Vijana Wauliza...

Je! Niende Kwenye Dansi ya Uhitimu?

”Kwa kawaida usiku wa dansi ya uthitimu ndio pia mara ya kwanza ambapo wazazi wako hukuambia, ’Mpenzi, furahia. Tutaonana asubuhi.’”

”Ninakumbuka nikienda kwenye dansi ya shule ambapo kulikuwa na wasindikizaji wawili tu, na hata hawakuwa wakishughulika na vijana hao.”

WANADARASA wenzako wamekuwa wakiizungumzia kwa miezi. Kwa vyovyote, dansia ya wahitimu wa shule ni tukio la mara moja tu maishani. Na kwa kuwa utakuwa unawaaga wanadarasa wenzako ambao umewajua kwa miaka, huenda kwa kawaida usitake kuikosa. “Tangu miaka yangu ya kwanza ya shule ya upili,” asema msichana wa miaka 18, “Nimetamani kuwa kwenye dansi ya uhitimu.”

Katika nchi fulani dansi ya wahitimu wa shule—dansi rasmi inayotangulia kuhitimu kutoka shule ya upili (sekondari)—ni hatua kubwa kikweli kwa vijana. Zaidi tu ya kuwa tukio la sherehe ya kijumuiya, dansi hiyo ni desturi ya muda mrefu inayotia alama kuingia katika utu mzima. Gazeti Seventeen lasema: “Kwa kawaida usiku wa dansi ya uhitimu ndio pia mara ya kwanza ambapo wazazi wako hukuambia, ‘Mpenzi, furahia. Tutaonana asubuhi.’ Kuwa nje usiku wote hakukubaliwi tu—ni yale unayotazamiwa kufanya.”

Si kwamba vijana wote hupangia kipindi cha usiku wote cha mwenendo mpotovu. Badala yake, wengi hutazamia tu ono zuri la kimahaba—nafasi ya kuwa Sinderela au Mwana-Mfalme Anayevutia wa kisasa! “Ni kama fantasia,” asema Darcey mwenye miaka 19. “Wao hutoka kwenye gari aina ya limosini iliyokodiwa, wanapiga picha, na kujionyesha mbele ya rafiki zao. Hiyo ndiyo nafasi yao ya kuelekezewa fikira na wengine.”

Dansi za shule hazivutii sana kimtindo, lakini zinapendwa sana pia. “Kila mara, unahitaji kikaramu ili tu kujifurahisha,” asema Jamey mwenye miaka 15. Lakini iwe jambo linalovutia ni dansi, mlo wa jioni, au kujivalia, vijana wengi huhisi kwamba kwenda kwenye vikaramu hivyo ni jambo la lazima. Mahangaiko yao pekee ni yule mtu watakayeenda naye, yale watakayovaa, na jinsi watakavyopata pesa za kugharimia jioni hiyo. Lakini kuna mambo mengineyo unayohitaji kufikiria.

Kutazama Mbele ya Mmeremeto Huo

Yesu Kristo mwenyewe alikuwa mmojawapo wale waliohudhuria vikusanyiko vya kijumuiya vyenye kuheshimika. (Linganisha Luka 5:29; Yohana 2:1, 2.) Lakini “karamu za ulafi,” au “karamu zisizo za adabu,” hushutumiwa katika Biblia. (Wagalatia 5:21; Byington) Katika karne ya kwanza, karamu zisizo za adabu ambamo wapagani wangeshiriki waziwazi katika “ufisadi, na tamaa, na ulevi, na karamu za ulafi, na vileo, na ibada ya sanamu isiyo halali” yalikuwa mambo ya kawaida. Hivyo Wakristo walionywa dhidi ya kuhudhuria mambo hayo yasiyofaa.—1 Petro 4:3, 4.

