Shule Yenye Mafanikio Ambayo Ni ya Ulimwenguni Pote

HII si shule fulani ya kibinafsi ambayo ni ghali au chuo kikuu maarufu ambacho walioteuliwa wachache tu ndio wanaweza kuhudhuria. La, shule hii hufanywa bila malipo kwa wanafunzi wayo. Vipindi vya masomo yaelekea hufanywa mahali fulani karibu nawe. Yaitwa Shule ya Huduma ya Kitheokrasi, nayo hufanywa kwenye mahali pa mikutano ya Mashahidi wa Yehova. Watu wapatao milioni tano ulimwenguni pote huhudhuria shule hii.

Huenda ukajiuliza, ‘Ni nini matakwa ya kujiandikisha? Ni nini hufunzwa katika hiyo shule? Hiyo hufanywaje? Na watu wamefaidikaje kutokana nayo?’

Matakwa

Ingawa watu wote wanakaribishwa kuhudhuria Shule ya Huduma ya Kitheokrasi, wale ambao wanajiandikisha lazima wajipatanishe na mafundisho ya kitabu kikuu cha hiyo shule, Biblia. Wanahitajika kuwa na maisha ambayo yanatimiza matakwa ya kimaadili ya Biblia. Hivyo wanafunzi hawawezi kuwa wanaishi maisha ya ukosefu wa adili. Hawawezi kuwa wezi, walevi, waasherati, watumiaji wa tumbaku, na kadhalika.—1 Wakorintho 6:9-11.

Shule nyingi leo zimetupilia mbali kanuni za uvaaji, lakini wanafunzi waliojiandikisha katika Shule ya Huduma ya Kitheokrasi wanatakiwa kuvalia kwa kiasi nguo zilizo nadhifu. (1 Timotheo 2:9, 10) Hakuna takwa la umri kwa shule hii. Watoto walio wachanga kufikia umri wa miaka minne au mitano ambao wanaweza kusoma wanajiandikisha na kwa ukawaida hushughulikia migawo, kama ilivyo na wanaume na wanawake walio katika umri wa miaka 90.

Muundo na Mfumo wa Elimu

Ili kuwezesha uhudhuriaji, kipindi chenye urefu wa muda wa dakika 45 cha Shule ya Huduma ya Kitheokrasi sikuzote hufanywa jioni moja katikati ya juma. Kufuatia maelezo mafupi ya kukaribisha ya mfunzi wa shule, msemaji wa kwanza jioni hiyo hutoa utoaji wa dakika 10 hadi 15 ukitegemea kimoja cha vitabu vya mafunzo vya shule. Kisha, kwa ukawaida yeye hufanya pitio pamoja na wasikilizaji la dakika tatu hadi tano la habari aliyozungumzia.

Halafu, mwalimu anayestahili hushughulikia mambo makuu ya mgawo wa usomaji wa Biblia kila juma, ambao kwa ujumla huwa sura mbili hadi nne katika Biblia. Dakika sita zaruhusiwa kwa ajili ya pitio hili. Wanafunzi ambao huenda sambamba na kazi hii ya shule ya kufanyia nyumbani ya kila juma kwa kipindi fulani cha wakati watakuwa wamesoma Biblia nzima.

Baada ya mambo makuu ya Biblia, toaji tatu za wanafunzi hutolewa, kila mmoja ukiwa na wakati uliowekwa wa dakika tano. Mmoja ni usomaji wa Biblia kutoka kwa sehemu ya mgawo wa kazi ya shule ya kufanyia nyumbani. Toaji zile nyinginezo mbili zategemea habari kutoka kitabu cha shule ambayo wanafunzi wote huhimizwa kusoma katika kutayarisha kwa ajili ya darasa. Baada ya mgawo wa kila mwanafunzi, mfunzi wa shule hutoa pongezi, na mara kwa mara, madokezo kwa ajili ya kufanya maendeleo.

