Simameni Mkiwa Kamili na kwa Usadikisho Imara

Washika Uaminifu-Maadili Walio Wajasiri Washinda Mnyanyaso wa Nazi

“MWANANGU, uwe na hekima na kunifurahisha moyo wangu; ili nipate kumjibu anilaumuye.” (Mithali 27:11) Ombi hilo changamfu laonyesha kwamba viumbe wa Mungu wenye akili wanaweza kuufurahisha moyo wa Yehova kwa sababu ni waaminifu-washikamanifu kwake. (Sefania 3:17) Hata hivyo, Shetani, aliye mdhihaki, ameazimia kuvunja uaminifu-maadili wa wale wanaomtumikia Yehova.—Ayubu 1:10, 11.

Tangu mwanzo wa karne ya 20 hasa wakati ambapo alivurumishwa kutoka mbinguni na kuja katika ujirani wa dunia, Shetani ameonyesha hasira kubwa sana kuelekea watu wa Yehova. (Ufunuo 12:10, 12) Hata hivyo, Wakristo wa kweli wamesimama “[wa]kiwa kamili na kwa usadikisho imara” na wameshika uaminifu-maadili kwa Mungu. (Wakolosai 4:12) Acheni tuchunguze kwa ufupi kielelezo kimoja chenye kutokeza cha uaminifu-maadili huo—Mashahidi wa Yehova nchini Ujerumani kabla na baada ya Vita ya Ulimwengu ya Pili.

Utendaji Wenye Bidii Wafanya Uaminifu-Maadili Ujaribiwe

Mnamo miaka ya 1920 na mwanzoni mwa miaka ya 1930, Bibelforscher, kama walivyoitwa Mashahidi wa Yehova wakati huo nchini Ujerumani, waligawanya vichapo vingi vinavyohusu Biblia. Kati ya mwaka wa 1919 na 1933, kwa wastani waliachia kila familia nchini Ujerumani vitabu, vijitabu, au magazeti manane.

Wakati huo, Ujerumani ndiyo iliyokuwa nchi yenye wafuasi watiwa-mafuta wa Kristo wengi zaidi. Kwa kweli, kati ya watu 83,941 ulimwenguni pote walioshiriki Mlo wa Jioni wa Bwana mwaka wa 1933, karibu asilimia 30 waliishi nchini Ujerumani. Baada ya muda mfupi, uaminifu-maadili wa Mashahidi hao Wajerumani ulijaribiwa vikali. (Ufunuo 12:17; 14:12) Visa vya kufukuzwa kazini, kuvamiwa nyumbani, na kufukuzwa shuleni viliongezeka upesi hadi kufikia kupigwa, kukamatwa, na kufungwa gerezani. (Picha ya 1) Basi, katika miaka iliyotangulia Vita ya Ulimwengu ya Pili, asilimia 5 hadi 10 ya watu wote waliofungwa katika kambi za mateso walikuwa Mashahidi wa Yehova.

Kwa Nini Wanazi Waliwanyanyasa Mashahidi?

Lakini, kwa nini serikali ya Nazi iliwaghadhibikia Mashahidi wa Yehova? Katika kitabu chake Hitler—1889-1936: Hubris, profesa wa historia Ian Kershaw asema kwamba Mashahidi walinyanyaswa kwa sababu walikataa “kujitoa kabisa kwa serikali ya Nazi.”

Kitabu Betrayal—German Churches and the Holocaust, kilichohaririwa na profesa wa historia Robert P. Ericksen na profesa wa kuchunguza mambo ya Wayahudi Sussanah Heschel, kilieleza kwamba Mashahidi “walikataa kushiriki jeuri au kutumia nguvu za kijeshi. . . . Mashahidi waliamini kutokuwamo katika siasa, jambo lililomaanisha kwamba hawangempigia Hitler kura wala saluti.” Jambo hilo liliwaghadhibisha Wanazi na kuwaletea Mashahidi madhara kwa sababu “Usoshalisti wa Kitaifa haungevumilia msimamo, wao” chaongezea kitabu hicho.

