Je, Umetumia Ukurasa wa Nyuma?

Kwa kawaida watu wanapochukua gazeti, wanaliangalia kisha mara moja wanaligeuza na kuangalia ukurasa wa nyuma. Ukurasa wa nyuma wa toleo la watu wote la Mnara wa Mlinzi una maswali mengi na habari zenye kuchochea pamoja na kurasa zinazoonyesha mahali ambapo habari fulani inapatikana.

Maswali yaliyo katika sehemu hii yanaweza kutusaidia kuanzisha mazungumzo. Ikiwa tunahubiri eneo letu mara nyingi, tunaweza kubadili utangulizi wetu kwa kutumia maswali tofauti-tofauti mwezi wote. Ikiwa mwenye nyumba ana shughuli nyingi, tunaweza kufupisha utangulizi wetu kwa kumwonyesha swali katika ukurasa wa nyuma na kusema, “Ikiwa ungependa kupata jibu, ninaweza kukuachia magazeti haya halafu tutaongea mengi wakati mwingine utakapokuwa na nafasi.” Huenda wahubiri fulani wakaamua kuanza mazungumzo kwa kumwonyesha mwenye nyumba ukurasa wa nyuma na kumwomba achague swali linalompendeza. Kisha wanaweza kumwonyesha mahali ambapo jibu linapatikana na kusoma andiko walilokuwa wamechagua mapema. Unaweza kufikiria njia nyingine za kutumia ukurasa wa nyuma ili kuwachochea watu wapendezwe na gazeti la Mnara wa Mlinzi.