsoang naheng e hole ka lebaka la lebitso* la hao+ 42 (ba tla utloa ka lebitso la hao le leholo+ le matla a hao) a tla a tl’o rapela a shebile ntlong ena, 43 e se eka u ka utloa u le maholimong moo u lulang teng.+ U etse sohle seo molichaba a se kopang e le hore batho bohle lefatšeng ba ka tseba lebitso la hao ’me ba u tšaba+ le ho u hlompha joaloka sechaba sa hao sa Iseraele hape ba tsebe hore ntlong ena eo ke e hahileng ho rorisoa lebitso la hao.

44 Haeba u romela sechaba sa hao ho ea loantša lira tsa sona+ sebakeng leha e le sefe ’me se rapela+ Jehova se shebile motse ona oo u o khethileng+ le ntlo eo ke u hahetseng eona,+ 45 u utloe thapelo le kopo ea sona u le maholimong ’me u fane ka kahlolo bakeng sa sona.

46 Haeba se etsa sebe (kaha ha ho na motho ea sa etseng sebe)+ ’me u se halefela ebile u se tlohela hore se hloloe ke lira tsa sona ’me li se isa botlamuoeng naheng ea tsona, hole kapa haufi,+ 47 haeba ha se le moo se bakela libe tsa sona+ ’me se khutlela ho uena+ ebile se kopa hore u se hauhele+ se re, ‘Re u foselitse ebile re entse sebe,’+ 48 se khutlela ho uena ka lipelo tsohle tsa sona+ le ka moea* oohle oa sona se le botlamuoeng ’me se rapela se shebile naha ea sona eo u e fileng baholo-holo ba sona le motse oo u o khethileng hammoho le ntlo eo ke u hahetseng eona,+ 49 u utloe thapelo le kopo ea sona u le maholimong sebakeng seo u lulang ho sona+ ’me u fane ka kahlolo bakeng sa sona. 50 U tšoarele sechaba sa hao melato eo se u etselitseng eona. U etse hore lira tse se isitseng botlamuoeng li se hauhele ’me li tla se hauhela+ 51 (kaha ke sechaba sa hao le lefa la hao,+ sechaba seo u se ntšitseng Egepeta+ har’a mollo* o chesang tšepe).+ 52 E se eka u ka utloa kopo ea mohlanka oa hao+ le kopo ea sechaba sa hao sa Iseraele, ka hore u se mamele neng kapa neng ha se kopa thuso ho uena.+ 53 Jehova ’Musi oa Lintho Tsohle, lichabeng tsohle tse lefatšeng u khethile sechaba sena hore e be lefa la hao+ feela joalokaha u buile u sebelisa mohlanka oa hao Moshe ha u ntša baholo-holo ba rona Egepeta.”

54 Ha Solomone a qeta ho rapela le ho kopa mohau ho Jehova, a phahama ka pel’a aletare ea Jehova moo a neng a khumame a phahamiselitse matsoho maholimong.+ 55 A ema ’me a hlohonolofatsa sechaba sohle sa Iseraele ’me a hoeletsa a re: 56 “Ho rorisoe Jehova, ea fileng sechaba sa hae sa Iseraele khotso* feela joalokaha a ne a se tšepisitse.+ Litšepiso tsohle tseo a li entseng a sebelisa mohlanka oa hae Moshe li phethahetse.+ 57 E se eka Jehova Molimo oa rona a ka ba le rona feela joalokaha a bile le baholo-holo ba rona.+ A se ke a re lahla kapa a re tlohela.+ 58 E se eka a ka etsa hore re tsamaee litseleng tsa hae,+ re mamele melao le litaelo tsa hae ka lipelo tsohle tsa rona e leng lintho tseo a laetseng baholo-holo ba rona hore ba li latele. 59 E se eka bosiu le motšehare Jehova a ka hopola kopo eo ke e entseng ho Jehova Molimo oa rona hore a ahlole bakeng sa ka le sechaba sa hae sa Iseraele letsatsi le letsatsi, 60 e le hore lichaba tsohle lefatšeng li ka tseba hore Jehova Molimo ke eena feela Molimo oa ’nete.+ 61 Sebeletsang Jehova Molimo oa rona ka lipelo tsa lona tsohle+ ka hore le mamele litaelo tsa hae le melao ea hae letsatsing lena.”

62 Morena le Baiseraele bohle ba neng ba e-na le eena ba etsetsa Jehova sehlabelo se seholo.+ 63 Solomone a etsetsa Jehova mahlabelo a kopanetsoeng.+ A etsa mahlabelo ka likhomo tse 22 000 le linku tse 120 000. Morena le Baiseraele bohle ba khakola ntlo ea Jehova.+ 64 Letsatsing leo morena o ile a halaletsa karolo e bohareng ea lebala le ka pel’a ntlo ea Jehova. Ke hona moo a neng a tla etsetsa mahlabelo a secheso, nyehelo ea lijo* le likarolo tse mafura tsa mahlabelo a kopanetsoeng hobane aletare ea koporo+ e ka pel’a tempele ea Jehova e ne e le nyenyane haholo hoo e neng e sa khone ho lekana mahlabelo a secheso, linyehelo tsa lijo le likarolo tse mafura+ tsa mahlabelo a kopanetsoeng. 65 Solomone a etsa mokete+ le Baiseraele bohle ba neng ba bokane ba tsoa Lebo-hamathe* ho ea fihla Khohlong* ea Egepeta.+ Ba etsetsa Jehova Molimo mokete ka matsatsi a supileng le matsatsi a mang a supileng. Kaofela e ne e le matsatsi a 14. 66 Letsatsing le latelang* a re sechaba se tsamaee ’me sechaba sa kopa Molimo hore a hlohonolofatse morena eaba se khutlela malapeng a sona se thabile ka lebaka la lintho tse ntle+ tseo Jehova a neng a li etselitse mohlanka oa hae Davida le sechaba sa hae sa Iseraele.

9 Hang ha Solomone a qetile ho haha ntlo ea Jehova, ntlo ea morena*+ le lintho tsohle tseo a neng a batla ho li haha,+ 2 Jehova a hlaha ho Solomone ka lekhetlo la bobeli feela joalokaha a ile a hlaha ho eena Gibeone.+ 3 Jehova a re ho eena: “Ke utloile thapelo ea hao le kopo eo u e entseng ho ’na. Ke halalelitse ntlo ena eo u e hahileng ka hore ke behe lebitso la ka moo ka ho sa feleng+ ’me mahlo a ka le pelo ea ka li tla lula li le moo.+ 4 Haeba u lula u ntšepahalla joaloka ntate oa hao Davida+ ’me u etsa lintho tsohle tseo ke u laetseng tsona+ le ho mamela melao ea ka,+ 5 ke tla tiisa terone ea ’muso oa hao Iseraele ka ho sa feleng feela joalokaha ke tšepisitse ntate oa hao Davida ka re, ‘Ho tla lula ho e-na le e mong oa leloko la hao ea lutseng teroneng ea Iseraele.’+ 6 Empa haeba uena le bara ba hao le tlohela ho ntatela, le sa mamele melao ea ka le litaelo tsa ka tseo ke le fileng tsona ’me le e’o sebeletsa melimo e meng ebile le e inamela,+ 7 ke tla felisa Baiseraele hohle naheng eo ke ba fileng eona,+ ke tlose ntlo eo ke e halalelitseng bakeng sa lebitso la ka+ ’me Baiseraele ba tla makalloa ba be ba tšehoe* ke batho bohle.+ 8 Ntlo ena e tla senyeha.+ Motho e mong le e mong ea fetang o tla e makalla, a letse mololi a re, ‘Ke hobane’ng ha Jehova a entse naha ee le ntlo ee tjee?’+ 9 Ba tla re, ‘Ke hobane ba lahlile Jehova Molimo oa bona ea ntšitseng baholo-holo ba bona naheng ea Egepeta eaba ba sebeletsa melimo e meng le ho e inamela. Ke ka lebaka leo Jehova a ba tliselitseng tlokotsi ena.’”+

10 Qetellong ea lilemo tse 20 tseo ka tsona Solomone a hahileng matlo a mabeli e leng ntlo ea Jehova le ntlo ea morena,*+ 11 Hirame+ morena oa Tire o ne a file Solomone lifate tsa kedare le tsa junipere hammoho le khauta eo a neng a e batla+ ’me Morena Solomone o ile a fa Hirame metse e 20 naheng ea Galilea. 12 Hirame a tloha Tire ho ea sheba metse eo Solomone a neng a mo file eona empa o ne a sa e khotsofalla.* 13 Hirame a re: “Ngoan’eso, ke metse ea mofuta ofe ee eo u mphileng eona?” Metse eo ea bitsoa Naha ea Kabule* ho fihlela letsatsing lena. 14 Hirame a romella morena khauta ea boima ba lik’hilokramo tse 4 104.*+

15 Ena ke tlaleho ea batho bao Morena Solomone a neng a ba bitselitse ho tla haha ntlo ea Jehova,+ ntlo* ea hae, Qubu,*+ lerako la Jerusalema, Hazore,+ Megido+ le Gezere.+ 16 (Faro morena oa Egepeta a hapa motse oa Gezere a ba a o chesa ’me a bolaea Bakanana+ ba neng ba lula ho oona. A o fa morali oa hae e leng mosali oa Solomone e le mpho ea karohano.)*+ 17 Solomone a haha Gezere, Bethe-horone e ka Tlase,+ 18 Baalathe+ le Tamare lefeelleng, ka har’a naha ea hae 19 hammoho le metse eohle ea Solomone ea polokelo, metse ea likariki,+ metse ea bapalami ba lipere le ntho e ’ngoe le e ’ngoe eo Solomone a neng a batla ho e haha Jerusalema, Lebanone le metseng eohle eo a neng a e busa. 20 Batho bohle bao e seng karolo ea Baiseraele+ ba neng ba setse ho Baamore, Bahethe, Bapereze, Baheve le Bajebuse,+ 21 litloholo tsa bona tse neng li setse naheng, tseo Baiseraele ba neng ba sa li felisa, Morena Solomone o ile a li bitsa hore li etse mosebetsi o boima.* E ntse e le makhoba ho fihlela letsatsing lena.+ 22 Empa ha ho na Moiseraele eo Solomone a ileng a mo etsa lekhoba+ hobane e ne e le masole a hae, bahlanka, likhosana, balaoli ba masole le balaoli ba likariki tsa hae tsa ntoa le bapalami ba lipere. 23 Ho ne ho e-na le balaoli ba matona ba 550 ba hlokometseng mosebetsi oa Solomone ba bile ba etella pele batho ba sebetsang.+

24 Morali oa Faro+ a tloha Motseng oa Davida+ a ea ntlong ea hae eo Solomone a neng a mo hahetse eona eaba Solomone o haha Qubu.*+

25 Hararo ka selemo+ Solomone o ne a etsa mahlabelo a secheso le mahlabelo a kopanetsoeng holim’a aletare eo a neng a e hahetse Jehova.+ O ne a boetse a etsa sehlabelo se kubellang mosi holim’a aletare e neng e le ka pel’a Jehova. O ile a qeta ho haha ntlo.+

26 Morena Solomone a etsa likepe tse ngata Ezione-gebere+ e haufi le Elothe, lebopong la Leoatle le Lefubelu naheng ea Edomo.+ 27 Hirame a romela bahlanka ba hae ka likepe tse ngata,+ bao e neng e le basesisi ba nang le boiphihlelo hore ba e’o sebetsa le bahlanka ba Solomone. 28 Ba ea Ofire+ ’me ba nka khauta e boima ba lik’hilokramo tse 14 364* moo eaba ba e tlisa ho Morena Solomone.

10 Mofumahali oa Sheba o ile a utloa hore Solomone o tumme ka lebaka la lebitso la Jehova.+ Kahoo, a ea ho eena ’me a mo botsa* lipotso tse thata.*+ 2 A fihla Jerusalema a tsamaea le batho ba bangata,+ likamele tse jereng oli ea balsame+ le khauta e ngata le majoe a bohlokoa. A ea ho Solomone ’me a mo botsa ntho e ’ngoe le e ’ngoe eo a neng a batla ho e tseba. 3 Morena Solomone a araba lipotso tsa hae kaofela. Ho ne ho se na potso eo a hlolehang ho e araba.

4 Ha mofumahali oa Sheba a bona kamoo Solomone a leng bohlale kateng,+ a bona ntlo eo a e hahileng,+ 5 lijo tse tafoleng ea hae,+ tsela eo bahlanka ba hae ba lutseng ka eona, basebeletsi ba hae ba fanang ka lijo tafoleng le tsela eo ba apereng ka eona, baqhatsetsi ba hae le mahlabelo a hae a secheso ao a neng a a etsa kamehla ntlong ea Jehova, a sala a maketse. 6 A re ho morena: “Bohlale ba hao le lintho tseo u li entseng tseo ke li utloileng naheng ea heso ke ’nete. 7 Ke ne ke sa kholoe ho fihlela ke tla ’me ke li bona ka mahlo a ka. Ke ne ke sa bolelloa lintlha kaofela. Empa bohlale le tsela eo u atlehileng ka eona li feta hole lintho tseo ke li utloetseng. 8 Ho thaba batho ba hao le bahlanka bana ba hao ba lulang ba e-na le uena kamehla ’me ba utloa bohlale ba hao.+ 9 Ho rorisoe Jehova Molimo oa hao+ ea u bontšitseng hore oa u rata ka ho u beha teroneng ea Iseraele. Jehova o u khethile hore u be morena e le hore u ahlole ka toka le ka ho loka hobane a rata sechaba sa hae sa Iseraele.”

