Kutumia Kitabu Kuishi Milele Katika Ziara za Kurudia
1 Mtume Paulo alijua umaana wa kuwa mwenye bidii–nyendelevu katika kutunza wale walioonyesha kupendezwa na kweli. Yeye aliwafananisha na mimea miororo, inayohitaji kutiliwa maji na kusitawishwa kwa ukawaida. (1 Kor. 3:6-9) Vivyo hivyo leo, watu wanaopendezwa wanahitaji utunzi mwororo tunaowapa tunapofanya ziara za kurudia ili kusitawisha ukuzi wao wa kiroho.
2 Ni vema kukumbuka kwamba watu tunaowazuru watahitaji kukumbushwa mara nyingi ili kuwasaidia wakumbuke mambo tuliyozungumzia wakati uliopita. Kwa hiyo, kwenye kila ziara ya kurudia, huenda ikafaa kupitia kifupi yale uliyozungumzia kwenye ziara iliyopita, ukikazia hasa mambo yaliyompendeza mwenye nyumba. Husisha mwenye nyumba katika mazungumzo na uwe tayari kuona mambo yanayompendeza na yale anayohitaji.
3 Katika kufanya ziara za kurudia, iwe kitabu “Kuishi Milele” kiliangushwa au la, huenda ukapenda kutumia njia hii ya mazungumzo ya moja kwa moja ili kuanzisha funzo:
◼ “Watu wengi tunaozungumza nao wamepata majibu kwa maswali yao ya Biblia kwa kutumia kitabu hiki.” Halafu ukifungua katika sehemu ya yaliyomo katika kitabu Kuishi Milele, unaweza kuuliza: “Ni kichwa gani hapa kinachokupendeza zaidi?” Fungua sura iliyompendeza mwenye nyumba, na umwonyeshe jinsi mafungu yenye nambari yanavyopatana na maswali yaliyo chini ya kila ukurasa ili aweze kukaza akilini habari za maana zaidi kwa kila fungu. Pitia mambo machache tu na ufanye mipango hususa ya kurudi tena.
4 Njia nyingine ya kuanzisha mazungumzo yaweza kuwa:
◼ “Nilifurahia kwelikweli mazungumzo yetu ya juma lililopita. Watu wengi wametuuliza kwa nini sisi hurudia-rudia kuwahubiri watu. Mimi nafikiri maelezo yaliyo katika ukurasa 29 wa kitabu hiki, Unaweza Kuishi Milele Katika Paradiso Duniani, yanaweza kukupendeza. [Soma fungu 11.] Kwa kutegemea yale tunayosoma hapa, ungeweza kusema ni nini kinachohitajiwa ili ibada yetu ikubalike kwa Mungu? [Ruhusu itikio halafu umpongeze mwenye nyumba.] Huko nyuma katika siku za Yesu, kulikuwako wale waliofikiri kwamba dini yao ilikubalika kwa Mungu. Ona yale yaliyosemwa kuwahusu katika fungu 2 la sura hii.” Soma na ueleze habari hiyo.
5 Kufuatia ziara ya wakati uliopita ambapo kitabu “Kuishi Milele” kiliangushwa, unaweza kusema:
◼ “Nilipozuru wakati uliopita, tulizungumzia hali za ulimwengu zinazohitaji kubadilishwa. Je! umepata kujiuliza kwa nini Mungu huruhusu uovu uwepo?” Ruhusu itikio na ufungue ukurasa 99, fungu la 2, na usome maswali ya somo. Soma na uzungumzie fungu hilo, ukisoma maandiko pia. Unaweza pia kutumia vielezi vilivyoteuliwa katika kitabu hicho, kwa mfano, kurasa 78, 84-5, 119, 147, 149-53, na 156-8.
6 Mahali Ambapo Trakti Iliachwa: Wakati mwingine trakti huachwa katika ziara ya kwanza. Katika kufanya ziara za kurudia, unaweza kuzungumzia fungu moja au mawili katika trakti pamoja na maandiko yaliyotajwa. Halafu uonyeshe jinsi mojawapo andiko lililotajwa katika trakti limezungumziwa kwa kina kirefu katika kitabu Kuishi Milele. Ikiwa mtu huyo aonyesha kupendezwa, huenda ukataka kutoa kitabu Kuishi Milele na kufanya mipango ya kuendelea na mazungumzo katika ziara inayofuata.
7 Tunapotilia maji mimea miororo ya imani ya Kikristo iliyo katika utunzi wetu wa uaminifu, Mungu ataifanya ikue kwa sifa na utukufu wake mwenyewe.—1 Kor. 3:7.