Shauri la mfunzi wa shule hutoka kwenye kichapo Kiongozi cha Shule ya Huduma ya Kitheokrasi, ambacho kila mwanafunzi anatarajiwa kukisoma kwa uangalifu. Ili kufanyia maendeleo sifa hususa ya usemi kwa ajili ya mgawo wake unaofuata, mwanafunzi huenda akaulizwa kupitia sura fulani kutoka kitabu cha kiongozi, kama vile “Uhusiano na Wasikilizaji na Matumizi ya Habari,” “Mifano Inayofaa,” “Matumizi ya Kurudia na Ishara za Mwili,” na “Kukazia Maana na Ubadilifu wa Sauti.”

Katika jamii nyinginezo Shule ya Huduma ya Kitheokrasi imeongezewa darasa la kujifunza kusoma na kuandika na kufanyia maendeleo usomaji. Makumi ya maelfu yamejifunza kusoma au kufanyia maendeleo usomaji wao katika madarasa kama hayo ya kujifunza kusoma na kuandika. Kwa kielelezo, katika Mexico kati ya mwaka wa 1946 na 1994, zaidi ya watu 127,000 walisaidiwa kujifunza kusoma na kuandika.

Yasaidia Mamilioni

Kotekote ulimwenguni Shule ya Huduma ya Kitheokrasi inaunga mkono jitihada za kimzazi za kuandaa elimu nzuri kwa watoto. Moriah mwenye umri wa miaka 16 alisema hivi: “Nilijifunza kutafiti habari na kufanyia mazoezi toaji zangu. Sasa kila mgawo ambao ninapata katika shule ya sekondari ni mswaki.”

Matthew mwenye umri wa miaka 15, aliyejiandikisha katika Shule ya Huduma akiwa na umri wa miaka saba, alionelea: “Nina faida kubwa kuliko wanarika wenzangu inapohusu mafanikio ya kielimu. Nimepata stadi za kujifunza na kusikiliza na uwezo wa kutoa hotuba kwa matokeo.” Ndugu yake mwenye umri wa miaka 17, Phil, aliongezea hivi: “Shule ya Huduma ya Kitheokrasi imenipa usadikisho zaidi. Najua kwamba nikipewa mgawo, ninaweza kuufanya.”

Shule ya Huduma ya Kitheokrasi pia imeelimisha watu wazima. Michael, aliyefikia miradi kama kutoa hotuba za usimamizi kazini, alieleza hivi: “Nilipojiunga na Shule ya Huduma nilikuwa mwenye woga kupita kiasi. Mimi si mwenye haya tena kamwe. Hiyo shule iliandaa mazingira mazuri, ule ujuzi, zile stadi, na kitia moyo cha kibinafsi nilichohitaji ili kushinda haya yangu.” Mzazi mmoja alionelea hivi: “Nahisi kwamba nimelipia fursa za kujifunza nilizozikosa nikiwa kijana.”

Katika kijiji kidogo cha Amerika ya Latini, washiriki wa Idara ya Elimu walihudhuria Shule ya Huduma ya Kitheokrasi. Baada ya kumsikiliza msemaji mwenyeji, mmoja wa wageni, aliye mkuu wa shule fulani, alipaaza sauti hivi: “Haiwezekani kwamba mwanamume huyu ambaye sikuzote tulimjua kuwa asiyeweza kusoma na kuandika anaweza kuzungumza katika Kihispania [badala ya lahaja ya wenyeji], achilia mbali kuweza kusema mbele ya wasikilizaji, lakini anafanya hivyo.”

Kwa kweli, Shule ya Huduma ya Kitheokrasi ni moja ya shule maridhawa kabisa ulimwenguni! Inaweza kusaidia vijana pamoja na wazee kupata elimu nzuri. Ni kama vile kijana mmoja alivyosema, “Ningependekeza kwamba yeyote anayefikiria kujiunga na hiyo shule ajiunge mara moja.”

[Picha katika ukurasa wa 13]

Shule ya Huduma ya Kitheokrasi yasaidia mamilioni ya watu kupata elimu nzuri