10 A fa morena khauta ea boima ba lik’hilokramo tse 4 104,* oli ea balsame e ngata+ le majoe a bohlokoa.+ Le ka mohla ha hoa ka ha hlola ho tlisoa oli e ngata hakaalo ea balsame joaloka eo mofumahali oa Sheba a ileng a e tlisetsa Morena Solomone.

11 Likepe tse ngata tsa Hirame tse neng li nkile khauta e tsoang Ofire+ tsa boela tsa tlisa lifate tsa algame+ tse ngata le majoe a bohlokoa ho tsoa Ofire.+ 12 Morena a etsa litšehetso ka lifate tsa algame bakeng sa ntlo ea Jehova le ntlo* ea morena hammoho le liharepa le liletsa tse likhoele bakeng sa libini.+ Ha ho e-s’o tlisoe kapa ha bonoa lifate tse ngata hakaalo tsa algame ho fihlela letsatsing lena.

13 Ho ekelletsa ho lintho tseo Morena Solomone a neng a li file mofumahali oa Sheba ka ho rata, o ile a boela a mo fa lintho tseo a neng a li batla le tseo a neng a li kopile. Ka mor’a moo mofumahali oa Sheba a khutlela naheng ea habo le bahlanka ba hae.+

14 Boima ba khauta eo Solomone a neng a e fumana ka selemo e ne e le lik’hilokramo tse ka bang 23 000,*+ 15 ho sa baloe e tsoang ho bo-rakhoebo bohle le phaello e tsoang ho marena ’ohle a Maarabia le matona a naha.

16 Morena Solomone a etsa lithebe tse kholo tse 200 tsa khauta e kopantsoeng le tšepe+ (thebe e ’ngoe le e ’ngoe e ne e entsoe ka khauta e boima ba lik’hilokramo tse ka bang supa*)+ 17 le lithebe tse nyenyane* tse 300 tse entsoeng ka khauta e kopantsoeng le tšepe (thebe ka ’ngoe e ne e entsoe ka khauta ea boima ba lik’hilokramo tse ka bang peli.*) Morena o ile a li beha ka har’a Ntlo ea Moru oa Lebanone.+

18 Morena a boela a etsa terone e kholo ea manaka a tlou+ ’me a e koahela ka khauta e hloekileng.+ 19 Ho ne ho e-na le litepisi tse tšeletseng tse eang teroneng ’me terone e ne e e-na le ntho e kang marulelo a selika-likoe ka mor’a eona. Mahlakoreng a mabeli a setulo ho ne ho e-na le moo ho behoang matsoho, pel’a teng ho eme litau tse peli.+ 20 Ho ne ho e-na le litau tse 12 tse emeng holim’a litepisi tse tšeletseng, tse ling li le ka lehlakoreng lena, tse ling li le ka lehlakoreng lane la litepisi. Ha ho na ’muso o mong o neng o entse ntho e tšoanang le ena.

21 Likopi tsohle tsa Morena Solomone li ne li entsoe ka khauta ’me lisebelisoa tsohle tsa Ntlo ea Moru oa Lebanone+ li entsoe ka khauta. Ho ne ho se na letho le neng le entsoe ka silevera hobane e ne e nkoa e se letho mehleng ea Solomone.+ 22 Morena o ne a e-na le likepe tsa Tarshishe tse ngata+ tse neng li le leoatleng hammoho le tsa Hirame tse ngata. Hanngoe ka mor’a lilemo tse tharo likepe tse ling tsa Tarshishe li ne li tla li nkile khauta, silevera, manaka a tlou,+ litšoene le lipikoko.

23 Morena Solomone o ne a ruile a bile a le bohlale ho feta marena ’ohle a neng a le teng lefatšeng.+ 24 Batho bohle lefatšeng ba ne ba batla ho utloa ka bohlale boo Molimo a bo fileng Solomone.+ 25 Selemo le selemo e mong le e mong o ne a tlisa lintho tsa silevera le tsa khauta, liaparo, lihlomo, oli ea balsame, lipere le limmoulo.

26 Solomone a ’na a eketsa likariki tsa hae tsa ntoa le lipere. O ne a e-na le likariki tsa ntoa tse 1 400 le lipere tse 12 000.+ O ile a li beha metseng ea likariki tsa ntoa le haufi le morena Jerusalema.+

27 Morena a etsa hore silevera e Jerusalema e be ngata joaloka majoe le lifate tsa kedare li be ngata joaloka lifate tsa sikamora tse Shefela.+

28 Lipere tsa Solomone li ne li tsoa Egepeta ’me bo-rakhoebo ba morena ba ne ba reka sehlopha* sa lipere ka theko e tšoanang.+ 29 Kariki ka ’ngoe e tsoang Egepeta e ne e rekoa ka likotoana tsa silevera tse 600 ’me pere eona e rekoa ka tse 150. Ba ne ba li romela ho marena ’ohle a Bahethe+ le a Siria.

11 Morena Solomone o ne a rata basali ba balichaba+ e leng ba Bamoabe,+ ba Baamone,+ ba Baedomo, ba Basidone+ le ba Bahethe+ ho akarelletsa le morali oa Faro.+ 2 Ba ne ba tsoa lichabeng tseo Jehova a neng a itse ka tsona ho Baiseraele: “Le se ke la ikopanya le tsona ’me le tsona li se ke tsa ikopanya le lona* hobane li tla le susumeletsa* hore le sebeletse melimo ea tsona.”+ Empa Solomone o ne a ba rata haholo. 3 O ne a e-na le basali ba 700 bao e neng e le likhosatsana le lirethe* tse 300 ’me butle-butle basali ba hae ba ile ba mo khelosa. 4 Ha Solomone a se a tsofetse,+ basali ba hae ba ile ba mo khelosa hore a sebeletse melimo e meng+ ’me o ne a sa sebeletse Jehova Molimo oa hae ka pelo ea hae eohle joaloka ntate oa hae Davida. 5 Solomone a rapela Ashtorethe+ molimotsana oa Basidone le molimo ea nyonyehang oa Baamone e leng Milkome.+ 6 Solomone o ile a fosetsa Jehova, a hloleha ho sebeletsa Jehova ka pelo eohle joalokaha ntate oa hae Davida a ne a mo sebeletsa.+

7 Solomone a haha sebaka se phahameng+ bakeng sa molimo ea nyonyehang oa Moabe e leng Kemoshe le molimo ea nyonyehang oa Baamone+ e leng Moloke+ ka pel’a thaba ea Jerusalema. 8 A boela a etsa libaka tse phahameng bakeng sa basali bohle ba hae ba balichaba, ba neng ba etsa sehlabelo se kubellang mosi ba bile ba etsetsa melimo ea bona mahlabelo.

9 Jehova a halefela Solomone hobane o ne a se a sa sebeletse Jehova Molimo oa Iseraele ka pelo ea hae eohle,+ ea ileng a hlaha ho eena habeli+ 10 ’me a mo laela hore a se ke a rapela melimo e meng.+ Empa Solomone ha aa ka a mamela taelo ea Jehova. 11 Jehova a re ho Solomone: “Kaha ha oa boloka selekane sa ka ebile ha oa mamela litaelo tseo ke u fileng tsona, ke tla tlosa* ’muso ho uena ’me ke o fe e mong oa bahlanka ba hao.+ 12 Empa nke ke ka o tlosa* ha u ntse u phela ka lebaka la ntate oa hao Davida. Ke tla o tlosa ha e le mora oa hao ea busang.+ 13 Nke ke ka tlosa ’muso oo kaofela.+ Ke tla fa mora oa hao leloko le le leng,+ ka lebaka la mohlanka oa ka Davida le ka lebaka la Jerusalema eo ke e khethileng.”+

14 Jehova a tlisetsa Solomone mohanyetsi+ e leng Hadade oa Moedomo ea tsoang lelapeng la borena la Edomo.+ 15 Ha Davida a ne a hlola Edomo,+ Joabe molaoli oa masole o ile a ea ’me a pata ba neng ba bolailoe, a ba a leka ho bolaea banna bohle ba Edomo. 16 (Joabe le Baiseraele bohle ba ile ba lula moo likhoeli tse tšeletseng ho fihlela a bolaile* banna bohle ba Edomo.) 17 Empa ha Hadade e ntse e le moshanyana, a balehela Egepeta le bahlanka ba ntate oa hae ba Baedomo. 18 Ba tloha Midiane ba ea Parane. Ba nka banna Parane+ ’me ba fihla Egepeta ho Faro morena oa Egepeta ea ileng a fa Hadade ntlo, lijo le naha. 19 Faro o ne a rata Hadade haholo a ba a re a nyale ngoan’abo mofumahali* Tahapenese e leng mosali oa hae. 20 Ha nako e fihla, ngoan’abo Tahapenese a ba le mora ea bitsoang Genubathe ’me Tahapenese a mo holisetsa* ka tlung ea Faro. Genubathe a lula ntlong ea Faro joaloka e mong oa bara ba Faro.

21 Hadade a utloa a le Egepeta hore Davida le Joabe molaoli oa masole ba shoele.*+ Hadade a re ho Faro: “E-re ke tsamaee ke ee naheng ea heso.” 22 Empa Faro a re ho eena: “Na ho na le ntho eo u e hlokang e etsang hore u batle ho ea naheng ea heno?” Hadade a re ho eena: “Ha ke hloke letho empa ke kopa u ntumelle ho khutlela naheng ea heso.”

23 Molimo a boela a tlisetsa Solomone mohanyetsi e mong+ e leng Rezone mora oa Eliada, ea neng a balehile morena oa hae e leng Hadadezere+ morena oa Zoba. 24 Ha Davida a ba hlola,* o ile a ipokellela banna ’me ea e-ba molaoli oa sehlopha sa masole.+ Ba ea Damaseka+ ba lula teng ’me Rezone ea e-ba morena oa Damaseka. 25 E ile ea e-ba mohanyetsi oa Baiseraele nakong eohle ha Solomone e ntse e le morena, a eketsa mathata a neng a bakiloe ke Hadade. O ne a hloile Baiseraele nakong ea ha a ntse a busa Siria.

26 Ho ne ho e-na le Jeroboame+ mora oa Nebate oa Moefraime ea tsoang Zereda, mohlanka oa Solomone+ eo lebitso la ’mè oa hae e neng e le Zerua oa mohlolohali. Jeroboame le eena o ile a fetohela* morena.+ 27 Lebaka le entseng hore a fetohele morena ke lena: Solomone o ne a hahile Qubu*+ ’me a koetse sekheo sa Motse oa Davida ntate oa hae.+ 28 Jeroboame e ne e le monna ea matla, ea tsebang mosebetsi. Ha Solomone a bona hore mohlankana enoa o sebetsa ka thata, a mo khetha hore a okamele+ batho ba bitselitsoeng ho sebetsa ntlong ea Josefa. 29 Ka nako eo, Jeroboame a tloha Jerusalema ’me moprofeta Akija+ oa Moshilo a mo fumana tseleng. Akija o ne a apere seaparo se secha, ba ne ba le babeli feela moo. 30 Akija a tšoara seaparo se secha seo a neng a se apere ’me a se tabola likotoana tse 12. 31 A re ho Jeroboame:

“Inkele likotoana tse leshome hobane Jehova Molimo oa Iseraele o itse: ‘Ke tlosa ’muso ho Solomone ’me ke tla u fa maloko a leshome.+ 32 Empa ho tla sala leloko le le leng+ ka lebaka la mohlanka oa ka Davida+ le ka lebaka la Jerusalema, motse oo ke o khethileng har’a maloko ’ohle a Iseraele.+ 33 Ke tla etsa sena hobane ba ntahlile+ ’me ba rapela Ashtorethe molimotsana oa Basidone, Kemoshe molimo oa Moabe le Milkome molimo oa Baamone. Hape ba entse se sebe mahlong a ka ’me ha baa mamela litaelo tsa ka joalokaha Davida ntate oa Solomone a ne a li mamela. 34 Empa nke ke ka nka ’muso kaofela ho eena, e tla ba morena bophelo bohle ba hae ka lebaka la mohlanka oa ka Davida eo ke mo khethileng+ hobane o ne a mamela melao ea ka le litaelo tsa ka. 35 Ke tla tlosa ’muso ho mora oa hae ’me ke u fe oona e leng maloko a leshome.+ 36 Ke tla fa mora oa hae leloko le le leng e le hore ho ka lula ho e-na le e mong* oa leloko la mohlanka oa ka Davida ea busang Jerusalema,+ motse oo ke ikhethetseng oona e le sebaka seo ke tla beha lebitso la ka ho sona. 37 Ke tla khetha uena ’me u tla busa hohle moo u ratang, u tla ba morena oa Iseraele eohle. 38 Haeba u mamela lintho tsohle tseo ke u laelang tsona, u etsa se setle mahlong a ka ka hore u mamele litaelo le melao ea ka joaloka mohlanka oa ka Davida,+ le uena ke tla ba le uena. Litloholo tsa hao li tla busa ka ho sa feleng joaloka tsa mohlanka oa ka Davida+ ’me ke tla u fa Iseraele. 39 Ke tla etsa hore litloholo tsa Davida li hlajoe ke lihlong ka lebaka la liketso tsa tsona tse mpe+ empa nke ke ka etsa joalo kamehla.’”+

40 Solomone a leka ho bolaea Jeroboame empa Jeroboame a balehela Egepeta ho Shishake+ morena oa Egepeta+ ’me a lula moo ho fihlela Solomone a shoa.

