Tumia Tovuti ya jw.org/sw Katika Huduma—“Uwe Rafiki ya Yehova”

Sehemu ya “Mafundisho ya Biblia” katika Tovuti ya jw.org/sw ina kipengele kwa ajili ya watoto kinachoitwa “Uwe Rafiki ya Yehova” chenye nyimbo, video, na mazoezi. Je, umetumia kipengele hicho katika huduma yako? Ikiwa unajifunza Biblia na mzazi mwenye watoto wadogo, kwa nini usimwonyeshe kipengele hicho? Kufanya hivyo kunaweza kumchochea achunguze sehemu nyingine za Tovuti yetu.

Alipokuwa akisambaza trakti Habari za Ufalme Na. 38, ndugu mmoja alikutana na mwanamke aliyeanza kusoma trakti hiyo mara tu baada ya kuipokea. Mwanamke huyo alikuwa na watoto kadhaa wadogo waliovutiwa na trakti hiyo. Ndugu huyo alizungumzia trakti hiyo kwa ufupi na kumwonyesha anwani ya Tovuti yetu iliyo nyuma ya trakti. Kwa kuwa mwanamke huyo alionyesha upendezi, ndugu alitumia kifaa chake cha mkononi kumwonyesha yeye na watoto wake mojawapo ya video za Caleb.

Dada mmoja alimwambia mfanyakazi mwenzake mwenye watoto wadogo kuhusu Tovuti yetu na habari zilizomo zinazohusu familia. Mwanamke huyo alifungua Tovuti ya jw.org akiwa pamoja na watoto wake. Baadaye alimwambia dada huyo kwamba watoto wake walipokuwa wakicheza nyumbani waliimba wimbo “Lihubiri Neno,” ambao unapatikana katika kipengele cha “Uwe Rafiki ya Yehova.”

Jitahidi ujue kipengele hicho kilicho kwenye Tovuti ya jw.org/sw, na upakue mojawapo ya video, nyimbo, au mazoezi katika simu yako ya mkononi au kifaa kingine. Kisha utakuwa tayari kutumia kipengele hicho katika huduma. Hicho ni kifaa chenye thamani kama nini kinachotusaidia kumtumikia Bwana!—Mdo. 20:19.