Matangulizi ya Kuchochea Kupendezwa
1 Yesu alikuwa stadi katika kutumia matangulizi. Iwe alikuwa akisema na kikundi kikubwa ama na mtu mmoja, Yesu alinasa uangalifu wa wasikilizaji wake kwa kuwahusisha wao binafsi. Yeye alionyesha wasikilizaji wake thamani ya habari yake.—Mt 5:3-12; Lk. 20:25-37; Yn 4:7-30.
2 Matayarisho ya Mapema ni ya Lazima: Ili kuchochea kupendezwa katika ujumbe wetu, tunahitaji kutunga matangulizi yetu ili kwamba yahusishe mtu mmoja mmoja, yahusu mahangaiko yake, na yaonyeshe kwamba ujumbe wa Ufalme utamsaidia yeye binafsi.
3 Katika kujitayarisha kwa ajili ya huduma, pitia mahangaiko makubwa ya watu katika jumuiya. Je! habari fulani za hivi karibuni zimenasa uangalifu wa kila mtu? Ni nini kitakachompendeza kijana? Mtu mzee-mzee? Waume, wake, au wazazi? Badala ya kutumia utangulizi uleule kwenye kila mlango, mara nyingi kuna matokeo zaidi ukitayarisha matangulizi kadhaa tofauti-tofauti na uwe tayari kuyabadilisha unapoona itikio la wenye nyumba. Wahubiri wengine wamekuwa na mafanikio mengi katika kutayarisha na kutumia matangulizi mbalimbali kutoka kitabu Kutoa Sababu kila mara wanapoenda katika huduma ya nyumba kwa nyumba. (rs-SW kur. 9-15) Hilo hufanya maneno yao ya utangulizi yawe mapya na ya kupendeza.
4 Katika mwezi wa Agosti, huenda ukapenda kutumia utoaji kama huu:
◼ “Habari ya asubuhi. Tumekuwa tukizungumza na baadhi ya majirani wako kuhusu zile sifa ambazo wangependa mtu anayeongoza wengine awe nazo. Je! ni sifa gani moja au mbili unazofikiri kuwa za maana zaidi? [Ruhusu itikio. Shukuru kwa mambo anayosema. Kubaliana naye ikiwa inafaa.] Je! ulijua kwamba Biblia inaeleza sifa za Yule aliyekubaliwa kuwa mtawala wa wanadamu? Ni hapa katika Isaya 9:6, 7. [Soma.] Unafikiri ingekuwaje kuishi chini ya mtawala kama huyo?” Ruhusu itikio halafu uelekeze uangalifu kwenye Zaburi 146:3, 4 na habari katika kitabu Kutoa Sababu kwenye kurasa 281-2 kuhusu ubora unaohakikishwa wa utawala wa Yesu. Au kurasa 112 na 113 za kitabu Kuishi Milele zaweza kutumiwa kuchochea mazungumzo zaidi. Ikiwa kupendezwa kwa moyo mweupe kunaonyeshwa, huenda ukataka kutoa kichapo hicho.
5 Ikiwa unazungumza na watu wenye familia, utoaji ufuatao waweza kufanikiwa tunapotoa kitabu Kuishi Milele.
Baada ya salamu ya kawaida, huenda ukasema:
◼ “Je! umeona kwamba mikazo na matatizo ya kila siku huwa ni mambo magumu kwelikweli kwa familia leo? [Ruhusu ikitio.] Je! una mawazo yoyote kuhusu mahali ambapo familia zaweza kupata shauri lenye kufaa? [Ruhusu itikio.] Tumekuwa tukielekeza uangalifu kwenye yale ambayo Biblia husema kuhusu habari hiyo. Ona yale ambayo Mwanzilishi wa ndoa alisema kwa wanadamu wawili wa kwanza.” Soma Mwanzo 1:28 halafu ufungue ukurasa 238 wa kitabu Kuishi Milele na uendelee na mazungumzo, ukitumia habari zilizoteuliwa kutoka sura ya 29.
6 Kwa kuiga njia za Yesu za kunasa kupendezwa na kuwahusisha wasikilizaji katika mazungumzo, tunaonyesha wale wenye mioyo minyoofu thamani ya mambo ya kiroho.