41 Histori eohle ea Solomone, lintho tsohle tseo a li entseng le bohlale ba hae li ngotsoe bukeng ea histori ea Solomone.+ 42 Solomone o busitse Iseraele eohle a le Jerusalema ka lilemo tse 40. 43 Solomone a shoa* eaba o pateloa Motseng oa Davida ntate oa hae. Mora oa hae Roboame+ ea e-ba morena.

12 Roboame a ea Shikeme hobane Baiseraele bohle ba ne ba tlile Shikeme+ ho tla mo etsa morena.+ 2 Ha Jeroboame mora oa Nebate a utloa ka taba ena, (o ne a ntse a lula Egepeta hobane o ne a balehile Morena Solomone)+ 3 ba mo bitsa. Ka mor’a moo, Jeroboame le Baiseraele bohle ba tla ho Roboame ’me ba re: 4 “Ntate oa hao o ne a re imelitse.+ Empa haeba u ka fokotsa mosebetsi o boima oo a re fileng oona ’me oa re tšoara hantle, re tla u sebeletsa.”

5 A re ho bona: “Tsamaeang ’me le khutlele ho ’na ka mor’a matsatsi a mararo.” Ba tsamaea.+ 6 Morena Roboame a buisana le banna ba baholo* ba neng ba sebeletsa ntate oa hae Solomone ha a ntse a phela a re: “Le ka nkeletsa hore ke re’ng ho sechaba see?” 7 Ba re ho eena: “Haeba kajeno u tla araba batho bana hantle, u be joaloka mohlanka ho bona ’me u lumele kopo ea bona, ba tla lula ba u sebeletsa.”

8 Roboame a se ke a mamela keletso eo banna ba baholo ba ileng ba mo fa eona empa o ile a buisana le bahlankana bao a hotseng le bona bao e neng e se e le basebeletsi ba hae.+ 9 A re ho bona: “Ke re’ng ho batho baa ba itseng ke fokotse mosebetsi o boima oo ntate oa ka a ba fileng oona?” 10 Bahlankana bao a hotseng le bona ba re ho eena: “Bolella batho ba itseng ntate oa hao o ne a ba imelitse hore u tla ba imetsa ho feta ntate oa hao.* 11 E-re ho bona: ‘Ntate oa ka o ne a le imelitse empa ’na ke tla le imetsa le ho feta. Ntate oa ka o le shapile ka liphali empa ’na ke tla le shapa ka liphali tse nang le metsu.’”

12 Jeroboame le batho bohle ba tla ho Roboame ka letsatsi la boraro feela joalokaha a ne a itse ba khutle.+ 13 Morena a se ke a mamela keletso eo banna ba baholo ba mo fileng eona ’me a araba batho hampe. 14 Morena a bua le bona ho ea ka keletso eo bahlankana ba neng ba mo file eona a re: “Ntate oa ka o ne a le imelitse empa ’na ke tla le imetsa le ho feta. Ntate oa ka o le shapile ka liphali empa ’na ke tla le shapa ka liphali tse nang le metsu.” 15 Morena a hana ho mamela sechaba hobane Jehova o ile a etsa hore ho be joalo+ e le hore ho ka phethahala mantsoe ao Jehova a a buileng ho Jeroboame mora oa Nebate a sebelisa Akija+ oa Moshilo.

16 Ha Baiseraele bohle ba bona hore morena o hana ho ba mamela, ba re ho eena: “Ha ho na letho le re kopanyang le Davida ebile ha re na lefa ho mora oa Jese. Baiseraele, a re khutleleng ho melimo ea rona. Hlokomela ntlo ea hao uena Davida.” Baiseraele ba khutlela malapeng* a bona.+ 17 Roboame a ’na a busa Baiseraele ba lulang metseng ea Juda.+

18 Morena Roboame a roma Adorame+ ea neng a etella pele batho ba bitselitsoeng ho sebeletsa morena empa Baiseraele bohle ba mo tlepetsa ka majoe. Morena Roboame a khona ho kena ka kariking ea hae ea ntoa e le hore a balehele Jerusalema.+ 19 Haesale Baiseraele ba fetohela+ ntlo ea Davida ho fihlela letsatsing lena.

20 Hang ha Baiseraele ba utloa hore Jeroboame o khutlile, ba mo bitsetsa ka pel’a sechaba ’me ba mo etsa morena oa Iseraele eohle.+ Ke leloko la Juda feela le ileng la latela ntlo ea Davida.+

21 Ha Roboame a fihla Jerusalema, a bokella banna bohle ba leloko la Juda le la Benjamine e leng masole a koetlisitsoeng* a 180 000 hore a loantše ba ntlo ea Iseraele e le hore a khutlisetse borena ho eena.+ 22 Molimo oa ’nete a bua le Shemaia+ mohlanka oa Molimo oa ’nete a re: 23 “E-re ho Roboame mora oa Solomone morena oa Juda le ho leloko lohle la Juda, la Benjamine le sechaba sohle, 24 ‘Jehova o re: “Le se ke la e’o loantša bana ba bo lona ba Baiseraele. E mong le e mong a khutlele ha hae hobane ke ’na ea entseng hore ntho ena e etsahale.”’”+ Ba mamela seo Jehova a se buileng ’me ba khutlela malapeng a bona feela joalokaha Jehova a ba laetse.

25 Jeroboame a haha* Shikeme+ e lithabeng tsa Efraime ’me a lula teng. A tloha moo a e’o haha Penuele.+ 26 Jeroboame a re ka pelong: “ ’Muso o tla khutlela ntlong ea Davida.+ 27 Haeba sechaba sena se tsoela pele ho etsa mahlabelo ntlong ea Jehova e Jerusalema,+ se* tla khutlela ho morena oa sona, morena Roboame oa Juda. Se tla mpolaea ’me se khutlele ho eena.” 28 Ka mor’a hore morena a fumane keletso, a etsa manamane a mabeli a khauta+ ’me a re ho sechaba: “Jerusalema e hole. Molimo oa lona ea le ntšitseng naheng ea Egepeta ke enoa lona Baiseraele.”+ 29 A beha e ’ngoe Bethele+ ’me e ’ngoe a e beha Dane.+ 30 Ntho ena ea etsa hore ba etse sebe+ ebile sechaba se ne se ea Dane ho ea rapela namane e neng e le moo.

31 A etsa matlo a borapeli ka holim’a libaka tse phahameng ’me a khetha baprista ho batho feela bao e neng e se Balevi.+ 32 Ka la 15 khoeling ea borobeli, Jeroboame a etsa mokete o joaloka mokete oa Juda.+ A etsa mahlabelo aletareng e Bethele+ bakeng sa manamane ao a neng a a entse le ho beha baprista libakeng tse phahameng tseo a neng a li entse Bethele. 33 A etsa linyehelo aletareng e Bethele ka la 15 khoeling ea borobeli e leng khoeli eo a neng a iqapetse eona. A etsetsa sechaba sa Iseraele mokete ’me a nyolohela aletareng ho ea etsa linyehelo le sehlabelo se kubellang mosi.

13 Mohlanka oa Molimo a fihla Bethele a tsoa Juda joalokaha Jehova a ne a mo laetse+ ’me a fumana Jeroboame a eme aletareng+ a etsa mahlabelo a kubellang mosi. 2 A hoeletsa aletare ho ea ka taelo ea Jehova a re: “Uena aletare, aletare! Jehova o re: ‘Ho tla hlaha mora lapeng la Davida eo lebitso la hae e leng Josiase.+ O tla etsa mahlabelo ka baprista ba libaka tse phahameng ba etsang mahlabelo a kubellang mosi holim’a hao ’me o tla chesa masapo a batho holim’a hao.’”+ 3 A fana ka letšoao* letsatsing leo a re: “Lena ke letšoao leo Jehova a faneng ka lona: Aletare e tla petsoloa ’me molora* o ho eona o qhaloe.”

4 Hang ha morena Jeroboame a utloa seo mohlanka oa Molimo oa ’nete a se buileng ka aletare e Bethele, a tlosa letsoho aletareng, a le otlolla a re: “Mo tšoareng!”+ Hang-hang letsoho leo a neng a mo supile ka lona la omella* eaba o hloleha ho le khutlisa.+ 5 Aletare ea petsoha le molora oa qhalana aletareng ho ea ka letšoao* leo mohlanka oa Molimo oa ’nete a neng a fane ka lona ho latela taelo ea Jehova.

6 Morena a re ho mohlanka oa Molimo oa ’nete: “Ke kopa u nkopele mohau ho* Jehova Molimo oa hao ’me u rapelle hore letsoho la ka le fole.”+ Mohlanka oa Molimo oa ’nete a kopa mohau ho Jehova ’me letsoho la morena la fola. 7 Morena a re ho mohlanka oa Molimo oa ’nete: “Tloo le ’na ntlong u tl’o ja lijo ’me u ntumelle hore ke u fe mpho.” 8 Empa mohlanka oa Molimo oa ’nete a re ho morena: “Le haeba u ne u ka mpha halofo ea ntlo ea hao, ke ne ke sa tl’o tsamaea le uena le ho ja kapa ho noa metsi sebakeng sena 9 hobane Jehova o ntaetse a re: ‘U se ke oa ja bohobe kapa oa noa metsi hape u se ke oa khutla ka tsela eo u ileng ka eona.’” 10 O ile a khutla ka tsela e ’ngoe, eseng eo a tlileng ka eona Bethele.

11 Ho ne ho e-na le moprofeta e mong ea tsofetseng ea lulang Bethele. Bara ba hae ba ile ba tla ’me ba mo bolella lintho tsohle tseo mohlanka oa Molimo oa ’nete a li entseng Bethele letsatsing leo le seo a neng a se buile ho morena. Ka mor’a hore ba mo bolelle lintho tsena, 12 a re ho bona: “Mohlanka eo o tsamaile ka tsela efe?” Bara ba hae ba mo bontša tsela eo mohlanka oa Molimo oa ’nete a tsamaileng ka eona ho tloha Juda. 13 A re ho bara ba hae: “Nqhaneheleng tonki.” Ba mo qhanehela tonki a e palama.

14 A latela mohlanka oa Molimo oa ’nete eaba o mo fumana a lutse tlas’a sefate se seholo. A re ho eena: “Na ke uena mohlanka oa Molimo oa ’nete ea tsoang Juda?”+ A re: “Ke ’na.” 15 A re ho eena: “Tloo lapeng la ka u tl’o ja.” 16 Empa mohlanka oa Molimo oa ’nete a re: “Nke ke ka khona ho tsamaea le uena kapa ho amohela kopo ea hao ebile nke ke ka ja kapa ka noa metsi le uena sebakeng sena 17 hobane Jehova o itse ho ’na, ‘U se ke oa ja kapa oa noa metsi moo. U se ke oa khutla ka tsela eo u ileng ka eona.’” 18 A re ho mohlanka oa Molimo oa ’nete: “Le ’na ke moprofeta joaloka uena ’me lengeloi le buile le ’na le laetsoe ke Jehova la re, ‘E-re a khutlele le uena ntlong ea hao e le hore a ka ja bohobe ’me a noa metsi.’” (O ne a mo thetsa.) 19 Mohlanka oa Molimo oa ’nete a tsamaea le eena ho ea ja le ho noa metsi ntlong ea hae.

20 Ha ba ntse ba lutse tafoleng, Jehova a bua le moprofeta ea tsofetseng 21 ’me moprofeta eo a hoeletsa mohlanka oa Molimo oa ’nete ea tsoang Juda a re, “Jehova o re kaha u fetohetse taelo ea Jehova ’me ha oa mamela taelo eo Jehova Molimo oa hao a u fileng eona 22 empa u khutlile ’me u jele le ho noa metsi sebakeng seo ke itseng u se ke oa etsa joalo ho sona, setopo sa hao se ke ke sa pateloa mabitleng a baholo-holo ba hao.”+

23 Ka mor’a hore mohlanka oa Molimo oa ’nete a je ’me a noe, moprofeta ea tsofetseng a mo qhanehela tonki. 24 A tsamaea empa tau ea mo fumana tseleng ea mo bolaea.+ Setopo sa hae se ne se rapaletse tseleng, tonki le tau li eme pel’a sona. 25 Banna ba babeli ba neng ba feta, ba ile ba bona setopo seo ’me tau e ne e eme pel’a sona. Ba fihla ba bolella batho ba motse oo moprofeta ea tsofetseng a neng a lula ho oona.

