Kuboresha Ustadi Wetu Katika Huduma—Kusitawisha Upendezi wa Watu Wanaopokea Magazeti Yetu kwa Ukawaida

Kwa Nini Ni Muhimu: Watu wengi wanaosoma magazeti yetu hawapendi kujifunza Biblia pamoja nasi. Huenda wanazipenda sana dini zao, au wanahisi kwamba hawana muda wa kutosha ili kujifunza. Hata hivyo, wanaposoma magazeti yetu kwa ukawaida huenda wakakuza tamaa kuelekea Neno la Mungu. (1 Pet. 2:2) Huenda makala fulani zikawavutia, au hali zao zikabadilika. Kuwatembelea kwa ukawaida kutawafanya wastarehe zaidi na kutatusaidia kujua mambo wanayopenda na mambo yanayowahangaisha. Hatimaye, huenda tukaanzisha funzo la Biblia.

Jinsi ya Kufanya Hivyo:

Kila mwezi, panga kumpelekea kila mmoja magazeti ya karibuni ya Mnara wa Mlinzi na Amkeni! Unaweza kumtembelea wakati mwingine wowote ndani ya mwezi huo ili kumchochea asome makala fulani katika magazeti uliyomwachia, au kumpelekea chapisho lingine la mwezi. Tunza rekodi hizo vizuri.—Ona Huduma Yetu ya Ufalme ya Januari 2014, uku. 3.
Jitayarishe kwa ajili ya kila ziara. Badala ya kumwachia tu magazeti mwenye nyumba na kisha kuondoka, anzisha mazungumzo na ujaribu kujenga urafiki pamoja naye, kwa kufanya hivyo unaweza kusitawisha upendezi wake.
Uwe macho kutumia kila fursa unayopata ili kuanzisha funzo. Ikiwa mmoja kati ya wale unaowapelekea magazeti kwa ukawaida anakuuliza maoni ya Biblia kuhusu jambo fulani, mletee chapisho la funzo linalozungumzia jambo hilo, na mjadili pamoja. Kabla ya kuondoka, muulize swali mtakalozungumzia katika ziara itakayofuata. Ikiwa unafanya mazungumzo pamoja naye kwa ukawaida kwa kutumia Biblia au chapisho la funzo, hata ikiwa ni kwa muda mfupi, basi utakuwa unaongoza funzo la Biblia. Je, umempatia mwenye nyumba broshua Habari Njema na kumwonyesha kifupi jinsi anavyoweza kujifunza Biblia? Je, umemwonyesha video Kwa Nini Ujifunze Biblia? na Ni Nini Hutendeka Kwenye Funzo la Biblia? Ingawa mtu huyo hakukubali funzo la Biblia wakati uliopita, kumbuka kwamba hali hubadilika. Je, haingekuwa vizuri kwako kujaribu tena?

Jaribu Dokezo Hili kwa Mwezi Mzima:

Andika orodha ya watu utakaowapelekea magazeti kwa ukawaida. Wapelekee magazeti ya karibuni, na uwajulishe kwamba utawaletea magazeti ya mwezi ujao.