Namna gani kuhusu dansi za uhitimu na dansi za shule? Huenda zingine zikapangwa na kusimamiwa vizuri, hivyo kukiwa mambo yaliyodhibitiwa kwa kulinganisha. Huenda tabia ya ufidhuli ikakemewa na kushughulikiwa upesi iwapo inatokea. Lakini zaidi ya mmeremeto na uzuri wa dansi nyingi—ikiwa si karibu zote—za uhitimu, mara nyingi huwa kuna roho ya karamu za ulafi.b “Kuna ukosefu mwingi wa adili za ngono na kunywa,” tineja mmoja akaambia Amkeni! Huenda vileo visiruhusiwe rasmi. Lakini huenda vileo vingi vikatumiwa kwenye vyoo, ngazini, na maegeshoni.

Biblia huonya: “Mvinyo hudhihaki, kileo huleta ugomvi.” (Mithali 20:1) Ongezea hayo muziki usio na adabu au wenye kuamsha nyege, dansi zisizozuiwa, mwangaza uliodidimishwa, na umati wa vijana ambao huenda wasithamini kanuni za Biblia, na unapata mchanganyiko wa karamu ya ulafi. Je! waweza kutegemea wasindikizaji wadhibiti mambo? Si wakati wote. Tineja aitwaye Charles husema waziwazi: “Wasindikizaji hawafanyi chochote.” Anawaonea? Si kulingana na kijana Darcey, anayesema: “Ninakumbuka nikienda kwenye dansi ya shule ambapo kulikuwa na wasindikizaji wawili tu, na hata hawakuwa wakishughulika na vijana hao.”

Ni lazima ikubaliwe kwamba hata wasindikizaji wenye kudhamiria sana waweza kupata kuwa vigumu sana katika jumba la dansi lenye giza au jumba la michezo kuweza kudhibiti umati wa vijana wanaoazimia kuwa na ‘wakati mzuri.’ Kama tokeo, shauku ya kuwa na jioni yenye mahaba yaweza kugeuka upesi kuwa jambo la kuhofisha. “Kuna vita vingi,” asema msichana mmoja tineja.

Hali Zenye Kuridhiana

Inakubalika, si dansi zote za uhitimu au za shule hugeuka kuwa za jeuri. Bado, kuna hatari halisi kwamba huenda ukawa katika hali inayoelekea kuwa ya kuridhiana. Mwanamke mmoja kijana akumbuka: “Unapocheza dansi uso kwa uso na wavulana, wao huanza kugusa kila sehemu ya mwili wako. Wao hutazamia ukubali hilo!” Je! hungeweza kuepuka tatizo kama hilo kwa kukaa peke yako tu? Labda. Lakini mara nyingi ni rahisi kusema kuliko kufanya.

Tuseme uende bila msindikizaji au uende na kikundi cha marafiki. Tineja mmoja atukumbusha: “Wavulana wengine wako humo peke yao, na wao hujaribu kufuatilia wasichana wengi kadiri wawezavyo.” Huenda pia kukawa hesabu kubwa ya wasichana wenye uchokozi humo. Kijana anayeenda peke yake aweza kuelekezewa fikira.

Kwa upande mwingine, kuwa na msindikizaji aliye mwamini mwenzi kwaweza bado kuzusha matatizo. Kwa vyovyote, matembezi ya kirafiki huchukuliwa kwa uzito na Mashahidi wa Yehova leo.c Na hata ikiwa unahisi una uhakika kwamba msindikizaji wako hapendezwi nawe kimahaba, ni kwa kadiri gani yeye aweza kwelikweli kukulinda? Lora mwenye miaka 19 asema: “Ni nini kitazuia wengine wasibadilishane wenzi wa dansi—au kukuomba kwamba mtembee nao kirafiki? Kutatukia nini basi?” Hali ya wasiwasi, isiyofaa yaweza kutokea kwa urahisi.

Jambo lisilostahili kusahauliwa pia ni hatari ya kulegeza viwango vyako vya adili na kutiwa ndani katika roho ya sherehe hiyo wewe mwenyewe. Mashirika mabaya kwa kweli “huharibu tabia njema.” (1 Wakorintho 15:33) Nick mwenye miaka 18 akubali: “Hata ikiwa Mashahidi wa Yehova wawili wangeenda pamoja, wangeweza kwa urahisi kusukumwa kufanya yale ambayo kila mtu anafanya.”