26 Ha moprofeta ea tsofetseng* a utloa ka taba ena, hang-hang a re: “Ke mohlanka oa Molimo oa ’nete ea fetohetseng taelo ea Jehova.+ Jehova o entse hore tau e mo hlasele e be e mo bolaee ho ea ka taelo eo Jehova a neng a mo file eona.”+ 27 A re ho bara ba hae: “Nqhaneheleng tonki.” Ba e qhaneha. 28 A tsamaea ’me a fumana setopo seo se rapaletse tseleng, tonki le tau li eme pel’a sona. Tau e ne e sa se ja ebile e sa hlasela tonki. 29 Moprofeta ea tsofetseng a nka setopo sa mohlanka oa Molimo oa ’nete ’me a se beha holim’a tonki, a tla le sona motseng oa habo ’me a mo llela eaba oa mo pata. 30 A pata setopo seo ka lebitleng la hae ’me ba ’na ba mo llela ba re: “Ao ngoan’eso!” 31 A re ho bara ba hae: “Ha ke shoa le mpatele sebakeng seo mohlanka oa Molimo oa ’nete a patetsoeng ho sona. Le behe masapo a ka pel’a masapo a hae.+ 32 Mantsoe ao a a buileng ho ea ka taelo ea Jehova ka aletare e Bethele le ka matlo ’ohle a borapeli a libakeng tse phahameng+ metseng ea Samaria a tla phethahala.”+

33 Le ka mor’a ntho ena, Jeroboame ha aa ka a tlohela lintho tse mpe tseo a neng a li etsa empa o ile a ’na a khetha baprista ba libaka tse phahameng har’a batho feela.+ O ne a khetha* motho e mong le e mong ea neng a batla ho ba moprista a re: “Mo khetheng hore e be moprista oa libaka tse phahameng.”+ 34 Sebe sena se ileng sa etsoa ke ba lelapa la Jeroboame,+ se ile sa etsa hore ba felisoe lefatšeng.+

14 Abija mora oa Jeroboame a kula. 2 Jeroboame a re ho mosali oa hae: “Ke kopa u ee Shilo ’me u etse eka ha u mosali oa ka e le hore ba se ke ba u tseba. Moprofeta Akija o moo. Ke eena ea ileng a re ke tla ba morena oa sechaba sena.+ 3 Tsamaea u ee ho eena u nkile lilofo tsa bohobe tse leshome, likuku le botlolo ea mahe a linotši. O tla u bolella hore na ho tla etsahala’ng ka moshanyana enoa.”

4 Mosali oa Jeroboame a etsa seo a se buileng. A ea Shilo+ ’me a fihla ntlong ea Akija. Mahlo a Akija a ne a shebile pele feela hobane o ne a sa bone ka lebaka la botsofali.

5 Empa Jehova o ne a itse ho Akija: “Mosali oa Jeroboame oa tla o tl’o kopa thuso ho uena hobane mora oa hae oa kula. Ke tla u bolella hore na u re’ng ho eena.* Ha a fihla o tla be a ikentse eka ke motho e mong.”

6 Hang ha Akija a utloa hore ho na le motho ea tlang monyako a re: “Kena uena mosali oa Jeroboame. Ke hobane’ng ha u ipatile? Ho itsoe ke u fe molaetsa o bohloko. 7 E-ea ho Jeroboame u mo bolelle hore Jehova Molimo oa Iseraele o re: ‘Ke u khethile har’a sechaba sa heno e le hore ke u etse moeta-pele oa sechaba sa ka sa Iseraele.+ 8 Ka tlosa ’muso lelapeng la Davida ’me ka u fa oona.+ Empa ha oa ba joaloka mohlanka oa ka Davida, ea ileng a mamela melao ea ka ka pelo eohle ea hae ’me a etsa lintho tse nepahetseng feela mahlong a ka.+ 9 Empa u entse lintho tse mpe ho feta marena ’ohle a busitseng pele ho uena ’me u iketselitse molimo le litšoantšo tsa tšepe* e le hore u nketsetse sebe+ ebile u ntahlile.+ 10 Ka lebaka leo, ke tlisa tlokotsi lelapeng la Jeroboame. Ke tla felisa bohle ba batona* lelapeng la hae, ho akareletsa le ba se nang thuso le ba se nang matla Iseraele. Ke tla fiela lelapa la Jeroboame+ feela joalokaha motho a tlosa bolokoe ho fihlela bo felile. 11 Mang kapa mang oa lelapa la Jeroboame ea shoellang motseng o tla jeoa ke lintja ’me ea shoellang naheng o tla jeoa ke linonyana kaha Jehova o boletse.’

12 Tsamaea u ee ha hao. Ha u fihla motseng, ngoana o tla shoa. 13 Baiseraele bohle ba tla mo llela ’me ba mo pate hobane ke eena feela oa lelapa la Jeroboame ea tla pateloa lebitleng. Ke eena feela oa lelapa la Jeroboame eo Jehova Molimo oa Iseraele a fumaneng ntho e ntle ho eena. 14 Jehova o tla ikhethela morena ea tla busa Iseraele. Morena eo o tla felisa ba lelapa la Jeroboame,+ ho tloha letsatsing leo ho ea pele ’me letsatsi leo le se le fihlile. 15 Jehova o tla otla Iseraele hore e thekesele joaloka lehlaka ka metsing ’me o tla tlosa Baiseraele naheng ena e ntle eo a e fileng baholo-holo ba bona,+ a ba hasanye ka nģ’ane ho Noka*+ hobane ba iketselitse lipalo tse halalelang*+ ’me ba foselitse Jehova. 16 O tla lahla Baiseraele ka lebaka la libe tseo Jeroboame a li entseng le tseo a entseng hore Baiseraele ba li etse.”+

17 Mosali oa Jeroboame a ea Tirza. Ha a fihla monyako oa ntlo, moshanyana a shoa. 18 Ba mo pata ’me Baiseraele bohle ba mo llela, ho ea kamoo Jehova a neng a buile a sebelisa mohlanka oa hae moprofeta Akija.

19 Histori eohle ea Jeroboame, kamoo a ileng a loana+ le ho busa kateng, e ngotsoe bukeng ea histori ea marena a Iseraele. 20 Jeroboame o ile a busa ka lilemo tse 22 eaba oa shoa.*+ Mora oa hae Nadabe ea e-ba morena.+

21 Roboame mora oa Solomone e ne e le eena morena oa Juda. Roboame o ne a le lilemo li 41 ha e e-ba morena. O busitse Jerusalema ka lilemo tse 17 e leng motse oo Jehova a neng a o khethile+ malokong ’ohle a Iseraele e le sebaka seo a tla beha lebitso la hae ho sona.+ Lebitso la ’mè oa Roboame e ne e le Naama oa Moamone.+ 22 Bajuda ba ne ba etsa lintho tse sa thabiseng Jehova+ ’me libe tseo ba ileng ba li etsa li ile tsa mo halefisa ho feta kamoo baholo-holo ba bona ba ileng ba mo halefisa kateng.+ 23 Le bona ba ile ba ikahela libaka tse phahameng, lipilara tse halalelang le lipalo tse halalelang*+ holim’a maralla ’ohle a phahameng+ le tlas’a lifate tsohle tse ntle tse tala.+ 24 Ho ne ho boetse ho e-na le matekatse a banna naheng.+ Sechaba sohle se ne se etsa lintho tsohle tse mpe tseo lichaba tseo Jehova a ileng a li leleka ka pel’a Baiseraele li neng li li etsa.

25 Ka selemo sa bohlano Morena Roboame a busa, Morena Shishake+ oa Egepeta a hlasela Jerusalema.+ 26 A nka matlotlo a ntlo ea Jehova le a ntlo ea morena.*+ A nka le lintho tsohle, ho akareletsa le lithebe tsa khauta tseo Solomone a neng a li entse.+ 27 Morena Roboame a etsa lithebe tsa koporo sebakeng sa tseo ’me a re li hlokomeloe ke balaoli ba balebeli* ba neng ba lebela monyako oa ntlo ea morena. 28 Neng kapa neng ha morena a tla ntlong ea Jehova, balebeli ba ne ba nka lithebe tseo ’me ba li khutlisetsa kamoreng ea balebeli.

29 Histori eohle ea Roboame le lintho tsohle tseo a li entseng, li ngotsoe bukeng ea histori ea marena a Juda.+ 30 Roboame le Jeroboame ba ne ba lula ba loantšana.+ 31 Roboame a shoa* eaba o pateloa Motseng oa Davida.+ Lebitso la ’mè oa hae e ne e le Naama oa Moamone.+ Mora oa hae Abijame*+ ea e-ba morena.

15 Ha Morena Jeroboame+ mora oa Nebate a e-na le lilemo tse 18 a busa, Abijame ea e-ba morena oa Juda.+ 2 O ile a busa Jerusalema ka lilemo tse tharo. Lebitso la ’mè oa hae e ne e le Maaka+ setloholo sa Absalome.* 3 A etsa libe tse tšoanang le tseo ntate oa hae a neng a li etsa. O ne a sa sebeletse Jehova Molimo oa hae ka pelo ea hae eohle joalokaha moholo-holo oa hae Davida a ne a mo sebeletsa. 4 Leha ho le joalo, ka lebaka la Davida,+ Jehova Molimo oa hae o ile a etsa hore ho be le e mong oa leloko la hae ea busang Jerusalema+ ka hore a etse hore mora oa hae a buse ’me a boloke Jerusalema e le teng. 5 Davida o ile a etsa lintho tse thabisang Jehova, a etsa lintho tsohle tseo a neng a mo laetse tsona bophelo bohle ba hae, ntle le tabeng ea Uria oa Mohethe.+ 6 Bophelong bohle ba Roboame, ho bile le ntoa pakeng tsa hae le Jeroboame.+

7 Histori eohle ea Abijame le lintho tsohle tseo a ileng a li etsa, li ngotsoe bukeng ea histori ea marena a Juda.+ Hape Abijame le Jeroboame ba ile ba loana.+ 8 Abijame a shoa* ’me a pateloa Motseng oa Davida. Mora oa hae Asa+ ea e-ba morena.+

9 Ha morena Jeroboame a e-na le lilemo tse 20 a busa Iseraele, Asa e ile ea e-ba morena oa Juda. 10 O busitse Jerusalema ka lilemo tse 41. Lebitso la nkhono oa hae e ne e le Maaka+ setloholo sa Absalome.* 11 Asa a etsa lintho tse thabisang Jehova+ joaloka moholo-holo oa hae Davida. 12 O ile a tlosa matekatse a banna* naheng+ ’me a tlosa le litšoantšo tsohle tse rapeloang tse nyonyehang* tseo baholo-holo ba hae ba neng ba li entse.+ 13 A tlosa le nkhono oa hae Maaka+ boemong ba bofumahali hobane o ne a etselitse palo e halalelang* setšoantšo se rapeloang se nyonyehang. Asa o ile a liha setšoantšo seo,+ a se chesetsa Khohlong ea Kidrone.+ 14 Empa libaka tse phahameng ha lia ka tsa tlosoa.+ Leha ho le joalo, Asa o ile a sebeletsa Jehova ka pelo eohle bophelo bohle ba hae. 15 A tlisa lintho tseo eena le ntate oa hae ba li halalelitseng ka tlung ea Jehova e leng silevera, khauta le lisebelisoa tse fapa-fapaneng.+

16 Asa le Basha+ morena oa Iseraele ba ne ba lula ba loantšana. 17 Morena Basha oa Iseraele a hlasela Juda ’me a haha* Rama+ e le hore ho se ke ha e-ba le motho ea tsoang kapa ea kenang Juda ho Morena Asa.+ 18 Morena Asa a nka silevera le khauta eohle e neng e setse matlotlong a ntlo ea Jehova le a ntlo* ea morena ’me a e fa bahlanka ba hae. A ba romela ho Ben-hadade mora oa Tabrimone mora oa Hezione, morena oa Siria+ ea neng a lula Damaseka a re: 19 “Ke entse selekane le uena joalokaha ntate oa ka a ne a se entse le ntate oa hao. Ke u romella mpho ea silevera le khauta. Tloo ’me u khaole selekane sa hao le Morena Basha oa Iseraele e le hore a ka ntlohela.” 20 Ben-hadade a mamela Morena Asa ’me a romela balaoli ba hae ba masole hore ba hlasele metse ea Iseraele. Ba hapa motse oa Ijone,+ Dane,+ Abele-bethe-maaka, Kinerethe eohle le naha eohle ea Nefthali. 21 Ha Basha a utloa ka taba ena, hang-hang a tlohela ho haha* Rama ’me a ’na a lula Tirza.+ 22 Morena Asa a bitsa Bajuda bohle, ha aa ka a siea le ea mong ’me ba nka majoe le lifate tsa Rama tseo Basha a neng a haha* ka tsona eaba Morena Asa o haha Geba+ e Benjamine le Mizpa+ ka tsona.

23 Histori eohle ea Asa, matla a hae, lintho tsohle tseo a ileng a li etsa le metse eo a ileng a e haha,* li ngotsoe bukeng ea histori ea marena a Juda. Botsofaling ba hae o ile a tšoaroa ke maoto.+ 24 Asa a shoa* ’me a pateloa Motseng oa Davida moholo-holo oa hae. Mora oa hae Josafate+ ea e-ba morena.

