Hakikisha Umerudi!
1 “Hayo yalikuwa mazungumzo mazuri kwelikweli! Lazima nikumbuke kufanya ziara ya kurudia hapo.” Je, umepata kusema maneno hayo na baadaye ukasahau pale ambapo mtu huyo anaishi? Ikiwa ndivyo, wajua kwamba njia pekee ya kuhakikisha kwamba utarudi ni kuandika.
2 Andika Yote: Mazungumzo na mtu mwenye kupendezwa yanapokuwa yangali akilini mwako, tumia muda fulani kuandika habari yote kuhusu ziara hiyo. Andika jina la mtu huyo na jinsi utakavyomtambua. Andika mahali anapoishi, lakini usipakisie—paangalie ili uhakikishe kwamba unachoandika ni sahihi. Andika jambo mlilozungumzia, andiko lolote mlilosoma, na kichapo ulichoangusha.
3 Ikiwa ulimwuliza mtu huyo swali litakalojibiwa kwenye ziara inayofuata, liandike. Je, ulipata kujua jambo fulani kuhusu mtu huyo, familia yake, au dini yake? Ikiwa ndivyo, andika jambo hilo. Kisha wakati unaofuata utakapomtembelea, kulitaja kutaonyesha kwamba wapendezwa naye kibinafsi. Mwishowe, tia ndani siku na wakati ulipomtembelea mara ya kwanza na siku uliyosema utarudi. Kwa kuandika maandishi sahihi, utakuwa na vikumbusho vilivyo wazi nawe hutasahau ahadi yako ya kurudi.—1 Tim. 1:12.
4 Unapokamilisha maandishi yako, yaweke pamoja na vifaa vyako vya utumishi wa shambani—mfuko wa vitabu, Biblia, kitabu Kutoa Sababu, na vichapo mbalimbali—ili yawe rahisi kupatikana. Inafaa kuandika wasiokuwepo nyumbani katika rekodi ya nyumba kwa nyumba ambayo ni tofauti na ile ya ziara zako za kurudia. Bila shaka, mbali na kuweka maandishi sahihi ya ziara za kurudia, jambo muhimu ni kuhakikisha kwamba umerudi!
5 Mfikirie Mtu Huyo: Unapojitayarisha kwenda hudumani, chunguza maandishi yako ya ziara za kurudia. Fikiria kila mtu na mfikio ambao huenda ukawa bora zaidi unapomtembelea mara nyingine. Fikiria jinsi ya kuendeleza kupendezwa kwa mtu huyo na funzo la Biblia la nyumbani. Mpango huo waweza kuongeza matokeo yako ukiwa mhudumu wa habari njema, na hivyo, kuongeza shangwe yako binafsi.—Mit. 21:5a.
6 Kwa hiyo, mara nyingine ukipata mtu atakayekusikiliza, usifikiri kwamba unaweza kumkumbuka kwa urahisi. Badala yake, andika, chunguza maandishi yako, endelea kumfikiria mtu huyo, kisha hakikisha kwamba umerudi!