Karamu Inapokwisha

Hata hivyo, mara nyingi matatizo yenyewe huanza baada ya karamu. “Wengine huenda kwa hoteli au kwa nyumba ya mtu fulani,” asema kijana Tanya. Yolanda aongeza: “Unapaswa ukae humo usiku wote. Hiyo ni sehemu ya desturi.” Dawa za kulevya, vileo, na ngono zaweza pia kuwa sehemu ya desturi ya dansi za uhitimu. Hata hivyo, asubuhi inayofuata, kijana aweza kuwa na dhamiri inayomsumbua, kutojistahi, na hofu halisi ya kutungwa mimba—au UKIMWI.

Basi, mara nyingi, dansi za uhitimu na za shule hushindwa kutimiza ahadi ya kutoa mahaba na furaha ifaayo na hudidimia kuwa karamu zisizo na adabu, karamu za ulevi. Tunakumbushwa kwamba nabii Isaya katika siku yake alionyesha jinsi Mungu huchukizwa na vikusanyiko vinavyoendelea “hata usiku wa manane.” Karamu hizo zilijaa vileo na muziki—“kinubi, na zeze, na matari, na filimbi.” Furaha? Bila shaka. Lakini Isaya alisema kuhusu wale waendao kwenye karamu: “Hawaiangalii kazi ya BWANA [Yehova, NW] wala kuyafikiri matendo ya mikono yake.”—Isaya 5:11, 12.

Naam, kuwa katika karamu na vijana wasiothamini maoni ya Biblia kwaweza kutokeza hatari kubwa. Ni kweli, si mambo yote kama hayo hugeuka kuwa karamu za ulevi, na hali hutofautiana kotekote ulimwenguni. Kwa hiyo wewe na wazazi wako lazima mwamue ikiwa inafaa kwako kuhudhuria. “Ni vigumu,” akakiri msichana mmoja kijana, “kwa sababu dansi ya uhitimu ni yenye kumeremeta, na ni kishawishi kikubwa. Imo mbele yako mwaka mzima!”

Lakini kuzungumza mambo pamoja na wazazi wako au Mkristo mkomavu kwaweza kusaidia kuelewesha mambo. Fikiria: Ni nani watakaohudhuria dansi? Ni usimamizi wa aina gani utakaokuwapo? Je! vileo vitaandaliwa? Ni muziki upi utachezwa? Je! kumekuwako matatizo katika miaka iliyopita? Kushiriki jambo hilo kwaweza kuonwaje na wengine—hasa Wakristo wenzi? Je! kuhudhuria kwaweza kuwakwaza wengine?—1 Wakorintho 10:23, 24, 32.

Kwa kufikiria matatizo yote yanayoambatana na dansi za uhitimu na za shule, vijana Wakristo wangeshauriana na wazazi wao na inaelekea waamue kutoenda. Lakini je, kuhitimu kwako si jambo linalostahili kujivunia? Bila shaka! Hata hivyo, inaelekea unaweza kupata njia salama zaidi ya kusherehekea, labda ukishiriki furaha yako na Mashahidi wenzi. Kwa mfano, familia yako yaweza kuamua kupanga kikusanyiko cha kiasi au karamu ya mlo. Vikusanyiko hivyo vinapokuwa vya ukubwa unaofaa na kupangwa vizuri, matatizo makubwa hayatokei.d

Huenda kikusanyiko hicho kikakosa mmeremeto na uzuri wa dansi rasmi ya uhitimu. Lakini bado chaweza kuwa kipindi cha furaha—kisicho na mitego ya dansi za uhitimu au za shule. Zaidi ya yote, utapatana na maneno ya Paulo kwenye 1 Wakorintho 10:31: “Mlapo, au mnywapo, au mtendapo neno lo lote, fanyeni yote kwa utukufu wa Mungu.”

[Maelezo ya Chini]

[Picha katika ukurasa wa 21]

Wasindikizaji huona ni kama haiwezekani kudhibiti mwenendo wa wote waliohudhuriay