25 Nadabe+ mora oa Jeroboame e ile ea e-ba morena oa Iseraele ha Morena Asa a e-na le lilemo tse peli a busa Juda. Nadabe o busitse Iseraele ka lilemo tse peli. 26 A ’na a fosetsa Jehova le ho etsa lintho tse mpe tseo ntate oa hae a neng a li etsa+ ’me a etsa sebe se tšoanang le seo ntate oa hae a ileng a etsa hore Baiseraele ba se etse.+ 27 Basha mora oa Akija oa lelapa la Isakare a rera ho mo bolaea, a mo bolaela Gibethone+ eo e neng e le ea Bafilista, ha Nadabe le Baiseraele bohle ba thibeletse Gibethone. 28 Ha Morena Asa a e-na le lilemo tse tharo a busa Juda, Basha o ile a bolaea Nadabe ’me ea e-ba morena oa Iseraele. 29 Hang ha e e-ba morena, a bolaea bohle ba lelapa la Jeroboame, ha aa ka a siea le a le mong. O ile a ba felisa ho ea ka seo Jehova a neng a se buile ho mohlanka oa hae Akija oa Moshilo.+ 30 O ile a etsa sena ka lebaka la libe tseo Jeroboame a neng a li entse le tseo a neng a entse hore Baiseraele ba li etse le hobane a ne a foselitse Jehova Molimo oa Iseraele. 31 Histori eohle ea Nadabe le lintho tsohle tseo a li entseng li ngotsoe bukeng ea histori ea marena a Iseraele. 32 Asa le Morena Basha oa Iseraele ba ile ba lula ba loantšana.+

33 Ha Morena Asa a e-na le lilemo tse tharo a busa Juda, Basha mora oa Akija ea e-ba morena oa Baiseraele bohle Tirza ’me a busa ka lilemo tse 24.+ 34 Empa o ile a ’na a fosetsa Jehova+ ’me a etsa sebe seo Jeroboame a ileng a etsa hore Baiseraele ba se etse.+

16 Jehova a bua ka Basha ho Jehu+ mora oa Hanani+ a re: 2 “Ke u phahamisitse u le tlase ’me ka u etsa moeta-pele oa sechaba sa ka sa Iseraele+ empa u ile oa ’na oa etsa liketso tse tšoanang le tsa Jeroboame ’me oa etsa hore sechaba sa ka sa Iseraele se etse sebe e le hore se nkutloise bohloko.+ 3 Ke tla felisa Basha le ba lelapa la hae ’me ke etse hore lelapa la hae le be joaloka lelapa la Jeroboame+ mora oa Nebate. 4 Bohle ba lelapa la Basha ba shoellang motseng ba tla jeoa ke lintja ’me ba shoellang naheng ba jeoe ke linonyana.”

5 Histori eohle ea Basha, lintho tseo a li entseng le matla a hae li ngotsoe bukeng ea histori ea marena a Iseraele. 6 Basha a shoa* ’me a pateloa Tirza.+ Ela mora oa hae ea e-ba morena. 7 Jehova o ile a bua le moprofeta Jehu mora oa Hanani ka Basha le ba lelapa la hae ka lebaka la lintho tse mpe tseo a li entseng mahlong a Jehova joaloka lelapa la Jeroboame le hobane a ile a bolaea Nadabe.+

8 Ha Morena Asa a e-na le lilemo tse 26 a busa Juda, Ela mora oa Basha ea e-ba morena oa Iseraele Tirza ’me a busa ka lilemo tse peli. 9 Ha Morena Ela a le Tirza a ntse a noa e le hore a tahoe ntlong ea Arza, ea neng a eteletse pele lelapa la morena motseng oa Tirza, mohlanka oa hae Zimri ea neng a etella pele halofo ea likariki tsa hae tsa ntoa, a rera ho mo bolaea. 10 Zimri a tla, a mo otla+ ’me a mo bolaea. Ka nako eo Morena Asa o ne a e-na le lilemo tse 27 a busa Juda ’me Zimri ea e-ba morena. 11 Ha a lula teroneng ’me e e-ba morena, o ile a bolaea bohle ba lelapa la Basha. Ha aa ka a siea leha e le ea mong e motona* ebang ke eo a amanang* le eena kapa metsoalle ea hae. 12 Zimri a felisa bohle ba lelapa la Basha, ho ea ka seo Jehova a neng a se buile ka eena a sebelisa moprofeta Jehu.+ 13 Sena se etsahetse ka lebaka la libe tseo Basha le mora oa hae Ela ba neng ba li entse le libe tseo ba entseng hore Baiseraele ba li etse ka ho fosetsa Jehova Molimo oa Iseraele ka litšoantšo tsa bona tse rapeloang tse se nang thuso.+ 14 Histori eohle ea Ela le lintho tsohle tseo a li entseng li ngotsoe bukeng ea histori ea marena a Iseraele.

15 Ha Morena Asa a e-na le lilemo tse 27 a busa Juda, Zimri ea e-ba morena Tirza ka matsatsi a supileng nakong eo masole a neng a hlomme litente e le hore a hlasele Gibethone,+ eo e neng e le ea Bafilista. 16 Masole a neng a hlomme litente a utloa ho thoe Zimri o entse bolotsana ebile o bolaile morena. Baiseraele bohle ba khetha Omri+ molaoli oa masole hore e be morena oa Iseraele letsatsing leo hona moo litenteng. 17 Omri le Baiseraele bohle ba nang le eena ba tloha Gibethone ho ea thibella Tirza. 18 Ha Zimri a bona hore motse o hapiloe, a kena ka toreng e sireletsehileng ea ntlo* ea morena ’me a icheselletsa ka tlung eaba oa shoa.+ 19 Sena se etsahetse ka lebaka la libe tseo a neng a li entse tse neng li sa thabise Jehova, liketso tsa hae tse tšoanang le tsa Jeroboame le sebe seo a entseng hore Baiseraele ba se etse.+ 20 Histori eohle ea Zimri le morero oa hae oa bolotsana, li ngotsoe bukeng ea histori ea marena a Iseraele.

21 Ka nako eo sechaba sa Iseraele sa ikarola lihlopha tse peli. Sehlopha se seng sa latela Tibni mora oa Ginathe ’me sa batla ho mo etsa morena, se seng sa latela Omri. 22 Batho ba neng ba latela Omri ba hlola batho ba neng ba latela Tibni mora oa Ginathe. Tibni a shoa ’me Omri ea e-ba morena.

23 Ha Morena Asa a e-na le lilemo tse 31 a busa Juda, Omri ea e-ba morena oa Iseraele ’me a busa ka lilemo tse 12. Tirza teng a busa ka lilemo tse tšeletseng. 24 A reka thaba ea Samaria ho Shemere ka silevera ea boima bo ka etsang lik’hilokramo tse 68* ’me a haha motse holim’a thaba eo. Motse oo a neng a o hahile Samaria*+ a o rehella ka Shemere e leng mong’a* thaba eo. 25 Omri a ’na a etsa lintho tse sa thabiseng Jehova. O ne a etsa lintho tse mpe ho feta bohle ba tlileng pele ho eena.+ 26 O ile a etsa liketso tse tšoanang le tsa Jeroboame mora oa Nebate. A etsa sebe se tšoanang le seo Jeroboame a se entseng sa hore a etse hore Baiseraele ba fosetse Jehova Molimo oa Iseraele ka litšoantšo tsa bona tse rapeloang tse se nang thuso.+ 27 Histori eohle ea Omri, lintho tseo a li entseng le matla a hae li ngotsoe bukeng ea histori ea marena a Iseraele. 28 Omri a shoa* ’me a pateloa Samaria. Mora oa hae Akabe+ ea e-ba morena.

29 Ha Morena Asa a e-na le lilemo tse 38 a busa Juda, Akabe mora oa Omri ea e-ba morena oa Iseraele. A busa Iseraele e Samaria+ ka lilemo tse 22. 30 Akabe mora oa Omri a etsa lintho tse sa thabiseng Jehova ho feta marena ’ohle a busitseng pele ho eena.+ 31 O ne a etsa libe tseo Jeroboame+ mora oa Nebate a li entseng. O ile a boela a nyala Jezebele+ morali oa Ethebaale morena oa Basidone+ ’me a sebeletsa Baale+ le ho mo rapela. 32 Hape a etsetsa Baale aletare ka tlung* ea Baale+ eo a neng a e hahile Samaria. 33 Akabe a boela a etsa palo e halalelang.*+ O ile a fosetsa Jehova Molimo oa Iseraele ho feta marena ’ohle a Iseraele a busitseng pele ho eena.

34 Ha Akabe a ntse a busa, Hiele oa Mobethele a haha Jeriko bocha. Ha a ne a haha motheo oa eona, mora oa hae oa letsibolo e leng Abirame o ile a shoa ’me ha a kenya mamati a eona, mora oa hae e monyenyane Segube le eena a shoa. Sena ke seo Jehova a ileng a se bua a sebelisa Joshua mora oa Nune.+

17 Elia*+ oa Motishba moahi oa Gileade+ a re ho Akabe: “Ke hlapanya ka Jehova Molimo oa Iseraele ea phelang eo ke mo sebeletsang* hore lilemong tsena ho ke ke ha e-ba le phoka kapa pula ntle le haeba ke bolela hore li tla ba teng.”+

2 Jehova a bua le Elia a re: 3 “Tloha mona u tsamaee ka tsela e eang bochabela ’me u ipate Khohlong ea Kerithe e ka bochabela ho Jordane. 4 U noe metsi nokaneng ’me ke tla laela makhoaba hore a u tlisetse lijo moo.”+ 5 Ka potlako a etsa seo Jehova a mo laetseng sona, a tsamaea ’me a lula Khohlong ea Kerithe e ka bochabela ho Jordane. 6 Makhoaba a ne a mo tlisetsa bohobe le nama hoseng le mantsiboea ’me o ne a noa metsi nokaneng.+ 7 Ka mor’a matsatsi nokana ea psha+ hobane pula e ne e sa ne.

8 Jehova a bua le Elia a re: 9 “E-ea Sarepta ea Basidone ’me u lule teng. Ke tla laela mosali oa mohlolohali moo hore a u fe lijo.”+ 10 A tsamaea a ea Sarepta. Ha a fihla keiting ea motse, ho ne ho e-na le mosali oa mohlolohali ea ntseng a roalla patsi. Elia a mo hoeletsa a re: “Ke kopa u ntlisetse metsi a manyenyane e le hore ke noe.”+ 11 Ha mosali eo a e’o lata metsi, a mo hoeletsa a re: “Ke kopa u ntlele bohobe.” 12 Mosali eo a re: “Ke hlapanya ka Jehova Molimo oa hao ea phelang, ha ke na bohobe haese phofo e ka tlalang seatla e ka nkhong e kholo le oli e nyenyane e ka nkhong e nyenyane.+ Hona joale ke roalla patsi e seng kae ebe ke ea hae ’me ke etsetsa ’na le mora oa ka lijo. Re tla ja ka lekhetlo la ho qetela ebe rea shoa.”

13 Elia a re ho eena: “U se ke oa tšoha. E-ea hae ’me u etse seo u se buileng. Empa pele ho moo, nketsetse bohobe bo selika-likoe bo bonyenyane ka lintho tse teng ’me u bo tlise ho ’na. Ka mor’a moo, u ka etsetsa uena le mora oa hao lijo. 14 Jehova Molimo oa Iseraele o itse: ‘Phofo e ka nkhong e kholo e ke ke ea fela le oli e ka nkhong e nyenyane e ke ke ea fela ho fihlela letsatsing leo ka lona Jehova a nesang pula.’”+ 15 A tsamaea ’me a etsa feela joalokaha Elia a buile. Eena, ba lelapa la hae le Elia ba ile ba e-ba le lijo ka matsatsi a mangata.+ 16 Phofo e ka nkhong e kholo le oli e ka nkhong e nyenyane ha lia ka tsa fela ho ea ka seo Jehova a neng a se buile a sebelisa Elia.

17 Ka mor’a lintho tsena, mosali oa mohlolohali e leng mong’a ntlo, a kuleloa ke mora, a kula haholo hoo a ileng a shoa.+ 18 A re ho Elia: “Mohlanka oa Molimo oa ’nete, ke u entse’ng? Na u tletse ho tla nkhopotsa phoso ea ka le ho bolaea mora oa ka?”+ 19 Elia a re ho eena: “Mphe mora oa hao.” A mo nka matsohong a ’mè oa hae a ea le eena kamoreng e marulelong eo a neng a lula ho eona, a mo beha holim’a bethe ea hae.+ 20 Elia a rapela Jehova a re: “Jehova Molimo oa ka,+ na u tlisetsa mosali eo oa mohlolohali eo ke lulang le eena tlokotsi ka hore u bolaee mora oa hae?” 21 A paqama holim’a ngoana ka makhetlo a mararo ’me a rapela Jehova a re: “Jehova Molimo oa ka, ke kopa u etse hore ngoana enoa a phele hape.” 22 Jehova a mamela kopo ea Elia+ ’me ngoana a boela a phela.+ 23 Elia a nka ngoana ’me a theoha le eena ho tsoa kamoreng e marulelong a ea ka tlung eaba o mo isa ho ’mè oa hae. Elia a re: “Bona, mora oa hao oa phela.”+ 24 Mosali eo a re ho Elia: “Joale kea tseba hore kannete u mohlanka oa Molimo+ le hore mantsoe ao u a buang a tsoang ho Jehova ke ’nete.”

18 Ka mor’a nako e itseng ka selemo sa boraro+ Jehova a bua le Elia a re: “E-ea ho Akabe ’me ke tla nesa pula lefatšeng.”+ 2 Elia a ea ho Akabe nakong eo ho neng ho e-na le tlala e kholo+ Samaria.

