Mungu Amekufanyia Nini Wewe?

‘HAKUNA!’ huenda wengine wakajibu hivyo. ‘Nalazimika kufanya kazi ngumu na kujitunza mwenyewe.’ Lakini ikiwa ndivyo unavyohisi, ebu fikiria tu kidogo. Ulipataje kuwapo?

Yapata miezi tisa kabla ya wewe kuzaliwa, vitu viwili vidogo sana vilivyo hai vilikutana ndani ya mama yako. Vikiwa pamoja vilifanyiza kitu kipya kingine kidogo sana kilicho hai, cha namna ya pekee sana.

Kile kikubwa zaidi cha vitu hivyo vidogo sana vilivyo hai kilikuwa yai, lililotolewa na mama yako. Kile kitu kidogo zaidi kilicho hai kilikuwa shahawa kutoka kwa baba yako—ambacho ni kidogo sana hivi kwamba, kulingana na kitabu The Experience of Childbirth cha Sheila Kitzinger, kama shahawa zote zilizotokeza watu wote walioko ulimwenguni zingelazwa sambamba, ‘zingeenea sehemu kubwa tu kidogo kuliko inchi moja [sentimeta 2.5].’ Lakini mara shahawa ya baba yako ilipopenya yai la mama yako, sheria za kupokeza urithi wa tabia zako zilianzishwa nayo mimba yako ikatungika!

Ndipo mifululizo ya ukuzi iliyo migumu sana kufahamika ikaanza. Ilikuwa yenye “kutatanisha sana hivi kwamba, baada ya zaidi ya karne moja ya uchunguzi, wanasayansi hata hawako karibu kuifumbua,” akaandika Andrea Dorfman katika Science Digest.

Kama mfano wa mifululizo ya ukuzi ambayo hutatanisha wanasayansi, mwandikaji uyo huyo anaeleza hivi: “Hali ya kuongoza ukuzi ni suala gumu kufahamika jinsi iyo hiyo. Mkono wa kushoto na kulia, kwa mfano, hukua bila kutegemeana hata kidogo kwa mafungu ya nyama yenye urefu wa milimeta moja, hata hivyo yanamalizika yakiwa na urefu unaolingana. Chembe zinajuaje wakati wa kuacha kuongezeka? . . . Inaelekea kila kiungo kina njia fulani ya ndani ya kuongozea ukuzi.” Je! sisi hatufurahi kwamba ndivyo ilivyo?

Kwa hiyo, ni nini kinachosababisha na kuongoza ukuzi katika vitu vyote vidogo sana vilivyo hai? Je! ni kani isiyo na akili inayoitwa asili? Je! Ni mfululizo usio na mpango unaoitwa mageuzi? Je! si wazi kwamba aina za uhai zenye kustaajabisha zilizo ngumu sana kufahamika, zilizo na utofautiano mkubwa mno, na zenye uzuri wa hali ya juu sana zilizo juu ya sayari hii yenye kupendeza sana zingeweza tu kuwa kazi ya Muumba mwenye nguvu zote? Ikiwa hivyo, je! haitupasi kuhisi tukiwa wenye shukrani sana kwa yale ambayo ametufanyia sisi?

Ushuhuda Usio na Mwisho wa Maajabu ya Uumbaji

Kila siku—hata kila saa—sisi tunanufaika na maajabu ya uumbaji. Kwa mfano, kunatukia nini tunapolala? Utendaji wa akili na wa misuli unajipunguza wenyewe. Hilo halifanyiki kwa hiari yetu wenyewe, kwa kuwa mara nyingi tunapatwa na usingizi bila kujua! Nao usingizi mzuri ni wenye kuburudisha kama nini! Wengine wanaweza kuendelea kwa majuma bila chakula, lakini wale wanaoendelea zaidi ya siku tatu bila usingizi wanaona ugumu mwingi kufikiri, kuona, na kusikia.

Baada ya wewe kuamka asubuhi, pengine mtu fulani anakuletea kahawa tamu. Sukari, ambayo wakati mmoja ilikuwa vigumu sana kuipata na ghali sana, sasa inapatikana kwa wingi sana hivi kwamba ni mara chache sana tunapoifikiria. Lakini inafanyizwaje? Inafanyizwa katika mimea kwa njia inayoitwa photosynthesis—kutendeana kwa nuru ya jua na maji na kaboni dayoksaidi. Wakati uo huo oksijeni, iliyo ya maana sana kwa viumbe hai duniani, inatolewa. Photosynthesis, ni njia iliyo ngumu sana kufahamika hivi kwamba ingali haijafahamika sana kabisa na wanasayansi. ‘Photosynthesis yenyewe inafanyizwaje?’ kinauliza kitabu The Plants. (Maktaba ya Uhai wa Asili) “Hiyo ni kama kuuliza jinsi uhai unavyoanza—sisi hatujui kabisa.”

Labda unapokunywa kahawa yako, unakumbuka programu ya televisheni ya siku iliyotangulia. Katika jicho la akili yako unaweza kuona tena tamasha hizo zenye kupendeza. Ziliingizwaje katika ubongo wako, zikawekwa akiba humo kama ukanda wa sinema, picha zikarudishwa hivi kwamba unaweza kuzieleza kwa wengine? Ni ajabu, sivyo? Mwanadamu alipataje akili ya kutimiza mambo hayo yote yenye kustaajabisha? Bila shaka si kutoka kwa wanyama. Je! ubongo wa binadamu haustaajabishi mno?

Basi, siku haijaanza bado. Hata hivyo ni mambo mengi mno kama nini tuliyo nayo tayari ya kumshukuria Muumba! Lakini kuna mengi zaidi sana!