Ulimwengu Wote Wateta na Kwatokea Shambulizi Kali

Kupitia mjumbe maalumu Joseph F. Rutherford, aliyekuwa akisimamia kazi wakati huo, alimtumia Hitler barua Februari 9, 1934 ya kuteta dhidi ya hali ya kutovumilia ya Nazi. (Picha ya 2) Katika Oktoba 7, 1934, barua ya Rutherford ilifuatwa na barua na telegramu zipatazo 20,000 za kumlalamikia Hitler zilizotumwa na Mashahidi wa Yehova katika nchi 50, kutia ndani Ujerumani.

Wanazi waliitikia kwa kuzidisha mnyanyaso. Katika Aprili 1, 1935, Mashahidi walipigwa marufuku katika taifa zima. Na katika Agosti 28, 1936, Gestapo walianzisha shambulizi kali. Hata hivyo, Mashahidi “waliendelea kugawanya vijitabu na kudumisha imani yao katika hali nyingine,” chasema kichapo Betrayal—German Churches and the Holocaust.

Mathalani, Desemba 12, 1936, japo Gestapo walikuwa karibu kugundua utendaji wao, Mashahidi wapatao 3,500 waligawanya makumi ya maelfu ya nakala za azimio lililochapwa kuhusu jinsi ambavyo walikuwa wakitendwa vibaya. Kuhusu kampeni hiyo, gazeti Mnara wa Mlinzi liliripoti hivi: “Ulikuwa ushindi mkubwa na kuchomwa vikali kwa adui, jambo lililowaletea wafanyakazi waaminifu shangwe isiyoelezeka.”—Waroma 9:17.

Mnyanyaso Washindwa!

Serikali ya Nazi iliendelea kuwasaka Mashahidi wa Yehova. Kufikia mwaka wa 1939, elfu sita kati yao walikuwa wametiwa gerezani na maelfu wakapelekwa katika kambi za mateso. (Picha ya 3) Hali ilikuwaje mwishoni mwa Vita ya Ulimwengu ya Pili? Mashahidi wapatao 2,000 waliokuwa wametiwa gerezani walikufa, zaidi ya 250 kati yao kwa kuuawa. Hata hivyo, wakaandika Profesa Ericksen na Heschel, “Mashahidi wa Yehova walishika sana imani yao licha ya taabu.” Kwa sababu hiyo, serikali ya Hitler ilipoanguka, zaidi ya Mashahidi elfu moja walitoka kwenye kambi wakiwa washindi.—Picha ya 4; Matendo 5:38, 39; Waroma 8:35-37.

Ni nini kilichowapa watu wa Yehova nguvu za kuvumilia mnyanyaso? Mwokokaji mmoja wa kambi za mateso, Adolphe Arnold, alieleza hivi: “Hata unapoishiwa na nguvu kabisa, Yehova anakuona, anajua unayovumilia, na atakupa nguvu unazohitaji ili kushinda hali hiyo na kubaki ukiwa mwaminifu. Mkono wake si mfupi.”

Maneno ya nabii Sefania yanawafaa kama nini Wakristo hao waaminifu! Alitangaza hivi: “BWANA, Mungu wako, yu katikati yako shujaa awezaye kuokoa; atakushangilia kwa furaha kuu.” (Sefania 3:17) Waabudu wote wa Mungu wa kweli leo na waige imani ya Mashahidi hao waaminifu-washikamanifu waliodumisha uaminifumaadili licha ya mnyanyaso wa Nazi na vivyo hivyo kuufurahisha moyo wa Yehova.—Wafilipi 1:12-14.

[Hisani ya Picha katika ukurasa wa 8]

Państwowe Muzeum Oświȩcim-Brzezinka, courtesy of the USHMM Photo Archives