3 Akabe a bitsa Obadia ea neng a hlokometse lelapa la morena. (Obadia o ne a hlompha Jehova haholo. 4 Ha Jezebele+ a bolaea* baprofeta ba Jehova, Obadia o ile a nka baprofeta ba 100 a ba pata, ba 50 ka lehaheng le leng le ba bang ba 50 ka ho le leng ’me o ne a ba fa bohobe le metsi.) 5 Akabe a re ho Obadia: “E-ea lilibeng le likhohlong* tsohle tse teng naheng ena. Mohlomong re tla fumana joang bo lekaneng e le hore lipere le limmoulo tsa rona li ’ne li phele ’me liphoofolo tsa rona li se ke tsa shoa kaofela.” 6 Ba arolelana libaka tseo ba tla ea ho tsona. Akabe a tsamaea a le mong ka tsela ena ’me Obadia a tsamaea a le mong ka tsela eane.

7 Ha Obadia a ntse a le tseleng, Elia a mo khahlanyetsa. Ha a mo bona a khumama* a re: “Moren’a ka Elia na ke uena?”+ 8 A re ho eena: “Ke ’na. Tsamaea u e’o bolella morena oa hao hore ke teng.” 9 Empa Obadia a re: “Ke sebe sefe seo ke se entseng hore u fane ka ’na ho Akabe hore a mpolaee? 10 Ke hlapanya ka Jehova Molimo oa hao ea phelang hore ha ho na sechaba kapa ’muso oo moren’a ka a sa romelang batho ho oona hore ba batlane le uena. Ka mor’a hore ba re, ‘Ha a eo mona,’ o ile a etsa hore mebuso le lichaba li hlapanye hore ha baa u fumana.+ 11 Empa joale u re ke tsamaee ke e’o bolella morena hore u teng.” 12 Ha ke tloha ho uena, moea o halalelang oa Jehova o tla u isa+ sebakeng seo ke sa se tsebeng. Etlare ha ke bolella Akabe hore u teng ’me a sa u fumane, o tla mpolaea. ’Na mohlanka oa hao esale ke hlompha Jehova ho tloha ke sa le mocha. 13 Na moren’a ka ha oa ka oa bolelloa hore na ke entse’ng ha Jezebele a bolaea baprofeta ba Jehova, hore ke ile ka pata baprofeta ba Jehova ba 100 ka lehaheng ka lihlopha tsa ba 50 ’me ka ’na ka ba fa bohobe le metsi?+ 14 Empa u re ke tsamaee ke e’o bolella morena hore u teng. Kannete morena o tla mpolaea.” 15 Elia a re: “Ke hlapanya ka Jehova Molimo oa mabotho ea phelang eo ke mo sebeletsang* hore kajeno ke tla ikisa ho eena.”

16 Obadia a tsamaea ho ea kopana le Akabe ’me a mo bolella eaba Akabe o e’o kopana le Elia.

17 Hang ha Akabe a bona Elia a re ho eena: “Na ke uena, uena ea tlisetsang Iseraele mathata?”*

18 Elia a re ho eena: “Ha se ’na ea tlisitseng mathata Iseraele, ke uena le lelapa la ntate oa hao hobane le tlohetse melao ea Jehova ’me le latetse melimo ea Baale.+ 19 Mpitsetse Baiseraele bohle Thabeng ea Karmele,+ baprofeta ba Baale ba 450 le baprofeta ba palo e halalelang*+ ba 400, ba jellang tafoleng ea Jezebele.” 20 Akabe a romela molaetsa ho sechaba sohle sa Iseraele ’me a bokella baprofeta Thabeng ea Karmele.

21 Elia a atamela sechaba sohle ’me a re: “Le tla lula le sa tsebe hore na le lehlakoreng lefe* ho fihlela neng?+ Haeba Jehova ke Molimo oa ’nete, mo lateleng+ empa haeba Baale e le eena molimo oa ’nete le latele eena.” Empa sechaba ha sea ka sa mo araba. 22 Elia a re ho sechaba: “Ke setse ke le mong ho baprofeta ba Jehova,+ ha baprofeta ba Baale bona ba le 450. 23 E-reng ba re fe lipohoana tse peli, ba ikhethele pohoana e le ’ngoe ’me ba e khaole likotoana ba e behe holim’a patsi empa ba se ke ba e hotetsa. Ke tla lokisa pohoana e ’ngoe ’me ke e behe holim’a patsi empa nke ke ka e hotetsa. 24 Hoeletsang ho molimo oa lona+ ’me le kope thuso, le ’na ke tla kopa thuso ho Jehova. Molimo ea tla arabela ka ho romela mollo o tla bontša hore ke eena Molimo oa ’nete.”+ Sechaba sohle sa re: “Ntho eo u e buang ea utloahala.”

25 Elia a re ho baprofeta ba Baale: “Ikhetheleng pohoana e le ’ngoe le e lokise pele hobane ke lona ba bangata. Le hoeletse lebitso la molimo oa lona empa le se ke la e hotetsa.” 26 Ba nka pohoana eo ba neng ba e filoe, ba e lokisa. Ba ’na ba bitsa lebitso la Baale ho tloha hoseng ho fihlela motšehare ba ntse ba re: “Baale re arabe!” Empa ho ne ho se na lentsoe kapa motho ea ba arabang.+ Ba ’na ba qhoma-qhoma ho potoloha aletare eo ba neng ba e entse. 27 Motšehare Elia a ba soma a re: “Hoeletsang haholo kaha le re ke molimo!+ Mohlomong o ntse a ja masapo a hlooho kapa o ile ntloaneng.* Kapa o robetse o hloka ho tsosoa.” 28 Ba ne ba hoelelitse haholo ebile ba itšeha ka lithipa le marumo ho ea ka tloaelo ea bona, ho fihlela ba le mali hohle ’meleng. 29 Letšehare la fela ba ntse ba etsa ntho e tšoanang,* ho fihlela mantsiboea ha ho etsoa nyehelo ea lijo* empa ho ne ho se na lentsoe kapa motho ea ba arabang. Ho ne ho se na motho ea ba mametseng.+

30 Qetellong Elia a re ho sechaba sohle: “Nkatameleng.” Sa atamela. A lokisa aletare ea Jehova e neng e helelitsoe.+ 31 Elia a nka majoe a 12, a lekanang le palo ea maloko a bara ba Jakobo, eo Jehova a neng a itse ho eena lebitso la hae e tla ba Iseraele.+ 32 Ka majoe ao a haha aletare+ e tlisang thoriso lebitsong la Jehova. Ho potoloha aletare a etsa foro. Sebaka se ka har’a moeli o entsoeng ke foro se ne se le boholo ba hore ho ka jaloa peo e ka etsang lilithara tse 15.* 33 A beha patsi hantle, a khaola pohoana likotoana ’me a e beha holim’a patsi.+ A re: “Tlatsang metsi ka linkhong tse ’nè tse kholo le a tšele holim’a nyehelo ea secheso le patsi.” 34 A re: “A tšeleng hape.” Ba a tšela. A boela a re: “A tšeleng ka lekhetlo la boraro.” Ba a tšela ka lekhetlo la boraro. 35 Metsi a tlala hohle aletareng, ba a tlatsa le ka forong.

36 Mantsiboea ha ho etsoa nyehelo ea lijo,*+ moprofeta Elia a atamela a re: “Jehova Molimo oa Abrahama,+ Isaka+ le Iseraele, kajeno batho bohle ba ke ba tsebe hore u Molimo Iseraele ’me ’na ke mohlanka oa hao le hore ke uena ea ntaetseng hore ke etse lintho tsena tsohle.+ 37 Nkarabe Jehova. Nkarabe e le hore batho bana ba ka tseba hore uena Jehova u Molimo oa ’nete le hore u ba thusa hore ba khutlele ho uena.”+

38 Mollo oa Jehova oa theoha leholimong ’me oa chesa nyehelo ea secheso,+ patsi, majoe, lerole le metsi a neng a le ka forong.+ 39 Ha batho bohle ba bona se etsahalang, ka potlako ba khumama ba re: “Jehova ke Molimo oa ’nete! Jehova ke Molimo oa ’nete!” 40 Elia a re ho bona: “Tšoarang baprofeta ba Baale! Ho se ke ha e-ba le ea mong ea phonyohang!” Ba ba tšoara ’me Elia a ba theolela nokaneng* ea Kishone+ eaba o ba bolaela teng.+

41 Elia a re ho Akabe: “Nyoloha u e’o ja ’me u noe hobane ho na le molumo oa pula e matla.”+ 42 Akabe a nyoloha ho ea ja le ho noa empa Elia eena a nyolohela ka holim’a thaba ea Karmele ’me a khumama a kentse hlooho pakeng tsa mangole.+ 43 Elia a re ho mohlanka oa hae: “Ke kopa u nyolohe ’me u shebe leoatleng.” A nyoloha ’me a sheba eaba o re: “Ho hang ha ho letho.” Elia a re a khutlele teng ka makhetlo a supileng. 44 Ka lekhetlo la bosupa mohlanka oa hae a re: “Ho na le leru le lenyenyane le kang letsoho la motho le nyolohang leoatleng.” Elia a re: “E-ea ho Akabe u re, ‘Lokisa kariki ea hao, u theohe e le hore pula e matla e se ke ea u thibella!’” 45 Hang-hang maru a koahela, ha fifala, ha foka moea eaba ho na pula e matla.+ Akabe a palama kariki ea hae a ea Jezriele.+ 46 Jehova a fa Elia matla eaba o tlama seaparo sa hae thekeng o matha ka pel’a Akabe ho ea fihla Jezriele.

19 Akabe+ a bolella Jezebele+ lintho tsohle tseo Elia a li entseng le hore o bolaile baprofeta bohle ka sabole.+ 2 Jezebele a romela moromuoa ho Elia a re: “E se eka melimo e ka mpha kotlo e boima haeba hosane ka nako ena ke sa u bolaea joaloka baprofeta bao u ba bolaileng!” 3 Elia a tšoha ’me a baleha e le hore a pholose bophelo ba hae.+ A ea Beersheba+ ea Juda+ ’me a siea mohlanka oa hae moo. 4 A tsamaea leeto le ka nkang letsatsi a ea lefeelleng ’me a fihla a lula tlas’a sefate sa lefielo. A ikopela ho shoa a re: “Ho lekane Jehova! Mpolaee+ hobane ho tšoana leha ke shoele joaloka baholo-holo ba ka.”

5 A paqama eaba o khaleha tlas’a sefate seo. Empa lengeloi la mo tšoara+ la re ho eena: “Tsoha u je.”+ 6 Ha a tsoha, pel’a hlooho ea hae ho ne ho e-na le bohobe bo selika-likoe holim’a majoe a chesang le jeke ea metsi. A ja ’me a noa eaba o robala hape. 7 Hamorao lengeloi la Jehova la tla ka lekhetlo la bobeli ’me la mo tšoara la re: “Tsoha u je hobane u sa ntse u tl’o nka leeto le lelelele le boima.” 8 A tsoha a ja ’me a noa. Lijo tseo li ile tsa mo fa matla a hore a tsamaee matsatsi a 40 le masiu a 40 ho fihlela a fihla Horebe, thabeng ea Molimo oa ’nete.+

9 Ha a fihla moo, a kena ka lehaheng+ ’me a robala ka ho lona. Jehova a bua le eena a re: “Elia, u batla’ng moo?” 10 Elia a re: “Haesale ke sebeletsa Jehova Molimo oa mabotho ka cheseho.+ Baiseraele ba fetohetse selekane seo ba se entseng le uena,+ ba sentse lialetare tsa hao, ba bolaile baprofeta ba hao ka sabole+ ’me ke ’na feela ea setseng. Le ’na ba batla ho mpolaea.”+ 11 A re: “Tsoa u ee ka holim’a thaba ’me u eme ka pel’a Jehova.” Jehova o ne a feta+ ’me moea o matla o ne o petsola lithaba le mafika ka pel’a Jehova+ empa Jehova o ne a se moeeng oo. Ka mor’a moea oo, ho ile ha e-ba le tšisinyeho ea lefatše+ empa Jehova o ne a le sieo ho eona. 12 Ka mor’a tšisinyeho ea lefatše, ho ile ha e-ba le mollo+ empa Jehova o ne a le sieo mollong oo. Ka mor’a mollo, ho ile ha e-ba le lentsoe le buelang fatše.+ 13 Hang ha Elia a le utloa, a ikoahela sefahleho ka seaparo sa hae se khethehileng+ ’me a tsoa a ema monyako oa lehaha. Lentsoe leo la re ho eena: “Elia, u batla’ng moo?” 14 Elia a re: “Haesale ke sebeletsa Jehova Molimo oa mabotho ka cheseho. Baiseraele ba fetohetse selekane seo ba se entseng le uena,+ ba sentse lialetare tsa hao, ba bolaile baprofeta ba hao ka sabole, ke ’na feela ea setseng. Le ’na ba batla ho mpolaea.”+

15 Jehova a re ho eena: “Khutla, u ee lefeelleng la Damaseka. Ha u fihla moo, u tlotse Hazaele+ hore e be morena oa Siria. 16 U tlotse Jehu+ setloholo sa Nimshi hore e be morena oa Iseraele ’me u tlotse Elisha* mora oa Shafate ea tsoang Abele-mehola hore e be moprofeta ea tla u nkela sebaka.+ 17 Jehu o tla bolaea+ mang kapa mang ea phonyohang sabole ea Hazaele,+ Elisha a bolaee+ mang kapa mang ea phonyohang sabole ea Jehu. 18 Ho ntse ho e-na le batho ba 7 000 ba setseng Iseraele+ ba sa kang ba khumamela Baale+ le ho mo suna.”+

