Kuboresha Ustadi Wetu Katika Huduma—Uwe Mwandamani Mzuri

Kwa Nini Ni Muhimu: Yesu alitambua umuhimu wa kuwa na mwandamani tunapohubiri. Kwa hiyo alipowatuma wanafunzi wake 70 kwenda kuhubiri, aliwapanga wawili-wawili. (Luka 10:1) Mwandamani anaweza kutoa msaada unaohitajika ikiwa yule anayehubiri naye anakabili hali ngumu au hana uhakika wa jinsi ya kumjibu mwenye nyumba. (Mhu. 4:9, 10) Anaweza kusimulia jinsi yeye hushughulikia hali kama hizo na pindi fulani kutoa dokezo ambalo litamsaidia yule anayehubiri pamoja naye awe mhubiri mwenye matokeo zaidi. (Met. 27:17) Pia, anaweza kumtia moyo kwa mazungumzo yenye kujenga kabla hawajafika kwenye nyumba nyingine.—Flp. 4:8.

Jinsi ya Kufanya Hivyo:

Sikiliza kwa makini mwandamani wako anapohubiri. (Yak. 1:19) Fungua Biblia yako ufuatane naye anaposoma andiko. Ukifanya hivyo utaweza kutoa msaada unapohitajika.
Tumia utambuzi ili kuamua ikiwa utatoa maelezo na wakati unaofaa wa kufanya hivyo. (Met. 25:11) Ikiwa unaandamana na mhubiri mwingine kwenye funzo la Biblia, maelezo unayotoa mara chache yatathaminiwa. Hata hivyo, unapohubiri nyumba kwa nyumba, ikiwa ni zamu ya mwandamani wako huenda akathamini ukimwacha azungumze. Iwapo yeye ni mhubiri mpya, au hana uhakika wa jinsi ya kujibu swali au kipingamizi, bila shaka atathamini sana msaada utakaotoa. Iwe unaandamana na mhubiri nyumba kwa nyumba, kwenye marudio, au funzo la Biblia, usimkatize na kuendeleza mazungumzo au kuanza kuzungumzia jambo tofauti.
Mweleze jinsi unavyoshughulika na hali kama hizo. Mara chache, ikiwa kuna uhitaji, usisite kumpa mhubiri uliyeandamana naye dokezo ili umsaidie awe mhubiri mwenye matokeo zaidi. (Met. 3:27) Inapofaa, unaweza kumwuliza hivi: “Ulionaje mazungumzo hayo?” au “Je, naweza kutoa dokezo?” au “Mimi hufanya hivi.” Kumbuka kwamba ingawa wengine huthamini madokezo pindi fulani, watavunjika moyo ikiwa wanarekebishwa kila wanapokosea.

Jaribu Dokezo Hili kwa Mwezi Mzima:

Baada ya utumishi, mweleze jambo hususa alilosema au kufanya ambalo limemfanya awe mwandamani mzuri.