Krismasi​—Wakati wa Shangwe kwa Watu wa Mashariki

MITI mikubwa mno ya Krismasi, taa zenye kung’aa, beramu zenye rangi-rangi​—vinaonekana katika kila sehemu ya maduka madogo na maduka makubwa-makubwa. Sauti za nyimbo za Krismasi zinasikika zikilia kutoka katika vikuza sauti, na matangazo yanawatia moyo watu wanunue zaidi. Wanaume na wanawake wakiwa wamevalia mavazi ya Baba-Krismasi wanatembea katika barabara wakitoa zawadi katika njia ya kusaidia. Je! hii ni tamasha katika nchi ya “Kikristo” tu? La, ni katika Japani, ambamo chini ya asilimia 1 ya idadi ya watu wanadai kuwa Wakristo.

Vivyo hivyo, katika kisiwa jirani cha Taiwani, “Wakristo” na watu wasio Wakristo wanasherehekea Krismasi pamoja na desturi yao ya kutoa zawadi. Na katika jamii za watu wa Kichina katika Malesia, baruti zinaongezea kimo kipya katika sherehe za sikukuu ya “Kikristo.”

Kwa sababu gani watu hawa wanasherehekea Krismasi? Je! wanaiamini Krismasi? Au je! wanaziamini shangwe za Krismasi? Ushuhuda unaonyesha kwamba “kula, unywe, na ufurahi” ndio ujumbe wanaopata kutokana na sherehe za Krismasi. Watu wengi wanazoea “Ukristo” Desemba 24 na 25 lakini wanarudia njia zao wenyewe​—Kibudha, Kishinto, Kitao, au yo yote​—siku ifuatayo. Ingawa hivyo, inawezekanaje watu wenye malezi mbalimbali ya kidini washiriki katika sikukuu ya “Kikristo”?

Mvulana mmoja mdogo wa Japani alipoulizwa kama yeye anaamini Baba-Krismasi, alijibu, ‘Ninamwamini Baba-Krismasi kwa kuwa alinipa michezo mingi.’ Jibu lake linaonyesha mawazo ya wengi katika Mashariki: ‘Uwe na akili zilizofunguka. Usiwe imara sana kuhusu dini. Ikiwa kuna jambo unaloweza kupata kutokana nayo, lifurahie. Lakini iweke mahali payo ili isiambukize sehemu nyingine za maisha yako.’

Njia hii ya kufikiri inaonekana wazi katika uchunguzi fulani uliofanywa na gazeti kuu la Kijapani. Ulizo moja lililoulizwa ni: “Katika Japani, ni jambo la kawaida mtu yule yule kushiriki sherehe mbalimbali za kidini kama vile omiyamairi [sherehe ya Kishinto ya kusherehekea ukuzi wa watoto], ohigan [desturi ya Kibudha inayofanywa mara mbili kwa mwaka kuwakumbuka wafu], na Krismasi. Je! wewe unafikiri jambo hilo ni baya?” Asilimia 19 peke yao walijibu “ni baya.” Hata kati ya wale wanaodai kuwa Wakristo, asilimia 60 walihisi kwamba hakuna jambo baya na kusherehekea karamu za dini mbalimbali.

Tabia hii inatokeza tukio la kidini lisilo na kifani​—wengi wanadai ni wafuasi wa dini zaidi ya moja. Kulingana na Uwakili wa Mambo ya Kilimo, jumla kuu ya watu wote wanaodai kuwa wafuasi wa vikundi vya kidini katika Japani ilikuwa 207,080,000 mwishoni mwa 1982, lakini idadi ya watu wa Japani iliyokadiriwa katika 1982 ilikuwa 118,600,000 tu. Jambo hili linamaanisha kwamba jumla ya washiriki wa dini katika Japani ilifikia asilimia 170 ya idadi kamili ya watu!

Huenda watu wenye tamaduni zinazoamini Mungu mmoja tu wakasema kwa sauti ya mshangao “Haiwezekani!” Lakini mashaka yale yale kuhusu mielekeo ya kidini yaenea katika njia ya kusherehekea Krismasi ya nchi za Magharibi pia. Hilo lingewezekana kuwaje hivyo? Na likiwa hivyo, je! lazima wewe usherehekee Krismasi?

[Picha katika ukurasa wa 3]

Jumla ya washiriki wa dini katiksa Japani: 207,080,000

Jumla ya idadi ya Wajapani: 118,800,000