19 Ha a tloha moo, a fumana Elisha mora oa Shafate a ntse a lema ka lipoho tse 24 tse pannoeng ka bobeli ka pel’a hae, o ne a tsamaea le tse peli tse qetellang. Elia a ea ho eena ’me a lahlela seaparo sa hae se khethehileng+ holim’a hae. 20 Elisha a siea lipoho a mathela Elia ’me a re ho eena: “Ke kopa ho ea suna ’Mè le Ntate. Ka mor’a moo ke tla u latela.” Elia a re ho eena: “E-ea u khutle hobane ha kea u thibela.” 21 A khutla a nka lipoho tse peli ho tse pannoeng eaba o etsa sehlabelo ka tsona ’me a besa mollo ka lijoko tse neng li panne lipoho e le hore a phehe nama ea lipoho tseo. A e fa batho ’me ba e ja. Ka mor’a moo a tsamaea, a latela Elia ’me a mo sebeletsa.+

20 Morena Ben-hadade+ oa Siria+ a bokella masole ’ohle a hae, marena a 32, masole a ’ona, lipere tsa ’ona le likariki tsa ntoa. A fihla Samaria+ a e thibella+ eaba oa e loantša. 2 A romela baromuoa ho Morena Akabe+ oa Iseraele hore ba re ho eena: “Ben-hadade o re, 3 ‘Silevera ea hao le khauta ea hao ke tsa ka hammoho le basali ba hao ba batle ka ho fetisisa le bara ba hao.’” 4 Morena oa Iseraele a araba a re: “Moren’a ka, ke mohlanka oa hao ’me lintho tsohle tseo ke nang le tsona ke tsa hao ho ea ka seo u se buileng.”+

5 Hamorao baromuoa ba khutla ’me ba re: “Ben-hadade o re, ‘Ke rometse molaetsa ho uena ka re: “U mphe silevera, khauta, basali le bara ba hao.” 6 Empa hosane ka nako ena ke tla romela bahlanka ba ka ho uena, ba tla batlisisa ka tlung ea hao le ka matlung a bahlanka ba hao ’me ba tla nka lintho tsohle tsa hao tsa bohlokoa.’”

7 Morena oa Iseraele a bitsa baholo bohle ba naha ’me a re: “Ke kopa le hlokomele hore monna enoa o ikemiselitse ho re bakela mathata kaha o batlile basali, bara, silevera le khauta ea ka ’me ha kea hana.” 8 Baholo bohle le batho bohle ba re: “U se ke oa lumela ho etsa seo a reng u se etse.” 9 Akabe a re ho baromuoa ba Ben-hadade: “E-reng ho moren’a ka, ‘Lintho tsohle tseo u li batlileng ka lekhetlo la pele ke tla u fa tsona empa ntho ena eona nke ke ka e etsa.’” Baromuoa ba isa molaetsa.

10 Ben-hadade a romela molaetsa ho Akabe a re: “Ke tla felisa Samaria ka masole a ka a mangata ho fihlela ho se na letho le setseng. E se eka melimo e ka mpha kotlo e boima haeba ke sa etse joalo.” 11 Morena oa Iseraele a re: “E-reng ho eena, ‘U se ke oa ithorisa pele ntoa e qala joalokaha eka u se u ntse u e hlotse.’”+ 12 Ben-hadade o ne a le litenteng* a ntse a noa le marena a mang. Ha a utloa karabo ena a re ho bahlanka ba hae: “Itokisetseng ho hlasela!” Ba itokisetsa ho hlasela motse.

13 Empa moprofeta e mong a tla ho Morena Akabe+ oa Iseraele a re: “Jehova o re, ‘Na u bone sehlopha see se seholo sa masole? Kajeno ke tla u thusa hore u se hlole ’me u tla tseba hore ke ’na Jehova.’”+ 14 Akabe a re: “U tla sebelisa mang?” Moprofeta eo a re: “Jehova o re, ‘Ke tla sebelisa bahlanka ba likhosana tsa liprofinse.’” Akabe a re: “Ke mang ea tla qala ntoa?” Moprofeta eo a re: “Ke uena!”

15 Akabe a bala bahlanka ba likhosana tsa liprofinse, ba ne ba le 232. Ka mor’a moo, a bala banna bohle ba Baiseraele ’me ba ne ba le 7 000. 16 Ba tsoa motšehare ha Ben-hadade le marena a 32 a neng a mo thusa ba le ka litenteng* ba ntse ba noa ’me ba tahiloe. 17 Ha bahlanka ba likhosana tsa liprofinse ba tsoile motseng, Ben-hadade a romela batho hore ba e’o sheba hore na ho etsahala’ng. Ba re ho eena: “Ho na le banna ba tlileng ba tsoang Samaria.” 18 A re: “Ba tšoareng ba phela, ebang ba tlile ho tla bopa khotso kapa ho tla loana.” 19 Empa ha bahlanka ba likhosana tsa liprofinse le masole a neng a ba latela ba tsoa motseng, 20 ba bolaea lira tsa bona. Basiria ba baleha+ eaba Baiseraele baa ba lelekisa le Morena Ben-hadade oa Siria a baleha a palame pere le banna ba bang ba neng ba palame lipere. 21 Empa morena oa Iseraele a ea ntoeng ’me a ’na a hlasela bapalami ba lipere le likariki tsa ntoa. A bolaea* Basiria ba bangata.

22 Moprofeta+ a tla ho morena oa Iseraele ’me a re ho eena: “Tsamaea u matlafatse masole a hao ’me u nahane hore na u tla etsa’ng+ hobane ha selemo se tlang se qala,* morena oa Siria o tl’o u hlasela.”+

23 Bahlanka ba morena oa Siria ba re ho eena: “Molimo oa bona ke Molimo oa lithaba. Ke ka lebaka leo ba re hlotseng. Empa haeba re ba loantšetsa sebakeng se se nang lithaba re tla ba hlola. 24 Hape u tlose marena ’ohle+ boemong ba ’ona ’me u behe matona. 25 U bokelle masole a lekanang le a u lahlehetseng, lipere le likariki tsa ntoa tse lekanang le tse u lahlehetseng. Ha re ba loantšetsa sebakeng se se nang lithaba re tla ba hlola.” Morena oa Siria a mamela keletso ea bona ’me a etsa feela joalo.

26 Ha selemo se qala,* Ben-hadade a bokella Basiria ’me ba nyolohela Afeke+ ho ea loantša Baiseraele. 27 Baiseraele le bona ba bokelloa ’me ba fuoa lintho tseo ba li hlokang eaba baa nyoloha ho ea kopana le bona. Ha Baiseraele ba hlomme litente ka pel’a bona, ba ne ba le joaloka mehlape e ’meli e menyenyane ea lipoli, ha Basiria bona ba ne ba tletse naha eohle.+ 28 Mohlanka oa Molimo oa ’nete a ea ho morena oa Iseraele a re ho eena: “Jehova o re, ‘Kaha Basiria ba itse Jehova ke Molimo oa lithaba ha se Molimo oa libaka tse se nang lithaba, ke tla u thusa hore u hlole sehlopha sena se seholo sa masole+ ’me u tla tseba hore ke ’na Jehova.’”+

29 Ba lula litenteng ka matsatsi a supileng, ba bang ba le ka lehlakoreng lena ba bang ka ho lane eaba ka letsatsi la bosupa baa loantšana. Baiseraele ba bolaea masole a Basiria a 100 000 ka letsatsi le le leng. 30 Masole a mang a balehela motseng oa Afeke.+ Empa lerako la oela holim’a a 27 000 a neng a setse. Ben-hadade le eena a balehela motseng ’me a ipata ka kamoreng e ka hare-hare.

31 Bahlanka ba hae ba re ho eena: “Re utloile hore marena a Iseraele a mohau.* Re kopa u re lumelle hore re itlame thekeng ka masela a hoashang* ’me re fase liropo hloohong re ee ho morena oa Iseraele. Mohlomong a ka u hauhela ’me a se ke a u bolaea.”+ 32 Ba itlama thekeng ka masela a hoashang ’me ba fasa liropo hloohong ba ea ho morena oa Iseraele ba re: “Mohlanka oa hao Ben-hadade o re o kopa hore u se ke oa mo bolaea.” Morena a re: “O ntse a phela? Ke ngoan’eso.” 33 Banna bao ba nka seo e le pontšo ea hore ho na le ntho e ntle e tl’o etsahala eaba ba lumellana le seo a se buileng ba re: “Ben-hadade ke ngoan’eno.” Morena a re: “Mo lateng.” Ben-hadade a ea ho Akabe ’me Akabe a mo palamisa kariki ea hae ea ntoa.

34 Ben-hadade a re ho eena: “Ke tla khutlisa metse eo ntate oa ka a e nkileng ho ntate oa hao, u iketsetse libaka tsa khoebo* Damaseka feela joalokaha ntate oa ka a li entse Samaria.”

Akabe a re: “Ho ea ka tumellano* ena ke tla u lumella hore u tsamaee.”

Ka lebaka leo a re a tsamaee.

35 Ho latela taelo ea Jehova, e mong oa bara ba baprofeta*+ a re ho motsoalle oa hae: “Ke kopa u nkotle.” Empa monna eo a hana. 36 A re ho monna eo: “Kaha ha oa mamela taelo ea Jehova, ha u tloha mona tau e tla u bolaea.” Ha a qeta ho tloha ho eena tau ea mo fumana eaba ea mo bolaea.

37 A kopana le monna e mong ’me a re: “Ke kopa u nkotle.” Monna eo a mo otla ’me a mo lematsa.

38 Moprofeta eo a tsamaea ’me a emela morena Akabe tseleng. O ne a ikoahetse mahlong ka lesela. 39 Ha morena a feta a mo hoeletsa a re: “ ’Na mohlanka oa hao ke ne ke ile ntoeng. Lesole le leng la tsoa moleng oa ntoa ’me la tlisa monna e mong ho ’na la re, ‘Hlokomela monna enoa. Haeba a ka baleha, u tla bolaoa bakeng sa hae+ kapa u patale silevera ea boima bo ka etsang lik’hilokramo tse 34.’* 40 Ha ke ntse ke etsa lintho tse ling, monna eo o ile a baleha.” Morena oa Iseraele a re ho eena: “Kahlolo ea hao e tla ba eona eo. U se u ikahlotse.” 41 Ka potlako a tlosa lesela leo a neng a ikoahetse mahlong ka lona ’me morena oa Iseraele a hlokomela hore ke e mong oa baprofeta.+ 42 Moprofeta eo a re ho eena: “Jehova o re, ‘Kaha u tlohetse monna eo ke itseng u mo bolaee hore a balehe,+ u tla bolaoa bakeng sa hae+ le batho ba hao ba tla bolaoa bakeng sa batho ba hae.’”+ 43 Morena oa Iseraele a ea ha hae Samaria+ a utloile bohloko a bile a nyahame.

21 Nabothe oa Mojezriele o ne a e-na le serapa sa morara Jezriele+ pel’a ntlo ea Akabe morena oa Samaria. 2 Akabe a re ho Nabothe: “Mphe serapa sa hao sa morara e le hore ke leme meroho ho sona hobane se pel’a ntlo ea ka. Ke tla u fa serapa sa morara se setle ho se feta. Kapa haeba u batla u ka nthekisetsa sona.” 3 Empa Nabothe a re ho Akabe: “Ho hang nke ke ka u fa lefa la baholo-holo ba ka hobane Jehova ha a lumelle seo.”+ 4 Akabe a khutlela ha hae a utloile bohloko a bile a nyahame ka lebaka la seo Nabothe oa Mojezriele a se buileng ha a re: “Nke ke ka u fa lefa la baholo-holo ba ka.” Akabe a paqama betheng a shebile leboteng a bile a hana le ho ja.

5 Mosali oa hae Jezebele+ a ea ho eena a re: “Ke hobane’ng ha u utloile bohloko hakaale ebile u sa batle le ho ja?” 6 Akabe a re ho eena: “Ke hobane ke itse Nabothe oa Mojezriele a nthekisetse serapa sa hae sa morara kapa haeba a batla ke mo fe serapa se seng sa morara empa o hanne.” 7 Mosali oa hae Jezebele a re ho eena: “Na ha se uena ea busang Iseraele? Tsoha u je ’me u thabe. Ke tla u fa serapa sa morara sa Nabothe oa Mojezriele.”+ 8 A ngola mangolo ka lebitso la Akabe, a a tempa ka setempe sa morena+ ’me a a romela ho baholo+ le bahlomphehi ba neng ba lula motseng oa Nabothe. 9 O ile a ngola tjena mangolong ao: “Laelang hore sechaba se itime lijo ’me le behe Nabothe ka pel’a sechaba sohle. 10 Le behe banna ba babeli ba se nang thuso ka pel’a hae ’me ba pake khahlanong le eena+ ba re, ‘U rohakile Molimo le morena!’+ ebe le mo ntšetsa ka ntle ho motse le mo tlepetsa ka majoe ho fihlela a shoa.”+

11 Banna ba motse, baholo le bahlomphehi ba neng ba lula motseng oa habo, ba etsa seo Jezebele a neng a se ngotse mangolong ao a a rometseng. 12 Ba laela hore ho itingoe lijo ’me ba beha Nabothe ka pel’a sechaba sohle. 13 Banna ba babeli ba se nang thuso ba tla ba lula ka pel’a hae ’me ba fana ka bopaki ka pel’a sechaba ba re: “Nabothe o rohakile Molimo le morena!”+ Ka mor’a moo, ba mo ntšetsa ka ntle ho motse ’me ba mo tlepetsa ka majoe ho fihlela a shoa.+ 14 Ba romela molaetsa ho Jezebele ba re: “Nabothe o tlepelitsoe ka majoe ho fihlela a shoa.”+

15 Ha Jezebele a utloa hore Nabothe o shoele, a re ho Akabe: “Tsamaea u e’o nka serapa sa morara sa Nabothe oa Mojezriele+ seo a hanneng ho u rekisetsa sona hobane o shoele.” 16 Ha Akabe a utloa hore Nabothe o shoele, a ea serapeng sa hae sa morara ’me a se nka.

