Watu Wasipopatikana Nyumbani
1 Katika maeneo mengi inazidi kuwa vigumu kuwakuta watu nyumbani. Katika hizi “nyakati za hatari,” watu wengi wanalazimika kufanya kazi kwa saa nyingi ili kupata riziki. (2 Tim. 3:1) Wengine hawapatikani nyumbani kwa kuwa wameenda kwenye tafrija au wameenda kutumia pesa zao kwa njia nyingine. Tunaweza kuwafikiaje watu hao tukiwa na habari njema?
2 Weka Rekodi Nzuri: Hatua ya kwanza ni kuandika nyumba ambazo hatukumkuta mtu. Kuandika ni muhimu hasa ikiwa eneo lenu huhubiriwa mara nyingi. Je, wewe huandika jina la barabara, namba ya eneo, jina lako, na tarehe? Unaweza kuacha nafasi ya kuandika habari za ziada unaporudi au mhubiri mwingine anaporudi kuhubiri katika nyumba ambazo watu hawakupatikana. Kipindi cha mahubiri kinapokwisha, kumbuka kumpa yule aliye na kadi ya eneo hilo habari ulizoandika, isipokuwa tu akikuruhusu urudi tena kuhubiri kwenye nyumba ambazo hamkuwakuta watu. Ikiwa ulimkuta mtu anayependezwa ambaye ungependa kumrudia, tumia karatasi tofauti kuandika kilichomfanya apendezwe.
3 Jaribu Wakati Tofauti: Watu ambao huwakuti nyumbani wakati wa kazi wanaweza kupatikana jioni au mwisho wa juma. Je, unaweza kupanga ratiba yako urudi tena wakati unaofaa zaidi? (1 Kor. 10:24) Ikiwa huwezi, huenda ukaamua kumpa mhubiri mwingine rekodi ya watu ambao hawakupatikana nyumbani ili awarudie wakati tofauti. Au unaweza kuwaandikia barua wale ambao hukuwakuta nyumbani au ujaribu kuwasiliana nao kupitia simu. Huenda wahubiri ambao hawawezi kuhubiri sana nyumba kwa nyumba kwa sababu ya matatizo ya afya wakafurahi kukusaidia kufanya hivyo.
4 Mfano mmoja unaonyesha umuhimu wa kuwasiliana na wale ambao hawapatikani nyumbani. Baada ya wahubiri kurudi mara nyingi kwenye nyumba moja kwa miaka mitatu, mwishowe walimkuta mwenye nyumba. Kumbe alikuwa akisubiri muda wote huo Shahidi amtembelee na kuendeleza funzo la Biblia ambalo alikuwa nalo kabla ya kuhamia eneo hilo.
5 Kamilisha Eneo: Ni wakati gani eneo linaweza kusemwa kuwa limekamilishwa? Kwa kawaida, ni wakati ambapo jitihada za kadiri fulani zimefanywa ili kuwasiliana na mtu fulani katika kila nyumba. Huenda ikafaa kuacha trakti au gazeti la zamani kwa busara kwenye nyumba ambazo hakuna mtu anayepatikana, hasa katika maeneo ambayo hayahubiriwi mara nyingi. Eneo linapaswa kukamilishwa katika muda wa miezi minne. Kisha linapaswa kurudishwa ili mtumishi wa maeneo aboreshe rekodi zake.
6 Tunataka watu wengi iwezekanavyo wapate nafasi ya kujifunza kuliitia jina la Yehova na kuokolewa. (Rom. 10:13, 14) Hilo linatia ndani wale ambao hatuwakuti nyumbani tunapohubiri nyumba kwa nyumba. Kama mtume Paulo, fanya iwe tamaa yako “kutoa ushahidi kamili kuhusu habari njema ya fadhili zisizostahiliwa za Mungu.”—Mdo. 20:24.
[Maswali ya Funzo]
1. Ni hali gani ngumu ambayo sisi hukabili tunaposhiriki huduma ya nyumba kwa nyumba?
2. Tunaweza kuhakikishaje nyumba ambazo hatuwakuti watu zinashughulikiwa vizuri?
3. Kuna mapendekezo gani ya kuwafikia wale ambao hatuwakuti nyumbani?
4. Ni nini kinachoonyesha umuhimu wa kurudi tena katika nyumba ambazo watu hawakupatikana?
5. Ni wakati gani inaweza kusemwa kwamba eneo limekamilika?
6. Kwa nini tunapaswa kujaribu kumfikia kila mtu katika eneo letu tukiwa na habari njema?