Kutoka kwa Wasomaji Wetu

Kujitibu Nilifurahi kuona mfululizo wa makala “Kujitibu—Je, Kwaweza Kukusaidia au Kukudhuru?” (Julai 8, 1998) Zimeandikwa vema na hutoa maoni yenye usawaziko ya jumla ya habari hiyo, ambayo yaweza kuwa yenye kutumika katika nchi nyingi ulimwenguni. Ni bora katika kukazia umaana wa kuwajibika mwenyewe kwa afya yetu kupitia mitindo-maisha ya afya badala ya kugeukia ‘dawa kwa magonjwa yote.’

J. M. J., Uingereza

Kuchezeana Kimapenzi Asanteni kwa makala “Maoni ya Biblia: Kuna Ubaya Gani Kuchezeana Kimapenzi?” (Julai 8, 1998) Familia yangu imeanza kupata nafuu kutokana na matokeo ya maisha yangu ya kuchezeana kimapenzi. Nilipuuza maumivu niliyokuwa nikisababishia familia yangu, hasa mke wangu mpendwa. Ikiwa ningeweza kusema jambo lolote kwa ndugu na dada zangu Wakristo, lingekuwa: “Tafadhali msikilize Baba yetu, Yehova. Geuka mbali, tafuta msaada, sali kwa Yehova, na ukimbie, ukimbie, ukimbie ubaya.”

D. B., Marekani

Kwangu mimi, makala hii ilionyesha kwamba kuchezeana kimapenzi si jambo dogo. Familia yetu iliathiriwa sana na talaka, na ulioonekana kuwa mchezo tu ulichangia sehemu kubwa katika tatizo hili. Natumaini shauri hili litasaidia wale ambao kwa kujitegemea wenyewe hawangeweza kuona kimbele jinsi ambavyo mwenendo wao, usemi wao, au ishara zao zingeweza kuathiri wale wa jinsia tofauti.

O. M., Jamhuri ya Cheki

Ilikuwa kama kitulizo kwa dada wengi walioumia mioyo. Kupitia makala hii, tumeona kwamba Yehova hutambua na hujali hisia zetu za ndani zaidi.

A. M. P., Hispania

Fungu lililo chini ya kichwa kidogo “Mahusiano ya Kihisia-Moyo” lilikuwa kufunuliwa kwa jambo jipya kwangu. Mume wangu alikuwa akisitawisha uhusiano wa karibu uliotegemea mapendezi sawa na dada mwingine katika kutaniko kwa sababu ya malezi yanayofanana. Katika miaka 17 ya ndoa yetu, hakuwa amefanya jambo lolote ambalo lingenifanya nikose kumtumaini, lakini nilianza kuwa na shaka. Haikuwa rahisi kumwambia mume wangu. Kwanza alishangaa lakini akajaribu kuelewa maoni yangu. Alisema kwamba hakutaka kuniumiza wala kuumiza watoto wetu watatu, naye alikomesha uhusiano huo mara moja. Nilipata faraja kwelikweli kwa itikio lake.

D. T., Kanada

Hatari ya Wanazi Nilisoma makala “Mashahidi wa Yehova—Wajasiri Licha ya Hatari ya Wanazi” kwa upendezi mwingi sana. (Julai 8, 1998) Katika huduma ya Kikristo, mara nyingi nimekutana na watu fulani, wengine wao wakiwa ama na moyo mweupe ama bila, wamewashtaki Mashahidi wa Yehova kuwa waliridhiana na utawala wa Nazi. Habari iliyo katika makala hii itanisaidia kusaidia watu wenye moyo mweupe waelewe kweli ya kihistoria kuhusu mashtaka hayo ya uwongo kutuhusu ambayo yanaenezwa.

A. F., Slovenia

Asanteni sana kwa makala hiyo. Miezi michache iliyopita, mume wangu, ambaye hashiriki imani moja na mimi, aliona habari fulani isiyojenga iliyochapishwa na waasi-imani. Nashukuru sana kwa makala hiyo ambayo hutoa jibu kwa uwongo kama huo.

C. G., Ujerumani

Kuwatazama Ndege Mimi ni msichana mwenye umri wa miaka saba. Niliipenda makala “Kuwatazama Ndege—Je, Kwavutia Kila Mtu?” (Julai 8, 1998) Picha na maelezo yalinisaidia kwelikweli kuona kwamba Yehova aliumba ulimwengu kwa njia ya ajabu. Mnyama niliyempenda zaidi alikuwa taji mweusi wa Afrika—kwa sababu ya sura yake ya ajabu. Asanteni kwa utafiti mliofanya.

F. C., Italia