17 Empa Jehova a re ho Elia+ oa Motishba: 18 “Tsamaea u e’o kopana le Akabe morena oa Iseraele ea Samaria.+ Ke eane o serapeng sa Nabothe sa morara o il’o se nka. 19 U re ho eena, ‘Jehova o re: “Na u bolaile motho+ ebile u nkile serapa sa hae?”’+ Hape u re ho eena, ‘Jehova o re: “Lintja li tla noa mali a hao sebakeng seo li noeleng mali a Nabothe ho sona.”’”+

20 Akabe a re ho Elia: “U mphumane sera sa ka!”+ Elia a re: “Ke u fumane. ‘Kaha u ikemiselitse ho etsa lintho tse sa thabiseng Jehova,+ 21 ke u tlisetsa mathata. Ke tla u bolaea ke be ke bolaee le banna bohle* ba tsoang lelapeng la hao,+ ho akarelletsa le motho ea se nang thuso le ea se nang matla Iseraele.+ 22 Ke tla etsa hore lelapa la hao le be joaloka lelapa la Jeroboame+ mora oa Nebate le lelapa la Basha+ mora oa Akija kaha u nkhalefisitse ’me u entse le hore Baiseraele ba etse sebe.’ 23 Hape Jehova o itse ka Jezebele: ‘Lintja li tla ja Jezebele tšimong ea Jezriele.+ 24 Mang kapa mang oa lelapa la Akabe ea shoellang motseng o tla jeoa ke lintja ’me mang kapa mang ea shoellang tšimong o tla jeoa ke linonyana.+ 25 Ha ho e-s’o ka ho e-ba le motho ea ikemiselitseng ho etsa lintho tse sa thabiseng Jehova joaloka Akabe+ ea susumetsoang ke mosali oa hae Jezebele.+ 26 O entse ntho e nyonyehang ka ho fetisisa ka hore a rapele litšoantšo tse nyonyehang* feela joaloka Baamore bohle bao Jehova a ileng a ba leleka ho Baiseraele.’”+

27 Ha Akabe a utloa mantsoe ana, a tabola liaparo tsa hae ’me a apara lesela le hoashang.* O ne a itima lijo, a robala a apere lesela leo a bile a tsamaea a nyahame. 28 Jehova a re ho Elia oa Motishba: 29 “Na u bone hore Akabe o ikokobelitse ka lebaka la seo ke se buileng?+ Kaha o ikokobelelitse ’na, nke ke ka tlisa mathata lelapeng la hae ha a ntse a phela. Ke tla a tlisa ha ho busa mora oa hae.”+

22 Ho ile ha feta lilemo tse tharo ho se na ntoa pakeng tsa Siria le Iseraele. 2 Ka selemo sa boraro Morena Josafate+ oa Juda a ea ho morena oa Iseraele.+ 3 Morena oa Iseraele a re ho bahlanka ba hae: “Na lea tseba hore motse oa Ramothe-gileade+ ke oa rona? Empa re o tlohetse, ha re o nke ho morena oa Siria.” 4 A re ho Josafate: “Na u tla ea le ’na ntoeng motseng oa Ramothe-gileade?” Josafate a re ho morena oa Iseraele: “Ke tla ea le uena le sechaba sa ka le lipere tsa ka.”+

5 Empa Josafate a re ho morena oa Iseraele: “Ke kopa u botse+ Jehova pele ka taba ena.”+ 6 Morena oa Iseraele a bokella baprofeta ba ka bang 400 ’me a re ho bona: “Na ke e’o loantša motse oa Ramothe-gileade kapa ke tlohele?” Ba re: “Tsamaea ’me Jehova o tla u thusa hore u hlole.”

7 Josafate a re: “Na ho na le moprofeta e mong oa Jehova moo? Le eena a re mo botseng.”+ 8 Morena oa Iseraele a re ho Josafate: “Ho na le monna e mong eo re ka mo botsang hore na Jehova o re’ng ka taba ena.+ Empa ke mo hloile+ hobane ha ho na mohla a profetang lintho tse ntle ka ’na, o lula a profeta tse mpe feela.+ Ke Mikaia mora oa Imla.” Josafate a re: “Morena ha aa lokela ho bua ka tsela ena.”

9 Morena oa Iseraele a bitsa molaoli oa lekhotla a re: “Potlaka u tle le Mikaia mora oa Imla.”+ 10 Morena oa Iseraele o ne a lutse teroneng ea hae le Josafate morena oa Juda a lutse teroneng ea hae, ba apere liaparo tsa bona tsa borena. Ba ne ba lutse seotlong* keiting ea Samaria ’me baprofeta bohle ba profeta ka pel’a bona.+ 11 Tsedekia mora oa Kenana a iketsetsa manaka a tšepe ’me a re: “Jehova o re, ‘U tla hlaba* Basiria ka manaka ana ho fihlela u ba felisitse.’” 12 Baprofeta ba bang bohle ba ne ba profeta ntho e tšoanang ba re: “Tsamaea u e’o loantša Ramothe-gileade ’me Jehova o tla u thusa hore u e hlole.”

13 Moromuoa ea neng a il’o bitsa Mikaia a re ho eena: “Baprofeta bohle ba re morena o tla atleha. Le uena ke kopa u bue lintho tse ntle.”+ 14 Mikaia a re: “Ke hlapanya ka Jehova Molimo ea phelang hore ke tla bua seo Jehova a tla mpolella sona.” 15 Ha Mikaia a fihla, morena a re ho eena: “Mikaia, re loantše Ramothe-gileade kapa re tlohele?” Mikaia a re: “Tsamaea u e’o e loantša ’me Jehova o tla u thusa hore u e hlole.” 16 Morena a re ho eena: “Ke tla etsa hore u hlapanye ka makhetlo a makae e le hore u bue ’nete ’me u bue feela seo Jehova a u boleletseng sona?” 17 Mikaia a re: “Ke bone Baiseraele bohle ba hasane lithabeng+ joaloka linku tse se nang molisa. Jehova o itse: ‘Ha ba na morena. E-re e mong le e mong a khutlele ntlong ea hae ka khotso.’”

18 Morena oa Iseraele a re ho Josafate: “Na ha kea u bolella hore a ke ke a profeta lintho tse ntle ka ’na empa o tla profeta tse mpe feela?”+

19 Mikaia a re: “Utloa lentsoe la Jehova: Ke bone Jehova a lutse teroneng ea hae+ ’me mangeloi* ’ohle a eme ka lehlakoreng la hae le letona le le letšehali.+ 20 Jehova a re, ‘Ke mang ea tla thetsa Akabe e le hore a ka ea Ramothe-gileade ’me a shoella teng?’ Lengeloi le leng le ne le re tjena ’me le leng le re tjena. 21 Lengeloi+ le leng la tla ka pel’a Jehova la re, ‘Ke tla mo thetsa.’ Jehova a re ho lona, ‘U tla mo thetsa joang?’ 22 La re, ‘Ke tla thetsa baprofeta ba hae e le hore ba tle ba bue leshano.’+ A re ho lona, ‘Tsamaea u e’o mo thetsa hobane u tla atleha.’ 23 Jehova o entse hore baprofeta bohle ba hao ba bue leshano+ empa ha e le hantle Jehova eena o ikemiselitse ho u fa kotlo.”+

24 Tsedekia mora oa Kenana a atamela ho Mikaia ’me a mo otla lerameng a re: “Lengeloi la Jehova le mphetile joang ’me la bua le uena?”+ 25 Mikaia a re: “U tla bona hore na le u fetile joang mohla u e’o ipata kamoreng e ka hare-hare.” 26 Morena oa Iseraele a re: “Isa Mikaia ho Amone letona la motse le ho Joashe mora oa morena. 27 U re ho bona, ‘Morena o re: “Koallang monna enoa teronkong+ ’me le fokotse metsi le lijo tseo a lokelang ho li fuoa ho fihlela ke khutla ke ntse ke phela.”’” 28 Empa Mikaia a re: “Haeba u ka khutla u ntse u phela, e tla ba Jehova ha aa bua le ’na.”+ A boela a re: “Lona sechaba, le hopole mantsoe ana.”

29 Morena oa Iseraele le Josafate morena oa Juda ba ea Ramothe-gileade.+ 30 Morena oa Iseraele a re ho Josafate: “Ke tla apara liaparo tse ling feela ’me ke kene ntoeng empa uena u apare liaparo tsa hao tsa borena.” Morena oa Iseraele a apara liaparo tse ling+ feela a kena ntoeng. 31 Morena oa Siria a re ho balaoli ba 32 ba likariki tsa hae tsa ntoa:+ “Le se ke la loantša motho ofe kapa ofe, le loantše morena oa Iseraele feela.” 32 Ha balaoli ba likariki tsa ntoa ba bona Josafate ba re: “Enoa ke eena morena oa Iseraele.” Ba ea ho eena ’me ba mo loantša eaba Josafate oa hoeletsa o kopa thuso. 33 Ha balaoli ba likariki tsa ntoa ba bona hore ha se morena oa Iseraele, hang-hang ba khutla.

34 Monna e mong a betsa motsu oa seqha sa hae, ha etsahala* hore motsu oo o kene seaparong sa tšepe sa morena oa Iseraele eaba oa mo hlaba. Morena a re ho mokhanni oa kariki ea hae ea ntoa: “Ke kopa u ntlose ntoeng* hobane ke lemetse haholo.”+ 35 Ntoa ea tsoela pele letsatsi lohle ’me morena a tlameha ho ema a tšehelitsoe kariking ea hae ea ntoa a shebile Basiria. Mali a tsoang leqebeng a tsoela ka har’a kariki ea hae ea ntoa eaba mantsiboea oa shoa.+ 36 Ha letsatsi le likela ha e-ba le motho ea fanang ka taelo e reng: “E mong le e mong a khutlele motseng oa habo! E mong le e mong a khutlele naheng ea habo!”+ 37 Morena a shoa ’me ba mo isa Samaria eaba ba mo patela teng. 38 Ha ba hlatsoa kariki ea ntoa letamong la Samaria, lintja tsa noa mali a hae ’me matekatse a ne a ntse a hlapela moo,* ho latela seo Jehova a neng a se buile.+

39 Histori eohle ea Akabe, lintho tseo a li entseng, ntlo* ea manaka a litlou+ eo a e hahileng le metse eo a e hahileng li ngotsoe bukeng ea histori ea marena a Iseraele. 40 Akabe a shoa*+ ’me mora oa hae Akazia+ ea e-ba morena.

41 Josafate+ mora oa Asa e bile morena oa Juda ha Akabe morena oa Iseraele a e-na le lilemo tse ’nè a busa. 42 Josafate o ne a le lilemo li 35 ha e e-ba morena ’me a busa Jerusalema ka lilemo tse 25. Lebitso la ’mè oa hae e ne e le Azuba morali oa Shilhi. 43 A ’na a etsa lintho joaloka ntate oa hae Asa+ ’me a thabisa Jehova.+ Empa libaka tse phahameng ha lia ka tsa tlosoa. Batho ba ne ba ntse ba etsa linyehelo le mahlabelo a kubellang mosi ho tsona.+ 44 Josafate a etsa hore ho lule ho e-na le khotso pakeng tsa hae le morena oa Iseraele.+ 45 Histori eohle ea Josafate, liketso tsa hae tse matla le kamoo a loanneng kateng, li ngotsoe bukeng ea histori ea marena a Juda. 46 O ile a boela a tlosa matekatse a banna*+ a neng a setse naheng ha ho ne ho busa ntate oa hae Asa.+

47 Ho ne ho se na morena Edomo+ ’me letona e ne e le lona le busang.+

48 Josafate o ile a boela a romela likepe tsa Tarshishe* Ofire ho ea lata khauta+ empa ha lia ka tsa ea hobane li ile tsa robeha Ezione-gebere.+ 49 Akazia mora oa Akabe a re ho Josafate: “E-re bahlanka ba ka ba tsamaee le bahlanka ba hao ka likepe” empa Josafate a hana.

50 Josafate a shoa* ’me a pateloa Motseng oa Davida moholo-holo oa hae.+ Mora oa hae Jorame+ ea e-ba morena.

51 Ha Morena Josafate a e-na le lilemo tse 17 a busa Juda, Akazia+ mora oa Akabe ea e-ba morena oa Iseraele e Samaria ’me a busa Iseraele ka lilemo tse peli. 52 Akazia a ’na a fosetsa Jehova ka hore a etse lintho tse mpe joaloka batsoali ba hae+ le joaloka Jeroboame mora oa Nebate, ea ileng a etsa hore Baiseraele ba etse sebe.+ 53 A sebeletsa Baale+ le ho mo rapela ’me a ’na a fosetsa Jehova Molimo oa Iseraele+ feela joaloka ntate oa hae.